1. ¿Tlake ueliskia panos kema tikinpouiliaj sekinok tlen tijyekojtiauij ipan Biblia?

¿TIKILNAMIKI kenijkatsa tijyolmatki kema tijyekok tlen melauak? Uelis nochi tlen mitsmachtiyayaj tikitayaya nelnelia eliyaya melauak, uan timoiljuiyaya nochi kinekiskiaj mitstlakakilisej. Nojkia timoiljuiyaya tlen Biblia tlamachtia kinpaleuiskia sekinok ma itstokaj ika pakilistli uan ma motemachikaj teipa kuali itstosej (Sal. 119:105). Yeka, ika miak pakilistli tikiniljuiyaya mouampoyouaj uan mochampoyouaj tlen tijyekojtiauiyaya. Uan, ¿kenijkatsa tijyolmatki kema tikitak amo kinejkej mitstlakakilisej?

2, 3. ¿Tlake moiljuiyayaj maseualmej tlen Jesús uan tlen tlamachtiyaya?

² Miakej maseualmej amo kinekij techtlakakilisej kema titlajtolmoyauaj. Kema Jesús itstoya ipan Tlaltipaktli kichijki miak uejueyi tlamantli, nopa kinextik Jehová kipaleuiyaya. Maske kiampa kichijki, miakej amo kinejkej kiselisej. Ma timoiljuikaj kema kiyolkuik Lázaro, maske katli tlayakanayayaj ipan religiones kiitakej tlen kichijki, inijuantij amo kinejkej kineltokasej tlaj Jesús eliyaya Mesías. Yeka, kinejkej kinmiktisej (Juan 11:47, 48, 53; 12:9-11).

³ Jesús kimatiyaya amo nochi kiseliskiaj kej Mesías (Juan 5:39-44). Yeka, kiniljuik katli eliyayaj itokilijkauaj Juan teAtsonpoliuiltijketl: “ToTeko kiteochiuas tlen kimachilis ajkeya naja uan nechtokilis” (Mat. 11:2, 3, 6). ¿Kenke miakej maseualmej amo kiselijkej Jesús?

4. ¿Tlake tikitasej ipan ni tlamachtili?

⁴ Ipan ni tlamachtili uan ipan tlamachtili 19, tikitasej kenke se keskij maseualmej tlen achtoui siglo amo kinejkej kiselisej Jesús. Nojkia, tikitasej kenke maseualmej amo kinekij  techtlakakilisej kema titlajtolmoyauaj uan tlake techpaleuis nojua kuali titlaneltokasej ipan Jesús uan amo tijtlauelkauasej.

5. ¿Kenke miakej maseualmej moiljuiyayaj Jesús amo eliyaya Mesías?

⁵ Miakej maseualmej amo kiseliyayaj Jesús pampa kimatiyayaj kanke euayaya. Maske kimatiyayaj kichiuayaya uejueyi tlamantli uan eliyaya se kuali tlamachtijketl, inijuantij san kiijtouayayaj eliyaya ikone se kuaxinketl. Uan nojkia pampa euayaya ipan Nazaret, se pilaltepetsi tlen amo ueyi. Yeka Natanael, katli teipa mochijki Cristo itokilijka, kiijtok: “Axaka tlen kuali uelis ualas tlen altepetl Nazaret” (Juan 1:46). ¿Kenke kiampa kiijtok? Uelis pampa moiljuiyaya nopa pilaltepetsi kampa Jesús euayaya amo tlauel kipatiitayayaj o pampa moiljuiyaya ipan tlen kiijtoua Miqueas 5:2, Mesías tlakatiskia ipan Belén uan amo ipan Nazaret.

6. ¿Tlake monekiyaya kichiuasej katli amo kineltokakej Jesús eliyaya Mesías?

⁶ Tlen Biblia kiijtoua. Tlajtolpanextijketl Isaías kiijtok ikualankaitakauaj Jesús, amo kinekiskiaj kimatisej sekinok tlamantli tlen Mesías (Is. 53:8). Miak tlamantli tlen panoskia eltoya ipan tlajtolpanextili. Tlaj ikualankaitakauaj kiitstoskiaj nopa tlajtolpanextili, kimatiskiaj Jesús nelia tlakatki ipan Belén uan elki se iteipaixui David (Luc. 2:4-7). Uan moaxitik tlen kiijtoua Miqueas 5:2, kampa kiijtoua kanke tlakatiskia Jesús. Uajka, ¿kenke amo kineltokakej? Pampa amo kimatiyayaj nochi tlamantli, uan kineltokakej san tlen inijuantij moiljuiyayaj. Yeka, amo kiselijkej Jesús uan kitlauelkajkej.

7. ¿Kenke miakej amo kinekij kintlakakilisej Jehová itlajtoltemakauaj?

⁷ Tlen nama pano. Miakej katli tijtekipanouaj Jehová amo titlatominpiaj. Yeka, miakej techitaj kej “tlakamej teikneltsitsij” o katli amo tlauel ixtlamatij (Hech. 4:13). Nojkia, kiijtouaj amo uelis titlamachtisej Biblia pampa amo tiajkej ipan uejueyi escuelas. Sekij kiijtouaj tlen tijneltokaj uala tlen Estados Unidos. Maske kiampa kiijtouaj nopa amo nelia pampa nopaya san itstokej se keskij toikniuaj. Sekij kiniljuijtokej tojuantij amo titlaneltokaj ipan Jesús. Uan panotok se keski xiuitl kiijtojtokej “tijchiuaj tlen Satanás kineki”, “san tikinxelouaj maseualmej” uan nojkia kiijtouaj “tijpatlatokej tlen Biblia nelnelia tlamachtia”. Katli kineltokaj nochi tlen kiijtouaj maseualmej uan amo tlatsintokaj tlen nelia pano, kinchikoitaj Jehová itlajtoltemakauaj uan amo kinekij kintlakakilisej.

8. Kej kiijtoua Hechos 17:11, ¿tlake ueliskia tijchiuas uan kiampa tijmatis ajkia nelnelia kitekipanouaj toTeotsij?

⁸ Tlen mitspaleuis amo tijtlauelkauas Jesús. Moneki tijtemosej tlen nelia panok. Lucas kichijki kampeka kitemos sekinok tlamachtili. Yeka, kema kiijkuilok amochtli Lucas “kiitak nochi tlen panok [...] uan kejatsa panotiajki”, kiampa katli kipouaskiaj nopa amochtli kiitaskiaj nelia panok tlen kikaktoyaj tlen Jesús (Luc. 1:1-4). Katli itstoyaj ipan Berea nojkia kiampa kichiuayayaj. Kema achtoui kinkamanaljuikej tlen Jesús, inijuantij “mojmostla kitemouayayaj ipan iTlajtol toTeko para kimatisej tlaj melauak” (xijpoua Hechos 17:11). Yeka, nojkia xijtemo sekinok tlamachtili. Kuali xikita tlen kineltokaj Jehová itlajtoltemakauaj, tlen Biblia tlamachtia uan nojkia xikita tlen kichijtokej. Tlaj tijtemos sekinok tlamachtili, mitspaleuis amo tijneltokas tlen maseualmej kiijtojtinemij. Nojkia, tlaj kiampa tijchiuas amo tikinchikoitas Jehová itlajtoltemakauaj.

9. ¿Tlake panok kema Jesús amo kinejki kichiuas “se tlaneskayotl tlen iluikak”?

⁹ Kema Jesús itstoya ipan Tlaltipaktli, maske tlauel kuali kej tlamachtiyaya, maseualmej nojua kinekiyayaj ma kichiua sekinok tlamantli. Kiiljuijkej “ma kichiua se tlaneskayotl tlen iluikak”, kiampa kiitaskiaj tlaj nelia eliyaya Mesías (Mat. 16:1). Uelis kiampa kiiljuijkej pampa amo kikuamachiliyayaj tlen kiijtoua ipan Daniel 7:13, 14. Maske kiampa kichijkej, Jehová ayamo kinekiyaya ma moaxiti nopa tlajtolpanextili. Tlen Jesús tlamachtiyaya monekiyaya kinpaleuis ma kimatikaj ya eliyaya Mesías. Jesús amo kichijki tlen kiiljuijkej, yeka sekij kitlauelkajkej uan amo kiselijkej (Mat. 16:4).

10. ¿Kenijkatsa Jesús kichijki tlen Isaías kiijtok?

¹⁰ Tlen Biblia kiijtoua. Isaías kiijtok tlen Mesías: “Axtsajtsis, niyon axkamatis chikauak. Axkikakisej itos tlamiakapa ipan calles” (Is. 42:1, 2). Kema Jesús tlajtolmoyajki amo kichijki pampa kinekiyaya ma kiuejkapantlalikaj. Uan amo kichijchijki uejueyi teokali, amo moyoyontiyaya ika uejueueyak yoyomitl uan amo kinchiualtik sekinok ma kitokaxtikaj ika tokajyotl tlen tlauel pankisa. Uan kema kitlajtolsenkauayayaj amo kichijki uejueyi tlamantli iixpa Herodes, uan kiampa ayokmo kitlatsakuiltiskiaj (Luc. 23:8-11). Uan maske kema tlajtolmoyauayaya kichijki uejueyi tlamantli, ya san mosentlalik kimoyauas nopa kuali tlamachtili. Yeka, kiniljuik itokilijkauaj: “Pampa yeka niualajtok” (Mar. 1:38).

11. ¿Tlake tlamantli tlen amo kinamiki kineltokaj se keskij maseualmej?

¹¹ Tlen nama pano. Miakej maseualmej mosentlachiliaj kema kiitaj nopa uejueyi iglesias uan tlen eltok nopaya kichijchijtokej ika tlamantli tlen tlauel pajpatiyo. Nojkia mosentlachiliaj kema katli tlayakanaj ipan religiones kinixmatij ika tokajyotl tlen tlauel pankisa, maske miakej tlamachtiaj tlen maseualmej kineltokaj. Katli nopaya mosentiliaj amo kiyekouaj miak tlamachtili tlen toTeotsij yon tlen mosentlalijtok  kichiuas. Uan katli mosentiliaj ininuaya Jehová itlajtoltemakauaj kiyekouaj tlen toTeotsij kipaktia uan kenijkatsa kineki ma kitekipanokaj. Ipan nopa kali kampa timosentiliaj amo uejueyi, amo tlauel pajpatiyo uan amo tlasokiyo. Nojkia, katli tlamachtiaj amo kitekiuiaj yoyomitl tlen kinextia inijuantij tlayakanaj yon kitekiuiaj tokajyotl tlen tlauel pankisa. Nochi tlen kineltokaj uan tlen tlamachtiaj kisa ipan Biblia. Maske kiampa tlamachtiaj, miakej maseualmej amo kiseliaj pampa amo ya nopa kinekij kikakisej uan kiijtouaj kiampa amo kinamiki tijueyichiuasej toTeotsij. Inijuantij kinekij kikakisej san tlen inijuantij kinpaktia.

12. Kej kiijtoua Hebreos 11:1, 6, ¿tlake kipaleuis se akajya kuali ma tlaneltoka?

¹² Tlen mitspaleuis amo tijtlauelkauas Jesús. Apóstol Pablo kiniljuik toikniuaj tlen Roma: “Nochi tlen kineltokaj iTlajtol toTeko, kineltokaj pampa kikaktokej” (Rom. 10:17). Tlaj se akajya kineki kuali tlaneltokas moneki kuali momachtis Biblia uan amo iljuichiuas kej maseualmej momajtokej kichiuaj maske nesiskia tlauel yejyektsi. Moneki kuali tlaneltokas uan kuali kiixmatis toTeotsij pampa tlaj “amo tlaneltokas amo uelis kichiuas tlen toTeotsij kipaktia” (xijpoua Hebreos 11:1; 11:6, TNM). Se akajya amo moneki kiitas uejueyi tlamantli uan kiampa kuali tlaneltokas, tlaj nochipa momachtia Biblia kipaleuis nojua kuali ma tlaneltoka uan ma motemachi ipan tlen kiyekojtia.

13. ¿Kenke miakej maseualmej kitlateljuijkej Jesús?

¹³ Kema Jesús itstoya ipan Tlaltipaktli, itokilijkauaj Juan teAtsonpoliuiltijketl amo kuali kiitayayaj pampa Jesús itokilijkauaj amo mosauayayaj. Jesús kinixtomilik amo kinamikiyaya kiampa kichiuasej pampa ya nojua itstoya ininuaya (Mat. 9:14-17). Maske kiampa kichijki, fariseos uan ikualankaitakauaj kitlateljuijkej pampa amo kichiuayaya tlen inijuantij momajtoyaj kichiuaj, uan tlauel kualankej kema  kinchikajki maseualmej ipan tonali sábado (Mar. 3:1-6; Juan 9:16). Nopa fariseos moueyimatiyayaj pampa moiljuiyayaj inijuantij kitlepanitayayaj nopa tlanauatili tlen sábado uan nojkia ueliskiaj tlanamakasej ipan teokali. Uan nojua tlauel kualankej kema Jesús kiniljuik amo kuali tlen kichiuayayaj (Mat. 21:12, 13, 15). Kema Jesús tlamachtik ipan sinagoga, katli kitlakakilijtoyaj tlauel kualankej pampa kiijtok eliyayaj kej israeleuanij katli moueyimatiyayaj uan amo kuali tlaneltokayayaj (Luc. 4:16, 25-30). Miakej amo kiselijkej Jesús pampa amo kichijki tlen inijuantij kiiljuijkej ma kichiua (Mat. 11:16-19).

14. ¿Kenke Jesús kiijtok amo kuali tlen kichiuayayaj maseualmej pampa amo tlamachtiyayaj tlen Biblia kiijtoua?

¹⁴ Tlen Biblia kiijtoua. Jehová kitekiuik itlajtolpanextijka Isaías uan kiijtok: “Ni tlakamej kiijtouaj para noaxkauaj uan yajuantij nechueyimatij ika ininkamak, pero ininyolo eltok uejka tlen na. Uan kema nechueyichiuaj san kitekiuiaj tlanauatili uan tlajtoli tlen tlakamej kinmachtijtokej” (Is. 29:13). Tlauel kuali pampa Jesús kiniljuik amo kuali tlen kichiuayayaj pampa inijuantij amo tlamachtiyayaj tlen Biblia kiijtoua. Nochi katli tlamachtiyayaj tlen maseualmej kineltokaj uan amo tlen Biblia tlamachtia, kitlauelkajkej Jehová uan Mesías.

15. ¿Tlake tlamantli tlen kichiuaj Jehová itlajtoltemakauaj amo kinpaktia maseualmej?

¹⁵ Tlen nama pano. Miakej maseualmej tlauel techkualankaitaj pampa tijchiuaj tlen Biblia tlamachtia, uan yeka amo tiiljuichiuaj ipan Navidad yon kema tikaxitiaj toxiui. Sekij techkualankaitaj pampa amo tijtlajpalouaj bandera yon amo tijchiuaj tlen maseualmej momajtokej kichiuaj kema se akajya miki. Uelis moiljuiaj Jehová kuali kiita tlen kichiuaj uan ya kiselia nochi nopa tlamantli. Tlaj amo moyakanaj ika tlen Biblia tlamachtia uan kichiuaj tlen maseualmej momajtokej, Jehová amo kuali kinitas (Mar. 7:7-9).

16. Kej kiijtoua Salmo 119:97, 113, 163-165, ¿tlake moneki tijchiuasej uan tlake amo?

¹⁶ Tlen mitspaleuis amo tijtlauelkauas Jesús. Xijchiua kampeka nojua tijpatiitas Jehová itlanauatiljuaj (xijpoua Salmo 119:97, 113, 163-165). Tlaj tlauel tikiknelia Jehová, mitspaleuis amo tijchiuas tlen maseualmej momajtokej kichiuaj. Amo xijkaua yon se tlamantli ma mitstsakuili nojua tlauel tikiknelis Jehová.

17. ¿Tlake kinekiyayaj maseualmej ma kichiua Mesías?

¹⁷ Kema Jesús itstoya ipan Tlaltipaktli se keskij maseualmej kinekiyayaj nima ma tekichiua. Kinekiyayaj Mesías ma kinmakixti tlen tlanauatianij tlen Roma. Kema kinejkej kitekitlalisej ya amo kinejki kiampa kichiuas (Juan 6:14, 15). Sacerdotes uan sekinok moiljuiyayaj Jesús kintekipatlaskia romanos, uan nopa kichiuaskia ma kualanikaj uan ayokmo kinkauaskiaj ma tlamachtikaj. Miakej judíos ayokmo kineltokakej Jesús pampa tlauel motekipachojtoyaj ipan tlamantli tlen política.

18. ¿Tlake tlajtolpanextili tlen Mesías amo kineltokakej judíos?

¹⁸ Tlen Biblia kiijtoua. Maske tlajtolpanextianij kiijtojtoyaj Mesías tlateuiskia ipan se tlauilankayotl uan tlatlaniskia, sekij tlajtolpanextianij nojkia kiijtojkej achtoui monekiyaya mikis uan kiampa techmakixtiskia (Is. 53:9, 12). Uajka, ¿kenke judíos kichiayayaj Mesías ma kichiua sekinok tlamantli? Uelis pampa san mosentlalijkej ipan tlajtolpanextili kampa kiijtojtoya Jesús kitlamiltiskia ininkuesoljuaj  uan amo kiitayayaj sekinok tlajtolpanextili (Juan 6:26, 27).

19. ¿Kenke miakej amo kinekij techtlakakilisej?

¹⁹ Tlen nama pano. Miakej amo kinekij elisej Jesús itokilijkauaj pampa amo timokalakiaj ipan política. Maske maseualmej kiijtouaj moneki tijtlapejpenisej se tlanauatijketl, tijmatij tlaj kiampa tijchiuasej uajka tijnextiskiaj amo tijnekij ma technauati Jehová (1 Sam. 8:4-7). Nojkia, maseualmej kiijtouaj moneki tijchijchiuasej escuelas, kampa tepajtiaj uan kampa moyolpakiltisej. Nojkia amo kinekij techtlakakilisej pampa kiijtouaj san timosentlaliaj titlajtolmoyauasej uan amo tijchiuaj sekinok tlamantli tlen kinpaleuis ipan ni tonali.

20. Kej Jesús kiijtok ipan Mateo 7:21-23, ¿tlake tlamantli tlauel tijpatiitaj?

²⁰ Tlen mitspaleuis amo tijtlauelkauas Jesús (xijpoua Mateo 7:21-23). Ma tikilnamikikaj tlauel ipati tijchiuasej nopa tekitl tlen Jesús technauatik (Mat. 28:19, 20, TNM). Yeka, amo ma timokalakikaj ipan política yon ma timoiljuikaj uelis tijxitlauasej kuesoli ipan ni tonali. Tojuantij tlauel tikinikneliaj maseualmej uan techtekipachoua tlen kinpano, yeka tlauel tijpatiitaj tikiniljuisej tlen kichiuas toTeotsij iTlanauatijkayo uan tikinpaleuisej ma mouampojchiuakaj ika Jehová.

21. ¿Ipan tlake tlamantli moneki timosentlalisej?

²¹ Ipan ni tlamachtili tikitstokej naui tlamantli tlen kichijki maseualmej katli itstoyaj ipan achtoui siglo amo ma kitlakakilikaj Jesús uan ma kitlauelkauakaj. Nojkia tikitstokej kenke ipan ni tonali nojkia amo kinekij techtlakakilisej. Ipan tlamachtili 19, tikitasej sekinok naui tlamantli. Yeka, nochipa ma tijchiuakaj kampeka nojua kuali titlaneltokasej, uan amo ma tijkauakaj yon se tlamantli ma kichiua tijtlauelkauasej Jesús.