1, 2. ¿Tlake tlaouijkayotl kiixnamikij toikniuaj?

PABLO kiyolchikajki Timoteo uan nojkia sekinok Cristo itokilijkauaj nojua kuali ma tlatekipanokaj (2 Tim. 4:5). Maske nochi tijchiuaj kampeka kiampa tijchiuasej, kemantika tijmatij ouij. Miakej toikniuaj moneki kinextisej amo majmauij kema tlajtolmoyauaj (2 Tim. 4:2). Ma timoiljuikaj ipan altepemej kampa toikniuaj amo kinkauaj ma tlajtolmoyauakaj, nopaya uelis kinpanos tlen tlauel amo kuali kema tlajtolmoyauaj.

² Jehová itlajtoltemakauaj kiixnamikij miak tlaouijkayotl tlen ueliskia kichiuas ma motekipachokaj. Miakej moneki tekitisej miak horas uan san kinaxilia tlen ika kinpanoltisej ininchampoyouaj. Uan maske kinekiskiaj nojua tlauel tlajtolmoyauasej, ayokmo uelij kichiuaj tlen kinekiskiaj pampa tlauel siajtokej. Nojkia, sekij amo uelij kuali tlajtolmoyauaj pampa kipiaj se kokolistli tlen amo kipia pajtli o pampa ya ueuejtixtokej. Uan sekij tlauel moyolkokouaj pampa moiljuiaj amo uelij kichiuaj se keski tlamantli. Mary, * se tosiuaikni katli eua Oriente Medio, kiijtoua: “Nochipa nimoyolkokoua uan nopa kichiua ayokmo ma nijpia chikaualistli. Teipa, amo kuali nijyolmati pampa nimoiljuia ueltoskia nitlajtolmoyauas uan amo san nimoyolkuesojtos”.

3. ¿Tlake tikitasej ipan ni tlamachtili?

³ Maske tijpiaj miak tlaouijkayotl, Jehová techpaleuis nojua kuali tijtekipanosej, maske san tijchiuasej tlen tiuelij. Ipan ni tlamachtili tikitasej kenijkatsa Jehová techpaleuia. Achtoui ma tikitakaj kenijkatsa kinpaleuik Pablo uan Timoteo maske kipixtoyaj miak tlaouijkayotl.

4. ¿Tlake tlaouijkayotl kiixnamijki Pablo?

⁴ Pablo kiixnamijki miak tlaouijkayotl tlen tlauel ouij. Monejki kipias chikaualistli kema kiuijuitejkej, kitetemijkej o kitepachojkej uan nojkia kema kitsajkej (2 Cor. 11:23-25). Ya nochipa kiijtok kema amo kuali kiyolmatiyaya (Rom. 7:18, 19, 24). Uan nojkia ika nochi iyolo kiiljuik Jehová ma kikixtili nopa uitstli tlen kitlaijiyouiltiyaya (2 Cor. 12:7, 8).

5. ¿Tlake kichijki Pablo maske kiixnamijki tlaouijkayotl?

⁵ Jehová kimakak Pablo chikaualistli uan kiampa nojua tlajtolmoyajki maske kiixnamijki miak tlaouijkayotl. Ma tikilnamikikaj nochi tlen kichijki kema tsaktoya ichaj ipan Roma: kimoyajki nopa kuali tlamachtili ininixpa katli tlayakanayayaj ipan religión judía uan uelis ininixpa tekichiuanij (Hech. 28:17; Filip. 4:21, 22). Nojkia katli tlamokuitlauiyayaj uan katli kipaxalouayayaj (Hech. 28:30, 31; Filip. 1:13). Uan ipan nopa tonali, Jehová kitekiuik Pablo ma kiijkuilo se keski amatlajkuiloli tlen kinpaleuik toikniuaj katli itstoyaj uejkajkia, uan ipan ni tonali nojua techpaleuia. Uan nochi tlen Pablo kichijki kinpaleuik uan kinyolchikajki toikniuaj tlen Roma, uan yeka ‘achi más mosemakakej ipan toTeko’ (Filip. 1:14). Maske Pablo amo uelki kichiua nochi tlen kinektoskia kichiuas, ya nochipa kichijki tlen uelki. Nochi tlaouijkayotl tlen kipanok kipaleuik ma kimoyaua nopa kuali tlamachtili (Filip. 1:12).

6. Kej kiijtoua 2 Corintios 12:9, 10, ¿tlake kipaleuik Pablo nojua ma tlajtolmoyaua?

⁶ Pablo kimatiyaya toTeotsij itonal kipaleuiyaya ma kichiua se keski tlamantli uan amo pampa ya ueliyaya kichiua. Yeka, kiijtok ichikaualis Jehová “achi más mopannextia kema se tlakatl axkipia fuerza” (xijpoua 2 Corintios 12:9; 12:10, TNM). * Jehová kipaleuik Pablo ika itonal, uan kiampa uelki nojua tlajtolmoyaua maske kitlaijiyouiltiyayaj, kitsajkej uan kiixnamijki sekinok kuesoli.

7. ¿Tlake kuesoli kiixnamijki Timoteo?

 ⁷ Timoteo nojkia monejki kitemos Jehová itlapaleuil uan kiampa nojua tlajtolmoyajki. Ma timoiljuikaj kema ya uan Pablo yajkej uejka kinpaxalotoj toikniuaj, nojkia Pablo kititlanki ma kinpaxaloti uan ma kinyolchikauati toikniuaj ipan sekinok tlanechikolmej (1 Cor. 4:17). Uelis Timoteo moiljuiyaya amo ueliskia kichiuas nopa tekitl, uan yeka uelis Pablo kiiljuik: “Ma axaka kiijto axmoneki mitstlakakilis pampa noja titelpokatlakatl” (1 Tim. 4:12). Nojkia, Biblia kiijtoua ipan nopa tonali Timoteo nochipa kikokouayaya iijti (1 Tim. 5:23). Maske kiampa kipanoyaya, kimatiyaya Jehová kipaleuiskia uan kiampa nojua kimoyauaskia nopa kuali tlamachtili uan nojua kinpaleuiskia toikniuaj (2 Tim. 1:7).

8. ¿Kenijkatsa Jehová techyolchikaua ipan ni tonali?

⁸ Ipan ni tonali Jehová techmaka “nopa ueyi chikaualistli” uan kiampa nojua titlatekipanojtosej (2 Cor. 4:7). Ma tikitakaj naui tlamantli tlen Jehová techmakatok uan nopa techpaleuis amo ma tijtlauelkauakaj: tlamaijtoli, Biblia, toikniuaj uan kema titlajtolmoyauaj.

9. ¿Kenijkatsa techpaleuia tlamaijtoli?

⁹ Tlamaijtoli. Ipan Efesios 6:18, Pablo kiijtok: “Ajachika [...] ximomaijtokaj ika toTeko”. Tlaj kiampa tijchiuaj Jehová techyolchikauas. Toikni Jonnie, katli eua Bolivia, kiijtok kenijkatsa kipaleuik Jehová kema kiixnamijki miak tlaouijkayotl. Isiua uan itatauaj tlauel mokokojkej. Yeka, tlauel ouij kimatki kinmokuitlauis. Teipa inana mijki, isiua uan itata ouij mochikajkej. Jonnie kiijtoua: “Kema tlauel nechtetsopayaya kuesoli, nikiljuiyaya Jehová tlen nelia nechpanoyaya”. Jehová kipaleuik ma kiijiyoui tlen kipanok. Nojkia, ipan nopa altepetl se ueuejtlakatl katli itoka Ronald, kiiljuijkej inana kipia cáncer uan san ipan se metstli mijki. ¿Tlake kipaleuik? Ya kiijtoua: “Tlamaijtoli nechpaleuia nikiljuis Jehová nochi tlen nijyolmati pampa san ya kena kikuamachilia tlen nechpano”. Uelis kemantika pampa tlauel timotekipachojtokej amo tijmatij tlake tikiljuisej Jehová kema timomaijtouaj. Maske kiampa tijyolmatij, Jehová kineki ma tikiljuikaj tlen techpano (Rom. 8:26, 27).

10. Kej kiijtoua Hebreos 4:12, ¿kenke tlauel ipati tijpouasej uan timoyoliljuisej tlen Biblia kiijtoua?

¹⁰ Biblia. Sanse kej Pablo, tojuantij nojkia ma tijpouakaj Biblia pampa nopa techyolchikauas uan techpaleuis (Rom. 15:4). Kema tijpouaj se texto uan timoyoliljuiaj tlen kiijtoua, Jehová uelis kitekiuis itonal uan kiampa techpaleuis tikitasej kenijkatsa tijchiuasej ipan tonemilis (xijpoua Hebreos 4:12). Ronald, katli tikijtojkej ipan párrafo 9, kiijtoua: “Niyolpaki pampa nimomatki nijpouas Biblia ika tlayoua. Tlauel nechpaleuik nimoyoliljuis ipan nopa kuajkuali tlamantli tlen Jehová kinextia uan kenijkatsa tlauel kiniknelia itekipanojkauaj”.

11. ¿Kenijkatsa Biblia kiyolchikajki se tosiuaikni katli tlaijiyouiyaya?

¹¹ Kema timoyoliljuiaj ipan tlen Biblia kiijtoua, techpaleuia tikitasej tokuesoljuaj kej kinamiki. Ma tikitakaj tlen kipanok se tosiuaikni katli mijki iueue. Se ueuejtlakatl kiiljuik ma kipoua amochtli Job uan nopa tlauel kipaleuiskia. Kema  kipouayaya, kipinajtik Job uan kejuak kiiljuik: “Job amo kinamiki kiampa timoiljuis”. Kema kiampa kichijki, kiitak ya nojkia moiljuiyaya tlen amo kinamiki. Tlauel kipaleuik ayokmo kiampa moiljuis uan kiijiyouis nopa kuesoli tlen kipixtoya.

12. ¿Kenijkatsa Jehová kintekiuia toikniuaj uan kiampa techyolchikauaj?

¹² Toikniuaj. Jehová nojkia techyolchikaua ika toikniuaj. Pablo kiijtok tlauel kinekiyaya kinitas toikniuaj uan kiampa sansejko moyolchikauaskiaj (Rom. 1:11, 12). Tosiuaikni Mary katli tikijtojkej ipan párrafo 2, tlauel kipaktia itstos ininuaya sekinok toikniuaj. Ya kiijtoua: “Jehová nechpaleuijtok ika toikniuaj katli amo kimatiyayaj tlen nechpanoyaya. Nechiljuijkej uan nechtlajkuiljuilijkej tlen tlauel nechyolchikajki. Nojkia tlauel nechpaleuia nikamanaltis ininuaya sekinok toikniuaj katli nojkia kiixnamiktokej nopa kuesoli, uan nijyekoua tlen inijuantij kichijkej. Ueuejtlakamej nochipa kichiuaj kuali ma nijyolmati ipan tlanechikoli”.

13. ¿Kenijkatsa uelis timoyolchikauasej ipan tlanechikoli?

¹³ Tlanechikoli techpaleuia sansejko timoyolchikauasej. Yeka, ma tikinyolchikauakaj toikniuaj, ma tikiniljuikaj tikinikneliaj uan ma tikintlaskamatikaj ika tlen kichiuaj. Se neskayotl, kema nechka peuaskia tlanechikoli, se ueuejtlakatl katli itoka Peter, kiiljuik se tosiuaikni katli iueue amo momachtia: “Tlauel techyolchikaua pampa nochipa timitsitaj ipan tlanechikoli. Nojkia nochipa tikinualika chikuasej mokoneuaj uan tikinpaleuia ma tlanankilikaj”. Tosiuaikni kinekiyaya mochokilis, yeka kitlaskamatilik uan kiiljuik: “Tlauel nechyolchikaua tlen tikijtok, ya nopa nijnekiyaya nijkakis”.

14. ¿Kenijkatsa techpaleuia kema titlajtolmoyauaj?

¹⁴ Kema titlajtolmoyauaj. Tlauel techyolchikaua kema titlajtolmoyauaj, maske kemantika maseualmej amo techtlakakiliaj (Prov. 11:25). Kiampa kiitak tosiuaikni Stacy. Kema se tlen ichampoyouaj kikixtijkej ipan tlanechikoli, tosiuaikni tlauel mokuesok uan nochipa moiljuiyaya tlaj ueltoskia kichiuas sekinok tlamantli uan kiampa kipaleuijtoskia. Amo ueliyaya moiljuia ipan sekinok tlamantli. Ya kiijtok tlauel kipaleuik kema tlajtolmoyauayaya pampa kiitak kenijkatsa kinpaleuis maseualmej. Tosiuaikni kiijtok: “Jehová nechpaleuik ma nijmachti se siuatl uan nima kipatlak inemilis. Nikitstok kema nitlajtolmoyaua tlauel nechpaleuia uan tlauel nechyolchikaua”.

15. ¿Tlake techmachtia tlen kiijtok Mary?

¹⁵ Kema tijpiaj se tlaouijkayotl uelis kichiuas ma timoiljuikaj amo ueli tlauel titlajtolmoyauaj. Maske kiampa tijyolmatisej, ma tikilnamikikaj Jehová tlauel yolpaki tlaj tijchiuaj kampeka titlatekipanosej. Mary, katli tikijtojkej ipan sekinok párrafos, kimatki amo tlauel tlapaleuiyaya kema pejki tlatekipanoua ipan se tlanechikoli kampa kamanaltij seyok tlajtoli. Ya kiijtok: “Achtoui san nitlanankiliyaya tlen amo ouij o san nijpouayaya se texto, uan kema nitlajtolmoyauayaya san nitemakayaya se pilamatsi”. Mary kiitayaya katli kuali kamanaltij nopa tlajtoli, ueliyayaj kichiuaj miak tlamantli uan ya amo. Teipa, kipatlak kej moiljuiyaya pampa kiitak Jehová uelis kitekiuis maske amo kuali kamanalti nopa tlajtoli. Uan nojkia kiijtok: “Tlen Biblia tlamachtia  ya nopa kinpaleuia maseualmej ma kipatlakaj ininnemilis”.

16. ¿Tlake uelis kinpaleuis katli amo uelij kisaj ininchaj?

¹⁶ Tlaj amo tiuelij tikisaj tochaj, Jehová kiita uan kipatiita kema titlajtolmoyauaj. Jehová uelis kichiuas ma tikinkamanaljuikaj katli techmokuitlauiaj o tepajtianij. Tlaj san timosentlaliaj ipan tlen tijchiuayayaj uejkajkia uan amo ipan tlen nama tijchiuaj, nopa amo techpaleuis. Uan tlaj tikitaj kenijkatsa Jehová techpaleuia ipan ni tonali, techpaleuis ma tijpiakaj chikaualistli, tikixnamikisej tlen techpano uan nojua tiyolpakisej.

17. Kej kiijtoua Eclesiastés 11:6, ¿kenke moneki nojua titlajtolmoyajtosej maske amo nima tikitaj kenijkatsa kinpaleuia maseualmej?

¹⁷ Amo tijmatij tlaj katli tikinkamanaljuiaj uelis asis ipan ininyolo tlen Biblia tlamachtia (xijpoua Eclesiastés 11:6). Se neskayotl, se tosiuaikni katli itoka Barbara uan kipia kipano 80 xiuitl, nochipa tlajtolmoyaua ika teléfono uan kichiua amatlajkuiloli. Ipan se tlen nopa amatlajkuiloli tlen kichijki kitlalik La Atalaya, marzo 1, 2014, tlen itoka “¿Qué ha hecho Dios por usted?”. Maske ya amo kimatiyaya ajkia kiseliskia nopa amatl, kiselijkej katli ayokmo kitekipanouayayaj Jehová. Nelnelia tlauel kinpaktik nopa amatlajkuiloli. Nopa toikni kimatki kejuak Jehová kamanaltiyaya iuaya. Uan maske ya panotoya 27 xiuitl ayokmo kitekipanojtoyaj Jehová, sampa pejkej kitekipanouaj uan sampa pejkej mosentiliaj. Barbara tlauel kipaleuik uan kiyolchikajki kema kimatki tlen kichijtoya. Nelnelia tlauel kinpaleuik nopa amatlajkuiloli tlen kititlanki.

18. ¿Tlake moneki tijchiuasej uan kiampa Jehová techpaleuis ma tijpiakaj chikaualistli?

¹⁸ Kej tikitstokej, Jehová techpaleuijtok ika miak tlamantli uan kiampa nojua tijpiaj chikaualistli. Yeka, kuali ma tijtekiuikaj tlen techmakatok: tlamaijtoli, Biblia, toikniuaj uan kema titlajtolmoyauaj. Tlaj kiampa tijchiuasej tijnextisej Jehová kineki techpaleuis uan kimati kenijkatsa kichiuas. Nochipa ma timotemachikaj Jehová kineki kinpaleuis itokilijkauaj katli “motemachiaj ipan ya ika nochi ininyolo” (2 Crón. 16:9).