¿Tijmajtoya?
¿Kitekiuiyayaj uejkajkia papiro kema kichijchiuayayaj barcos?
Papiro.
MIAKEJ maseualmej kimatij egipcios, griegos uan romanos, kitekiuiyayaj papiro kema tlajkuilouayayaj. * Maske nopa papiro kitekiuiyayaj kema tlajkuilouayayaj, nojkia kitekiuiyayaj kema kichijchiuayayaj barcos.
Omej barcos tlen kichijchijtoyaj ika papiro, uan kipantijkej ipan Egipto kampa kinkauayayaj katli miktokej.
Kipano 2,500 xiuitl, tlajtolpanextijketl Isaías kiijtok katli itstoyaj ipan Etiopía “kampa peua nopa atemitl Nilo”, kintitlankej “inintlayakankauaj tlen kisenkauaj tlajtoli para ma yakaj ipan nopa atemitl Nilo ipan miak kuakanaua [tlen papiro]”. Uan tlajtolpanextijketl Jeremías kiijtok kema medos uan persas kitsontlamiltiskiaj Babilonia, inijuantij kitlatiskiaj barcos tlen kichijchijtoyaj ika papiro, kiampa babiloniaeuanij amo choloskiaj (Is. 18:1, 2; Jer. 51:32).
Biblia nelnelia toTeotsij iTlajtol, yeka katli kipouaj amo mosentlachiliaj kema ixtlamatinij kipantiaj se keski tlamantli tlen kinextia uejkajkia kitekiuiyayaj papiro tlen ika kichijchiuayayaj barcos (2 Tim. 3:16). Ma tikitakaj se keski tlamantli tlen kinextia kenijkatsa kichijchiuayayaj barcos ika papiro tlen kipantijtokej ipan Egipto.
¿KENIJKATSA KICHIJCHIUAYAYAJ BARCOS IKA PAPIRO?
Ipan Egipto, kampa kinkauayaya katli miktokej, kipantijtokej se keski tlaixkopinkayotl uan se keski tlamantli kampa nesi kenijkatsa kikuiyayaj papiro uan kenijkatsa kichijchiuayayaj barcos. Tlakamej kitsontekiyayaj papiro ikuayo uan kuali kiilpiyayaj ika tsontli uan teipa nojua kiilpiyayaj ika sekinok tsontli. Nopa papiro ikuayo ueliyaya motejtejpichoua uan motatakatsoua. Nopa amochtli A Companion to Ancient Egypt, kiijtoua iuexka nopa barcos tlen kichijchiuayayaj eliyaya kipano 17 metros, uan ueliyayaj kitlaliliaj 20 o 24 kuauitl tlen ika kinemiltiyayaj.
Se tlaixkopinkayotl kampa nesi kenijkatsa kichijchiuayayaj barcos ika papiro.
¿KENKE KICHIJCHIUAYAYAJ BARCOS IKA PAPIRO?
Ipan tlamayamitl Nilo tlauel onkayaya papiro, yeka amo ouij kichijchiuayayaj barcos. Maske maseualmej kichijchiuayayaj uejueyi barcos ika kuauitl, katli michtlajtlamayayaj uan katli tlapeuayayaj nojua kitekiuiyayaj atlapechtli uan barcos tlen pilsiltsitsij tlen kichijchijtoyaj ika papiro.
Nopa barcos tlen kichijchijtoyaj ika papiro, nojua tlauel motekiuik ipan miak xiuitl. Plutarco, se historiador griego, kiijtok ipan siglo 1 uan 2 y.u.J., maseualmej nojua kitekiuiyayaj atlapechtli tlen kichijchijtoyaj ika papiro.
^ párr. 3 Nopa papiro moskaltia kampa san momantok atl uan itejteno ueyatl. Moskaltia se makuili metros uan motomauilia se 15 centímetros.
