1. ¿Tlake tlamantli moneki kitlapejpenisej maseualmej?

 IPAN ni tonali nochi moneki kitlapejpenisej se tlamantli tlen tlauel ipati: kikauasej ma kinyakana toTeotsij iTlanauatijkayo o kipaleuisej Satanás, katli eli ikualankaitaka Jehová. Moneki kitlapejpenisej san se tlen ni tlamantli tlaj kinekij itstosej nochipa o amo (Mat. 25:31-33, 46). Kema mochiuas nopa “ueyi tlaijiyouilistli” toTeotsij itekipanojkauaj katli amo kitlauelkauasej, kipiasej se machiotl o se marca uan kiampa uelis momanauisej (Apoc. 7:14; Ezeq. 9:4, 6). Uan katli kipiasej nopa machiotl tlen nopa “fiero tlapiali” kintsontlamiltisej (Apoc. 14:9-11).

2. 1) ¿Tlake techmachtia ma tijchiuakaj Hebreos 10:35-39? 2) ¿Kenijkatsa techpaleuia amochtli Apocalipsis?

² (Xijpoua Hebreos 10:35-39). Tlauel kuali tlaj ta ya tijtlapejpenijtok ma mitsyakana Jehová. Uan uelis tijneki tikinpaleuis sekinok maseualmej nojkia kiampa ma kichiuakaj. Tlauel mitspaleuis tlen kiijtoua amochtli Apocalipsis, pampa nopaya kiijtoua tlake kinpanos toTeotsij ikualankaitakauaj uan tlake tlateochiualistli kiselisej katli amo kitlauelkauaj Jehová. Tlauel ipati tikitasej sejse tlen ni tlamantli pampa techpaleuis nojua ma timosentlalijtokaj tijtekipanosej toTeotsij. Nojkia, ika tlen timomachtijtokej uelis tikinpaleuisej sekinok ma kitlapejpenikaj kitekipanosej Jehová uan amo ma kitlauelkauakaj.

3. ¿Tlake tlajtlanili tijnankilisej ipan ni tlamachtili?

³ Ipan ni tlamachtili tijnankilisej ni tlajtlanili: ¿Tlake kiselisej katli kipaleuiaj toTeotsij iTlanauatijkayo? Uan, ¿tlake kinpanos katli kipaleuiaj nopa tlapiali chichiltik tlen kiijtoua Apocalipsis?

4. ¿Ajkia kinita Juan itstokej iluikak iuaya Jesús?

⁴ Apóstol Juan kinita kejuak ipan se temiktli ome pamitl maseualmej katli kipaleuiaj toTeotsij iTlanauatijkayo uan katli nochipa itstosej, uan kiselisej miak tlateochiualistli. Ipan achtoui pamitl itstokej 144,000 maseualmej (Apoc. 7:4). Inijuantij itstoyaj ipan Tlaltipaktli, uan yauij iluikak pampa tlanauatisej iuaya Jesús (Apoc. 5:9, 10; 14:3, 4). Juan kinita nopa 144,000 iuaya Jesús moketstokej iluikak ipan “Tepetl Sion” (Apoc. 14:1).

5. ¿Tlake kiselisej katli kintlapejpenijtokej yasej iluikak uan nojua itstokej ipan Tlaltipaktli?

⁵ Nopa 144,000 katli tlanauatisej iuaya Cristo pejkej kintlapejpeniaj kema nojua itstoyaj apóstoles uan ipan ni tonali nojua kiampa kichiuaj (Luc. 12:32; Rom. 8:17). Maske kiampa kichijtokej, Juan kiiljuiaj ipan itlamia tonali itstoskiaj san se keskij ipan Tlaltipaktli. Kema nechka mochiuas nopa ueyi tlaijiyouilistli, katli kintlapejpenijtokej yasej iluikak kiselisej nopa “sello”, ni kiijtosneki toTeotsij kintlapejpenijtok (Apoc. 7:2, 3; 12:17). Kema mochijtos nopa ueyi tlaijiyouilistli, nochi katli kintlapejpenijtokej uan nojua itstokej ipan Tlaltipaktli, yasej iluikak uan mopantitij ininuaya sekinok katli amo kema kitlauelkajkej toTeotsij. Kiampa nopa 144,000 tlanauatisej iuaya Jesús ipan toTeotsij iTlanauatijkayo (Mat. 24:31; Apoc. 5:9, 10).

6, 7. 1) ¿Ajkia nojkia kinitak Juan uan tlake tijmatij tlen inijuantij? 2) ¿Kenke moneki kuali kitlakakilisej tlen kiijtoua Apocalipsis 7, katli yasej iluikak uan nopa miakej maseualmej?

⁶ Teipa, kema Juan tlanki kinita katli itstosej iluikak, pejki kinita tlauel miakej maseualmej. Inijuantij elij tlauel miakej uan amo aka ueli kinpoua (Apoc. 7:9, 10). ¿Tlake tijmatij tlen inijuantij? Juan kiiljuijkej inijuantij “ualajkej ipan nopa tonali tlen ueyi tlaijiyouilistli uan kichikuenijtokej ininyoyo ika ieso nopa Pilborregojtsi [o Jesucristo], uan yeka kichijtokej chipauak ininyoyo” (Apoc. 7:14). Kema ya mochijtos nopa ueyi tlaijiyouilistli uan momanauijtosej nopa tlauel miakej maseualmej, itstosej ipan Tlaltipaktli uan kiselisej miak tlateochiualistli (Sal. 37:9-11, 27-29; Prov. 2:21, 22; Apoc. 7:16, 17).

⁷ Tlaj techtlapejpenijtokej tiasej iluikak o timotemachiaj tiitstosej ipan Tlaltipaktli, nochi moneki kejuak timoitasej ipan nopa tlaixkopinkayotl tlen Apocalipsis capítulo 7. Nochi tlauel tiyolpakisej, katli itstosej iluikak uan katli itstosej ipan Tlaltipaktli. Uan nojkia tlauel tiyolpakisej pampa tijtlapejpenijkej tijpaleuisej toTeotsij iTlanauatijkayo. ¿Tlake sekinok tlamantli kiijtoua amochtli Apocalipsis tlen nopa ueyi tlaijiyouilistli? (Mat. 24:21).

8. ¿Kenijkatsa peuas nopa ueyi tlaijiyouilistli uan tlake kichiuasej miakej maseualmej?

⁸ Kej tikitakej ipan tlamachtili 20, tekichiuanij nechka kitsontlamiltisej nopa Ueyi Babilonia, nochi religiones tlen amo melauak (Apoc. 17:16, 17). Kema panos nopa, peuas nopa ueyi tlaijiyouilistli. Uajka, ¿kiueyichiuasej Jehová miakej maseualmej ipan nopa tonali? Amo. Ipan Apocalipsis capítulo 6, kiijtoua ipan nopa tonali maseualmej katli amo kitekipanouaj Jehová kintemosej políticos uan tlanamakanij, tlen Biblia kinixnextia kej tepemej, pampa kinekisej ma kinpaleuikaj. Jehová kinitas kej ikualankaitakauaj  pampa amo kipaleuisej iTlanauatijkayo (Luc. 11:23; Apoc. 6:15-17).

9. ¿Kenijkatsa ipan ueyi tlaijiyouilistli maseualmej kiitasej amo tielij kej sekinok religiones, uan tlake techpanos?

⁹ Ipan nopa tonali kema mochijtos nopa ueyi tlaijiyouilistli, maseualmej kiitasej tojuantij amo tielij kej sekinok religiones. ¿Kenke? Pampa san tojuantij tijtekipanojtosej Jehová uan amo tijpaleuisej nopa “fiero tlapiali” (Apoc. 13:14-17). ToTeotsij ikualankaitakauaj tlauel kualanisej pampa kiitasej amo tijchiuaj kej sekinok maseualmej. Yeka, miakej altepemej techteuisej. Kema kiampa panos, Biblia kitokaxtia kema techteuis Gog tlen tlali Magog (Ezeq. 38:14-16).

10. Kej kiijtoua Apocalipsis 19:19-21, ¿tlake kichiuas Jehová kema kiitas kintlaijiyouiltiaj itekipanojkauaj?

¹⁰ Kema Jehová kiitas kintlaijiyouiltiaj itekipanojkauaj, tlauel kualanis (Ezeq. 38:18, 21-23). Ipan Apocalipsis capítulo 19, kiixtoma tlake panos teipa: Jehová kititlanis iKone ma kinmanauiti itekipanojkauaj uan ma kintsontlamilti ikualankaitakauaj. Jesús amo iselti tlateuis, iuaya itstosej nopa “soldados tlen iluikak” o iluikaeuanij uan nojkia nopa 144,000 (Apoc. 17:14; 19:11-15). Ipan nopa tlauilankayotl, kintsontlamiltisej nochi maseualmej uan tekichiuanij katli kiijixnamikij toTeotsij (xijpoua Apocalipsis 19:19-21).

11. ¿Tlake tlamantli kiijtoua Apocalipsis kichiuas nojua tlauel ma yolpakikaj?

¹¹ Kema toTeotsij ya kintsontlamiltijtos ikualankaitakauaj, ¿kenijkatsa kiyolmatisej Cristo itokilijkauaj pampa momanauijkej? ¡Tlauel yolpakisej! Nojkia, kema kitsontlamiltisej Ueyi Babilonia iluikaeuanij tlauel yolpakisej, uan teipa panos seyok tlamantli tlen kichiuas nojua kiampa ma kiyolmatikaj (Apoc. 19:1-3). Apocalipsis kiijtoua elis nopa “nenamiktili tlen nopa Pilborregojtsi [o Jesucristo]” (Apoc. 19:6-9).

12. Kej kiijtoua Apocalipsis 21:1, 2, ¿kema mochiuas nopa “nenamiktili tlen nopa Pilborregojtsi”?

¹² Maske nopa 144,000 ya itstosej iluikak kema ayamo pejtos Armagedón, ipan nopa tonali ayamo mochiuas nopa “nenamiktili tlen nopa Pilborregojtsi” (xijpoua Apocalipsis 21:1, 2). Nopa “nenamiktili” mochiuas kema ya tlantos Armagedón, kema nochi toTeotsij ikualankaitakauaj ya kintsontlamiltijtosej (Sal. 45:3, 4, 13-17).

13. ¿Kenijkatsa kinpaleuis katli itstosej nopaya kema mochiuas nopa “nenamiktili tlen nopa Pilborregojtsi”?

¹³ Ipan nopa “nenamiktili” Jesucristo kejuak mosiuajtis ininuaya nopa 144,000, kej kema se tlakatl mosenkaua iuaya se siuatl. Kema panos nopa, Jesús uan nopa 144,000 peuas tlanauatisej sansejko Mil Xiuitl ipan Tlaltipaktli (Apoc. 20:6).

14, 15. Kej kiijtoua Apocalipsis capítulo 21, ¿ika tlake kinixnextiaj nopa 144,000? (Xikita tlaixkopinkayotl ipan ipantsajka).

¹⁴ Teipa, ipan Apocalipsis capítulo 21 kinixnextiaj nopa 144,000 ika se yejyektsi altepetl tlen kitokaxtiaj “yankuik Jerusalén” (Apoc. 21:2, 9). “Itsinpeualtil nopa tepamitl tlen kiyaualok nopa altepetl eltok matlaktli uan ome uejueyi tetinij uan ininpani ijkuilijtok inintoka nopa matlaktli uan omej [apóstoles tlen] nopa Pilborregojtsi”. Uelis Juan tlauel mosentlachilik kema kiitak itoka ijkuilijtok ipan se tlen nopa tetl. ¡Nelia se ueyi tlateochiualistli! (Apoc. 21:10-14; Efes. 2:20).

 ¹⁵ Ni altepetl amo eli kej sekinok altepemej, pampa “icalle” kichijchijtoyaj ika senkistok oro, nopa 12 kaltemitl eliyaya 12 “perlas tlen uejueyi”, “nopa tetinij tlen ika kitsinpeualtijtoyaj” kipixtoya se keski tetl tlen tlauel pajpatiyo, uan iuexka nopa altepetl tlauel kuali kej eltoya (Apoc. 21:15-21). Maske kipiayaya nochi ni tlamantli, Juan kiitak kipolouayaya se tlenijki. Ya kiijtoua: “Axnikitak se teopamitl ipan nopa altepetl pampa toTeko Dios Tlen Kipia Nochi Chikaualistli uan nopa Pilborregojtsi, inijuantij iteopa nopa altepetl. Uan ipan nopa altepetl axmonejki Tonati, niyon metstli para kitlauilis pampa inintlatlanex toTeko uan nopa Pilborregojtsi kitlauilia” (Apoc. 21:22, 23). Nochi nopa 144,000 itstosej iixpa Jehová (Heb. 7:27; Apoc. 22:3, 4). Yeka, tikijtouaj Jehová uan Jesús elij nopa teokali tlen nopa altepetl.

16. ¿Tlake tlateochiualistli kiselisej maseualmej kema toTeotsij iTlanauatijkayo tekichijtos Mil Xiuitl?

¹⁶ Katli kintlapejpenijtokej yasej iluikak tlauel yolpakij kema moiljuiaj ipan nopa altepetl, uan katli itstosej ipan Tlaltipaktli nojkia moneki kiampa kiyolmatisej. ¿Kenke? Pampa kema toTeotsij iTlanauatijkayo tlanauatijtos ipan Mil Xiuitl, nopa “yankuik Jerusalén” kinteochiuas nochi katli itstosej ipan Tlaltipaktli. Juan kiitak nochi nopa tlateochiualistli tlen kiselisej, eli kej atemitl tlen temaka yolistli uan ipan ome inaliyo tlen nopa atemitl, eltok miak “kuauitl tlen temaka yolistli para nochipa” uan ixiuiyo ueli kinchikaua maseualmej (Apoc. 22:1, 2). Nochi katli itstosej ipan nopa tonali, kiselisej nochi ni tlateochiualistli. Uan katli kichiuasej tlen toTeotsij kineki, yolik mochijtiasej xitlauakej. Nojkia, ayokmo onkas kokolistli, tlaijiyouilistli yon chokistli (Apoc. 21:3-5).

17. Kej kiijtoua Apocalipsis 20:11-13, ¿ajkia inijuantij kiselisej nopa tlateochiualistli kema tekichijtos toTeotsij iTlanauatijkayo ipan nopa Mil Xiuitl?

¹⁷ Nopa tlauel miakej maseualmej katli momanauisej ipan Armagedón uan katli tlakatisej ipan nopa yankuik Tlaltipaktli kiselisej ni tlateochiualistli. Nojkia, ipan Apocalipsis capítulo 20 kiijtoua moyolkuisej katli miktokej (xijpoua Apocalipsis 20:11-13). Uan, ¿ajkia inijuantij moyolkuisej? Katli “kuajkualmej” uan  katli “axkuajkualmej”. Katli kuajkualmej, elij toTeotsij itekipanojkauaj katli itstoyaj uejkajkia uan katli amo kuajkualmej elij katli amo kema kiixmatkej Jehová (Hech. 24:15; Juan 5:28, 29). Uajka, ¿kiijtosneki nochi moyolkuisej ipan nopa Mil Xiuitl kema tekichijtos toTeotsij iTlanauatijkayo? Amo. Katli amo kema kinejkej kitekipanosej Jehová amo moyolkuisej, pampa maske kiniljuijkej tlen monekiyaya kichiuasej, inijuantij amo kiselijkej uan kinextijkej amo kinekiyayaj itstosej ipan nopa yankuik Tlaltipaktli (Mat. 25:46; 2 Tes. 1:9; Apoc. 17:8; 20:15).

18. ¿Kenijkatsa tiitstosej kema tlamis nopa Mil Xiuitl?

¹⁸ Kema tlamis nopa Mil Xiuitl, nochi maseualmej elisej xitlauakej. Yon se maseuali ayokmo kipias tlajtlakoli tlen Adán uan Eva techkauilijtejkej (Rom. 5:12). ToTeotsij kitlamiltis nochi tlajtlakoli uan mikilistli. Yeka, uelis tikijtosej kema tlamis nopa Mil Xiuitl, nochi maseualmej yoltosej pampa elisej xitlauakej (Apoc. 20:5).

19. ¿Kenke monekis sampa techyejyekosej?

¹⁹ Tijmatij Jesús katli eliyaya xitlauak, kichijki kampeka amo kema kitlauelkauas Jehová maske Satanás miakpa kiyejyekok. ¿Nojkia kiampa kichiuasej katli elisej xitlauakej kema Satanás kinyejyekos? Sejse maseuali monekis kinextis kema tlamis nopa Mil Xiuitl uan Satanás sampa malakantos (Apoc. 20:7). Katli amo kema kitlauelkauas Jehová maske kiixnamikis nopa tlaouijkayotl, kipias nemilistli tlen axkema tlamis uan yolpakis pampa ayokmo itstos kejuak ilpitok (Rom. 8:21). Uan katli tlaijixnamikisej, toTeotsij kintsontlamiltis kej kichiuas ika Satanás uan iajakauaj (Apoc. 20:8-10).

20. ¿Tlake tijyolmati pampa tikitstokej tlen kiijtoua Apocalipsis?

²⁰ Ipan ni tlamachtili tikixtonkej tlen kiijtoua Apocalipsis, ¿kenijkatsa tijyolmati? ¿Tiyolpaki pampa nojkia tijneki tiitstos ipan nopa “tlaixkopinkayotl” uan tikitas kenijkatsa moaxitia sejse tlen ni tlajtolpanextili? ¿Nojkia tijneki tikiniljuis sekinok ma kitekipanokaj toTeotsij kej ya kipaktia? (Apoc. 22:17). Ika nochi tlen tikitstokej tlen mochiuas teipa, uelis nojkia tlauel tiyolpakij uan tijnekij tikijtosej kej Juan kiijtok: “¡Keja nopa ma eli! ¡Xiuala toueyiTeko Jesús!” (Apoc. 22:20).