1. Kej kiijtoua amochtli Apocalipsis, ¿tlake kichiua Satanás ika toTeotsij itekipanojkauaj?

 AMOCHTLI Apocalipsis kiijtoua toTeotsij iTlanauatijkayo ya tekichijtok iluikak uan Satanás kimajkajkej ipan Tlaltipaktli (Apoc. 12:1-9). Maske katli itstokej ipan iluikak tlauel yolpakij pampa Satanás ayokmo itstok nopaya, tojuantij nojua tlauel titlaijiyouiaj. ¿Kenke? Pampa Satanás kintlaijiyouiltia nochi toTeotsij itekipanojkauaj katli itstokej ipan Tlaltipaktli (Apoc. 12:12, 15, 17).

2. ¿Tlake techpaleuis tikixnamikisej tlaouijkayotl?

² ¿Tlake techpaleuis tikijiyouisej kema Satanás techtlaijiyouiltia? (Apoc. 13:10). Tlauel techpaleuis tlaj tijmatisej tlake panos teipa. Se neskayotl, apóstol Juan kiijkuilok ipan Apocalipsis nochi nopa tlateochiualistli tlen nechka tijselisej. Se tlen nopa tlamantli eli kema toTeotsij kintsontlamiltis ikualankaitakauaj. Ma tikitakaj tlake kiijtoua Apocalipsis tlen inijuantij uan tlake kinpanos.

3. ¿Tlake kitekiuia Apocalipsis uan kiampa kiixnextia se keski tlamantli?

³ Kampa peua Apocalipsis kiijtoua ipan nochi ni amochtli kiijtoua se keski tlamantli ika se keski tlanextilili (Apoc. 1:1). ToTeotsij ikualankaitakauaj kinixnextiaj kej tlapialmej. Se neskayotl, kamanalti tlen “se fiero tlapiali tlen tlejkoyaya tlen nopa ueyi atl. Uan kipixtoya chikome itsonteko uan matlaktli ikuakua” (Apoc. 13:1). Teipa, itepotsko yaui “seyok  fiero tlapiali tlen kisayaya tlalijtik”, uan kamanalti kej se ueyi dragón uan kichiua ‘ma uetsi tlitl tlen iluikak’ (Apoc. 13:11-13). Uan nojkia kiijtoua nesi “se fiero tlapiali chichiltik” katli ipani yaui se auilnenkasiuatl. Ni eyij tlapialmej kinixnextiaj nochi ikualankaitakauaj Jehová katli kiijixnamiktokej uan amo kipaleuiaj iTlanauatijkayo. Yeka, tlauel ipati tijmatisej ajkia inijuantij elij (Apoc. 17:1, 3).

4, 5. ¿Kenijkatsa techpaleuis Daniel 7:15-17 ma tijkuamachilikaj tlen kitekiuia Apocalipsis?

⁴ Achtoui ma tikitakaj tlake kinixnextiaj ni tlapialmej, uan kiampa tijmatisej ajkia inijuantij elij toTeotsij ikualankaitakauaj. Tlaj tijnekij kuali tijkuamachilisej, moneki tijkauasej Biblia ma techixtomili. Miak tlamantli tlen ijkuilijtok ipan Apocalipsis tlen ika kiixnextia se keski tlamantli, ipa moijtojtoya ipan sekinok amochtli tlen Biblia. Se neskayotl, tlajtolpanextijketl Daniel kintemijki “nauij uejueyij tekuanimej kiskej ipan ueyi atl” (Dan. 7:1-3). Uan teipa ya nojkia kiijtok ni tlapialmej kinixnextiaj “nauij tlanauatianij” (xijpoua Daniel 7:15-17). Ni techpaleuia ma tijkuamachilikaj nopa tlapialmej tlen kiijtoua Apocalipsis, kinixnextiaj nochi tekichiuanij.

⁵ Ma tikitakaj se keski tlamantli tlen kiijtoua Apocalipsis. Biblia techpaleuis tijkuamachilisej tlake kiijtosneki. Achtoui tikitasej ajkia inijuantij kinixnextiaj nopa tlapialmej. Teipa, tikitasej tlake kinpanos. Uan nojkia tlake uelis tijyekosej tlen ni tlamantli.

6. Kej kiijtoua Apocalipsis 13:1-4, ¿ajkia kinixnextia nopa tlapiali katli kipia chikome itsonteko?

⁶ Tlen kiixnextia nopa tlapiali katli kipia chikome itsonteko (xijpoua Apocalipsis 13:1-4). Biblia kiijtoua ni tlapiali nesi kej se leopardo, iikxiuaj eli kej se oso, ikamak kej se león uan kipia matlaktli ikuakua. Sejse tlen nopa nauij tlapialmej tlen kiijtoua Daniel capítulo 7 nojkia kiampa elij. Uan ipan Apocalipsis nojkia kiijtoua neski se tlapiali katli kipia nochi nopa tlamantli. Uajka ni tlapiali amo kiixnextia san se tekichijketl. Apocalipsis kiijtoua ni tlapiali kipia “tekiuejkayotl ika nochi xinachtli tlakamej, uan ika tlakamej tlen kipiaj sejse tlamantli inintlalnamikilis uan inincostumbres, uan ika tlakamej tlen kamatij nochi tlamantli tlajtoli uan ika tlen euanij nochi tlaltinij”. Kej tikitaj, kipia miak chikaualistli uan amo kej sekinok tekichiuanij (Apoc. 13:7). Uajka, ni tlapiali kinixnextia nochi tekichiuanij katli tlanauatijtokej ipan miak xiuitl (Ecl. 8:9). *

7. ¿Ajkia inijuantij kinixnextia nopa chikome tsontekomitl tlen nopa tlapiali?

⁷ Tlen kiixnextia nopa chikome tsontekomitl. Apocalipsis capítulo 17 techpaleuis tijkuamachilisej, pampa nopaya moixtoma kenijkatsa eli nopa tlapiali tlen moijtok ipan capítulo 13. Apocalipsis 17:10 kiijtoua: “Kinneskayotiaj chikomej tlanauatianij. Makuiltij nopa tlanauatianij ya miktokej, se nama tlanauatia uan seyok noja poliui tlanauatis. Uan kema ualas yajaya tlen noja poliui, san tlanauatis para se keski tonali”. Nochi tlanauatianij tlen Satanás kintekiuijtok, chikomej elij kej “itsonteko” nopa tlapiali pampa tlauel pankistokej. Inijuantij elij uejueyij tlanauatianij katli tlauel kintlaijiyouiltijtokej toTeotsij itekipanojkauaj. Kema apóstol Juan nojua itstoya, makuiltij tlen ni tlanauatianij ya tlanauatijtoyaj: Egipto, Asiria, Babilonia, Medopersia uan Grecia. Uan nopa  chikuasej tsontekomitl, tlen kiixnextiyaya Roma, tlanauatiyaya kema Juan kiijkuilok Apocalipsis. Uan, ¿ajkia kiixnextia nopa chikome tsontekomitl tlen mokaua?

8. ¿Ajkia kiixnextia nopa san iyojtsi tsontekomitl?

⁸ Kej tikitasej, nopa tlajtolpanextili tlen eltok ipan amochtli Daniel techpaleuia ma tijkuamachilikaj ajkia kiixnextia nopa chikome uan iyojtsi tsontekomitl tlen mokaua. ¿Ajkia elij nopa uejueyij tlanauatianij katli tlanauatiaj ipan itlamia tonali o ipan ‘tonali tlen iaxka toueyiTeko’? (Apoc. 1:10). Uelis tikijtosej nopa san iyojtsi itsonteko tlen nopa tlapiali tlen kiijtoua Apocalipsis 13:1-4 elij ni tlanauatianij: Reino Unido uan Estados Unidos, pampa kipiaj miak tlanauatili ipan ni tonali.

9. ¿Ajkia kiixnextia nopa tlapiali katli “kipixki ome ikuakua keja se pilborregojtsi”?

⁹ Capítulo 13 tlen Apocalipsis kiijtoua tlake kichiua nopa chikome tsontekomitl tlen kiixnextia Reino Unido uan Estados Unidos. Ipan nopa capítulo kiijtoua eli seyok tlapiali katli “kipixki ome ikuakua keja se pilborregojtsi, pero kamatki keja nopa ueyi dragón”. Ni tlapiali kichiua “uejueyi tlaneskayotl”, uan kichiua ‘ma uetsi tlitl tlen iluikak hasta Tlaltipaktli kema tlakamej kitlachiliaj’ (Apoc. 13:11-15). Ipan capítulos 16 uan 19 tlen Apocalipsis kitokaxtia “istlakatikateokamanalojketl” (Apoc. 16:13; 19:20). Daniel kiijtok tlake kichiuaskiaj Reino Unido uan Estados Unidos, katli kipiaj uejueyi tlanauatili. Ya kiijtok: “Kinxoleuas tlaltinij kampa ueli hasta axtleno mokauas” (Dan. 8:19, 23, 24). Uan nelia kiampa panok kema mochijki nopa Ompa Ueyi Tlauilankayotl. Nopa ome bombas atómicas tlen kichijki ma tlami ni ueyi tlauilankayotl, kichijchijkej científicos tlen Reino Unido uan Estados Unidos. Kiampa kejuak kichijkej ‘ma uetsi tlitl tlen iluikak hasta Tlaltipaktli’.

10. Kej kiijtoua Apocalipsis 13:14, 15; 17:3, 8, 11, ¿tlake kiixnextia nopa “tlaixkopinkayotl tlen nesis keja nopa achtoui fiero tlapiali”?

¹⁰ Nama, tikitasej tlen kichiua seyok tlapiali. Maske nesi kej nopa tlapiali katli kipia chikome itsonteko, ni tlapiali eli chichiltik. Apocalipsis kiijtoua eli se “tlaixkopinkayotl” tlen nopa tlapiali uan nojkia kiijtoua eli “nopa chikuexpa tlanauatijketl” (xijpoua Apocalipsis 13:14, 15; 17:3, 8, 11). * Nojkia, kiijtoua ni “tlanauatijketl” tekichijki, teipa ixpolijki uan teipa sampa neski. Ni tlajtolpanextili moaxitia ipan Organización de las Naciones Unidas, katli kinixnextia nochi tlanauatianij. Achtouia kiixmatiyayaj kej Sociedad de Naciones, uan ixpolijki ipan nopa Ompa Ueyi Tlauilankayotl. Teipa, sampa neski uan motokaxtia kej nama tikixmatij.

11. ¿Tlake kichiuasej políticos, uan kenke amo kinamiki timajmauisej?

¹¹ Políticos kichiuasej maseualmej ma kiijixnamikikaj Jehová uan itlanechikol. Inijuantij kejuak kinsansejkotilisej “tlanauatianij uan ininsoldados” ipan Armagedón, “nopa ueyi tonal kema peuas nopa ueyi tlateuijkayotl ika toTeko Tlen Kipia Nochi Chikaualistli” (Apoc. 16:13, 14, 16). Maske kiampa panos, amo ma timajmauikaj pampa Jehová kinmanauis nochi katli kipaleuiaj iTlanauatijkayo (Ezeq. 38:21-23).

12. ¿Tlake kinpanos nochi ni tlapialmej?

¹² Tlen kinpanos ni tlapialmej. Apocalipsis 19:20 kiijtoua: “Tlen tlejkotoya ipan nopa kauayo chipauak kiitski nopa fiero tlapiali uan nopa istlakatikateokamanalojketl [...]. Nopa istlakatikateokamanalojketl elki tlen kichijki chikaualneskayotl iixtla  nopa fiero tlapiali uan kinkajkayajtoya nochi tlakamej tlen kiselijkej nopa machiotl tlen nopa fiero tlapiali uan tlen kiueyimatkej itlaixkopinkayo. Uan nochi omej kinkuamajkajki noja yoltokej ipan nopa tlitl tlen onpano ueyi uan lemeni ika azufre”. Uajka, maske nojua tlanauatijtosej, toTeotsij kintsontlamiltis ikualankaitakauaj.

13. ¿Tlake tlamantli kiixnamikij Cristo itokilijkauaj?

¹³ ¿Tlake techmachtia? Nochipa ma tijtekipanokaj Jehová uan ma tijpaleuikaj iTlanauatijkayo (Juan 18:36). Tlaj nochipa kiampa tijnekij tijchiuasej, amo kema ma timokalakikaj ipan política. Uelis tijmatisej ouij amo kiampa tijchiuasej pampa tekichiuanij kinekij ma tikinpaleuikaj ika tlen tikijtouaj uan ika tlen tijchiuaj. Katli kinpaleuiaj, kejuak kiseliaj nopa “machiotl” tlen nopa tlapiali (Apoc. 13:16, 17). Katli kinmachiotisej, Jehová ayokmo kuali kinitas uan amo kipiasej nemilistli tlen axkema tlamis (Apoc. 14:9, 10; 20:4). Yeka, moneki tijchiuasej kampeka amo timokalakisej ipan política, maske tekichiuanij techchiualtisej ma tikinpaleuikaj.

14. Kej kiijtoua Apocalipsis 17:3-5, ¿tlake kiitak Juan tlen kichijki ma mosentlachili?

¹⁴ Juan kiijtoua tlauel mosentlachilik kema kiitak seyok tlamantli. ¿Tlake kiitak? Se siuatl katli yauiyaya ipan se tlen nopa tlapialmej (Apoc. 17:1, 2, 6). Kiixnextia kejuak “se fiero momekatijkasiuatl”, katli itoka eli “Ueyi Babilonia” uan momekatia ininuaya “nochi tlanauatianij ipan Tlaltipaktli” (xijpoua Apocalipsis 17:3-5).

15, 16. ¿Tlake kiijtosneki “Ueyi Babilonia”, uan kenijkatsa tijmatij?

¹⁵ Tlen kiijtosneki “Ueyi Babilonia”. Ni siuatl amo kinixnextia políticos, pampa Apocalipsis kiijtoua momekatia ininuaya tekichiuanij (Apoc. 18:9). Nojkia kiijtoua yaui ipan se tlapiali, nopa kiijtosneki ya kineki kinnauatis tekichiuanij. Uan ni siuatl nojkia amo kinixnextia tlanamakanij katli Satanás kinnauatia, pampa Apocalipsis kamanalti tlen inijuantij ipan sekinok versículos, uan kintokaxtia “tlanamakanij tlen euaj kampa ueli ipan Tlaltipaktli” (Apoc. 18:11, 15, 16).

¹⁶ Ipan Biblia miakpa motekiuia nopa tlajtoli auilnemij uan momekatiaj. Ni uelis kineki kiijtos kema se akajya kiijtoua kiueyichiua toTeotsij uan nojkia kinueyichiua tlaixkopinkayomej o amo kuali monejnemiltia, kej kichiuaj maseualmej (1 Crón. 5:25; Sant. 4:4). Uan kema ipan Biblia kamanalti tlen se akajya katli amo kitlauelkaua toTeotsij, kitekiuia nopa tlajtoli “se kuali ichpokatl” (2 Cor. 11:2; Apoc. 14:4). Uejkajkia ipan altepetl Babilonia onkayaya miak religiones tlen amo melauak. Uajka, nopa Ueyi Babilonia kinixnextia religiones tlen amo melauak uan tlen nopaya kichiuaj (Apoc. 17:5, 18; xikita ipan jw.org “¿Qué es Babilonia la Grande?”).

17. ¿Tlake kipanos Ueyi Babilonia?

¹⁷ Tlen kipanos Ueyi Babilonia. Apocalipsis 17:16, 17 kiijtoua: “Nopa fiero tlapiali uan nopa matlaktli ikuakua tlen tikitak kineskayotia tlanauatianij tlen tlanauatisej iuaya. Uan nochi kikokolisej nopa momekatijkasiuatl. Yajuantij kitlamikokosej uan kikauasej sosoltik uan xolotik. Elis keja kikuasej inakayo uan kitlamitlatisej tlen mokauas. Pampa toTeko kintlalilis ipan ininyolo nopa matlaktli tlanauatianij para ma kimakakaj inintekiuejkayo nopa fiero tlapiali”. Uajka, Jehová kichiuas nochi altepemej ma kitemokaj tlapaleuili ipan nopa “fiero tlapiali chichiltik”, katli kiixnextia Naciones Unidas, uan kiampa kitsontlamiltisej religiones tlen amo melauak (Apoc. 18:21-24).

18. ¿Tlake moneki tijchiuasej tlaj amo tijnekij tiitstosej ipan Ueyi Babilonia?

 ¹⁸ ¿Tlake techmachtia? Moneki tijchiuasej kampeka tijueyichiuasej toTeotsij kej ya kineki (Sant. 1:27). Amo kema ma tijkauakaj Ueyi Babilonia ma techyoltilana tijchiuasej iljuitl tlen amo uala ipan Biblia, timonejnemiltisej kej sekinok yon tijneltokasej tlen kichiuaj tetlajchiuianij. Uan nojua ma tijchijtokaj kampeka tikiniljuisej maseualmej: “Xikisakaj ipan ya”. Tlaj kiampa kichiuasej, toTeotsij amo kintlajtlakoltis ika tlen kichiua nopa Ueyi Babilonia (Apoc. 18:4).

19. ¿Ajkia eli nopa “ueyi dragón tlen chichiltik”?

¹⁹ Ipan amochtli Apocalipsis nojkia kamanalti tlen “se ueyi dragón tlen chichiltik” (Apoc. 12:3). Ni ueyi dragón moteuia iuaya Jesús uan iiluikaejkauaj (Apoc. 12:7-9). Nojkia, kinteuia toTeotsij itekipanojkauaj uan kinmaka chikaualistli nopa tlapialmej (Apoc. 12:17; 13:4). ¿Ajkia eli ni “dragón”? Biblia kiijtoua eli Diablo o Satanás “tlen mokuepki nopa kouatl uejkajkia ipan nopa xochimili” (Apoc. 12:9; 20:2). Ya eli katli kinyakana nochi toTeotsij ikualankaitakauaj.

20. ¿Tlake kipanos nopa dragón?

²⁰ Tlen kipanos nopa dragón. Apocalipsis 20:1-3 kiijtoua se iluikaejketl kikuamajkauas Satanás ipan se ueyi ostotl uan nopaya tsaktos. Satanás kitsakuasej mil xiuitl uan ayokmo uelis kinkajkayauas maseualmej “hasta tlamis nopa mil xiuitl”. Uan teipa, ya uan iajakauaj kinkuamajkauasej ipan “tlitl tlen onpano ueyi uan lemeni ika azufre”. Ni kiijtosneki kintsontlamiltisej uan ayokmo kema sampa itstosej (Apoc. 20:10). ¡Nelia tlauel kuali tiitstosej kema Satanás uan iajakauaj kintsontlamiltisej!

21. ¿Kenke kichiua tlauel ma tiyolpakikaj tlen kiijtoua Apocalipsis?

²¹ ¡Nelia tlauel techpaleuia tijmatisej tlake kiixnextia sejse tlamantli tlen kiijtoua amochtli Apocalipsis! Ipan ni tlamachtili tikitstokej ajkia inijuantij elij toTeotsij ikualankaitakauaj uan tlake kinpanos. Tlauel tiyolpakij kema tijpouaj “ni amatlapouali tlen techiljuia nama tlen panos teipa. Uan [toTeotsij] kinteochiuas nochi tlen kikakisej ni tlajtoli” (Apoc. 1:3). ¿Tlake tlateochiualistli kiselisej katli amo kitlauelkauasej toTeotsij kema ayokmo itstosej ikualankaitakauaj? Ni tikixtomasej ipan tlamachtili 21.