1, 2. ¿Kenke se keski textos mopatla kej tikitaj?

 KEMA se tlakatl uan se siuatl mosenkauaj, tlauel yolpakij uan tlauel kuali nesij. Nojkia, tlauel kuali kitlakakiliaj nochi tlen toikni kiixtoma. Maske inijuantij kuali kimatij tlake kineki kiijtos nopa textos, nama kichiuaj kampeka tlauel kuali kitlakakilisej, pampa nopa kinpaleuis kema ya itstosej sansejko.

² Nojkia kiampa kinpano tetajmej kema kiniskaltiaj ininkoneuaj. Maske uelis miakpa kikaktokej tlamachtili kampa kiijtoua kenijkatsa kinamiki kiniskaltisej konemej, kema inijuantij kinpiaj ininkoneuaj moneki kiitasej kenijkatsa kichiuasej. Ipan nopa tonali peuaj tlauel kipatiitaj nochi tlamachtili kampa kiijtoua kenijkatsa moneki kiniskaltisej konemej. ¡Tetajmej kipiaj se ueyi tekitl! Kema mopatla se tlamantli ipan tonemilis nojkia mopatla kej tikitaj se keski textos, maske ipa tijpojtoyaj. Yeka, mojmostla tijpouaj Biblia uan timoyoliljuiaj tlen timomachtiaj, kej kinnauatijkej ma kichiuakaj tlanauatianij tlen Israel (Deut. 17:19).

3. ¿Tlake tikitasej ipan ni tlamachtili?

³ Tetajmej, inmojuantij inkipiaj se ueyi tlateochiualistli pampa uelis inkinpaleuisej inmokoneuaj ma kiixmatikaj Jehová. Maske kiampa inkichiuasej, amo san moneki inkinmachtisej tlen toTeotsij, nojkia moneki inkinpaleuisej ma kiiknelikaj Jehová ika nochi ininyolo. ¿Kenijkatsa uelis inkichiuasej? Ipan ni tlamachtili tikitasej naui textos tlen inmechpaleuis (2 Tim. 3:16). Nojkia, tikitasej kenijkatsa  kinpaleuijtok se keskij tetajmej pampa moyakankej ika tlen Biblia kiijtoua.

4. Kej kiijtoua Santiago 1:5, ¿tlake uelis kinpaleuis tetajmej ma kinpaleuikaj ininkoneuaj kiiknelisej Jehová?

⁴ Se: xikiljuikaj Jehová ma inmechyakana. Tlauel inmechpaleuis tlaj inkiiljuiaj Jehová ma inmechpaleui inkipiasej tlalnamikilistli, uan kiampa inkinpaleuisej inmokoneuaj ma kiiknelikaj (xijpoua Santiago 1:5). San Jehová tlauel kuali tetlajtolmaka. ¿Kenke? Pampa ya ipa eli tetaj (Sal. 36:9). Uan nojkia nochi tlen ya kiijtoua nochipa techpaleuia (Is. 48:17).

5. 1) ¿Tlake kinmaka toTeotsij itlanechikol nochi tetajmej? 2) ¿Tlake tijyekok tlen kichijkej toikniuaj Amorim kema kiniskaltijkej ininkoneuaj?

⁵ Jehová kinpaleuia tetajmej ma kinpaleuikaj ininkoneuaj nojua tlauel ma kiiknelikaj, uan kichiua ika miak tlamachtili uan ika itlanechikol (Mat. 24:45). Se neskayotl, tlauel kinpaleuis kampa kiijtoua “Ayuda para las familias”, tlen miak xiuitl kiski ipan pilamochtsi ¡Despertad! uan nama eltok ipan jw.org. Ipan ni sitio tlen internet nojkia uelis kipantisej videos tlen kintlajtlanilijtokej toikniuaj uan tlanextilili tlen kinpaleuis tetajmej ma kichiuakaj tlen Jehová kiijtoua, kiampa kuali kiniskaltisej ininkoneuaj (Prov. 2:4-6). *

6. ¿Kenijkatsa kiitaj se toikni iuaya isiua pampa Jehová itlanechikol kinpaleuia?

⁶ Miakej tetajmej kitlaskamatiliaj Jehová pampa tlauel kinpaleuijtok ika itlanechikol. Se toikni katli itoka Joseph kiijtoua: “Nelia tlauel ouij nijmati nikiniskaltis eyij nokoneuaj. Yeka, na uan nosiua nochipa tikiljuiaj Jehová ma techpaleui. Tikitstokej se keski tlamachtili uan videos tlen kistok, nelia tlauel techpaleuijtok ipan nopa tonali kema monekiyaya. Nochipa tijkajtokej Jehová ma techyakana, nopa kichijtok kuali ma tiitstokaj”. Joseph uan isiua kiitstokej nopa videos uan tlamachtili nelnelia kinpaleuijtok ikoneuaj ma mouampojchiuakaj ika Jehová.

7. Kej kiijtoua Romanos 2:21, ¿kenke tetajmej moneki kichiuasej kampeka uan kiampa kinextisej se kuali neskayotl?

 ⁷ Ome: xikinmachti ika tlen tijchiua. Konemej nochipa kiitaj uan kinekij kichiuasej tlen inintatauaj kichiuaj. Kej tijmatij, amo aka eli xitlauak (Rom. 3:23). Maske nopa nelia, se tetaj katli tlalnamiki kichiua kampeka kinextis se kuali neskayotl (xijpoua Romanos 2:21). Se tetaj kiijtok: “Tokoneuaj elij kej se ichkatl tlen nochi kiachichina, pampa inijuantij kichiuaj uan kiijtouaj nochi tlen kiitaj uan kikakij”. Nojkia kiijtok: “Kema kiitaj amo sanse tijchiuaj ika tlen tikinmachtiaj, inijuantij techiljuisej”. Yeka, tlaj tijnekij tikinpaleuisej ma kiiknelikaj Jehová, achtoui tojuantij moneki tlauel tikiknelisej uan tijnextisej.

8, 9. ¿Tlake tijyekok tlen kiijtojkej Andrew uan Emma?

⁸ Tetajmej uelis kichiuasej miak tlamantli uan kiampa kinpaleuisej ininkoneuaj ma kiiknelikaj Jehová. Ma tikitakaj tlen kiijtoua Andrew, se telpokatl katli kipia 17 xiuitl uan ya moatsonpoliuiltik: “Notatauaj nechmachtijkej tlauel ipati nochipa nimomaijtos. Mojmostla ika tlayoua, notata momaijtouayaya nouaya maske ya nimomaijtojtoya. Uan nochipa techiljuiyayaj: ‘Uelis miakpa inmomaijtosej’. Nopa nechpaleuik tlauel ma nijpatiita tlamaijtoli. Nama, tlauel nechpaktia nimomaijtos uan nikita Jehová kej noTata katli tlauel nechiknelia”. Tetajmej, xikilnamikikaj tlaj tlauel inkiikneliaj Jehová, inmokoneuaj nojkia kiampa kichiuasej.

⁹ Ma tikitakaj tlen kiijtoua Emma. Itata motlanejtoya miak tomij uan kema kintlauelkajki, inana monejki tlaxtlauas. Emma kiilnamiki: “Miakpa nonana amo kiaxiliyaya itomij, maske kiampa kipanoyaya, ya nochipa techiljuiyaya Jehová kinmokuitlauia itekipanojkauaj uan kinpaleuia kipiasej tlen moneki. Nojkia, tlen kitlapejpeniyaya kichiuas, kinextiyaya nelia motemachiyaya ipan Jehová. Nonana kinextik se kuali neskayotl”. ¿Tlake kimachtia tetajmej? Maske kiixnamikij kuesoli, uelis kinextisej se kuali neskayotl (Gál. 6:9).

10. Kej kiijtoua Deuteronomio 6:6, 7, ¿kema ueliyayaj kamanaltij israeleuanij tlen Jehová ininuaya ininkoneuaj?

¹⁰ Eyi: Xijchiua kampeka nochipa tikamanaltis ininuaya mokoneuaj. Jehová kiniljuik israeleuanij mojmostla ma kinkamanaljuikaj ininkoneuaj tlen ya (xijpoua Deuteronomio 6:6, 7). Miakpa ueliskia kiampa kichiuasej uan kinpaleuisej ma kiiknelikaj Jehová. Se neskayotl, okichpilmej itstoyaj miak horas ininuaya inintatauaj kema kitokayayaj o kipixkayayaj se tlamantli. Uan siuapilmej kichiuayayaj se keski tekitl ipan ininchaj ininuaya ininnana, kej kema tlajtsomayayaj. Kema tetajmej kichiuayayaj se keski tlamantli ininuaya ininkoneuaj, kinpaleuiyaya ma kiniljuikaj kenijkatsa Jehová tlauel tetlasojtla uan kenijkatsa kinmokuitlauia ininchampoyouaj.

11. ¿Kema uelis kamanaltisej tetajmej ininuaya ininkoneuaj?

¹¹ Ipan ni tonali mopatlatok miak tlamantli. Ipan miak altepemej, tetajmej ayokmo itstokej miak horas ininuaya ininkoneuaj, pampa tekitij o ininkoneuaj momachtiaj. Yeka, tetajmej moneki kuali kiitasej kema uelis itstosej ininuaya ininkoneuaj uan kamanaltisej (Efes. 5:15, 16; Filip. 1:10). Uelis itstosej sansejko kema  momachtiaj ininuaya ininchampoyouaj. Se piltelpokatsi katli itoka Alexander kiijtoua: “Notata nochipa kichiua kampeka timomachtisej sansejko uan amo kikaua yon se tlamantli ma techtsakuili kiampa tijchiuasej. Nojkia, kema tlami timomachtiaj, tikamanaltij”.

12. ¿Tlake moneki kiilnamikisej tetajmej kema momachtiaj ininuaya ichampoyouaj?

¹² ¿Tlake uelis kichiuasej tetajmej uan kiampa ininchampoyouaj kinpaktis kema momachtisej sansejko? Uelis kinpaleuis tlaj momachtisej sansejko nopa yankuik amochtli Nochipa xiitsto. Tlaj kiampa kichiuasej, kimatisej tlake kamanaltisej. Inmojuantij inkinekij inmokoneuaj ma kiijtokaj tlen kiyolmatij uan tlen kintekipachoua, yeka kema inmomachtisej sansejko amo xikinajuakaj, nojkia amo san xikiniljuijtokaj tlake moneki kichiuasej. Uan tlaj kiijtosej se tlamantli tlen amo motlatskilia ipan Biblia, amo ximomajmatikaj. Xikintlaskamatilikaj pampa kiijtouaj tlen kiyolmatij uan xikiniljuikaj nojua kiampa ma kichijtokaj. Tlaj inmokoneuaj kiijtouaj tlen kiyolmatij, inmechpaleuis inkimatisej kenijkatsa inkinpaleuisej.

13. ¿Kema tetajmej nojkia uelis kinpaleuisej ininkoneuaj ma mouampojchiuakaj ika Jehová?

¹³ Tetajmej, mojmostla xikitakaj kenijkatsa inkinpaleuisej inmokoneuaj mouampojchiuasej ika Jehová. Amo san kema inmomachtisej Biblia uelis inkinkamanaljuisej tlen ya. Se tenaj katli itoka Lisa kiijtoua: “Tikinpaleuiyayaj tokoneuaj ma kiixmatikaj toTeotsij ika tlen kichijchijtok. Se neskayotl, kema tochichi kintlauetskiltiyaya, tikiniljuiyayaj Jehová tlauel yolpaki uan kichijtok tojuantij nojkia ma tiyolpakikaj”.

14. Kej kiijtoua Proverbios 13:20, ¿kenke tlauel ipati tetajmej kinpaleuisej ininkoneuaj kuali ma kintlapejpenikaj ininuampoyouaj?

¹⁴ Naui: xikinpaleuikaj inmokoneuaj kipiasej kuajkualmej ininuampoyouaj. Biblia xitlauak kiijtoua touampoyouaj uelis techpaleuisej ma tijchiuakaj tlen kuali o tlen amo kuali (xijpoua Proverbios 13:20). Tetajmej, ¿inkimatij ajkia  elij ininuampoyouaj inmokoneuaj? ¿Kuali inkinixmatij uan sansejko inkichijtokej se keski tlamantli? ¿Tlake uelis inkichiuasej uan kiampa inkinpaleuisej mouampojchiuasej ininuaya katli kiikneliaj Jehová? (1 Cor. 15:33). Kema inkichiuasej se tlamantli ininuaya inmochampoyouaj, xikintlaneuikaj katli kuali mouampojchijtokej iuaya Jehová (Sal. 119:63).

15. ¿Tlake uelis kichiuasej tetajmej uan kiampa kinpaleuisej ininkoneuaj kipiasej kuali ininuampoyouaj?

¹⁵ Ma tikitakaj se neskayotl. Se tetaj katli itoka Tony kiijtoua tlen kichijtokej ya uan isiua, kiampa kinpaleuijtokej ininkoneuaj ma kinpiakaj kuali ininuampoyouaj. Toikni kiijtoua: “Miak xiuitl tikintlanejtokej toikniuaj uan tosiuaikniuaj katli amo kipiaj sanse ininxiui uan amo momajtokej kichiuaj sanse tlamantli. Titlakuaj sansejko uan nojkia timomachtiaj. Tlen tijchijtokej, nelia techpaleuijtok tikinixmatisej katli kiikneliaj Jehová uan kitekipanouaj ika pakilistli. Nojkia, tikintlanejtokej ma mokauakaj tochaj toikniuaj katli tepaxalouaj chijchikuasej metstli, misioneros uan sekinok toikniuaj. Tikitstokej tlauel kinpaleuijtok tokoneuaj nojua ma mouampojchiuakaj ika Jehová kema kiitaj tlen toikniuaj kinpanotok, kej tlatekipanouaj uan tlen kikajtokej pampa kinekij kuali tlatekipanosej”. Tetajmej, xijchiuakaj kampeka inkipaleuisej inmokoneuaj ma kinpiakaj kuali ininuampoyouaj.

16. ¿Tlake moneki kiilnamiktosej tetajmej tlaj se ininkone ayokmo kineki kitekipanos Jehová?

¹⁶ Tlaj se inmokone kiijtoua ayokmo kineki kitekipanos Jehová, amo ximoiljuikaj san tlapik tlen inkichijkej. Jehová techkaua ma tijtlapejpenikaj tlaj tijtekipanosej o amo. Tlaj inmokone ayokmo kineki kitekipanos Jehová, ximotemachikaj sampa tlakuepilis. Uelis inkiilnamikisej tlapoualistli tlen nopa telpokatl katli kistej ichaj (Luc. 15:11-19, 22-24). Maske kiampa kichijki, teipa tlakuepilik. Nama uelis inmoiljuiaj: “Nopa eli san se tlapoualistli uan amo nelia pano”. Tlen  kipanok se telpokatl katli itoka Elie, kinextia ni kena pano.

17. ¿Kenijkatsa mitspaleuia tlen kipanok Elie?

¹⁷ Elie kiijtoua kenijkatsa kipaleuijkej itatauaj. Ya kiijtoua: “Maske kichijkej kampeka nechmachtisej tlen Biblia tlamachtia uan ma nikikneli toTeotsij, kema nimotelpokachijki ayokmo kuali nimonejnemiltik”. Nojkia, pejki kichiua tlen amo kuali uan ayokmo kinejki ma kipaleuikaj itatauaj nojua kuali tlaneltokas. Kistej ichaj uan ayokmo moyakanki ika Jehová itlanauatiljuaj. Maske kiampa kichijki, kemantika kikamanaljuiyaya tlen Biblia se iuampo. Elie kiijtoua: “Kema nijpouiliyaya nouampo tlen Biblia, kichiuayaya nojua tlauel ma nimoiljui ipan Jehová. Tlen notatauaj nechmachtijtoyaj kema nieliyaya niokichpil, pejki moskaltia ipan noyolo kej se xinachtli”. Teipa, Elie sampa tlakuepilik. * ¡Itatauaj tlauel yolpajkej pampa kimachtijkej kema nojua eliyaya okichpil! (2 Tim. 3:14, 15).

18. ¿Kenijkatsa tikinita tetajmej katli kichiuaj kampeka kinpaleuisej ininkoneuaj ma kiiknelikaj Jehová?

¹⁸ Tetajmej, Jehová inmechmakatok se ueyi tlateochiualistli: inkinpaleuisej inmokoneuaj ma kitekipanokaj toTeotsij (Sal. 78:4-6). Tijmatij eli ouij kiampa inkichiuasej, yeka tiinmechtlaskamatiliaj pampa chikauak intekitij. Nojua xijchijtokaj kampeka inkinpaleuisej inmokoneuaj ma kiiknelikaj Jehová uan ma moyakanakaj ika itlanauatiljuaj (Efes. 6:4). Tlaj kiampa inkichiuasej, uelis inmotemachisej toTeotsij katli tlauel teiknelia tlauel yolpakis uan kuali inmechitas.