1. Kej kiijtoua Proverbios 4:7, ¿kenke nochi tijnekij nojua tijpiasej toTeotsij itlalnamikilis?

 ¿MONEKTOK tijtlapejpenis se tlamantli tlen tlauel ipati? Tlaj kena, uelis monejki tijtlajtlanis Jehová ma mitsmaka tlalnamikilistli pampa tijnekiyaya tijmatis tlake tijchiuas (Sant. 1:5). Tlanauatijketl Salomón kiijkuilok: “Tlen más ipati ipan moyolis elis para tijtemos tlalnamikilistli” (xijpoua Proverbios 4:7). Kema kiijtok ni tlamantli, kamanaltik tlen nopa tlalnamikilistli tlen Jehová techmaka uan amo tlen maseualmej (Prov. 2:6). Uajka, ¿uelis techpaleuis tlalnamikilistli tlen Jehová techmaka? Kena. Ipan ni tlamachtili tikitasej kenijkatsa techpaleuis.

2. ¿Kenijkatsa uelis tijpiasej tlalnamikilistli?

² Uelis tijpiasej tlalnamikilistli tlaj timomachtisej uan tijchiuasej tlen kiijtojkej omej tlakamej katli tlauel tlalnamijkej. Achtoui, tikitasej tlen kichijki Salomón. Biblia kiijtoua “toTeko Dios kimakak Salomón miak tlalnamikilistli uan tlamachilistli” (1 Rey. 4:29). Teipa tikitasej tlen Jesús kichijki, katli ipan Tlaltipaktli san ya tlauel tlalnamijki (Mat. 12:42). Se tlajtolpanextili kiijtok ni tlamantli tlen Jesús: “Itonal toTeko motlalis ipan ya. Uan nopa tonaltsi kimakas tlamachilistli, [uan] tlalnamikilistli” (Is. 11:2).

3. ¿Tlake tikitasej ipan ni tlamachtili?

³ Salomón uan Jesús kiijtojkej tlake uelis tijchiuasej ipan se keski tlamantli tlen tlauel ipati, pampa Jehová kinmakak  tlalnamikilistli. Ipan ni tlamachtili tikitasej kenijkatsa techpaleuis tlen kiijtojkej ipan ni eyi tlamantli: 1) kenijkatsa moneki tikitasej tomij, 2) toteki uan 3) kej kinamiki timoitasej.

4. ¿Kenke Salomón uan Jesús amo san se kej itstoyaj?

⁴ Salomón tlauel tlatominpiayaya uan kipiayaya miak tlamantli tlen pajpatiyo (1 Rey. 10:7, 14, 15). Uan Jesús, amo tlapijpiayaya yon kipiayaya ichaj (Mat. 8:20). Maske amo sanse kej itstoyaj, kiitayayaj tlen kipixtoyaj kej kinamiki pampa moyakanayayaj ika Jehová itlalnamikilis.

5. ¿Kenijkatsa Salomón kiitayaya tomij?

⁵ Salomón kiijtok tomij uelis techpaleuis (Ecl. 7:12). Tomij techpaleuia ma tijpiakaj tlen ika timopanoltisej, uan kemantika uelis ika tijkouasej tlen techpaktis. Maske Salomón tlauel tlatominpiayaya, kiitak onka sekinok tlamantli tlen moneki nojua tlauel tijpatiitasej. Ya kiijtok: “Más kuali para tlakamej mitstlepanitasej pampa tijchiua tlen kuali uan axpara tijpiaskia miak tomij” (Prov. 22:1). Nojkia, kiitak katli kinekij kipiasej miak tomij, amo nochipa yolpakij ika tlen kipiaj (Ecl. 5:10, 12). Uan kiijtok uelis techpanos tlen amo kuali tlaj san timotemachiaj ipan tomij, pampa uelis amo nochipa tijpixtosej (Prov. 23:4, 5).

6. Kej kiijtoua Mateo 6:31-33, ¿kenijkatsa kiitayaya Jesús tlen kipixtoya?

⁶ Jesús kiitayaya kej kinamiki tlen kipiayaya, yeka yolpakiyaya ika nopa tlakualistli uan tlen kiiyaya (Luc. 19:2, 6, 7). Se tonali, kichijki atl ma mokuepa vino, uan elki nopa achtoui ueyi tlamantli tlen kichijki (Juan 2:10, 11). Nojkia, kema kimiktijkej mokentijtoya se yoyomitl tlen tlauel patiyo (Juan 19:23, 24). Maske kipixtoya se keski tlamantli, amo san nopa kipatiitayaya. Yeka, kiniljuik itokilijkauaj: “Axaka uelis kintekipanos omej itekojuaj [...], axueli inkitekipanosej toTeko intla inkikauiliaj ma inmechyoltilana  tomij” (Mat. 6:24). Jesús tlamachtik tlaj tikachtouitlaliaj tijtekipanosej toTeotsij, Jehová nochipa techmakas tlen monekis (xijpoua Mateo 6:31-33).

7. ¿Tlake tlateochiualistli kiselijtok se toikni pampa kiita tomij kej kinamiki?

⁷ Miakej toikniuaj uan tosiuaikniuaj tlauel kinpaleuijtok tlen Jehová tetlajtolmaka pampa kinekij kiitasej tomij kej kinamiki. Ma tikitakaj tlen kiijtok se toikni telpokatl katli itoka Daniel. Ya kiijtoua: “Kema nojua nieliyaya piltelpokatsi, nijtlapejpenik nikachtouitlalis nijtekipanos Jehová”. Daniel kichijtok kampeka amo tlauel tlapijpias, yeka ueltok kitekiuia tonali uan tlen kimati kichiuas, kiampa kinpaleuia toikniuaj kema kintlasojsoljuilia se tlenijki uan tlatekipanoua ipan Betel. Ya nojkia kiijtoua: “Amo kema nechyolkokojtok tlen nijtlapejpenik. Tlaj nimosentlalijtoskia nijtlanis miak tomij uan amo nijtekipanoskia Jehová, uelis nama amo nikinpiaskia miakej nouampoyouaj, uan nojkia amo niyolpakiskia. Maske tijpiasej miak tomij, amo kema uelis tijkouasej nochi tlateochiualistli tlen Jehová techmaka”. Tlaj timosentlaliaj tijtekipanosej Jehová uan amo tijpatiitaj tomij, tijselisej miak tlateochiualistli.

8. Kej kiijtoua Eclesiastés 5:18, 19, ¿kenijkatsa tijmatij Salomón kiitayaya tekitl kej kinamiki?

⁸ Salomón kiijtok eli kej “se regalo tlen toTeko” kema tiyolpakij pampa tijchiuaj se tekitl (xijpoua Eclesiastés 5:18, 19). Ya nojkia kiijtok: “Tlen tekitij kuali kiselisej inintlaxtlauil” (Prov. 14:23). Ya amo san techiljuik ma titekitikaj, pampa ya nojkia kiampa kichijki. Se neskayotl, ya kichijchijki miak kali, kitojki xokomekatl uan sekinok tlamantli, kichijki kampa kiajokuiskia atl uan kichijchijki uejueyi altepemej (1 Rey. 9:19; Ecl. 2:4-6). Kej tikitaj, Salomón tlauel tekitik. Uan maske tlauel yolpajki ika tlen kichijki, kimatiyaya monekiyaya kichiuas se keski tlamantli uan kiampa nelia yolpakiskia. Nojkia, kiyakanki chikome xiuitl nopa tekitl tlen mochijki kema kichijchijkej teokali kampa tlaueyichiuaskiaj. Ni tlauel kiyolpakiltik Jehová (1 Rey. 6:38; 9:1). Maske kichijki miak tlamantli, Salomón kiitak tlauel ipati tlaj kitekipanoskia toTeotsij. Yeka kiijkuilok: “Tlen nochi tlajtoli tlen nikijtojtok uan tlen inkikaktokej, ya ni tlen más ipati para nimitsiljuis: ‘Xikimakasi toTeko uan xijchiua tlen kiijtoua itlanauatiljuaj’” (Ecl. 12:13).

9. ¿Tlake kichijki Jesús uan kiampa kiitak tekitl kej kinamiki?

⁹ Jesús nojkia tlauel tekitik. Kema nojua eliyaya telpokatl, kuaximayaya (Mar. 6:3). Ya kinpiayaya miakej iikniuaj, yeka uelis itatauaj kitlaskamatiyayaj pampa kitlaniyaya se kentsi tomij tlen ika kinpaleuiyaya ma kikouakaj se keski tlamantli. Jesús eliyaya xitlauak, yeka uelis miakej kitekimakayayaj pampa kuali kichiuayaya iteki. Maske tlauel yolpakiyaya kema kuaximayaya, amo kikauayaya iteki ma kichiua ayokmo kuali kitekipanos iTata Jehová (Juan 7:15). Yeka kema pejki senkistok tlatekipanoua, kiijtok: “Amo tlauel ximokuatotonikaj san para inkitlanisej tlakualistli tlen inkikuasej mojmostla uan tlen nimantsi tlami. Más kuali ximokuatotonikaj para inkipantisej nopa tlakualistli tlen uejkauas uan tlen inmechmakas yolistli yankuik para nochipa” (Juan 6:27). Uan ipan Sermón del Monte nojkia kiijtok: “Xijnechikokaj tlen nelia ipati ne iluikak kampa  amo uelis kualos yon moxixas” (Mat. 6:20).

10. ¿Tlake ueliskia panos tlaj kuali tijchiuaj se tekitl?

¹⁰ Jehová techmaka tlalnamikistli tlen techpaleuia tikitasej tekitl kej kinamiki. Nochi moneki tijchiuasej kampeka titekitisej uan kuali tijchiuasej toteki (Efes. 4:28). Kemantika, katli techtekimakatok kiita kuali titekitij uan amo titlachtekij, yeka uelis techiljuis tlauel kipaktia kej tijchiuaj toteki. Uelis kemantika tijnekisej nojua tlauel titekitisej pampa tijnekij katli techtekimakatok kuali ma kinita Jehová itlajtoltemakauaj. Tlaj kiampa tijchiuasej, uelis ayokmo tiitstosej ininuaya tochampoyouaj uan ayokmo kuali titlatekipanosej. Kema kiampa techpanos, monekis tijchiuasej se tlamantli uan kiampa tikitasej tekitl kej kinamiki.

11. ¿Tlake kiyekok William tlen se ueuejtlakatl?

¹¹ William, se toikni katli nojua telpokatl, kiijtok kiyekok moneki kiitas iteki kej kinamiki. Se keski tonali kipaleuik se ueuejtlakatl ika se keski tekitl. William kiijtoua tlen nopa ueuejtlakatl: “Ya eli se kuali neskayotl pampa kiita tekitl kej kinamiki. Kipaktia tekitis uan kuali kichiua, yeka miakej kinpaktia kej tekiti. Kema tlami tekiti, itstok ininuaya ichampoyouaj uan nojkia kuali kitekipanoua Jehová. ¡Nesi nochipa yolpaktok!”. *

12. ¿Kenijkatsa Salomón kinextik moitayaya kej kinamiki, uan tlake kipanok teipa?

¹² Kema Salomón nojua kuali kitekipanouayaya Jehová, moitayaya kej kinamiki. Kema nojua eliyaya telpokatl uan pejtoya tlanauatia, kiitak amo ueliyaya kichiua se keski tlamantli uan yeka kiiljuik Jehová ma kiyakana (1 Rey. 3:7-9). Nojkia, kiitak tlauel mauilili tlaj moueyimatiskia. Ya kiijtok: “Aki achtoui moueyimati, teipa motepotlamis, uan aki achtoui motlepanita teipa uetsis uan tlauel  mokokos” (Prov. 16:18). Maske kimajtoya ni tlamantli, teipa kiilkajki. Kema ya tekichijtoya se keski xiuitl, pejki moueyimati uan kiixpanok toTeotsij itlanauatiljuaj. Se neskayotl, ipan nopa Tlanauatili nojkia kiijtouayaya tlen monekiyaya kichiuasej tlanauatianij tlen Israel: “Axkinamiki para se tlanauatijketl ma kinpias miak[ej] siuamej pampa kikixtisej tlen iojui toTeko” (Deut. 17:17). Salomón amo kineltokak ni tlanauatili uan yeka kinpixki 700 isiuajuaj uan 300 iompakasiuajuaj, uan miakej amo kitekipanouayayaj Jehová (1 Rey. 11:1-3). Uelis kiampa kichijki pampa moiljuik amo tleno kipanoskia. Tlaj kiampa moiljuik o amo, ya tlauel tlaijiyouik pampa kitlauelkajki Jehová (1 Rey. 11:9-13).

13. ¿Tlake tijyekouaj tlen Jesús kichijki?

¹³ Jesús amo moueyimatki uan nochipa moitak kej kinamiki. Kema ayamo ualayaya ipan Tlaltipaktli, kipaleuik Jehová ipan se keski tekitl. Colosenses 1:16 kiijtoua: “ToTeko kitekimakak Cristo ma kichijchiua nochi tlen onka ipan iluikak uan nochi ipan Tlaltipaktli”. Uelis kema Jesús moatsonpoliuiltik kiilnamijki tlen kichijtoya iuaya iTata ipan iluikak (Mat. 3:16; Juan 17:5). Maske kiilnamijki nochi tlen kichijtoya, amo kema moueyimatki. Nojkia, ika tlen kichijki kinextik amo moiljuiyaya san ya tlauel ipati. Ya kiniljuik itokilijkauaj: “Axniualajtok para nikinnauatis tlakamej ma nechtekipanokaj. ¡Axtle! Niualajtok para nikintekipanos tlakamej, uan para nimotemaktilis uan nimikis para nitlaxtlauas tlen moneki para nikintojtomas miak[ej] [maseualmej]” (Mat. 20:28). Nojkia kiijtok kichiuayaya tlen Jehová kinauatiyaya uan amo san tlen ya kinekiyaya (Juan 5:19). ¡Jesús amo kema moueyimatki! Nojkia tijnekij tijchiuasej kej ya.

14. ¿Kenijkatsa tlen Jesús kiijtok techpaleuia ma timoitakaj kej kinamiki?

¹⁴ Jesús kiniljuik itokilijkauaj monekiyaya moitasej kej kinamiki. Se tonali, kiniljuik: “ToTeko inmechmokuitlauia hasta  kimati keski inmotsonkal inkipiaj” (Mat. 10:30). Tlauel techyolchikaua tlen kiijtoua ni texto pampa kemantika uelis tijmatij amo topati. Nopaya techilnamikilia toTata Jehová kitekipachoua tlen techpano uan tlauel techpatiita. Tlaj ya kiita uelis kuali tijtekipanosej uan uelis tijpiasej nemilistli tlen axkema tlamis, amo kinamiki timoiljuisej mokuapoloua.

15. 1) Kej kiijtoua La Atalaya, ¿kenijkatsa kinamiki timoitasej? 2) Kej nesi ipan tlaixkopinkayomej tlen iamayo 24, ¿tlake panos tlaj san timosentlaliaj ipan tojuantij?

¹⁵ Ipan La Atalaya tlen kiski ipan xiuitl 2005, kiijtok moneki timoitasej kej kinamiki, nopaya kiijtoua: “Amo kinamiki timoiljuisej tlauel topati uan timoueyimatisej yon kinamiki timoiljuisej amo tleno topati. Moneki tijchiuasej kampeka timoitasej kej kinamiki uan tikitasej tlen kena ueli tijchiuaj uan tlake amo. Se tosiuaikni kiijtok: ‘Maske nijnextia se keski kuajkuali tlamantli, nojkia nijmati amo san na tlauel kuali noyolo, pampa nojkia nimokuapoloua kej sekinok. Yeka, nimoita kej kinamiki’”. * Kej tikitaj, tlauel kuali tlaj nojkia kiampa timoitaj.

16. ¿Kenke Jehová techiljuia tlen techpaleuia?

¹⁶ Jehová techiljuia miak tlamantli ipan Biblia tlen tlauel techpaleuia. Kiampa kichiua pampa techiknelia uan kineki ma tiyolpakikaj (Is. 48:17, 18). Yeka, moneki tijchiuasej kampeka tikachtouitlalisej tijtekipanosej pampa nopa kichiuas nelnelia ma tiyolpakikaj. Nojkia, amo titlaijiyouisej kej miakej maseualmej katli san mosentlalijtokej kipiasej miak tomij, tlauel tekitij o san mosentlaliaj ipan inijuantij. Uajka, nochipa ma tijnextikaj titlalnamikij, kiampa tijyolpakiltisej Jehová (Prov. 23:15).