1. ¿Tlake tlamantli tijmatij ouij tijchiuasej?

 ¿TIJMATI ouij tijchiuas se tlamantli tlen timosentlalijtok? Amo san ta kiampa mitspano. Philip kiampa kipanok, maske mosentlalijtoya nochipa momaijtos, kemantika kimatiyaya ouij kikixtis tonali uan kiampa kichiuas. Uan Erika, maske mosentlalijtoya asis kualka ipan tlanechikoli tlen mochiua kema tlajtolmoyauaj, san kemantika asiyaya kualka. Uan Tomás kinekiyaya kitlamipouas Biblia. Ya kiijtoua: “Amo nechpaktiyaya nijpouas Biblia. Expa nijpeualtik uan san nimokauayaya ipan Levítico”.

2. ¿Kenke amo kinamiki timokuesosej tlaj ayamo tijchiuaj se tlamantli tlen timosentlalijtokej?

² Tlaj tijchiua kampeka tijchiuas tlen timosentlalijtok uan tijmati ouij, amo ximokueso. Kemantika maske amo ouij tlen timosentlalijtok, monekis tijkauas ma pano tonali uan tijchiuas kampeka. Kema kiampa tijchiua, tijnextia tijpatiita timouampojchijtos iuaya Jehová uan tijneki kuali tijtekipanos. Jehová kiita tlen tijchiua uan amo mitsiljuia xijchiua tlen amo tiueli (Sal. 103:14; Miq. 6:8). Yeka xikita tlaj nelnelia uelis tijchiuas tlen timosentlalijtok. Uan tlaj tikita kena tiuelis, ¿tlake mitspaleuis? Ma tikitakaj tlen uelis tijchiuas.

3. ¿Kenijkatsa techpaleuia kema tijnekij tijchiuasej se tlamantli ika nochi toyolo?

³ Tlaj tijnekij tijchiuasej tlen timosentlalijtokej, moneki tijnekisej tijchiuasej ika nochi toyolo pampa nopa techpaleuis tijchiuasej tlen timosentlalijtokej. Kema tijnekij tijchiuasej se tlamantli ika nochi toyolo, eli kejuak  nopaajakatl tlen kipaleuia ma molini se barco. Tlaj tlaajakatok, kichiuas nopa barco ma asiti kampa yaui. Uan tlaj tlauel tlaajakas, uelis kichiuas nima ma asiti. Nojkia, tlaj tijnekij tijchiuasej tlen timosentlalijtokej, moneki tijchiuasej ika nochi toyolo. Toikni David, katli eua El Salvador, kiijtoua: “Kema tijnekis tijchiuas se tlamantli ika nochi moyolo, mitspaleuis xijchiua kampeka. Uan amo tijkauas yon se tlamantli ma mitstsakuili tijchiuas tlen timosentlalijtok”. Uajka, ¿tlake mitspaleuis tijnekis tijchiuas ika nochi moyolo se tlamantli?

4. ¿Tlake uelis tijtlajtlanisej Jehová? (Filipenses 2:13; nojkia xikita tlaixkopinkayotl).

⁴ Xikiljui Jehová ma mitspaleui tijnekis tijchiuas se tlamantli ika nochi moyolo. Jehová mitspaleuis ika itonal tijnekis tijchiuas tlen timosentlalijtok (xijpoua Filipenses 2:13). Uelis kemantika timochiualtiaj tijchiuasej se tlamantli pampa tijmatij kiampa moneki tijchiuasej uan amo pampa nelnelia tijnekij. Kiampa kipanok tosiuaikni Norina, katli eua Uganda. Maske mosentlalijtoya kimachtis se akajya, amo kichiuayaya pampa moiljuiyaya amo ueliskia tlamachtis. ¿Tlake kipaleuik? Ya kiijtoua: “Maske mojmostla nikiljuiyaya Jehová ma nechpaleui nijnekis nijmachtis se akajya ika nochi noyolo, na nojkia nijchijki kampeka kuali nitlamachtis. Kema panok se keski metstli, nikitak ya pejtoya nitlamachtia ika nochi noyolo. Yeka ipan nopa xiuitl pejki nikinmachtia omej maseualmej”.

5. ¿Ipan tlake tlamantli uelis timoyoliljuisej?

⁵ Ximoyoliljui kenijkatsa Jehová mitspaleuijtok (Sal. 143:5). Apóstol Pablo moyoliljuik kenijkatsa Jehová kipaleuijtoya uan nopa kipaleuik ma kitekipano ika nochi iyolo (1 Cor. 15:9, 10; 1 Tim. 1:12-14). Tlaj timoyoliljuia kenijkatsa Jehová mitspaleuijtok, tijnekis tijchiuas tlen timosentlalijtok (Sal. 116:12). Ma tikitakaj tlake kipaleuik se tosiuaikni katli eua Honduras ma mochiua precursora regular. Ya kiijtoua: “Pejki nimoyoliljuia kenijkatsa Jehová tlauel nechiknelia. Kichijki ma niitsto ipan itlanechikol uan nechmokuitlauia. Kema nimoyoliljuik ipan nopa tlamantli, nechpaleuik nojua tlauel ma nikikneli Jehová uan nojua tlauel nijnejki nitlatekipanos kej precursora regular”.

6. ¿Tlake seyok tlamantli techpaleuis ma tijnekikaj tijchiuasej tlen timosentlalijtokej?

⁶ Ximoiljui kenijkatsa mitspaleuis tlaj tijchiuas tlen timosentlalijtok. Sampa ma tikitakaj tlen kichijki Erika, katli tikijtojkej ipan párrafo se. ¿Tlake kipaleuik kualka ma asi ipan tlanechikoli tlen mochiua kema titlajtolmoyauaj? Ya kiijtoua: “Nikitak tlaj niasiskia kualka ueliskia nikintlajpalos uan nikamanaltis ininuaya toikniuaj. Uan nojkia ueliskia nijyekos miak tlamantli tlen nechpaleuiskia nojua kuali nitlajtolmoyauas”. Erika mosentlalik ipan  tlen ueliskia kichiuas tlaj asiskia kualka, uan nopa kipaleuik kiampa ma kichiua. Uan ta, ¿kenijkatsa mitspaleuis tlaj tijchiuas tlen timosentlalijtok? Tlaj timosentlalijtok tijpouas Biblia, ximoiljui kenijkatsa mitspaleuis nojua timonechkauis ika Jehová (Sal. 145:18, 19). Uan tlaj tijneki tijnextis kuajkuali tlamantli ipan monemilis, ximoiljui kenijkatsa mitspaleuis kuali timouikas ininuaya sekinok (Col. 3:14). ¿Tlake sekinok tlamantli uelis tijchiuas? Xikijkuilo kenke tijneki tijchiuas tlen timosentlalijtok uan xijtlachili kemantika, kiampa amo tikilkauas. Tomás, katli tikijtojkej ipan párrafo se, kiijtoua: “Kema nikita kenijkatsa nechpaleuis tlaj nijchiuas tlen nimosentlalijtok, nechpaleuia amo ma nijtlajkokaua tlen nimoiljuijtok nijchiuas”.

7. ¿Tlake kichijkej Julio iuaya isiua pampa kinekiyayaj kichiuasej tlen mosentlalijtoyaj?

⁷ Ximouika ininuaya katli uelis mitspaleuisej (Prov. 13:20). Julio uan isiua kinekiyayaj tlatekipanotij kampa monekij tlajtolmoyauanij. Ya kiijtoua tlake kinpaleuik: “Tikintemojkej touampoyouaj katli ueliskiaj techyolchikauasej uan tikiniljuiyayaj tlen tijnekiyayaj tijchiuasej. Miakej tlen inijuantij ya kichijtoyaj tlen mosentlalijtoyaj, yeka tlen techiljuiyayaj tlauel techpaleuiyaya. Techtlajtlaniyayaj tlaj ya timokualchijchijtiauiyayaj uan nojkia techyolchikauayayaj”.

8. ¿Tlake uelis techpanos tlaj tijchiuaj se tlamantli san kema tijnekij? (Nojkia xikita tlaixkopinkayotl).

⁸ Kemantika uelis amo tijnekij tijchiuasej se tlamantli ika nochi toyolo. Uajka, ¿kinamiki tijtlajkokauasej tlen timosentlalijtokej? Amo. Sampa ma tikitakaj kenijkatsa nopa ajakatl kiolinia se barco. Maske nopa ajakatl uelis kiuikas nopa barco kampa asiti, amo nochipa chikauak tlaajaka o kemantika amo tlaajaka. Uajka, katli kiuika nopa barco, ¿amo uelis asiti kampa yaui? Kena pampa uelis kitekiuis se motor o remos uan kiampa asiti kampa yaui. Tojuantij nojkia uelis kiampa techpanos, kemantika tlauel tijnekisej tijchiuasej se tlamantli uan kemantika amo. Yeka, tlaj amo tijpiaskiaj sekinok tlapaleuili, amo ueliskia tijchiuasej tlen timosentlalijtokej. Sanse kej katli kiuika nopa barco kiita kenijkatsa kichiuas uan kiampa asiti kampa yaui, tojuantij nojkia uelis tijchiuasej tlen timosentlalijtokej maske kemantika tijmatisej ouij. Tlaj kiampa tijchiuasej, tlauel techpaleuis. Achtoui tikitasej se tlajtlanili tlen mochiuiliaj toikniuaj uan teipa tikitasej tlake techpaleuis tijchiuasej se tlamantli ika nochi toyolo.

9. ¿Kinamiki timochiualtisej tijchiuasej se tlenijki maske amo tijnekij?

⁹ Jehová kineki ma tijtekipanokaj ika pakilistli uan ika nochi toyolo (Sal. 100:2; 2 Cor. 9:7). Uajka, ¿kinamiki tijchiuasej  se tlamantli tlaj amo tijnekij tijchiuasej ika nochi toyolo? Ma tikilnamikikaj tlen kichijki apóstol Pablo. Ya kiijtok: “Na nijnauatia notlakayo uan nijchiua ma eli notekipanojka” (1 Cor. 9:25-27). Pablo mochiualtik kichiuas tlen Jehová kinekiyaya maske kemantika amo kinekiyaya kichiuas ika nochi iyolo. ¿Kuali kiitak Jehová tlen kichijki Pablo? Kena, yeka kiteochijki (2 Tim. 4:7, 8).

10. ¿Tlake tlateochiualistli uelis tijpiasej tlaj tijchiuaj tlen timosentlalijtokej maske amo tijnekij?

¹⁰ Jehová kipaktia kema tijchiuaj kampeka tijchiuasej se tlamantli maske kemantika amo tijnekij. ¿Kenke? Pampa maske amo techpaktia tlen timosentlalijtokej tijchiuasej, tijchiuaj pampa tikikneliaj. Jehová kiteochijki Pablo uan nojkia techteochiuas tlaj tijchiuaj kampeka (Sal. 126:5). Uan kema tikitasej Jehová techteochiua, nopa techyololinis tijchiuasej tlen timosentlalijtokej. Tosiuaikni Lucyna, katli eua Polonia, kiijtoua: “Maske kemantika amo nijneki nias nitlajtolmoyauati pampa nisiajtok, kema nia nitlajtolmoyaua uan nitlakuepilia nochaj, tlauel niyolpaki. Nikita tlajtolmoyaualistli kej se ueyi tlateochiualistli”. Nama ma tikitakaj tlake techpaleuis kema amo tijnekij tijchiuasej se tlamantli.

11. ¿Kenijkatsa techpaleuia Jehová kuali ma timonauatikaj?

¹¹ Xikiljui Jehová ma mitspaleui kuali timonauatis. Se akajya katli kuali monauatia, kuali kinauatia tlen kiyolmati uan tlen kichiua. Ni kuali tlamantli techpaleuia amo ma tijchiuakaj tlen amo kuali, ma tijchiuakaj tlen kuali uan ma tijchiuakaj se tlamantli maske tijmatij ouij o amo tijnekij. Ma tikilnamikikaj toTeotsij itonal techpaleuia ma tijnextikaj ni kuali tlamantli. Uajka, tlaj tijtlajtlaniaj Jehová ma techmaka itonal, techpaleuis ma timonauatikaj (Luc. 11:13; Gál. 5:22, 23). David, katli tikijtojkej ipan párrafo eyi, mosentlalik kichiuas kampeka momachtis Biblia. Ya kiijtoua tlauel kipaleuik tlamaijtoli: “Nikiljuik Jehová ma nechpaleui kuali nimonauatis, uan nelia nechpaleuik. Nojkia nikitak tlake uan kema ueliskia nimomachtis uan nojua kiampa nijchijtok”.

12. ¿Kenijkatsa techpaleuia Eclesiastés 11:4 ma timosentlalikaj nojua tlauel tijtekipanosej Jehová?

¹² Amo xijchia nochi kuali ma elto ipan monemilis. Ipan ni tonali amo nochipa kuali tiitstosej. Tlaj san timochiasej, uelis amo kema tijchiuasej tlen timosentlalijtokej (xijpoua Eclesiastés 11:4). Toikni Dayniel, kiijtoua: “Amo kema kuali tiitstosej. Yeka tlaj nima tijchiuas se tlamantli, tlauel mitspaleuis”. Toikni Paul katli eua Uganda nojkia kiijtoua kenke amo moneki timochias: “Kema timosentlalis tijchiuas se tlamantli maske amo kuali tiitstok, tijkaua Jehová ma mitsteochiua” (Mal. 3:10).

13. ¿Kenijkatsa techpaleuia kema achtoui tijchiuaj tlen amo tlauel ouij?

¹³ Achtoui xijchiua tlen amo ouij. Uelis kemantika amo tijnekij tijchiuasej tlen timosentlalijtokej pampa timoiljuiaj eli ouij. Tlaj kiampa timoiljuiaj, uajka uelis tijxejxelosej. Se neskayotl, tlaj tijneki tijnextis se kuali tlamantli ipan monemilis, uajka ika yolik xijnextijtia. Uan tlaj tijneki nochipa tijpouas Biblia, uelis timosentlalis mojmostla tijpojtias san se keski versículos. Tomás, katli tikijtojkej kampa peua ni tlamachtili, tlauel ouij kimatiyaya kitlamipouas Biblia san ipan se xiuitl. Ya kiijtoua: “Nikitak  tlauel ouij nijtlamipouas Biblia ipan se xiuitl, yeka nimosentlalik yolik nijpojtias. Nimosentlalik nijpouas mojmostla san se keski versículos uan nimoyoliljuis. Yeka pejki tlauel nechpaktia nitlapouas”. Tomás pejki tlauel kipaktia tlapouas, yeka teipa pejki uejkaua kipoua Biblia uan kitlamipojki. b

14. ¿Tlake tlaouijkayotl uelis techtsakuilis?

¹⁴ Maske tijnekisej tijchiuasej se tlamantli ika nochi toyolo, kemantika tikixnamikisej tlaouijkayotl. Kemantika techpanos tlen amo kuali, tlen kichiuas ma timotonalpolokaj uan uelis kichiuas ayokmo ma timosentlalikaj ipan tlen tijnekij tijchiuasej (Ecl. 9:11). O uelis tikixnamikisej se tlaouijkayotl tlen kichiuas ayokmo ma tijpiakaj chikaualistli (Prov. 24:10). Nojkia pampa titlajtlakolejkej, uelis tijchiuasej se tlamantli tlen kichiuas ayokmo ma tijchiuakaj tlen timosentlalijtokej (Rom. 7:23). O uelis amo tijnekij tijchiuasej tlen timosentlalijtokej pampa tisiajtokej (Mat. 26:43). ¿Tlake techpaleuis kema tikixnamikisej se keski tlaouijkayotl?

15. ¿Kenke tijchiuaj kampeka tijchiuasej tlen timosentlalijtokej maske tikixnamikij tlaouijkayotl? (Salmo 145:14).

¹⁵ Amo ximoiljui ayokmo uelis tijchiuas tlen timosentlalijtok pampa tikixnamiki se tlaouijkayotl. Maske Biblia kiijtoua tikixnamikisej miak tlaouijkayotl, nojkia kiijtoua ika Jehová itlapaleuil uelis tijchiuasej tlen timosentlalijtokej (xijpoua Salmo 145:14). Philip, katli tikijtojkej ipan párrafo se, kiampa moiljuia: “Na san nimosentlalia nijchiuas tlen nimoiljuijtok. Uan amo san nimosentlalia kema nijtlajkokaua se tlenijki o kema nimokuapoloua”. Sampa ma tikitakaj tlen kipanok David. Ya kiijtoua: “Kema nijmati ouij nijchiuas tlen nimosentlalijtok o  nechpano se tlenijki tlen amo kuali, amo nijkaua ma nechtsakuili nijchiuas tlen nimosentlalijtok. Nimoiljuia nopa tlaouijkayotl uelis kichiuas ma nijnexti nikiknelia Jehová”. Kema tijchiuaj kampeka tijchiuasej tlen timosentlalijtokej maske tikixnamikij tlaouijkayotl, tijnextiaj tijnekij tijyolpakiltisej Jehová. Ya yolpaki kema kiita tijchiuaj kampeka tijchiuasej tlen timosentlalijtokej.

16. ¿Tlake uelis tijchiuasej tlaj tikixnamikij se tlamantli tlen ouij?

¹⁶ Kema tikixnamiki se tlaouijkayotl, xijchiua kampeka tijyekos sekinok tlamantli. Kuali xikita tlen mitspano uan ximotlajtlani: “¿Tlake uelis nijchiuas uan kiampa amo tleno nechtsakuilis?” (Prov. 27:12). Uan tlaj ya tijchijkej kampeka tijchiuasej tlen timosentlalijtokej uan amo tiuelij, ¿moneki tijpatlasej tlen timosentlalijtokej? Tlaj tijneki tijmatis tlaj moneki tijpatlas tlen tijnekij tijchiuas, ximoiljui tlaj nelnelia tiuelis. c Jehová nojua kuali mitsitas maske amo tijchijki nopa tlamantli tlen amo tiueliskia (2 Cor. 8:12).

17. ¿Kenijkatsa techpaleuis tlaj tikilnamikisej tlen ya tijchijkej?

¹⁷ Xikilnamiki tlen ya tijchijki. Biblia kiijtoua Jehová “axkiilkauas nopa tekitl tlen inkichijtokej” (Heb. 6:10). Uajka, nojkia xikilnamikto tlen ya tijchijki. Ximoiljui kenijkatsa tijchijki se keski tlamantli tlen timosentlalijtoya, kej kema pejki timouampojchiua iuaya Jehová, kema pejki titlajtolmoyaua uan kema timoatsonpoliuiltik. Tlen ya tijchijki, kinextia uelis tijchiuas sekinok tlamantli tlen timosentlalijtok (Filip. 3:16).

18. ¿Tlake moneki tikilnamiktos kema tijchiua kampeka tijchiuas tlen timosentlalijtok? (Nojkia xikita tlaixkopinkayotl).

¹⁸ Ika Jehová itlapaleuil uelis tijchiuas tlen timosentlalijtok. Sanse kej nopa tlakatl katli kiuika nopa barco yolpaki kema onasi kampa yaui, ta nojkia uelis tiyolpakis tlaj tijchiuas tlen timosentlalijtok. Katli kiuika se barco tlauel yolpaki kema kiuika pampa tlajtlachixtia. Ta nojkia uelis tiyolpakis kema tikitas kenijkatsa Jehová mitspaleuia pampa tijchiua kampeka tijchiuas tlen timosentlalijtok (2 Cor. 4:7). Tlaj nojua tijchijtos kampeka, tikitas kenijkatsa Jehová tlauel mitsteochiuas (Gál. 6:9).