TLAMACHTILI 21
¿Kenijkatsa technankilia Jehová kema timomaijtouaj?
“Tijmatij temachtli yajaya techmakas nopa tlen tijtlajtlanijtokej” (1 JUAN 5:15).
UIKATL 41 Jehová xijkaki notlamaijtol
TLEN MOIXTOMAS a
1, 2. ¿Tlake uelis timotlajtlaniaj?
¿NOJKIA timotlajtlanijtok tlaj Jehová mitstlakakilia kema timomaijtoua? Amo san ta kiampa mitspanotok. Miakej toikniuaj nojkia kiampa motlajtlanijtokej kema kiixnamikij tlaouijkayotl. Tlaj tikixnamiktokej se tlaouijkayotl, uelis timoiljuisej Jehová amo techtlakakilia.
2 Ipan ni tlamachtili tikitasej kenke uelis timotemachisej Jehová kena kintlakakilia kema momaijtouaj itekipanojkauaj (1 Juan 5:15). Nojkia tikitasej kenke kemantika uelis timoiljuisej Jehová amo techtlakakilia uan kenijkatsa technankilia.
JEHOVÁ AMO NOCHIPA TECHNANKILIS KEJ TIJNEKISKIAJ
3. ¿Kenke kineki Jehová ma timomaijtokaj?
3 Biblia kiijtoua Jehová tlauel techiknelia uan techpatiita (Ageo 2:7; 1 Juan 4:10). Yeka techiljuia ma timomaijtokaj uan ma tijtlajtlanikaj ma techpaleui (1 Ped. 5:6, 7). Jehová kineki techpaleuis ma tiitstokaj inechka uan kiampa uelis tikijiyouisej nochi kuesoli.
Jehová kitlakakilik David, yeka kimakixtik tlen ikualankaitakauaj. Uan Pablo kimakak chikaualistli uan kiampa kiijiyouik tlen kipanok. (Xikita párrafo 4).
4. Xikijto kenke timotemachia Jehová kena kintlakakilia itekipanojkauaj (nojkia xikita tlaixkopinkayotl).
4 Onka miak tlapoualistli ipan Biblia kampa kiijtoua Jehová kintlakakilik itekipanojkauaj kema momaijtojkej. Uelis tikilnamikij tlen kipanok tlanauatijketl David. Maske kinpixki miakej ikualankaitakauaj, nochipa momaijtouayaya uan kiiljuiyaya Jehová ma kipaleui. Se tonali kiiljuik Jehová ika nochi iyolo: “¡TOTEKO, xijtlakakili tlen nimomaijtoua ika ta! Xinechnankili pampa ta titemachtli uan san tlen kuali tijchiua” (Sal. 143:1). Uan Jehová nelia kitlakakilik uan kipaleuik (1 Sam. 19:10, 18-20; 2 Sam. 5:17-25). Yeka David kiijtok: “TOTEKO itstok ininnechka nochi tlen kinotsaj”. Uan tojuantij nojkia uelis timotemachisej kej ya (Sal. 145:18).
Jehová kitlakakilik David, yeka kimakixtik tlen ikualankaitakauaj. Uan Pablo kimakak chikaualistli uan kiampa kiijiyouik tlen kipanok. (Xikita párrafo 5).
5. ¿Nochipa kichijki Jehová tlen kitlajtlanijkej itekipanojkauaj? Xikijto se neskayotl. (Nojkia xikita tlaixkopinkayotl).
5 Uelis Jehová amo nochipa kichiuas tlen tijtlajtlaniaj. Kiampa kipanok apóstol Pablo, ya kipixtoya kejuak “se uitstli” ipan itlakayo o se tlaouijkayotl, yeka expa kiiljuik Jehová ma kikixtili. ¿Kitlakakilik Jehová kema momaijtok? Kena, maske amo kikixtilik nopa tlaouijkayotl, kipaleuik nojua kuali ma tlatekipano (2 Cor. 12:7-10).
6. ¿Kenke kemantika uelis timoiljuisej Jehová amo technankilia?
6 Maske Jehová amo technankilis kej tijnekiskiaj, uelis timotemachisej ya kimati tlake techpaleuis. Efesios 3:20 kiijtoua ya uelis “kichiuas onpano más miak [tlamantli] uan axkeja nochi tlen ueli tijtlajtlaniaj o tlen tiuelij timoiljuiaj”. Uajka, ya uelis technankilis kema amo tijchiaj o kej amo timoiljuijtokej.
7. ¿Kenke kemantika moneki tijpatlasej tlen tijtlajtlaniaj Jehová? Xikijto se neskayotl.
7 Kema kuali tijkuamachiliaj tlen Jehová kineki, kemantika kichiuas ma tijpatlakaj tlen tijtlajtlaniaj. Ma tikitakaj tlen kipanok toikni Martin Poetzinger. Kema ayamo panotoya miak tonali mosenkajtoya, kitsajkej kampa nazis kinchiualtiyayaj ma tekitikaj. Maske kitlajtlaniyaya Jehová ma kipaleui sampa itstos iuaya isiua uan tlajtolmoyauas, amo kiampa panok pampa panok ome semana uan nojua tsaktoya. Yeka toikni Poetzinger sampa momaijtok uan kiiljuik Jehová: “Xinechpaleui nikitas tlake tijneki ma nijchiua”. Nopa kipaleuik ma moiljui tlen kiixnamikiyayaj toikniuaj katli nojkia tsaktoyaj. Miakej tlen inijuantij kinekiyayaj kimatisej kenijkatsa itstokej ininsiuajuaj uan ininkoneuaj. Yeka toikni Poetzinger sampa kiiljuik Jehová: “Tlaskamati pampa tinechmakatok se yankuik tekitl. Xinechpaleui nikinyolchikauas noikniuaj”. Uan nelia tlauel kinyolchikajki ipan nopa chiknaui xiuitl kema kitsaktoyaj.
8. ¿Tlake moneki tikilnamikisej kema timomaijtouaj?
8 Ma tikilnamikikaj Jehová kichiuas tlen mosentlalijtok kema kinamiki. Ya mosentlalijtok kitsontlamiltis tlen techtlasojsoljuilia, kokolistli, mikilistli uan sekinok tlamantli tlen techtlaijiyouiltia. Ya kitsontlamiltis nochi ni tlamantli ika iTlanauatijkayo (Dan. 2:44; Apoc. 21:3, 4). Maske kiampa kichiuas, ipan ni tonali nojua kikajtok Satanás ma tlanauati (Juan 12:31; Apoc. 12:9). b Tlaj Jehová kitsontlamiltiskia nochi tlen techtlaijiyouiltia, timoiljuiskiaj Satanás kena kuali tlanauatia. Uajka, maske ayamo asi nopa tonali kema Jehová kichiuas tlen mosentlalijtok, ya techpaleuijtos. Ma tikitakaj kenijkatsa techpaleuia.
¿KENIJKATSA TECHNANKILIA JEHOVÁ KEMA TIMOMAIJTOUAJ?
9. ¿Kenijkatsa techpaleuia Jehová ika tlen tijtlapejpeniaj? Xikijto se neskayotl.
9 Techmaka tlalnamikilistli. Jehová kiijtojtok techmakas tlalnamikilistli uan kiampa kuali tijtlapejpenisej tlen tijchiuasej. Uan tlauel moneki tijtlajtlanisej ma techmaka tlalnamikilistli kema tijtlapejpenisej tlen tlauel ipati ipan tonemilis, kej tlaj timosenkauasej o amo (Sant. 1:5). Ma tikitakaj tlen kipanok tosiuaikni María. c Kema tlatekipanouayaya kej precursora regular, kiixmatki se toikni. Ya kiijtoua: “Pejki kuali timouampojchiuaj, teipa pejki timoixtokaj. Monekiyaya nijtlapejpenis tlake nijchiuas. Maske nijmatiyaya na monekiyaya nijtlapejpenis tlake nijchiuas, tlauel nimomaijtok uan nikiljuik Jehová ma nechyakana”. María kiitak kenijkatsa Jehová kinankilik uan kimakak tlalnamikilistli. ¿Kenijkatsa kiyakanki? Kitemok tlamachtili ipan amatlajkuiloli uan kipantik tlen tlauel kipaleuik. Nojkia inana, katli kitekipanoua Jehová, kipaleuik ma moiljui tlake kichiuaskia ika tlen kiyolmatiyaya. Yeka María kuali kitlapejpenik tlen kichijki.
¿Kenijkatsa Jehová techmaka chikaualistli uan kiampa ueli tikijiyouiaj tlen techpano? (Xikita párrafo 10).
10. Kej kiijtoua Filipenses 4:13, ¿kenijkatsa Jehová kinpaleuis itekipanojkauaj? Xikijto se neskayotl. (Nojkia xikita tlaixkopinkayotl).
10 Techmaka chikaualistli. Jehová kimakak chikaualistli apóstol Pablo uan tojuantij nojkia techmakas kema tikixnamikisej tlaouijkayotl (xijpoua Filipenses 4:13). Ma tikitakaj kenijkatsa kipaleuik toikni Benjamín. Kema nojua eliyaya telpokatl, miak xiuitl itstoya ininuaya ichampoyouaj kampa momanauiaj maseualmej ipan África. Ya kiijtoua: “Nochipa nimomaijtouayaya uan nikiljuiyaya Jehová ma nechpaleui nijchiuas tlen kuali. Ya nechpaleuik pampa nechmakak tlaseuilistli, kichijki amo ma nimajmaui nitlajtolmoyauas uan nechpaleuik kuali ma nitlaneltoka ika pilamochtsitsij”. Ya nojkia kiijtoua: “Kema nijpojki tlen kinpanotok toikniuaj uan nikitak kenijkatsa Jehová kinpaleuik, nechpaleuik amo ma nijtlauelkaua Jehová”.
¿Tikitstok kenijkatsa Jehová kintekiuijtok toikniuaj uan kiampa mitspaleuijtok? (Xikita párrafos 11, 12). d
11, 12. ¿Kenijkatsa Jehová uelis kintekiuis toikniuaj uan kiampa technankilis kema timomaijtouaj? (Nojkia xikita tlaixkopinkayotl).
11 Techpaleuia ika toikniuaj. Kema nechka kimiktiskiaj Jesús, tlauel momaijtok. Maseualmej kiijtouayayaj kitlaijiljuiyaya Jehová, yeka kiiljuik ma kimakixti. Jehová kipaleuik pampa kititlanki se iluikaejketl ma kiyolchikaua (Luc. 22:42, 43). Uajka, ya nojkia uelis kichiuas se toikni ma technojnotsa ipan teléfono o ma techpaxalo uan kiampa techyolchikauas. Yeka ma tijchiuakaj kampeka tikitasej kenijkatsa tikinyolchikauasej toikniuaj ipan tlanechikoli (Prov. 12:25).
12 Ma tikitakaj tlen kipanok tosiuaikni Míriam. Kema panok se keski semanas kema mijki iueue, itstoya iselti ichaj uan tlauel mokuesouayaya. Tlauel mochokiliyaya uan kinekiyaya kamanaltis iuaya se akajya. Ya kiijtoua: “Nijmatiyaya ouij nijnojnotsas se akajya, yeka san nimomaijtok. Kema nojua nimomaijtouayaya, tsilinki noteléfono. Eliyaya se ueuejtlakatl, katli eliyaya touampo”. Toikni iuaya isiua tlauel kiyolchikajkej. Míriam motemachia Jehová kichijki ni toikni ma kinojnotsa.
¿Kenijkatsa Jehová kintekiuia katli amo kitekipanouaj uan kiampa techpaleuia? (Xikita párrafos 13, 14).
13. Xikijto kenijkatsa Jehová kichiua ma techpaleuikaj maseualmej katli amo kitekipanouaj.
13 Uelis kintekiuis maseualmej katli amo kitekipanouaj (Prov. 21:1). Kemantika, Jehová kinyololinia maseualmej katli amo kiueyichiuaj uan kiampa kinpaleuia itekipanojkauaj. Se neskayotl, Jehová kiyololinik tlanauatijketl Artajerjes ma kikaua Nehemías ma tlapaleui kikualchijchiuasej altepetl Jerusalén (Neh. 2:3-6). Uan ipan ni tonali, Jehová nojkia kichiua katli amo kitekipanouaj ma techpaleuikaj kema moneki.
14. ¿Kenijkatsa mitspaleuia tlen kipanok Soo Hing? (Nojkia xikita tlaixkopinkayotl).
14 Se tosiuaikni katli itoka Soo Hing, kiitak kenijkatsa Jehová kipaleuik kema kitekiuik se tepajtijketl. Ikone kipia se keski kokolistli ipan itsontekuich, yeka kipanok tlen tlauel amo kuali. Soo Hing iuaya iueue, ayokmo uelkej tekitikej pampa kimokuitlauiskiaj. Ayokmo kipixkej tomij uan tlauel ouij kimatkej. Soo Hing kiijtok ayokmo ueliskia kiijiyouis, yeka momaijtok ika nochi iyolo. Nopa tepajtijketl kitekipachok tlen kinpanoyaya, yeka kinpaleuik ma kinmakakaj tlapaleuili tlen temakaj tekichiuanij uan nojkia ma kipantikaj se kali kampa amo patiyo kininamaskiaj. Soo Hing kiijtok: “Tikitakej kenijkatsa Jehová techpaleuik. Timotemachiaj nelia kikaki ‘kema timomaijtouaj’” (Sal. 65:2).
MONEKI TITLANELTOKASEJ UAN KIAMPA TIKITASEJ KENIJKATSA JEHOVÁ TECHPALEUIA
15. ¿Tlake kipaleuik se tosiuaikni ma kiita Jehová kena kitlakakilik kema momaijtok?
15 Maske Jehová amo nochipa technankilia kej tijnekiskiaj, ya nochipa techmaka tlen techpaleuia kuali ma titlaneltokakaj. Yeka moneki nochipa tikitasej kenijkatsa technankilia toTata Jehová. Tosiuaikni Yoko moiljuiyaya Jehová amo kitlakakiliyaya kema momaijtouayaya, yeka pejki kiijkuiloua nochi tlen kitlajtlaniyaya. Kema panok se keski tonali, sampa kipojki tlen kiijkuilojtoya uan kiitak Jehová kena kinankilijtoya, uan nojkia kimakatoya se keski tlamantli maske amo kiilnamikiyaya tlaj tlajtlantoya. Kemantika moneki ma timoyoliljuikaj kenijkatsa Jehová technankilia kema timomaijtouaj (Sal. 66:19, 20).
16. ¿Kenke moneki kuali titlaneltokasej kema timomaijtouaj? (Hebreos 11:6).
16 Moneki kuali titlaneltokasej kema tijtlajtlaniaj Jehová se tlamantli uan nojkia kema technankilia (xijpoua Hebreos 11:6). Ma tikitakaj tlen kinpanok Mike uan Chrissy, katli kinekiyayaj tlatekipanosej ipan Betel. Mike kiijtoua: “Maske miakpa tijtitlankej solicitud uan tlauel timomajtokej, amo techtlanejkej”. Maske kiampa kinpanok Mike uan Chrissy, nochipa motemachijkej Jehová kimatiyaya kanke kuali tlatekipanosej. Inijuantij nojua kichijkej kampeka kuali kitekipanosej Jehová, tlatekipanojkej kej precursores regulares kampa monekij tlajtolmoyauanij, kampa mochijchiua kali kampa titlaueyichiuaj uan nama tepaxalouaj chijchikuasej metstli. Mike nojkia kiijtoua: “Maske Jehová amo techmakak tlen tijnekiyayaj, kena techpaleuijtok ika tlamantli tlen amo timoiljuijtoyaj”.
17, 18. Kej kiijtoua Salmo 86:6, 7, ¿ipan tlake timotemachiaj?
17 (Xijpoua Salmo 86:6, 7). David motemachiyaya Jehová kitlakakiliyaya kema momaijtouayaya, uan ta nojkia uelis kiampa tijchiuas. Ipan ni tlamachtili tikitakej kenijkatsa Jehová techmaka tlalnamikilistli uan chikaualistli, kiampa uelis tikijiyouisej nochi tlen techpanos. Nojkia tikitakej Jehová kichiua ma techpaleuikaj toikniuaj o maseualmej katli amo kiueyichiuaj.
18 Maske kemantika Jehová amo technankilis kej tijnekiskiaj, timotemachiaj kena techpaleuis. Ya nochipa techmakas tlen techpoloua uan kichiuas kema kinamiki. Yeka nochipa ma timomaijtokaj uan ma timotemachikaj Jehová techmokuitlauis ipan ni tonali, uan ipan yankuik Tlaltipaktli techmakas nochi tlen monekis (Sal. 145:16).
UIKATL 46 Timitstlaskamatiliaj, Jehová
a Jehová kiijtojtok techtlakakilis kema timomaijtouaj tlaj tijtlajtlaniaj tlen ya kipaktia. Kema tikixnamikij tlaouijkayotl, timotemachiaj ya techpaleuis uan kiampa amo tijtlauelkauasej. Ipan ni tlamachtili tikitasej kenijkatsa Jehová technankilia kema timomaijtouaj.
b Ipan Tlen Tematiltia, junio 2017, ipan tlamachtili “Nochipa xikilnamikto tlake tlamantli tlauel ipati”, moixtoma kenke Jehová kikajtok ma tlanauati Satanás.
c Mopatlatok se keski tokajyotl.
d TLEN NESI IPAN TLAIXKOPINKAYOTL. Se tosiuaikni iuaya isiuapil asij ipan se altepetl kampa momanauiaj maseualmej. Uan toikniuaj kuali kinseliaj uan kinpaleuiaj.
