1. ¿Tlake techiljuia Jehová ma tijchiuakaj? (Nojkia xikita tlaixkopinkayomej).

 ¿AJKIA uelis techyolchikauas uan kuali techyakanas? San toTeotsij Jehová uelis tikiljuisej ma techpaleui. Ya techiljuia ma timomaijtokaj uan kineki kiampa ma tijchiuakaj, yeka techiljuia: “Ximomaijtojtinemikaj [...] ajachika” (1 Tes. 5:17). Uelis tikiljuisej nochi tlen techtekipachoua uan tikiljuisej ma techyakana nochipa (Prov. 3:5, 6). Jehová kipaktia temakas tlen kipia, yeka uelis timomaijtosej kema tijnekisej.

2. ¿Tlake tikitasej ipan ni tlamachtili?

² Maske tlauel tijpatiitaj timomaijtosej, kemantika amo kiampa tijchiuaj pampa tlauel timotekiuiaj. O uelis timoiljuiaj moneki nojua kuali timomaijtosej. Tlen kiijtoua Biblia tlauel techpaleuis. Ipan ni tlamachtili tikitasej tlen Jesús kichijki uan kenijkatsa tijkixtisej tonali. Nojkia tikitasej tlake makuili tlamantli uelis tikijtosej kema timomaijtosej.

3. ¿Tlake kimatiyaya Jesús?

³ Jesús kimatiyaya Jehová tlauel kipatiita tlamaijtoli. Kema ayamo ualayaya ipan Tlaltipaktli, kiitak kenijkatsa iTata kintlakakilik Ana, David, Elías uan sekinok itekipanojkauaj (1 Sam. 1:10, 11, 20; 1 Rey. 19:4-6; Sal. 32:5). Yeka, Jesús kiniljuik itokilijkauaj nochipa  ma momaijtokaj uan ma motemachikaj Jehová kintlakakiliskia (Mat. 7:7-11).

4. ¿Tlake techmachtia tlen Jesús kichijki?

⁴ Jesús kinmachtik itokilijkauaj kenijkatsa momaijtosej. Kema itstoya ipan Tlaltipaktli ajachika momaijtouayaya. Monejki kiiyokatlalis tonali pampa tlauel motekiuiyaya uan maseualmej nochipa itstoyaj iuaya (Mar. 6:31, 45, 46). Kualka meuayaya pampa kipaktiyaya kamanaltis iuaya iTata (Mar. 1:35). Uan se tonali, seyoual momaijtok pampa monekiyaya kitlapejpenis se tlamantli tlen tlauel ipati (Luc. 6:12, 13). Uan kema nechka kimiktiskiaj, miakpa momaijtok pampa kimatiyaya tlauel ipati tlen kichiuaskia (Mat. 26:39, 42, 44).

5. ¿Kenijkatsa uelis tijchiuasej kej Jesús?

⁵ Tlen Jesús kichijki techmachtia moneki tikiyokatlalisej tonali uan timomaijtosej. Kej Jesús, moneki tikitasej kema timomaijtosej: uelis ika ijnalok o kema ya tlayoua. Kiampa Jehová kiitas tlauel tijpatiitaj tijnojnotsasej. Tosiuaikni Lynne tlauel kitlaskamatki kema kimatki ueliskia kinojnotsas Jehová. Ya kiijtoua: “Kema nijyekok Jehová nochipa nechtlakakilia, nikitak kej se nouampo uan nimosentlalik nojua kuali nimomaijtos”. Uelis tojuantij nojkia tijyolmatij kej tosiuaikni. Nama ma tikitakaj makuili tlamantli tlen uelis tikijtosej kema timomaijtosej.

6. Kej kiijtoua Apocalipsis 4:10, 11, ¿tlake kinamiki kiselis Jehová?

⁶ Ma tijueyichiuakaj Jehová. Apóstol Juan kinitak kejuak ipan se temiktli, 24 ueuejtlakamej katli kiueyichiuayayaj Jehová. Uan kiijtouayayaj: “Nochi chikaualistli tijpia. Kinamiki ma timitsnextilikaj nochi tlatlepanitakayotl. Kinamiki para san ta ma timitsueyichiuakaj” (xijpoua Apocalipsis 4:10, 11). Iluikaeuanij nojkia kimatij san Jehová kinamiki tijueyichiuasej. Inijuantij itstokej iuaya Jehová uan kuali kiixmatij. Kiitaj kinextia kuajkuali tlamantli ika tlen kichiua, yeka kinekij kiueyichiuasej (Job 38:4-7).

7. ¿Kenijkatsa uelis tijueyichiuasej Jehová kema timomaijtosej?

 ⁷ Kema timomaijtouaj, nojkia moneki tijueyichiuasej Jehová. Kiampa tijchiuaj kema tikiljuiaj tlake uan kenke techpaktia nopa kuajkuali tlamantli tlen kinextia. Kema tijpouasej uan timomachtisej Biblia, ma tijchiuakaj kampeka tikitasej tlake kuajkuali tlamantli tlen Jehová kinextia tlauel techpaktia (Job 37:23; Rom. 11:33). Teipa ma tikiljuikaj tlen tijyolmatij pampa kinextia kuajkuali tlamantli. Nojkia, uelis tijueyichiuasej pampa techpaleuijtok o kinpaleuijtok toikniuaj. Ya nochipa techmokuitlauia uan kiita tlake techpoloua (1 Sam. 1:27; 2:1, 2).

8. ¿Tlake tlamantli uelis tijtlaskamatilisej Jehová? (1 Tesalonicenses 5:18).

⁸ Ma tijtlaskamatilikaj Jehová. Kema timomaijtosej uelis tijtlaskamatilisej miak tlamantli (xijpoua 1 Tesalonicenses 5:18). Tijpiaj tlen kuali uan san ya ueli techmaka nochi ni tlamantli, yeka ma tijtlaskamatilikaj (Sant. 1:17). Ya techmakatok ni yejyektsi Tlaltipaktli, kichijchijtok sekinok kuajkuali tlamantli, techmakatok tonemilis, tochampoyouaj, touampoyouaj uan kiijtojtok teipa kuali tiitstosej. Nojkia uelis tijtlaskamatilisej pampa techkajtok ma timouampojchiuakaj iuaya.

9. ¿Kenke kemantika tijmatij ouij titetlaskamatilisej?

⁹ ¿Kenke moneki tijtlaskamatilisej Jehová? Kemantika uelis tijmatisej ouij pampa maseualmej amo tetlaskamatij. Maseualmej san kinekij kipiasej sekinok tlamantli uan amo kitlaskamatij tlen kipiaj. Tlaj nojkia timoiljuisej kej inijuantij, peuas san tijtlajtlanisej Jehová miak tlamantli uan amo tijtlaskamatilisej. Tlaj amo tijnekij kiampa ma techpano, moneki tijchiuasej kampeka tijtlaskamatilisej Jehová nochi tlamantli tlen techmaka (Luc. 6:45).

10. ¿Kenijkatsa kipaleuik se tosiuaikni pampa pejki kitlaskamatilia Jehová? (Nojkia xikita tlaixkopinkayotl).

¹⁰ Kema tijtlaskamatiliaj Jehová, techpaleuia ma tikixnamikikaj tlaouijkayotl. Ma tikitakaj tlen kipanok tosiuaikni Kyung-sook, tlen kipanok ijkuilijtok ipan Tlen Tematiltia enero 1, 2015. Kiiljuijkej kipiayaya cáncer ipan ipulmones. Ya kiijtok: “Tlauel nimoyolkokok kema nechiljuijkej nimokokouayaya. Tlauel nimajmajki pampa nijmatki nimikiskia”. ¿Tlake kipaleuik kiixnamikis nopa kuesoli? Ya kiijtok mojmostla kema nechka kochiskia, tlejkoyaya kalpani, momaijtouayaya uan kitlaskamatiliyaya Jehová makuili tlamantli tlen kipanotoya ipan nopa tonali. Nopa kichiuayaya kuali ma kiyolmati uan kipaleuiyaya  ma kiiljui Jehová tlauel kiiknelia. Ya kiitak kenijkatsa Jehová kinpaleuia itekipanojkauaj kema kiixnamikij tlaouijkayotl. Uan nojkia kiitak maske tijpiaj kuesoli, Jehová techteochiua ipan miak tlamantli. Sanse kej Kyung-sook, nojkia uelis tijtlaskamatilisej Jehová miak tlamantli maske tikixnamikij tlaouijkayotl. Kema tijtlaskamatiliaj Jehová, techpaleuia ma tikijiyouikaj nochi uan kuali ma tijyolmatikaj.

11. ¿Kenke Pedro uan Juan monekiyaya amo majmauisej?

¹¹ Ma tikiljuikaj Jehová ma techpaleui amo timajmauisej titlajtolmoyauasej. Kema Jesús nechka tlakuepiliskia iluikak, kiniljuik itokilijkauaj: “Intlayolmelauatij tlen na ipan ni altepetl Jerusalén, uan ipan estados Judea uan Samaria. Uan [...] kampa más uejuejka pilaltepetsitsij” (Hech. 1:8; Luc. 24:46-48). Teipa, tlayakananij tlen Judá kinitskijkej Pedro uan Juan uan kinuikakej Sanedrín, nopaya kiniljuijkej kinchiuiliskiaj tlen amo kuali tlaj nojua tlajtolmoyauaskiaj (Hech. 4:18, 21). ¿Tlake kichijkej inijuantij?

12. Kej kiijtoua Hechos 4:29, 31, ¿tlake kichijkej Jesús itokilijkauaj?

¹² Pedro uan Juan kiniljuijkej nopa tlayakananij: “Ximoyoliljuikaj intla kuali para tiinmechneltokasej o intla achi más kuali tijneltokasej Toteko. Pero para tojuantij axtiuelij tijkauasej tikinpouilisej tlakamej tlen tikitstokej uan tlen tijkaktokej” (Hech. 4:19, 20). Kema Pedro uan Juan kinkixtijkej kampa kintsaktoyaj, mosentilijkej ininuaya nopa sekinok Jesús itokilijkauaj. Sansejko kitlajtlanijkej Jehová ma kinpaleui, uan kiijtojkej: “Xitechmaka fuerza timotlatekipanojkauaj para ma axtimajmauikaj tikamatisej motlajtol”. Uan Jehová kinankilik kema kitlajtlanijkej ma kinpaleui (xijpoua Hechos 4:29, 31).

13. ¿Tlake techmachtia tlen kichijki Jin-hyuk?

¹³ Tlaj tlanauatianij techiljuisej ayokmo ma titlajtolmoyauakaj, uelis tijchiuasej kej apóstoles. Kiampa kichijki toikni Jin-hyuk, katli kitsajkej pampa kiueyichiuayaya toTeotsij. Kampa tsaktoya kiiljuijkej ma kinmokuitlaui sekinok katli nojkia kintsaktoyaj. Kiiljuijkej san ma kintlajtlani tlake kinpolouayaya uan amo ma kinkamanaljui tlen Biblia. Maske kiampa kiiljuijkej, ya kitlajtlanik Jehová ma kipaleui amo ma majmauis uan kimatis kenijkatsa kinkamanaljuis tlen Biblia (Hech. 5:29). Ya kiijtoua: “Jehová nechtlakakilik kema nimomaijtok uan kichijki amo ma nimajmaui. Nojkia nechmakak tlalnamikilistli. Pejki nikinmachtia ika Biblia se keskij katli kintsaktoyaj maske san niuejkauayaya makuili minutos. Tlayoua nikijkuilouayaya amatlajkuiloli uan ika ualmostla nikinmajmakayaya katli tsaktoyaj”. Sanse kej kichijki Jin-hyuk, uelis timotemachisej Jehová techpaleuis ma titlajtolmoyauakaj tlaj tikiljuisej ma techmaka tlalnamikilistli uan ma techpaleui amo timajmauisej.

14. ¿Tlake mitspaleuis tikixnamikis se kuesoli? (Salmo 37:3, 5).

¹⁴ Ma tikiljuikaj Jehová ma techpaleui kema tijpiaj kuesoli. Uelis titlaijiyouiaj pampa tikixnamikij se tlaouijkayotl, uelis pampa mijki se tlen tochampoyouaj, techtlatsakuiltiaj, timokokouaj, timoyolkuesouaj o tijpiaj se kuesoli ika  se tlen tochampoyouaj. Uan uelis nojua tlauel amo kuali tijyolmatij pampa onka uejueyi kokolistli uan tlauilankayotl. Yeka xikiljui Jehová nochi tlen tijyolmati, kej tijchiuaskia ika se kuali mouampo. Uan ximotemachi nelnelia mitspaleuis (xijpoua Salmo 37:3, 5).

15. ¿Kenijkatsa techpaleuia tlamaijtoli kema tikixnamikij tlaouijkayotl? Xikijto se neskayotl.

¹⁵ Kema ajachika timomaijtouaj, techpaleuia ma tikijiyouikaj tlaouijkayotl (Rom. 12:12). Jehová kimati nochi tlen kinpano itekipanojkauaj uan kintlakakilia kema “kitsajtsiliaj ma kinpaleui” (Sal. 145:18, 19). Kiampa kiitak Kristie, se precursora katli kipia 29 xiuitl. Pejki mokokoua, yeka tlauel mokuesok. Uan teipa kimatki inana kipixtoya se kokolistli uan amo mochiuaskia. Kristie kiijtoua: “Mojmostla nijtlajtlaniyaya Jehová ma nechpaleui uan ma nechmaka chikaualistli, kiampa nikijiyouiskia nochi tlen nechpanoyaya. Nijchijki kampeka nijtekipanos Jehová, nias tlanechikoli uan nimomachtis Biblia”. Ya nojua kiijtoua: “Tlamaijtoli nechmakak chikaualistli, uan tlauel nimoyolchikajki pampa nijmatiyaya Jehová itstoya nonechka. Maske amo nima nimochikajki, Jehová nechnankilik uan nechmakak tlayolseuilistli”. Amo ma tikilkauakaj: “Toteko kimati kejatsa kinmakixtis kuali tlakamej ipan tlen ueli tlayejyekoli” (2 Ped. 2:9).

16. ¿Kenke moneki Jehová ma techpaleui kema techyoltilana tlen amo kuali?

¹⁶ Ma tijtlajtlanikaj Jehová ma techpaleui kema techyoltilana tlen amo kuali. Nochi titlajtlakolejkej, yeka moneki nochipa tijchijtosej kampeka amo tijchiuasej tlen amo kuali. Uan Satanás nojkia kichiua miak tlamantli pampa kineki ouij ma tijmatikaj tijchiuasej tlen kuali. Ya kineki kisokiuis totlalnamikilis ika tlen timoyolpakiltiaj pampa nopa  uelis kichiuas ayokmo kuali ma techita Jehová, uan ma tijchiuakaj se ueyi tlajtlakoli (Mar. 7:21-23; Sant. 1:14, 15).

17. ¿Tlake seyok tlamantli moneki tijchiuasej tlaj amo tijnekij ma techyoltilana tlen amo kuali? (Nojkia xikita tlaixkopinkayomej).

¹⁷ Tlaj amo tijnekij tijchiuasej tlen techyoltilana, moneki tijtlajtlanisej Jehová ma techpaleui. Jesús kiijtok ni tlamantli kema momaijtok: “Axaka xijkauili ma techyoltilana ma titlajtlakolchiuasej. Xitechmanaui tlen yajaya tlen axkuali” (Mat. 6:13). Jehová kineki techpaleuis, san moneki titlajtlanisej. Moneki timomaijtosej uan nojkia tijchiuasej kampeka amo tijkauasej ma techmaua yon se kentsi tlen moiljuiaj maseualmej katli Satanás kinnauatia (Sal. 97:10). Tlaj amo tijnekij tijsokiuisej totlalnamikilis, moneki timomachtisej Biblia, tiasej tlanechikoli uan titlajtolmoyauasej. Uan Jehová kiijtojtok amo kikauas ma techpano tlen amo uelis tikijiyouisej (1 Cor. 10:12, 13).

18. ¿Tlake moneki tijchiuasej?

¹⁸ Tlaj amo tijneki tikixpanos toTeotsij, moneki nochipa timomaijtos. Jehová kineki xijpouili nochi tlen eltok ipan moyolo (Sal. 62:8). Yeka xijkixti tonali uan kiampa mojmostla timomaijtos ika nochi moyolo, xijueyichiua uan xijtlaskamatili nochi tlen mitsmaka. Nojkia xikiljui ma mitspaleui amo timajmauis kema titlajtolmoyauas, ma mitspaleui tikijiyouis tlaouijkayotl uan amo ma mitsyoltilana tlen amo kuali. Ajachika ximomaijto uan amo xijkaua ma mitstsakuili yon se tlamantli. ¿Uan kenijkatsa technankilia Jehová kema timomaijtouaj? Ipan nopa seyok tlamachtili tijnankilisej ni tlajtlanili tlen tlauel ipati.