1, 2. 1) ¿Tlake motemachiaj kiselisej Jehová itekipanojkauaj? 2) ¿Tlake techpaleuis ma tikilnamiktokaj tlen timotemachiaj tijselisej? (Xikita nopa achtoui tlaixkopinkayotl).

SANSE kej apóstol Pablo, katli kintlapejpenijtokej, motemachiaj ‘yasej uejkapa para kiselisej tlen kitlantokej’ (Filip. 3:14). Nelia kinekij itstosej iuaya Jesús ipan iTlanauatijkayo uan kiampa kinpaleuisej maseualmej ma elikaj xitlauakej (Apoc. [Rev.] 20:6). ¡Nelia tlauel kuali tlen Jehová kineki kinmakas! Uan sekinok itekipanojkauaj motemachiaj kiselisej seyok tlamantli. Inijuantij kinekij itstosej nochipa ipan Tlaltipaktli, uan tlauel yolpakij motemachisej ipan nopa tlamantli (2 Ped. 3:13).

² Pampa Pablo kinekiyaya kinpaleuis toikniuaj katli nojkia kintlapejpenijtoyaj ma kiselikaj tlen kichiayayaj, ya kintlajtolmakak: “San ximoyoliljuikaj tlen nepa iluikak” (Col. 3:2). Monekiyaya nochipa kiilnamiktosej inijuantij itstoskiaj iluikak (Col. 1:4, 5). Tlaj timotemachiaj tiitstosej ipan iluikak o ipan Tlaltipaktli, tlaj timoyoliljuisej  ipan nochi tlateochiualistli tlen Jehová kiijtojtok techmakas tlauel techpaleuis nochipa ma tikilnamiktokaj tlen ipan timotemachiaj tijselisej (1 Cor. 9:24).

3. ¿Tlake kintlajtolmakak Pablo Cristo itokilijkauaj?

³ Pablo nojkia kiniljuik se keski tlamantli ueliskia kichiuas amo ma kiselikaj tlen kichiayayaj. Ya kintlajkuiljuilik toikniuaj katli itstoyaj Colosas uan kiniljuik se keski katli amo nelia eliyayaj Cristo itokilijkauaj san kineltokaskiaj nopa Tlanauatili pampa kinekiskiaj kuali ma kinita toTeotsij uan amo pampa tlaneltokayayaj ipan Cristo (Col. 2:16-18). Nojkia, kiniljuik kenijkatsa amo kichiuaskiaj tlen amo kuali iuaya se akajya katli axininnamik, kenijkatsa kisenkauaskiaj kuesoli iuaya se toikni uan kenijkatsa kiixnamikiskiaj tlaouijkayotl ika ininchampoyouaj. Tlen tetlajtolmakak nojua techpaleuia ipan ni tonali. Yeka, ma tikitakaj se keski tlamantli tlen tetlajtolmakak ipan nopa amatlajkuiloli Colosenses.

4. ¿Kenke tlaj techyoltilana tijchiuasej ‘tlen ueli ika tlen axtonamik’ uelis kichiuas amo ma tijselikaj tlen tijchiaj?

⁴ Kema Pablo kinilnamikilijtoya toikniuaj tlen ipan motemachiyayaj, teipa kinijkuiljuilik: “Uajka ximomakakaj cuenta para inmiktokejya uan ayok xijchiuakaj tlen inmoyolo inmechnotsa xijchiuakaj. Amo xijchiuakaj tlen ueli ika tlen axinmonamik. Amo ximoiljuikaj tlen axkuali. Amo xijtokilikaj tlen fiero tlen kineki inmotlakayo. Amo ximoiljuikaj tlamantli tlen eli se pinaualistli. Amo xijnekikaj inkipiasej más tlamantsitsij mojmostla” (Col. 3:5). Kemantika uelis tlauel chikauak techyoltilana timomekatisej uan nopa uelis kichiuas ayokmo kuali ma timouikakaj iuaya Jehová yon ma tijselikaj tlen tijchiaj. Se toikni katli momekatik uan teipa sampa pejki kitekipanoua toTeotsij, kiijtoua: “Tlauel chikauak nechyoltilanki, uan kema nikitak, ya nitlajtlakolchijtoya”.

5. ¿Tlake moneki tijchiuasej kema techyoltilanas se tlamantli tlen amo kuali?

⁵ Tlauel moneki timomokuitlauisej kema se tlamantli ueliskia techyoltilanas ma titlajtlakolchiuakaj uan ma tikixpanokaj toTeotsij itlanauatiljuaj. Se neskayotl. Tlaj se ichpokatl uan se telpokatl moixtokaj, tlauel moneki ma momokuitlauikaj uan ma mokamanaljuikaj tlen se keski tlamantli tlen amo kichiuasej kema moixmatisej, kej monajnauasej, motsoponisej o itstosej ininselti (Prov. 22:3). Se toikni tlakatl nojkia ueliskia tlajtlakolchiuas tlaj uejka yaskia tekititi o tlaj tekitiskia iuaya se siuatl, ni nojkia ueliskia kipanos se tosiuaikni (Prov. 2:10-12, 16). Tlauel techpaleuis achtoui tikijtosej tojuantij tielij Jehová itlajtoltemakauaj. Moneki nochipa kuali timonejnemiltisej uan tikilnamiktosej tlake ueliskia techpanos tlaj tikixtokaskiaj o tikajasiskiaj se akajya. Uan tlauel moneki ma timomokuitlauikaj kema timotekipachouaj o kema timoyolkokouaj pampa uelis tlauel tijnekiskiaj ma techpaleuikaj uan tijkauaskiaj katli ueli maseuali ma techyolchikaua. Tlaj kiampa techpanoskia, kinamiki tikiljuisej Jehová uan toikniuaj ma techpaleuikaj, kiampa amo tijchiuasej yon se tlamantli tlen kichiuaskia amo ma tijselikaj tlen tijchiaj (xijpoua Salmo 34:18; Proverbios 13:20).

6. ¿Tlake moneki tikilnamikisej kema tijtlapejpenisej tlen ika timoyolpakiltisej?

⁶ Tlaj amo kema tijnekij tijchiuasej tlen amo kuali iuaya se akajya katli axtonamik, moneki amo timoyolpakiltisej ika tlen techyoltilanaskia ma titlajtlakolchiuakaj. Tlen kinextiaj ipan tlamantli tlen ika timoyolpakiltiaj kichiua ma tikinilnamikikaj Sodoma uan Gomorra (Jud. 7). Katli kichiuaj ma nesi nopa tlamantli kinekij ma timoiljuikaj amo kenijki tlaj timotekasej iuaya se akajya. Moneki timomokuitlauisej uan kiampa amo tikitasej nopa tlamantli kej inijuantij kiitaj. Tlaj amo kuali tijtlapejpeniskiaj tlen ika timoyolpakiltisej, uelis kichiuas amo ma tijselikaj tlen tijchiaj (Prov. 4:23).

7. ¿Tlake tlamantli uelis panos ipan tlanechikoli?

⁷ Nochi tikitaj kej se tlateochiualistli tiitstosej ipan Jehová itlanechikol. Tlauel techpaleuia ma tikilnamiktokaj tlake tijselisej kema timomachtiaj Biblia ipan tlanechikoli uan kema timopaleuiaj ika miak tlaiknelili uan tijnextiaj tijpiaj kuali toyolo. Maske tijchiuaj nopa, kemantika se keski tlamantli kichiua ma timokualanikaj ininuaya toikniuaj. Tlaj amo nima tijsenkauaj se kuesoli, teipa uelis titekualankaitasej (xijpoua 1 Pedro 3:8, 9).

8, 9. 1) ¿Tlake kuajkuali tlamantli techpaleuis ma tijselikaj tlen tijchiaj? 2) ¿Tlake techpaleuis ma tiitstokaj ika tlaseuilistli tlaj se toikni techyolkokos?

⁸ ¿Tlake uelis tijchiuasej tlaj amo tijnekij titekualankaitasej uan kiampa uelis tijselisej tlen tijchiaj? Pablo kiniljuik katli itstoyaj ipan Colosas: “Pampa toTeko inmechtlapejpenijtok uan inmechiyokakajtok para iaxkauaj pampa inmechiknelia miak, moneki xikintlasojtlakaj uan xikinchiuilikaj sekinok tlen kuali. Sejse inmojuantij ximoiknonekikaj uan xitekamauikaj ika yamanik. Xijpiakaj inmoyolo ika nochimej. Uajka xijpiakaj inmoyolo ika tlen inmechchiuiliaj tlen axkuali uan xikintlapojpoljuikaj. Intla se kiteiljuiaj seyok ika se tlenijki, ma kitlapojpoljui keja Cristo inmechtlapojpoljuijtok. Uan tlen más ipati para inkichiuasej, moneki ximoiknelikaj uan keja nopa initstosej kuali, pampa tlaiknelijkayotl techilpia sansejko para ma tijpiakaj sanse toyolo” (Col. 3:12-14).

⁹ Tlaj titeikneliaj uan tijnextiaj kuali toyolo, techpaleuis ma timotlapojpoljuikaj. Ximoiljui ni: tlaj se toikni techyolkokok ika tlen kiijtok o kichijki, ma tikilnamikikaj kemantika tojuantij nojkia tikijtojtokej o tijchijtokej se tlenijki tlen kinyolkokojtok toikniuaj. Tlauel tikintlaskamatiliaj toikniuaj pampa teikneliaj uan kipiaj kuali ininyolo uan yeka kiilkajtokej tlen tikinchiuilijtokej (xijpoua Eclesiastés 7:21, 22). Uan nojkia tlauel tijtlaskamatij Jesús pampa kinextijtok kuali iyolo touaya, pampa kichijtok sansejko ma tijueyichiuakaj toTeotsij (Col. 3:15). Nochi tijueyichiuaj sanse toTeotsij, tijmoyauaj sanse tlamachtili uan tikixnamikij sanse tlaouijkayotl. Tlaj nelia tikinikneliaj toikniuaj, tijnextisej kuali toyolo ininuaya uan tikintlapojpoljuisej, uan nopa kichiuas ma tiitstokaj sansejko uan ma timosentlalikaj ipan nopa tlamantli tlen tijselisej.

10, 11. 1) ¿Kenke tlauel amo kuali se tekokolis? 2) ¿Tlake techpaleuis amo ma titekokolikaj uan kiampa uelis tijselisej tlen tijchiaj?

¹⁰ Tlaj tikinkokolisej sekinok nojkia ueliskia kichiuas amo ma tijselikaj tlen tijchiaj. Biblia kuali kinextia kenke tlauel amo kuali kema se akajya kiampa kichiua. Kiijtoua Caín kikokolik iikni Abel uan yeka kimiktik. Coré, Datán uan Abiram kikokolijkej Moisés uan yeka kiijixnamijkej. Tlanauatijketl Saúl nojkia kikokolik David pampa kuali kisayaya tlen kichiuayaya, uan kinejki kimiktis. Yeka, Biblia kiijtoua: “Kema tlakamej mochikoitaj [o mokokoliaj] uan san kinekij moueyitlalisej ininseltsitsij, uajka axtleno kisas kuali uan onkas nochi tlamantli tlajtlakoli” (Sant. 3:16).

¹¹ Tlaj nelia titeikneliaj uan tijpiaj kuali toyolo, uajka amo titekokolisej. ToTeotsij iTlajtol kiijtoua: “Se tlen teiknelia kipia iyolo ininuaya sekinok uan kinchiuilia tlen kuali. Yajaya axkineki tlen sekinok kipiaj” (1 Cor. 13:4). Tlaj amo tijnekij titekokolisej, uajka moneki tikinitasej toikniuaj kej Jehová kinita. Moneki tikilnamiktosej nochi sansejko titlatekipanouaj ipan tlanechikoli, yeka tielij sanse. Nopa techpaleuis ma tijyolmatikaj tlen toikniuaj kiyolmatij, kej Pablo kiijtok: “Intla se parte ipan totlakayo kiselia se tlatlepanitakayotl, nochi partes ipan totlakayo pakij” (1 Cor. 12:16-18, 26). Kiampa, kema se akajya kiselis se keski tlateochiualistli, tojuantij nojkia tlauel tiyolpakisej uan amo tijkokolisej. Ma timoiljuikaj ipan tlen kichijki Jonatán, katli eliyaya Saúl ikone. Kema Jehová kitlapejpenik David  kej tlanauatijketl, Jonatán amo kikokolik maske yaya kinamikiyaya elis tlanauatijketl. Ya kinextik kiikneliyaya David uan kipixtoya kuali iyolo uan nojkia tlauel kiyolchikajki (1 Sam. 23:16-18). ¿Nojkia uelis tijchiuasej kej ya kichijki?

12. ¿Tlake textos kinpaleuis tochampoyouaj ma kiselikaj tlen tijchiaj?

¹² Tlaj tijchiuaj tlen Biblia techtlajtolmaka, techpaleuis ma tiitstokaj ika tlaseuilistli uan ma tiyolpakikaj ininuaya tochampoyouaj, uan nojkia uelis tijselisej tlen tijchiaj. ¿Tlake kiijtok Pablo monekiyaya kichiuasej toikniuaj tlen Colosas? Ya kiijtok: “Xitlakakikaj insiuamej tlen inkipiaj inmoueue. Sejse inmojuantij xijkauilikaj inmoueue ma inmechyakana keja kinamiki pampa ininaxkauaj toTeko. Xitlakakikaj intlakamej tlen inkipiaj inmosiuajuaj. Nochi inmojuantij xikiniknelikaj inmosiua uan amo ximokualanikaj ininuaya. Uan inkonemej, xijchiuakaj nochi tlen inmonana uan inmotata inmechiljuiaj pampa ya nopa tlen kipaktia toTeko. Xitlakakikaj inmojuantij tlen inkinpiaj inmokoneuaj. Amo xikinkualankamakakaj inmokoneuaj para ma axmokuesosej” (Col. 3:18-21). Tlen Pablo kintlajtolmakak toikniuaj, ipan ni tonali nojua kinpaleuia nochi tetajmej, siuamej uan konemej.

13. ¿Tlake uelis kichiuas se tosiuaikni tlaj kineki iueue ma kitekipano toTeotsij?

 ¹³ ¿Tlake tijchiuas tlaj timoiljuia moueue, katli amo kitekipanoua Jehová, amo kuali mitsmokuitlauia? ¿Timoiljuia kuali timouikaskia iuaya tlaj nochipa tikiljuijtos amo kuali tlen kichiua? Uan maske kichiuaskia tlen ta tijneki, ¿timoiljuia kinekiskia kitekipanos Jehová? Uelis amo. Tlaj tijnextis nelia tijtlepanita pampa yaya mitsyakana, uajka uelis kipatlas kej monejnemiltia. Uan nojkia tijchiuas xiitstokaj ika tlaseuilistli, tijueyichiuas Jehová uan uelis teipa moueue kinekis kitekipanos toTeotsij. Kiampa inomej uelis inkiselisej tlen toTeotsij kiijtojtok techmakas (xijpoua 1 Pedro 3:1, 2).

14. ¿Tlake kinamiki kichiuas se toikni tlaj isiua amo kitlepanita?

¹⁴ ¿Tlake uelis tijchiuas tlaj mosiua, katli amo kitekipanoua Jehová, amo mitstlepanita? ¿Timoiljuia mitstlepanitas tlaj tijkualankanojnotsas pampa tijneki ma kiita san ta tikijtoua tlake mochiuas? Amo. Jehová kineki xijchiua kej Jesús uan xikikneli mosiua (Efes. 5:23). Jesús kiyakana tlanechikoli ika miak tlaiknelili uan kipia ueyi iyolo (Luc. 9:46-48). Tlaj se toikni kichiua kej Jesús, uelis se tonali isiua nojkia kitekipanos Jehová.

15. ¿Kenijkatsa uelis kinextis se Cristo itokilijka tlauel kiiknelia isiua?

¹⁵ Biblia kiniljuia tlakamej: “Xikiniknelikaj inmosiua uan amo ximokualanikaj ininuaya” (Col. 3:19). Se tlakatl katli tlauel kiiknelia isiua, nochipa kitlakakilia uan kinextilia kipatiita tlen ya kiijtoua (1 Ped. 3:7). Maske se tlakatl amo nochipa kichiuas tlen isiua kiiljuia, tlaj kitlajtlanilis tlake moiljuia, kipaleuis kuali ma kitlapejpeni tlen kichiuas (Prov. 15:22). Se tlakatl katli tlauel teiknelia, amo kema kichiualtia isiua ma kitlepanita. Se siuatl kitlepanita iueue pampa ya kiiknelia. Tlaj se Cristo itokilijka kiiknelia isiua uan kiniknelia ikoneuaj, uelis inijuantij nojkia kitekipanosej Jehová ika miak pakilistli uan uelis itstosej nochipa.

16, 17. Tlaj titelpokatl, ¿tlake uelis tijchiuas uan kiampa amo tikualanis kema motatauaj mitstlalnamiktiaj?

¹⁶ Uelis ta tieli se piltelpokatsi, uan timoiljuia motatauaj, katli kitekipanouaj toTeotsij, amo mitskauaj xijchiua yon se tlamantli. Uelis nopa kichiua ximoiljui tlaj nelia tlauel kuali tijtekipanos Jehová o amo. Tlaj ta tijtlauelkauas toTeotsij, tikitas amo aka kitekipachoua tlen mitspano, kej kichiuaj motatauaj uan toikniuaj.

¹⁷ Tlaj motatauaj amo kema mitstlalnamiktiskiaj, ¿timoiljuiskia motatauaj nelia kintekipachoua tlen mitspano? (Heb. 12:8). Uelis amo mitspaktia kenijkatsa mitstlalnamiktiaj. Amo ximoiljui ipan nopa tlamantli, kualtiaskia timoiljuis kenke mitstlalnamiktiaj. Yeka amo xikualani uan xijchiua kampeka kuali tikinnankilis. Biblia kiijtoua: “Se tlen kimokuitlauia ikamak para axkamatis tlauel, yajaya kipia tlalnamikilistli. Se tlakatl tlen kimachilia miak tlamantli axnimantsi kualani” (Prov. 17:27). Ximosentlali kuali titlalnamikis uan amo xikualani kema mitstlajtolmakaj, uan ximoiljui kenijkatsa mitspaleuis tlen mitsiljuisej maske amo mitspaktis kej mitsiljuisej (Prov. 1:8). Tlauel mitspaleuis tlaj motatauaj kiikneliaj Jehová. Inijuantij kinekij mitspaleuisej xijseli nopa nemilistli tlen toTeotsij techmakas.

18. ¿Kenke timosentlalijtok nochipa tikilnamiktos tlen tijselis teipa?

¹⁸ Nochi tojuantij uelis tijselisej se tlamantli tlen tlauel kuali: uelis tiitstosej nochipa ipan iluikak o ipan se xochimili ipan Tlaltipaktli. Temachtli tijselisej tlen tijchiaj pampa toTeotsij kitenkajtok. Ya kiijtoua kenijkatsa tiitstosej ipan Xochimili: “Nopa tlali temitos ika tlakamej tlen kiixmatij toTeko” (Is. 11:9). Nochi katli itstosej ipan Tlaltipaktli, toTeotsij kinmachtijtos. Tlauel kuali tlaj tijchiuasej kampeka tijselisej tlen tijchiaj. Yeka, nochipa ma tikilnamiktokaj tlen Jehová techtenkauilijtok. ¡Amo tleno ma techtsakuili tijselisej tlen tijchiaj!