IPAN tlauel miak xiuitl tlen panotok, nochi katli kiueyichiuaj Jehová kimakatokej tlakajkaualistli. Israeleuanij kimakayayaj tlapialmej kej tlakajkaualistli, uan Cristo itokilijkauaj nojkia kejuak kimakaj Jehová tlakajkaualistli kema kiueyichiuaj. Nojkia onka seyok tlamantli tlen toTeotsij kipaktia ma kimakakaj (Heb. 13:15, 16). Uan katli kichiuaj nopa, tlauel yolpakij. Ma tikitakaj tlen kichijkej se keskij toTeotsij itekipanojkauaj.

Ana eliyaya se toTeotsij itekipanojka, uan maske tlauel kinekiyaya kipias se ikone, ya amo ueliyaya konepia. Kema momaijtok, kiiljuik Jehová tlaj kipiaskia se ikone, ya kimaktiliskia ma kitekipano “nochi tonali ipan iyolis” (1 Sam. 1:10, 11). Teipa, Ana konekuik uan kipixki se okichpil katli kitokaxtik Samuel. Kema ayokmo kichichitik, kichijki tlen kitenkajtoya uan kiuikak ipan tabernáculo, kampa kitekipanoskia Jehová. ToTeotsij tlauel kiteochijki Ana pampa kichijki nopa. Ya kinpixki sekinok makuiltij ikoneuaj, uan Samuel elki se tlajtolpanextijketl uan se katli kiijkuilok pilamochtsitsij tlen Biblia (1 Sam. 2:21).

Sanse kej Ana uan Samuel, tojuantij nojkia uelis tijtekipanosej Jehová ipan nochi tonemilis. Jesús kiijtok tijseliskiaj miak tlateochiualistli tlaj tijkauaskiaj miak tlamantli pampa tijnekiskiaj tijtekipanosej Jehová (Mar. 10:28-30).

Dorcas, se tosiuaikni katli itstoya ipan achtoui siglo, tlauel miakej kiixmatiyayaj pampa “nochipa kichiuayaya miak tlamantli tlen kuali para kinpaleuis sekinok”. Se tonali, ‘pejki mokokoua uan teipa mijki’, yeka toikniuaj tlen itlanechikol tlauel mokuesojkej. Kema kimatkej Pedro nechka nemiyaya, kiiljuitoj ma kiyolkuiti Dorcas. ¡Nelia tlauel yolpajkej kema Pedro asito uan kiyolkuik! (Hech. 9:36-41). ToTeotsij amo kema kiilkajki tlen Dorcas kichijki (Heb. 6:10). Tlen Dorcas kichijki, moijkuilok ipan Biblia uan nama tojuantij uelis tijchiuasej kej ya.

Tlen apóstol Pablo kichijki nojkia tlauel techpaleuia tojuantij. Ya temakak tlen kipixtoya kema tlauel tlajtolmoyajki uan kichijki kampeka kinpaleuis maseualmej. Kiniljuik toikniuaj tlen Corinto: “Ika pakilistli nijtlamiltis nochi tlen nijpia uan hasta na nojkia nimotemaktilis para niinmechpaleuis para inkisasej kuali iixpa toTeko” (2 Cor. 12:15). Pablo kimatiyaya tlaj tikinpaleuiskia sekinok nelia tlauel tiyolpakiskiaj, Jehová kuali techitaskia uan tlauel techteochiuaskia (Hech. 20:24, 35).

Jehová tlauel yolpaki kema tijtekipanouaj uan kema tijtekiuiaj tochikaualis uan tonali tlen tijpiaj pampa tikinpaleuiaj toikniuaj. ¿Uelis tijchiuasej seyok tlamantli? ¡Kena! Maske tikinpaleuiaj sekinok, nojkia uelis tijueyichiuasej Jehová kema titemakaj totomij. Nopa tomij tlen titemakaj ika nochi toyolo tepaleuia ma momoyajto nopa kuali tlamachtili ipan nochi Tlaltipaktli. Kiampa nojkia tikinpaleuiaj toikniuaj misioneros uan sekinok toikniuaj katli senkistok kitekipanouaj Jehová. Nopa tomij nojkia kitekiuiaj kema kichijchiuaj amatlajkuiloli uan videos, kinpaleuiaj katli kinpano tlen amo kuali uan kema kichijchiuaj kali kampa timosentilisej. Tlaj titemakasej tlen tijpiaj ika nochi toyolo, tijselisej miak tlateochiualistli. Uan nojkia tijueyichiuasej Jehová ika ‘nochi tlamantli tlen tijpiaj’ (Prov. 3:9; 22:9).