1. ¿Tlake kiyolmatij miakej toTeotsij itekipanojkauaj kema mokuapolouaj?

SE TONALI apóstol Pablo kiijtok: “¡Nelia niteiknelti!” (Rom. 7:24). Miakej toTeotsij itekipanojkauaj nojkia kiampa kiyolmatij. Maske tijnekij nochipa tijyolpakiltisej toTeotsij, kemantika timokuapolouaj pampa titlajtlakolejkej. Uan sekinok katli kichijtokej se ueyi tlajtlakoli, moiljuiaj Jehová amo kema kintlapojpoljuis.

2. 1) Kej kiijtoua Salmo 34:22, ¿kenke toTeotsij itekipanojkauaj amo kinamiki nochipa moyolkokojtosej tlaj mokuapolosej? 2) ¿Tlake tikixtomasej ipan ni tlamachtili? (Xikita nopa recuadro “ ¿San techmachtia se keski tlamantli, o eli se tlajtolpanextili?”).

² Biblia kiijtoua katli momanauisej ipan Jehová amo moneki nochipa moyolkokojtosej pampa mokuapolojkej (xijpoua Salmo 34:22). ¿Tlake kiijtosneki timomanauisej ipan Jehová? ¿Tlake moneki tijchiuasej tlaj tijnekij Jehová ma techtlasojtla uan ma techtlapojpoljui? Tijnankilisej ni tlajtlanili tlaj tijmatisej kenke Jehová kinnauatik israeleuanij ma kichijchiuakaj altepemej kampa momanauiskiaj uan kenijkatsa kitekiuiyayaj. Maske nopa Tlanauatili mopatlak ipan Pentecostés, xiuitl 33, moneki tikilnamikisej elki Jehová katli temakak nopa Tlanauatili. Yeka, tlen tlanauatik techmachtia tlake moiljuia tlen tlajtlakoli, tlen katli tlajtlakolchiuaj uan kema moyolkuepaj. Achtoui ma tikitakaj  kenke onkayaya altepemej kampa momanauiyayaj uan kenijkatsa kitekiuiyayaj.

3. ¿Tlake kinchiuiliyayaj israeleuanij katli temiktiyayaj?

³ Jehová tlauel kikualankaitayaya kema se akajya kimiktiyaya seyok. Yeka, tlaj se israelejketl kimiktiyaya se akajya, Jehová tlanauatik se “iteixmatka nopa mijkatsi” ueliskia “momakuepas” uan kimiktis (Núm. 35:19). Kiampa katli temiktijtoya kejuak kiixtlauayaya tlen kichijtoya. Iteixmatka nopa mijkatsi monekiyaya nima momakuepas, kiampa nopa tlali amo nempoliuiskia, pampa Jehová kiniljuijtoya “se tlen temiktia kichiua axtlapajpaktik nopa tlali”. Jehová kinnauatijtoya: “Amo xijchiuakaj axtlapajpaktik nopa tlali kampa inyasej” (Núm. 35:33, 34).

4. ¿Tlake monekiyaya kichiuas se akajya katli temiktiyaya maske amo kinekiyaya?

⁴ Tlaj se israelejketl kimiktiyaya seyok maske amo kinekiyaya, nojkia ueliskia kimiktisej (Gén. 9:5). Tlaj se akajya kichiuayaya nopa, Jehová kitlasojtlayaya pampa amo kichijki san pampa kinejki. Yeka, monekiyaya momanauiti ipan se tlen nopa chikuasej altepemej kampa momanauiyayaj, kiampa katli momakuepayaya amo kimiktiskia. Nopaya monekiyaya mokauas uan san kisaskia kema nopa sumo sacerdote mikiskia (Núm. 35:15, 28).

5. ¿Kenijkatsa techpaleuis ma tikixmatikaj Jehová tlaj timoyoliljuisej ipan nopa altepemej kampa momanauiyayaj?

⁵ Jehová kiiljuik Josué ni tlajtoli: “Xikiniljui nopa israelitajmej ma kitlapejpenikaj [...] ‘altepetinij kampa ueli[s] momanauisej’”. Nopa altepemej kinitayayaj kejuak tlatsejtseloltikej, pampa toTeotsij tlanauatijtoya ma kintlapejpenikaj (Jos. 20:1, 2, 7, 8). Uajka, uelis timotlajtlanisej: “¿Kenijkatsa techpaleuis ma tijmatikaj Jehová tlauel tetlasojtla tlaj timoyoliljuisej ipan nopa altepemej? ¿Uan kenijkatsa techpaleuia ipan ni tonali ma tijnekikaj timomanauisej ipan Jehová?”.

6, 7. 1) Tlaj se akajya temiktiyaya maske amo kinekiyaya, ¿tlake monekiyaya kichiuasej ueuejtlakamej? (Xikita nopa achtoui tlaixkopinkayotl). 2) ¿Kenke monekiyaya monojnotsas ininuaya ueuejtlakamej?

⁶ Kema se israelejketl temiktiyaya maske amo kinekiyaya, monekiyaya yas ipan se altepetl kampa ueliskia momanauis, uan kema asiskia monekiyaya kinpouilis ueuejtlakamej nochi tlen panotoya. Uan ueuejtlakamej monekiyaya kuali kiselisej (Jos. 20:4). Kema panoskia se keski tonali, monekiyaya kiuikasej ipan nopa altepetl kampa temiktik uan ueuejtlakamej katli nopaya euayayaj kitlajtolsenkauaskiaj (xijpoua Números 35:24, 25). Tlaj ueuejtlakamej kiijtouayayaj amo temiktik pampa kinekiyaya, uajka kikauiliyayaj ma tlakuepili ipan nopa altepetl kampa momanauiyaya.

⁷ ¿Kenke monekiyaya monojnotsas ininuaya ueuejtlakamej? Pampa kiampa altepetl Israel eltoskia tlapajpaktik uan toTeotsij kitlasojtlaskia. Se katli momachtia Biblia kiixtonki tlaj se akajya katli temiktijtoya amo tleno kiniljuiskia ueuejtlakamej, uajka ueliskia kimiktisej. Uan kiijtok: “Yaya eliskia itlajtlakol tlaj kimiktiskiaj pampa amo kikajki toTeotsij ma kipaleui”. Nopa tlakatl katli temiktijtoya ueliskia kipaleuisej. San monekiyaya kitemos tlapaleuili uan kichiuas tlen kiiljuiskiaj. Tlaj amo yaskia kampa momanauiskia, uajka ueliskia kimiktisej.

8, 9. Tlaj se akajya tlajtlakolchiua, ¿kenke moneki kiniljuis ueuejtlakamej ma kipaleuikaj?

⁸ Ipan ni tonali, tlaj se Cristo itokilijka  tlajtlakolchiua moneki kiniljuis toikniuaj ueuejtlakamej ma kipaleuikaj. ¿Kenke moneki monojnotsas ininuaya? Pampa ipan Biblia kiijtoua Jehová kintlapejpenijtok ueuejtlakamej ma kinpaleuikaj katli tlajtlakolchiuaj (Sant. 5:14-16). Nojkia pampa inijuantij uelis kinpaleuisej katli moyolkuepaj sampa kuali ma mouikakaj iuaya Jehová uan ayokmo ma tlajtlakolchiuakaj (Gál. 6:1; Heb. 12:11). Uan nojkia pampa san inijuantij kintekimakatokej uan kinmachtijtokej kenijkatsa kinyolchikauasej katli tlajtlakolchijtokej uan kenijkatsa kinpaleuisej amo tlauel ma moyolkokojtokaj. Jehová kiijtoua inijuantij elij kej kampa momanauia se akajya kema ‘nelchikauak uetsi atl’ (Is. 32:1, 2). ¿Amo timoiljuia ni kinextia Jehová tlauel tetlasojtla?

⁹ Miakej toTeotsij itekipanojkauaj kuali kiyolmatij kema monojnotsaj ininuaya ueuejtlakamej uan kiniljuiaj ma kinpaleuikaj. Se neskayotl. Se toikni katli itoka Daniel kichijki se ueyi tlajtlakoli uan maske ya panotoya miak metstli ika tlajtlakolchijtoya, amo kiniljuijtoya ueuejtlakamej. Ya kiijtok: “Pampa ya panotoya miak tonali, nimoiljuiyaya ayokmo ueliskiaj nechpaleuisej”. Daniel majmauiyaya pampa amo kinekiyaya ma kimatikaj tlen kichijtoya. Uan kema momaijtouayaya kiyolmatiyaya achtoui monekiyaya kiiljuis Jehová ma kitlapojpoljui. Teipa, kiniljuik ueuejtlakamej ma kipaleuikaj. Ya kiijtok: “Maske achi nimajmauiyaya nimonojnotsas ininuaya, kema nikinpouilik tlen nijchijtoya, nijyolmatki kejuak nimokixtilik se ueyi tlamamali. Nama nijmachilia amo tleno nechtsakuilia ma nijnojnotsa Jehová”. Nama, Daniel ayokmo kiyolkokoua itlalnamikilis uan nojkia tlatekipanoua kej tlapaleuijketl ipan tlanechikoli.

10. ¿Tlake monekiyaya kichiuas katli temiktijtoya tlaj kinekiyaya ma kitlasojtlakaj?

¹⁰ Tlaj katli temiktijtoya kinekiyaya ma kitlasojtlakaj, nima monekiyaya kitemos tlapaleuili  uan mochololtis ipan se tlen nopa altepemej (xijpoua Josué 20:4). San momanauiskia tlaj nima asiskia uan tlaj nopaya mokauaskia. Monekiyaya kikauas iteki, ichaj, nochi tlen kipixtoya uan ayokmo ueliskia kisas kanajya, san kisaskia kema mikiskia nopa sumo sacerdote (Núm. 35:25). * Amo kenijki tlaj kikauaskia miak tlamantli, pampa ueliskia kuali itstos uan momanauis. Uan tlaj kisaskia tlen nopa altepetl, kinextiskia amo kipatiitayaya inemilis katli kimiktijtoya uan ya nojkia ueliskia mikis.

11. ¿Tlake moneki kichiuas se Cristo itokilijka katli moyolkuepa tlaj kineki kinextis kipatiita toTeotsij itlasojtlalis?

¹¹ Ipan ni tonali nojkia kiampa moneki kichiuasej katli tlajtlakolchijtokej. Moneki nima kitemosej ma kinpaleuikaj, kiampa toTeotsij uelis kintlasojtlas. Moneki moyolkuepasej uan kikauasej nochi tlen ueliskia kichiuas sampa ma tlajtlakolchiuakaj. Apóstol Pablo kiijtok toikniuaj tlen Corinto katli moyolkuepkej mokuesojkej “keja toTeko kipaktia” uan nopa kinpaleuik ‘ma kimakasikaj toTeko’ (2 Cor. 7:10, 11). Tlaj tojuantij nojkia tijchiuaj kampeka ayokmo tijchiuasej se tlajtlakoli, uajka tijnextisej nelia techyolkokoua tlen tijchijkej uan tijpatiitaj toTeotsij itlasojtlalis.

12. ¿Tlake tlamantli moneki kichiuas se Cristo itokilijka tlaj kineki Jehová nojua ma kitlasojtla?

¹² ¿Tlake tlamantli moneki kikauas se Cristo itokilijka tlaj kineki toTeotsij nojua ma kitlasojtla? Moneki kikauas nochi tlamantli tlen ueliskia kichiuas ma tlajtlakolchiua maske uelis tlauel kipaktia (Mat. 18:8, 9). Se neskayotl. Tlaj touampoyouaj amo kitekipanouaj Jehová, ¿tijchiuaj kampeka ayokmo timouikasej ininuaya? Tlaj tijmatij ouij timonauatisej kema tikijij vino, ¿timosentlalijtokej amo tiitstosej ininuaya katli tlauel kinpaktia tlaisej? Uan tlaj tlauel techyoltilana timotekasej iuaya se akajya, ¿tijchiuaj kampeka amo tikitasej ipan películas, Internet o ipan seyok tlamantli tlen ueliskia kichiuas ma timoiljuikaj tlen amo kuali? Moneki tikilnamikisej tlauel kuali tiitstosej tlaj tijchiuasej kampeka tiitstosej tixitlauakej iixpa Jehová. Se akajya katli kimachilia Jehová kitlauelkajtok, tlauel moyolkokoua. Uan se katli kimachilia Jehová ‘nochipa kiiknelia’, nelia tlauel yolpaki (Is. 54:7, 8).

13. ¿Kenke katli temiktijtoya ueliskia itstos ika temachili uan ika pakilistli ipan nopa altepetl?

¹³ Kema katli temiktijtoya asiyaya ipan nopa altepetl ayokmo tleno ueliskiaj kichiuilisej. Jehová kiijtok ipan nopa altepetl ‘ueliskiaj momanauisej’ (Jos. 20:2, 3). Jehová amo kiijtok sampayano ma kitlateljuikaj ika tlen kichijtoya. Nojkia amo kikauiliyayaj ma kalaki katli kinekiyaya momakuepas, kiampa amo kimiktiskia katli yajtoya momanauia. Kema itstoya ipan nopa altepetl, toTeotsij kejuak kimokuitlauiyaya uan yeka amo majmauiyaya. Amo itstoya ipan se cárcel, ya ueliyaya tekiti uan kinpaleuiyaya sekinok maseualmej, uan nojkia kitekipanouayaya Jehová ika tlaseuilistli. ¡Nopaya ueliskia kichiuas miak tlamantli uan yolpakis!

14. ¿Ipan tlake uelis motemachis se akajya katli moyolkueptok?

¹⁴ Sekij toTeotsij itekipanojkauaj maske moyolkueptokej nojua kinyolkokoua tlen kichijkej. Sekinok moiljuiaj Jehová nochipa kiilnamiktos inintlajtlakol. Tlaj ta nojkia kiampa tijyolmati, uelis timotemachis Jehová mitstlasojtla uan mitstlapojpoljuijtok. Daniel, katli tikijtojkej ipan párrafo 9, kiitak nopa nelia. Ueuejtlakamej  kitlajtolmakakej uan kipaleuijkej sampa ma kipia kuali itlalnamikilis, yeka pejki tlauel kuali kiyolmatki. Ya kiijtok: “Ayokmo monekiyaya nimoyolkokojtos pampa Jehová nechtlapojpoljuijtoya. ToTeotsij kejuak kiuika totlajtlakoljuaj uan uejka kitlalia, kiampa ayokmo sampa tikilnamikisej tlen tijchijkej”. Kej tikijtojkej, tlaj se maseuali asiyaya ipan nopa altepetl kampa momanauiyayaj ayokmo tleno kipanoyaya. Nojkia kiampa pano kema Jehová techtlapojpoljuia, amo moneki timoiljuisej Jehová techilnamikilijtos tlen tijchijkej o amo kema kiilkauas (xijpoua Salmo 103:8-12).

15, 16. ¿Kenijkatsa techyolchikaua pampa tijmatij Jesús techmakixtik uan eli Sumo Sacerdote?

¹⁵ Tojuantij tlauel moneki ma timotemachikaj ipan itlasojtlalis Jehová. Kej tikitakej kampa pejki ni tlamachtili, Pablo kiijtok eliyaya teiknelti uan moyolkokouayaya pampa amo ueliyaya senkistok kichiua nochi tlen Jehová kinauatiyaya. Maske kiyolkokouayaya tlen kichijtoya uan kichiuayaya kampeka amo tlajtlakolchiuas, ya kiijtok: “Tlaskamati toTeko Dios [ika] toueyiteko Jesucristo” (Rom. 7:25). Pampa Pablo moyolkueptoya, motemachiyaya Jehová kitlapojpoljuijtoya ika Jesús. Cristo temaktilik inemilis, kej nopa kichiua kuali ma tijpiakaj totlalnamikilis uan ma tijpiakaj tlayolseuilistli (Heb. 9:13, 14). Uan pampa Jesús eli Sumo Sacerdote, yeka “ueli kinmakixtis para nochipa nochi tlakamej tlen kinechkauiaj toTeko ipampa tlen yajaya kichijki, pampa yajaya itstos para nochipa uan ajachika momaijtoua ika toTeko toTata ininpampa inijuantij” (Heb. 7:24, 25). Uejkajkia israeleuanij ueliyayaj motemachiaj Jehová kintlapojpoljuiskia pampa itstoya se sumo sacerdote. Yeka, pampa nama Jesús eli Sumo Sacerdote, uelis timotemachisej Jehová “temachtli techtlasojtlas uan techpaleuis ipan tlen ueli tlalochtli kema más moneki” (Heb. 4:15, 16).

¹⁶ Yeka, tlaj tijneki timomanauis ipan Jehová, moneki titlaneltokas ipan Jesús imikilis. Amo ximoiljui san kinpaleuis sekinok maseualmej. Xijneltoka Jesús motemaktilik pampa kineki mitsmakixtis (Gál. 2:20, 21). Nojkia moneki tijneltokas san ika nopa tlamakixtili Jehová mitstlapojpoljuis uan kichiuas xiitsto nochipa. Jesús imikilis eli se kuali tlamantli katli Jehová mitsmakatok.

17. ¿Kenke tijneki timomanauis ipan Jehová?

¹⁷ Nopa altepemej kampa momanauiyayaj, techmachtia Jehová tlauel tetlasojtla. Ika nopa altepemej Jehová kinextik tlauel kipatiita nemilistli. Uan nojkia kinextia kenijkatsa techpaleuiaj ueuejtlakamej, kenijkatsa uelis tijnextisej nelia timoyolkuepaj uan kenijkatsa ya tlauel techtlapojpoljuia. ¿Tijnextiaj nelia tijpatiitaj timomanauisej ipan Jehová? ¡San Jehová uelis techmanauis! (Sal. 91:1, 2). Ipan seyok tlamachtili tikitasej kenijkatsa uelis tijchiuasej kej Jehová, katli nochipa kichiua tlen xitlauak uan tetlasojtla.