1, 2. 1) ¿Kenijkatsa Jesús kinankilik Pedro kema kiiljuik amo kinamikiyaya tlaijiyouis? (Xikita nopa achtoui tlaixkopinkayotl). 2) ¿Kenke kiampa kinankilik?

JESÚS itokilijkauaj amo kineltokayayaj tlen kiniljuik. Maske inijuantij motemachiyayaj kikualtlaliskia tlanauatijkayotl ipan Israel, ya kiniljuik tlaijiyouiskia uan mikiskia. Apóstol Pedro kiiljuik: “Ximoikneli noTeko, ta amo kinamiki mitspanos nopa”. Uan Jesús kinankilik: “Xinechtlalkaui, Axkualtlakatl. Tijneki tinechtsakuilis para ma axnijchiua ipakilis toTeko. Axtimoiljuia tlen toTeko Dios moiljuia, san timoiljuia keja tlakamej” (Mat. 16:21; 16:22, TNM; 16:23; Hech. 1:6).

² Tlen Jesús kiijtok kinextik kenijkatsa amo sanse moiljuia toTeotsij ika tlen moiljuiaj maseualmej katli Satanás kinnauatia (1 Juan 5:19). Uan tlen Pedro kiiljuik kinextia kenijkatsa maseualmej san moiljuiaj ipan inijuantij. Jesús kuali kimajtoya Jehová amo kiampa moiljuiyaya. Jehová kinekiyaya Jesús ma mokualchijchiua pampa tlauel tlaijiyouiskia uan mikiskia. Uan ika tlen kiijtok, Jesús kinextik moiljuiyaya kej Jehová uan amo kej maseualmej.

3. ¿Kenke tijmatij ouij amo timoiljuisej kej maseualmej uan tikitasej tlamantli kej Jehová kiita?

 ³ Uan tojuantij, ¿timoiljuiaj kej toTeotsij o kej maseualmej? Maske uelis tijpatlatokej tonemilis uan timoyakanaj ika tlen Jehová tlanauatia, ¿nojkia tijpatlatokej totlalnamikilis? ¿Tijchiuaj kampeka tikitasej tlamantli kej toTeotsij kiita? Tlaj tijnekij timoiljuisej kej Jehová, moneki nochipa tijchijtosej kampeka. Uan moneki timomokuitlauisej pampa amo ouij peuas timoiljuisej kej maseualmej (Efes. 2:2). Uan uelis nojkia tijnekiskiaj timoiljuisej kej maseualmej, uan nopa kichiuas ma timosentlalikaj san ipan tojuantij. Uajka, tijmatij ouij timoiljuisej kej Jehová, uan amo ouij peuas timoiljuisej kej sekinok maseualmej.

4. 1) ¿Tlake panos tlaj peuas timoiljuisej kej maseualmej? 2) ¿Kenijkatsa techpaleuis ni tlamachtili?

⁴ Tlaj nojkia peuas timoiljuisej kej maseualmej, teipa peuas timoueyimatisej uan timoiljuisej san tojuantij kinamiki tikijtosej tlake tlamantli eli kuali uan tlake amo (Mar. 7:21, 22). Yeka, tlauel moneki ma timoiljuikaj kej Jehová uan amo kej maseualmej. Ni tlamachtili techpaleuis kiampa ma tijchiuakaj. Tikitasej kenke timoiljuisej kej toTeotsij tlauel techpaleuia uan amo kiijtosneki kejuak techilpitokej. Nojkia tikitasej tlake uelis tijchiuasej uan kiampa amo timoiljuisej kej maseualmej. Ipan seyok tlamachtili, tikitasej kenijkatsa uelis timoiljuisej kej toTeotsij ipan se keski tlamantli tlen tijchiuaj.

5. ¿Kenke sekij maseualmej amo kinekij se akajya ma kiniljui tlen kichiuasej?

⁵ Miakej maseualmej amo kinekij sekinok ma kiniljuikaj tlen kichiuasej. Kiijtouaj: “Amo aka nijneki ma nechiljui tlake nijchiuas”. Uelis kiampa kiijtouaj pampa kinekij ininselti kitlapejpenisej tlen kichiuasej, uan amo kenijki tlaj kiampa moiljuiaj. Amo kinekij sekinok ma kiniljuikaj tlake kichiuasej uan amo kinekij elisej sanse kej sekinok maseualmej. *

6. 1) ¿Tlake techkaua ma tijchiuakaj Jehová? 2) ¿Kiijtosneki uelis tijchiuasej nochi tlen tijnekisej?

⁶ Uajka, uelis timotemachisej tlaj timoiljuisej kej Jehová amo kiijtosneki ayokmo tijchiuasej tlen timoiljuiaj o tijpatlasej kej tielij. Kej kiijtoua 2 Corintios 3:17, “kema itonal toueyiTeko mokaua ipan iyolo se tlakatl, nopa tlakatl ayok ilpitok [...], ya majkajtok”. Tojuantij uelis tijtlapejpenisej tlake tijnekij uan tlake techpaktia, pampa kiampa techchijchijki Jehová. Maske kiampa eli, moneki tikilnamikisej amo uelis tijchiuasej nochi tlen tijnekisej (xijpoua 1 Pedro 2:16). Kema monekis tijtlapejpenisej tlaj se tlamantli kuali o amo, Jehová kineki ma timoyakanakaj ika iTlajtol. ¿Kiijtosneki amo techkaua yon se tlamantli ma tijchiuakaj o techpaleuia ika tlen technauatia?

7, 8. Tlaj timoiljuisej kej Jehová, ¿kiijtosneki ayokmo uelis tijchiuasej tlen tijnekisej? Xikijto se neskayotl.

⁷ Ma tikitakaj se neskayotl. Tetajmej kinekij kinpaleuisej ininkoneuaj ma kichiuakaj tlen xitlauak, kuali ma tekitikaj uan ma tlatlepanitakaj. ¿Kiijtosneki amo kinkauaj ma kichiuakaj tlen kinekij? Amo, pampa kinekij kinpaleuisej kuali ma itstokaj. Kema ininkoneuaj moskaltisej uan ayokmo itstosej ininchaj, monekis kitlapejpenisej tlake kichiuasej. Tlaj kichiuasej tlen inintatauaj kinmachtijkej, uelis kuali kitlapejpenisej tlen kichiuasej uan amo kipiasej miak kuesoli uan tekipacholi.

 ⁸ Jehová eli se kuali tetaj uan kineki ikoneuaj kuali ma itstokaj ipan ininnemilis (Is. 48:17, 18). Yeka, techmachtia kenijkatsa kinamiki timonejnemiltisej uan kenijkatsa timouikasej ininuaya sekinok. Ya kineki ma timoiljuikaj uan ma tijchiuakaj kej ya. Uajka, tlaj timoiljuisej kej Jehová, techpaleuis ma tijmatikaj miak tlamantli uan kuali tijtlapejpenisej tlen tijchiuasej (Sal. 92:5; Prov. 2:1-5; Is. 55:9). Nojkia techpaleuia ma tijtlapejpenikaj tlen kichiuas ma tiyolpakikaj uan kikaua ma tijchiuakaj tlen techpaktia (Sal. 1:2, 3). Uajka, timoiljuisej kej Jehová tlauel techpaleuia.

9, 10. ¿Kenke tlen Jehová moiljuia nelia tlauel tepaleuia uan maseualmej inintlalnamikilis amo?

⁹ Cristo itokilijkauaj kinekij moiljuisej kej Jehová pampa tlen ya moiljuia nelia tepaleuia uan tlen maseualmej moiljuiaj amo tepaleuia. Ipan ni Tlaltipaktli maseualmej kiijtouaj kenijkatsa kinamiki timonejnemiltisej, kenijkatsa timouikasej ininuaya tochampoyouaj uan kenijkatsa tiyolpakisej ipan toteki. Jehová amo moiljuia kej inijuantij. Nojkia, miakej maseualmej kinekij tlauel pankisasej uan amo kenijki kiitaj kema se akajya momekatia. Kemantika, katli mosenkajtokej kiniljuiaj uelis mokauasej tlaj kipiaj tlen ueli kuesoli o kiixpolosej nopa amatl kampa nesi mosenkajtokej pampa nopa kinpaleuis nojua tlauel ma yolpakikaj. Uajka, ¿tlen maseualmej moiljuiaj tlauel tepaleuia uan Biblia amo?

¹⁰ Jesús kiijtok se akajya kinextia kipia tlalnamikilistli ika tlamantli tlen kichiua (Mat. 11:19). Maske maseualmej kichijchijtokej yajyankuik tlamantli tlen tepaleuia, amo kitlamiltijtokej tlamantli tlen kichiua ma titlaijiyouikaj, kej tlauilankayotl, kema se akajya techikoita o tlasisinijkayotl. Nojkia, maseualmej amo kenijki kiitaj kema se akajya momekatia. ¿Techpaleuijtok ni tlamantli ayokmo ma timokokokaj, kuali ma timouikakaj ininuaya tochampoyouaj uan kitlamiltijtok sekinok kuesoli? Amo, kej kiijtouaj miakej maseualmej, kichijtok nojua tlauel ma momiakili. Uan maseualmej katli moiljuiaj kej toTeotsij tlauel yolpakij ininuaya ininchampoyouaj, amo mokokouaj kej maseualmej katli momekatiaj uan kuali mouikaj ininuaya ininikniuaj katli itstokej ipan nochi Tlaltipaktli (Is. 2:4; Hech. 10:34, 35; 1 Cor. 6:9-11). Tlen Jehová moiljuia nelia tlauel tepaleuia.

11. ¿Kej ajkia kinekiyaya moiljuis Moisés, uan kenijkatsa kipaleuik?

¹¹ ToTeotsij itekipanojkauaj katli uejkajkia itstoyaj nojkia kiitakej tlauel kinpaleuiyaya kema moiljuiyayaj kej Jehová. Ma tikitakaj tlen kipanok Moisés. Maske “Moisés momachtik nochi tlalnamikilistli tlen nopa egipcios kimatiyayaj”, nojua kiiljuik Jehová ma kimaka tlalnamikilistli (Hech. 7:22; Sal. 90:12). Nojkia, kitlajtlanik Jehová: “Xinechiljui tlake mopakilis para nijchiuas” (Éx. 33:13). Moisés kikajki Jehová ma kiyakana, yeka tlen ya kichijki tlapaleuik ma moaxiti tlen Jehová mosentlalijtok. Nojkia, ipan Biblia kiijtoua ya eli se tlen toTeotsij itekipanojkauaj katli tlauel kuali tlaneltokak (Heb. 11:24-27).

12. Kema Pablo kitlapejpeniyaya tlen kichiuas, ¿tlake kikauayaya ma kiyakana?

¹² Apóstol Pablo tlauel momachtijtoya uan tlalnamikiyaya, uan uelis kamanaltiyaya ome tlajtoli (Hech. 5:34; 21:37, 39; 22:2, 3). Maske kimatiyaya miak tlamantli, kema kitlapejpeniyaya tlen kichiuas ya nochipa kikauayaya toTeotsij iTlajtol ma kiyakana  uan amo tlen maseualmej moiljuiyayaj (xijpoua Hechos 17:2; 1 Corintios 2:6, 7, 13). Pampa kiampa kichiuayaya, kipaleuik ipan tlajtolmoyaualistli uan motemachiyaya nochipa itstoskia iluikak (2 Tim. 4:8).

13. ¿Ajkia kinamiki kichiuas kampeka moiljuis kej Jehová?

¹³ Kej ya tikitakej, tlaj timoiljuisej kej Jehová tlauel techpaleuis uan amo maseualmej inintlalnamikilis. Tlaj tijchiuasej tlen ya kiijtoua, techpaleuis tlauel ma tiyolpakikaj uan kuali ma tiitstokaj. Jehová amo techchiualtia ma timoiljuikaj kej ya. “Tlalnamijkatlatekipanojketl” yon ueuejtlakamej amo techchiualtiaj ma timoiljuikaj kej inijuantij (Mat. 24:45; 2 Cor. 1:24). Sejse tlen tojuantij moneki tijchiuasej kampeka timoiljuisej kej toTeotsij. ¿Kenijkatsa uelis tijchiuasej?

14, 15. 1) Tlaj tijnekij timoiljuisej kej Jehová, ¿tlake tlamantli moneki tijkauasej ma kalaki ipan totsonteko? 2) Kej kiijtoua Romanos 12:2, ¿kenke moneki ayokmo timoiljuisej kej maseualmej? Xikijto se neskayotl.

¹⁴ Ipan Romanos 12:2, techiljuia: “Ayok xijchiuakaj keja ama kichiuaj tlakamej ipan ni Tlaltipaktli. Pero xijkauilikaj toTeko ma inmechyolpatla uan ma inmechchiua inyankuikej tlakamej pampa inkipatlatiauij inmotlalnamikilis ika tlen kuali. Uan keja nopa inkimatisej tlake ipakilis toTeko. Uan inkiitasej para inmechpaktis tlen yajaya kineki xijchiuakaj, uan kisas kuali uan yejyektsi uan tlen senkistok kinamiki para inmojuantij”. Ni techmachtia uelis timoiljuisej kej Jehová maske kema ayamo tikixmatiyayaj timoiljuiyayaj seyok tlamantli. Maske kej elij totatauaj o tlen techpanotok kichiua ma timoiljuikaj se keski tlamantli, totlalnamikilis kena uelis mopatlatias. Uajka, uelis mopatlas tlaj tijkauasej ma kalaki uan ma mokaua se keski tlamantli ipan totlalnamikilis. Tlaj timoiljuisej tlen Jehová kipaktia, tikitasej tlen ya moiljuia tlauel tepaleuia. Uan nopa kichiuas ma tijnekikaj timoiljuisej kej ya.

¹⁵ Uajka, tlaj tijnekij tijpatlatiasej totlalnamikilis moneki ayokmo tijkauasej ma kalaki ipan totsonteko tlen maseualmej moiljuiaj. Ni kiijtosneki amo tijkauasej ma techmaua tlen moiljuiaj uan tlen kiijtouaj maseualmej. Ni achtoui tlamantli tlauel ipati. Tlaj tijnekij kuali tijkuamachilisej, ma timoiljuikaj se maseuali amo kineki mokokos uan peua kikua tlakualistli tlen kipaleuis itstos kuali. ¿Kipaleuis tlaj kikuas tlakualistli tlen sokiyo? Amo. Uajka san tlapik eliskia tlaj timomachtiskiaj tlen toTeotsij moiljuia uan nojua tijkauaskiaj ma techmaua tlen maseualmej moiljuiaj.

16. ¿Ika tlake tlamantli moneki timomokuitlauisej?

¹⁶ Maske amo tijnekiskiaj, kemantika kena tijkakij tlen maseualmej moiljuiaj pampa tiitstokej ipan ni Tlaltipaktli (1 Cor. 5:9, 10). Uan kema titlajtolmoyauaj nojkia tijkakij tlamachtili tlen amo melauak. Maske uelis tijkakisej tlen maseualmej moiljuiaj, moneki ayokmo timoyolpakiltisej ika nopa tlamantli uan tijkixtisej tlen totsonteko. Sanse kej Jesús, moneki nimantsi tijkixtisej tlalnamikilistli tlen Satanás kineki ma tijpiakaj. Kena uelis tijchiuasej se keski tlamantli tlen techpaleuis amo ma timoiljuikaj kej maseualmej. Ma tikitakaj kenijkatsa uelis tijchiuasej nopa (xijpoua Proverbios 4:23).

17. ¿Tlake uelis tijchiuasej tlaj amo tijnekij tijsokiuisej totlalnamikilis?

¹⁷ Moneki kuali tikintlapejpenisej touampoyouaj. Biblia techiljuia tlaj timomatisej tiitstosej ininuaya katli amo kitekipanouaj Jehová, peuas nojkia timoiljuisej kej  inijuantij (Prov. 13:20; 1 Cor. 15:12, 32, 33). Nojkia moneki kuali tijtlapejpenisej tlen ika timoyolpakiltisej. Tlaj amo timoyolpakiltisej ika tlamantli kampa kineltokaj tlen nopa evolución, kampa nesi tlasisinijkayotl o kampa momekatiaj, techpaleuis amo ma tijsokiuikaj totlalnamikilis ika tlamantli tlen amo melauak (2 Cor. 10:5).

18, 19. 1) ¿Kenke moneki timomokuitlauisej ika tlen maseualmej moiljuiaj? 2) ¿Tlake tlajtlanili uelis timochiuilisej, uan kenke?

¹⁸ Nojkia moneki tijmatisej kema o kanke monextia tlen maseualmej moiljuiaj uan amo tijkauasej ma techmaua. Ma timoiljuikaj ipan se keski tlamantli: kema se akajya tematiltia se tlamantli tlen panotok, uelis tlen kiijtoua kinextia kipaleuia se partido político o se tekichijketl. Uan kemantika nojkia kipanoltiaj kampa nesi tlen maseualmej kinamikiskia ma mosentlalikaj kichiuasej uan kampa moijtoua tlake tlamantli uelis kipiasej. Ipan se keski amochtli o películas moijtoua tlauel ipati kema se akajya moiljuia san ya tlauel ipati o ichampoyouaj. Ni tlamantli amo nelia pampa Biblia kiijtoua san uelis tiyolpakisej tlaj tlauel tikiknelisej Jehová (Mat. 22:36-39). Uan maske se keski tlamantli nesi amo kenijki tlaj kiitasej konemej, teipa yolik kichijtias konemej amo kenijki ma kiitakaj kema se akajya momekatia.

¹⁹ Ni amo kiijtosneki amo uelis timoyolpakiltisej ika tlamantli tlen kuali. Yeka, kualtiaskia ma timotlajtlanikaj: “¿Nijmati kema uan kanke maseualmej kinextiaj tlen moiljuiaj? ¿Nikiniljuia nokoneuaj tlake uelis kitlachilisej o tlake uelis kipouasej uan tlake amo? ¿Nojkia nijmati tlake uelis nikitas o nijpouas uan tlake amo? ¿Nikinmachtia nokoneuaj tlen moiljuia Jehová uan kiampa amo moiljuisej kej maseualmej?”. Tlaj kuali tijmatij kenijkatsa moiljuia Jehová uan kenijkatsa moiljuiaj maseualmej uajka amo tijkauasej ma techmaua tlen moiljuiaj ipan ni Tlaltipaktli.

20. ¿Tlake kichiuas ma timoiljuikaj kej Jehová o kej Satanás?

²⁰ Ma tikilnamikikaj uelis timoiljuisej kej Jehová o kej Satanás. Katli kuali tijtlakakilisej kichiuas ma timoiljuikaj kej ya. Tlaj tijkauasej ipan totsonteko ma kalaki tlen maseualmej moiljuiaj, uajka nojkia peuas timoiljuisej uan tijchiuasej kej inijuantij. Yeka, tlauel moneki tijmokuitlauisej tlen tikitaj, tlen tijpouaj, tlen tijkakij uan tlen timoiljuiaj.

21. ¿Tlake tlamantli tikitasej ipan seyok tlamachtili?

²¹ Kej ya tikitakej, tlaj tijnekij timoiljuisej kej Jehová amo san moneki amo tijkauasej ma kalaki ipan totsonteko tlen uelis kisokiuis. Nojkia moneki timomachtisej tlen moiljuia Jehová uan kiampa nojkia timoiljuisej kej ya. Ipan seyok tlamachtili tikitasej kenijkatsa uelis tijchiuasej nopa.