1, 2. 1) Kej kiijtoua Efesios 6:16, ¿kenke moneki kuali titlaneltokasej? 2) ¿Tlake tlajtlanili tijnankilisej?

¿TIJPIAJ totlaneltokilis “keja itepostsajka” se tlateuijketl? (Xijpoua Efesios 6:16). Uelis tikijtosej kena. Nojkia kej itepostsajka se tlateuijketl kimanauiyaya ipan nochi itlakayo, totlaneltokilis nojkia techpaleuia amo ma tijchiuakaj tlen maseualmej momajtokej kichiuaj, kej auilnemilistli, tlasisinijkayotl o sekinok tlamantli tlen kiixpano toTeotsij itlanauatiljuaj.

² Pampa tiitstokej ipan “itlamia tonali”, tikixnamikisej miak tlaouijkayotl kampa monekis tijnextisej tlaj kuali titlaneltokaj (2 Tim. 3:1). Yeka, ¿tlake techpaleuis tijmatisej tlaj kuali titlaneltokaj? Uan, ¿tlake techpaleuis nochipa kuali titlaneltokatosej? Ma tikitakaj kenijkatsa monankilia ni tlajtlanili.

3. ¿Kenijkatsa tlateuianij kimokuitlauiyayaj inintepostsajka, uan kenke?

³ Inintepostsajka tlateuianij kipikiyayaj ika kuetlaxtli uan kitlaliliyayaj se tlamantli tlen chiyauak, kiampa amo tleno kipanoyaya nopa kuetlaxtli uan amo nempoliuiyaya nopa tepostli. Yeka, tlaj se tlateuijketl kiitayaya itepostsajka amo kuali eltoya, nima kikualchijchiuayaya uan kiampa sampa mokualchijchijtoya kema yaskia tlateuiti. ¿Kenijkatsa ika tlen tikijtojtokej mouika ika tlaneltokili?

4. ¿Kenke moneki kuali tikitasej kenijkatsa eltok totlaneltokilis?

⁴ Kej kichiuayayaj uejkajkia, moneki nochipa tikitasej kenijkatsa eltok totlaneltokilis. Ni san tojuantij moneki tikitasej.  Kiampa kuali timokualchijchijtosej, pampa nochi Cristo itokilijkauaj nochipa kejuak timoteuijtokej ika amo kuali ajakamej (Efes. 6:10-12). ¿Tlake techpaleuis timokualchijchijtosej kema tikixnamikisej tlaouijkayotl? Se, tikiljuisej Jehová ma techpaleui. Nojkia, moneki tijpouasej Biblia uan kiampa uelis timoitasej kej Jehová techita (Heb. 4:12). Biblia kiijtoua: “Ximotemachi ipan [Jehová] ika nochi moyolo. Amo xijtokili san tlen motlalnamikilis mitsiljuia” (Prov. 3:5, 6). Ika tlen tijpojkej, kualtiaskia tikitasej tlen namanok tijtlapejpenijkej tijchiuasej. Uelis kema amo tijpixtoyaj tomij, ¿timoiljuijkej ipan tlen Jehová kiijtojtok ipan Hebreos 13:5? Nopaya kiijtoua: “Axkema niinmechkajteuas, nochipa niitstos inmouaya”. ¿Nelia timotemachijkej Jehová techpaleuiskia? Tlaj timotemachiaj ipan tlen Jehová kiijtok, kiijtosneki kuali eltok totlaneltokilis.

5. ¿Tlake uelis tikitasej kema tijtlachiliaj kenijkatsa eltok totlaneltokilis?

⁵ Kema tikitaj kenijkatsa eltok totlaneltokilis uelis tikitasej se keski tlamantli tlen amo timoiljuijtoyaj. Uelis tikitasej kanke nojua moneki tijpatlasej. Kema tlauel timokuesouaj, istlakatili o pampa tlauel timoyolkokouaj, uelis kichijtok ayokmo kuali ma titlaneltokakaj. Tlaj kiampa mitspano, ¿tlake mitspaleuis uan kiampa kuali eltos motlaneltokilis?

6. ¿Tlake tlamantli amo kenijki tlaj techkuesoua?

⁶ Amo kenijki tlaj techkuesoua se keski tlamantli, kej kema tijnekij nochipa tijchiuasej tlen Jehová uan Jesús kinpaktia (1 Cor. 7:32). Uan tlaj titlajtlakolchijtokej, tlauel tijnekij sampa kuali timouikasej iuaya toTeotsij (Sal. 38:18). Nojkia, katli mosenkajtokej amo kenijki tlaj kinekij kiyolpakiltisej ininsiua o ininueue, uan nochi tijnekij kuali ma itstokaj tochampoyouaj uan toikniuaj (1 Cor. 7:33; 2 Cor. 11:28).

7. 1) ¿Tlake panos ika totlaneltokilis tlaj tlauel timokuesouaj? 2) Kej kiijtoua Proverbios 29:25, ¿kenke amo kinamiki tikinmakasisej maseualmej?

⁷ Maske amo kenijki tlaj techkuesoua se keski tlamantli, tlaj tlauel timokuesosej uelis kichiuas ayokmo kuali ma titlaneltokakaj. Se tlen nopa tlamantli eli tlaj san timoiljuijtokej tijpiasej miak yoyomitl uan nochipa tijnekisej tijpixtosej miak tlakualistli (Mat. 6:31, 32). Tlaj tlauel techkuesos nopa tlamantli, kichiuas ma timosentlalikaj tlauel titlapijpiasej uan peuas tikiknelisej tomij. Uan nopa kichiuaskia ayokmo kuali ma titlaneltokakaj uan ayokmo kuali ma tijtekipanokaj Jehová (Mar. 4:19; 1 Tim. 6:10). Nojkia, uelis timokuesosej kema tijnekisej sekinok kuali ma techitakaj. Nopa kichiuaskia ma tikinmakasikaj maseualmej pampa timoiljuisej techpinajtisej o techtlaijiyouiltisej, uan amo pampa tijnekisej tijyolpakiltisej toTeotsij. ¿Tlake techpaleuis amo ma tijchiuakaj nopa? Ma tikiljuikaj Jehová ma techpaleui kuali ma titlaneltokakaj uan amo ma timajmauikaj (xijpoua Proverbios 29:25; Luc. 17:5).

8. ¿Tlake moneki tijchiuasej tlaj se akajya kimoyaua istlakatili tlen Jehová uan toikniuaj?

⁸ Satanás, katli kipeualtik “nochi istlakayotl”, kitekiuia miak tlamantli uan kiampa kimoyaua istlakatili tlen Jehová uan toikniuaj (Juan 8:44). Nopa apóstatas o katli ayokmo kinejkej kitekipanosej Jehová, istlakatij uan kiijtouaj tlen amo melauak tlen toTeotsij itlanechikol ipan Internet, televisión uan ipan sekinok tlamantli. Tlen kiijtouaj eli kej “lemenkakuatlamintli” tlen Satanás kitekiuia (Efes. 6:16). ¿Tlake moneki tijchiuasej tlaj se akajya  techiljuia tlen nopa istlakatili? Amo tijtlakakilisej. ¿Kenke? Pampa timotemachiaj ipan Jehová uan ipan toikniuaj. Yeka, amo tijnekij tijmatisej yon se kentsi tlen kichiuaj apóstatas. Nojkia, amo kema ma tikamanaltikaj ininuaya apóstatas tlen se tlamachtili.

9. ¿Tlake uelis techpanos tlaj timotekipachouaj?

⁹ Tlaj timotekipachouaj uelis kichiuas ayokmo kuali ma titlaneltokakaj. Kemantika, kema tijpiaj kuesoli kichiua tlauel ma timotekipachokaj. Maske kena kinamiki tijsenkauasej kuesoli tlen tijpiaj, amo moneki nochipa timoiljuijtosej ipan nopa tlamantli. Pampa nopa kichiuaskia ayokmo ma timotemachikaj ipan tlen Jehová kitenkajtok kichiuas (Apoc. 21:3, 4). Kema timotekipachouaj uelis kichiuas tlauel ma tisiauikaj uan ayokmo tijtekipanosej toTeotsij (Prov. 24:10). Nopa tlamantli amo kinamiki ma techpano.

10. ¿Tlake techmachtia tlen kiijkuilok tosiuaikni?

¹⁰ Ma tikitakaj tlake kichiua se tosiuaikni tlen eua Estados Unidos uan kiampa nojua kuali tlaneltokas maske kimokuitlauia iueue katli tlauel mokokoua. Ya kititlanki se amatlajkuiloli ipan Kali Betel. Ya kiijtoua: “Kemantika tlen tikixnamikij kichijtok tlauel ma timokuesokaj uan ma timotekipachokaj. Maske kiampa techpano, tlauel timotemachiaj ipan tlen teipa tijselisej. Nochi nopa tlamachtili tlen tijseliaj tlauel techpaleuia kuali ma titlaneltokakaj uan ma tikijiyouikaj nochi tlen tikixnamikij. Tlauel kuali tlen techtlajtolmakaj pampa techpaleuia ma tikijiyouikaj nochi tlaouijkayotl tlen Satanás kichiua”. Tlen kiijtok tosiuaikni techmachtia kena uelis tijchiuasej kampeka amo timotekipachosej. ¿Kenijkatsa tijchiuasej nopa? Tlaj timotemachisej Jehová nochipa techyolchikauas uan tijpatiitasej nochi tlamachtili tlen ya techmaka, uan tlaj tikitasej nopa tlaouijkayotl tlen tijpiasej kej se tlamantli tlen Satanás kichiua.

11. ¿Tlake tlajtlanili moneki timochiuilisej uan kiampa tikitasej kenijkatsa eltok totlaneltokilis?

¹¹ ¿Nojua techpoloua se keski tlamantli uan kiampa nojua kuali titlaneltokasej? Ma timoiljuikaj tlake tijchijtokej ipan se keski metstli tlen panotok: “¿Nijchijtok kampeka  amo tlauel nimokuesos? ¿Amo nijtlakakilia istlakatili tlen kiijtouaj apóstatas yon nikamanaltitok ininuaya tlen se tlamachtili? ¿Nijchijtok kampeka amo nimotekipachos?”. Tlaj titlanankiliaj kena, uajka totlaneltokilis kuali eltok. Maske kuali titlaneltokatokej, moneki kuali titlachixtosej, pampa Satanás kitekiuia sekinok tlamantli. Ma tikitakaj se keski tlen nopa tlamantli.

12. ¿Tlake uelis techpanos tlaj tijnekisej tlauel titlatominpiasej?

¹² Tlaj tlauel tijnekisej titlatominpiasej uelis kichiuas ayokmo kuali ma titlachixtokaj uan ayokmo kuali ma titlaneltokakaj. Apóstol Pablo kiijtok: “Xijchiua keja se tlakatl tlen mosoldadochiua. Yajaya axueli moilpis ika tlamantli ipan ininyolis sekinok tlakamej. San ueli moyoliljuia kejatsa kipaktis iteko tlen kisoldadochijki” (2 Tim. 2:4). Se tlateuijketl romaejketl amo ueliyaya kipias seyok tekitl. ¿Tlake ueliskia kipanos tlaj kiixpanoskia nopa tlanauatili?

13. ¿Kenke se tlateuijketl amo ueliyaya kipia seyok tekitl?

¹³ Ma timoiljuikaj ipan ni tlamantli. Tlateuianij kuali mokualchijchiuaj kenijkatsa kitekiuisej ininespada uan kiampa uelis yasej tlateuitij, uan se tlen nopa tlateuijketl amo itstok nopaya pampa yajki kinamakato tlakualistli. Ika tiotlak tlateuianij kitlachiliaj kenijkatsa eltok nochi tlen kitekiuiaj uan kitentiaj ininespada, uan nopa tlateuijketl katli tlakualnamaka ya motekiuia tlakualchiuas uan kiampa ualmostla kinamakas nopa tlakualistli. Ika ijnalok, ininkualankaitakauaj ualauij kinteuiaj. Ximoiljui, ¿ajkia kuali tlateuis uan kiyolpakiltis itlayakanka? ¿Ika ajkia tlateuijketl mitspaktiskia tiitstos, ika se katli mokualchijchijki o katli san tlanamakayaya?

14. ¿Tlake kipatiitaj itlateuijkauaj Cristo?

¹⁴ Nojkia kej se kuali tlateuijketl, tojuantij timosentlaliaj san ipan se tlamantli: tikinyolpakiltisej totlayakankauaj Jehová uan Cristo. San nopa tlamantli tlauel tijpatiitaj, uan amo tlen Satanás techtenkauilia. Yeka, tijkauaj tonali uan tochikaualis, kiampa tijtekipanouaj Jehová uan nojkia techpaleuia kuali  ma titlaneltokakaj uan nojkia tijtekiuiaj nochi nopa sekinok tlamantli tlen ika timomanauisej.

15. ¿Tlake techtlajtolmakak Pablo, uan kenke?

¹⁵ Nochipa kuali ma titlachixtokaj. ¿Kenke? Apóstol Pablo kiijtok miakej maseualmej “kikajtejtokej kineltokaj toTeko” pampa kinejkej kipiasej miak tomij (1 Tim. 6:9, 10). Nopa tlajtoli “kikajtejtokej” kinextia uelis timosentlalisej tijpiasej tlamantli tlen amo moneki. Nojkia toyolo uelis ‘kinekis más tlamantsitsij tlen kiijtlakos’. Yeka, amo ma tijkauakaj nopa tlamantli ma kalaki ipan toyolo. Moneki tikitasej kej tlamantli tlen uelis kichiuas amo kuali ma titlaneltokakaj.

16. Kema tijpouaj ipan tlen kiijtoua Marcos 10:17-22, ¿ipan tlake tlajtlanili moneki timoiljuisej?

¹⁶ Nama ximoiljui tijpia tomij uan uelis timokouis miak tlamantli. ¿Tijchiuas tlen amo kinamiki tlaj timokouia miak tlamantli tlen tijneki maske amo moneki? Amo. Maske uelis timokouisej se tlamantli, kualtiaskia ma timoiljuikaj ipan ni tlajtlanili: ¿Nijpia tonali uan chikaualistli uan kiampa uelis nijtekiuis uan nijkualchijchiuas tlen nijkouas? ¿Ueliskia kichiuas san ma tijpatiitakaj nopa tlamantli tlen timokouiaj? ¿Ueliskia techpanos kej nopa telpokatl katli Jesús kitlanejki nojua tlauel ma kitekipano toTeotsij uan amo kinejki? (Xijpoua Marcos 10:17-22).  Tlauel kuali tlaj amo titlapijpiasej uan tijtekiuisej tonali uan tochikaualis kema tijtekipanosej Jehová.

17. ¿Tlake amo moneki tikilkauasej?

¹⁷ Amo kema ma tikilkauakaj tojuantij nochipa kejuak timoteuijtokej uan moneki mojmostla kuali timokualchijchijtosej (Apoc. 12:17). Toikniuaj amo uelis kichiuasej kuali ma titlaneltokakaj. Tojuantij moneki tijchiuasej tlen techpaleuis kuali ma titlaneltokakaj.

18. ¿Kenke tlateuianij monekiyaya kuali kiitskisej inintepostsajka?

¹⁸ Uejkajkia, kitlepanitayayaj se tlateuijketl katli amo majmauiyaya. Uan eliyaya se pinaualistli tlaj kema tlakuepiliyaya amo kiuikayaya itepostsajka. Nopa historiador romano Tácito kiijkuilok: “Tlaj se akajya kikauayaya itepostsajka eliyaya se ueyi pinaualistli”. Yeka, tlateuianij kuali kiitskiyayaj inintepostsajka.

19. ¿Tlake techpaleuis nochipa kuali ma titlaneltokakaj?

¹⁹ Tlaj tijnekij nochipa kuali titlaneltokasej, moneki nochipa tiasej tlanechikoli uan tikiniljuisej sekinok tlen Jehová itoka uan iTlanauatijkayo (Heb. 10:23-25). Nojkia, moneki mojmostla tijpouasej Biblia uan tikiljuisej Jehová ma techpaleui tijchiuasej ipan tonemilis (2 Tim. 3:16, 17). Kiampa, yon se tlamantli tlen Satanás kitekiuis kichiuas nochipa ma titlaijiyouikaj (Is. 54:17). Tlaneltokilis techmokuitlauis. Amo timajmauisej, uan sansejko ininuaya toikniuaj tijtekipanosej Jehová. Uan amo san tikijiyouisej tlen mojmostla tikixnamikij, nojkia uelis tiitstosej kema Jesús kintlanis Satanás uan katli kipaleuiaj (Apoc. 17:14; 20:10).