1. ¿Tlake techkaua Jehová tijchiuasej?

JEHOVÁ techkaua ma tijtlapejpenikaj tlen tijchiuasej ipan tonemilis. Kema tijtlapejpeniaj se tlamantli tlen ya kipaktia, techpaleuia kuali ma tijtlapejpenikaj uan techpaleuia kuali ma kisa tlen tijnekij tijchiuasej (Sal. 119:173). Kema tijchiuaj tlen Biblia tetlajtolmaka, techpaleuia kuali ma tijtlapejpenikaj tlen tijchiuasej ipan tonemilis (Heb. 5:14).

2. Kema tijtlapejpeniaj se tlamantli, ¿tlake uelis ouij tijmatisej tijchiuasej?

² Maske kuali tijtlapejpenijtokej tlen tijchiuasej, uelis nojua moneki tijchiuasej kampeka tijtlamiltisej tlen tijpeualtijkej. Ma tikitakaj se keski neskayotl. Se telpokatl mosentlalia kipouas nochi Biblia uan kichiua san ipan se keski semanas, teipa ayokmo kichiua. Se tosiuaikni kineki tlatekipanos kej precursora, ya amo kichiua kema kiijtoua kipeualtis tlatekipanos. Ueuejtlakamej mosentiliaj uan kiijtouaj nojua tlauel kinpaxalosej toikniuaj, uan pano miak metstli uan axaka kipaxalouaj. Maske tlen tikijtojkej amo sanse tlen kinpano, nochi inijuantij kitlapejpenijkej kichiuasej se tlamantli uan amo kichijkej. Kiampa kinpanok achtoui Cristo itokilijkauaj tlen Corinto. Ma tikitakaj tlake uelis tijyekosej tlen kinpanok.

3. ¿Tlake mosentlalijkej kichiuasej toikniuaj tlen Corinto, uan tlake panok?

³ Ipan xiuitl 55, toikniuaj tlen Corinto mosentlalijkej kichiuasej se tlamantli tlauel ipati. Kimatkej toikniuaj tlen Jerusalén uan Judea amo kipixtoya tlen ika mopanoltisej, uan ipan sekinok tlanechikoli pejkej kisentiliaj tomij ika tlen kinpaleuiskiaj. Pampa teikneliyayaj uan kinekiyayaj temakasej tlen kipixtoyaj,  kiijtojkej nojkia tlapaleuisej, yeka kitlajtlanijkej apóstol Pablo kenijkatsa kichiuaskiaj. Ya kiniljuik kenijkatsa ueliskia kichiuasej uan kiiljuik Tito ma kinpaleui kisentilisej tomij (1 Cor. 16:1; 2 Cor. 8:6). Teipa kema ya panotoya se keski metstli Pablo kimatki amo temakatoyaj tomij. Yeka, maske sekinok tlanechikoli ya kipixtoyaj tomij uan kiampa ueliskiaj kititlanisej Jerusalén, inijuantij ayamo kisentilijtoyaj (2 Cor. 9:4, 5).

4. Kej kiijtoua ipan 2 Corintios 8: 7, 10, 11, ¿tlake kiniljuik Pablo ma kichiuakaj toikniuaj tlen Corinto?

⁴ Toikniuaj tlen Corinto kuali tlen kitlapejpenijtoyaj kichiuasej, uan Pablo kintlaskamatilik pampa kuali tlen kinekiyayaj kichiuasej uan pampa kuali tlaneltokayayaj. Uan kiniljuik monekiyaya kitlamichiuasej tlen mosentlalijtoyaj (xijpoua 2 Corintios 8:7, 10, 11). Tlen kinpanok techmachtia maske kuali titlatekipanouaj nojua moneki tijchiuasej kampeka tijchiuasej tlen tikijtojkej.

5. ¿Tlake tlajtlanili tijnankilisej?

⁵ Uelis tojuantij nojkia tijmatij ouij tijchiuasej tlen tijtlapejpenijkej pampa tielij titlajtlakolejkej uan amo nima tijchiuaj se tlamantli, kej kinpanok toikniuaj tlen Corinto. Nojkia, uelis techpanos se tlamantli tlen amo timoiljuijtoyaj, uan nopa ueliskia kichiuas amo ma tijchiuakaj tlen tijtlapejpenijkej (Ecl. 9:11; Rom. 7:18). Ipan ni tlamachtili tijnankilisej ni tlajtlanili: ¿Tlake techpaleuis kuali tijtlapejpenisej tlen tijchiuasej?, ¿tlake uelis tijchiuasej uan kiampa tikitasej tlen tijtlapejpenijkej? Uan, ¿tlake techpaleuis tijtlamiltisej tlen tijpeualtijkej?

6. ¿Kema uelis tijpatlasej tlen tikijtojkej tijchiuasej?

⁶ Onka se keski tlamantli tlen tijtlapejpenijkej tijchiuasej tlen amo kema uelis tijpatlasej. Kema amo tijnekij tijkauasej tijtekipanosej Jehová uan kema amo tijnekij tikixpanosej tosiua o toueue (Mat. 16:24; 19:6). Maske kiampa tijchiuaj ipan se keski tlamantli, onka se keski tlen kena uelis tijpatlasej, pampa kemantika mopatla kej tiitstokej. ¿Tlake techpaleuis kuali tijtlapejpenisej tlen tijchiuasej?

7. ¿Tlake moneki tikiljuisej toTeotsij ma techmaka, uan kenke?

⁷ Xikiljui toTeotsij ma mitsmaka tlalnamikilistli. Jehová kipaleuik apóstol Santiago ma kiijkuilo: “Intla se tlen inmojuantij kineki achi más tlalnamikilistli [...], ma kitlajtlani toTeko [...]. Yajaya tlen temaka miak tlalnamikilistli, uan axkiajuas pampa kitlajtlania” (Sant. 1:5). Kemantika nochi techpoloua tijnextisej “tlalnamikilistli” ipan se keski tlamantli. Yeka, ma tikiljuikaj Jehová kema tijtlapejpeniaj tijchiuasej se keski tlamantli o kema monekis tijpatlasej. Tlaj kiampa tijchiuasej, Jehová techpaleuis kuali ma tijtlapejpenikaj tlen tijchiuasej.

8. ¿Tlake moneki tijchiuasej kema tijtlapejpenisej tijchiuasej se tlamantli?

⁸ Kuali ma timomachtikaj tlen tijnekij tijmatisej. Ma tikitakaj tlen kiijtoua Biblia, ma tijpouakaj amatlajkuiloli tlen techmaka toTeotsij itlanechikol uan ma tikiljuikaj se akajya ma techpaleui (Prov. 20:18). Ni tlauel techpaleuis, kema tijnekisej tijtemosej seyok tekitl, tiasej timochantitij sejkanok o ipan tlake escuela timomachtisej uan kiampa uelis tijpiasej se tekitl ika timopanoltisej uan kiampa techpaleuis tijtekipanosej Jehová.

9. ¿Kenijkatsa techpaleuia amo timokajkayauasej toselti?

⁹ Ma timoiljuikaj kenke tijchiuaj. Jehová kiita kenke tijnekij tijchiuasej se keski tlamantli (Prov. 16:2). Ya kineki ma tikijtokaj nochi tlen melauak. Yeka, amo moneki tikinkajkayauasej sekinok uan amo ma timokajkayauakaj  toselti ika tlen tijtlapejpeniaj. Tlaj kiampa tijchiuaj, uelis ouij tijmatisej tijchiuasej tlen tijtlapejpenijkej. Ximoiljui se telpokatl kineki tlatekipanos kej precursor, pano tonali uan amo kiaxitia horas uan amo yolpaki ipan tlajtolmoyaualistli. Maske uelis moiljuik kineki tlatekipanos kej precursor pampa kineki kiyolpakiltis Jehová. ¿Nelia kiampa kinekiyaya kichiuas, o san pampa kinekiyaya kinyolpakiltis itatauaj o se akajya katli kiixmati?

10. ¿Tlake moneki tijchiuasej tlaj tijnekij tijpatlasej se keski tlamantli?

¹⁰ Ma tikitakaj seyok neskayotl. Se katli kimachtiaj ika Biblia mosentlalia kikauas tlachichinas. Ya kichiua kampeka uan amo tlachichina se o ome semanas, teipa sampa peua tlachichina uan teipa kikaua. Pampa kiiknelia Jehová uan pampa kineki kichiuas tlen ya kipaktia, nopa kipaleuik ayokmo ma tlachichina (Col. 1:10; 3:23).

11. ¿Kenke moneki tikitasej tlake tijchiuasej ipan se keski tlamantli?

¹¹ Ma tikitakaj tlake tijchiuasej ipan se keski tlamantli. Nopa techpaleuis tijtlamiltisej tlen tijtlapejpenijkej. Ma timoiljuikaj tlaj timosentlaliaj nochipa tijpouasej Biblia uan amo tijpixtokej se programa, uelis ouij tijmatisej tijchiuasej tlen timosentlalijkej. * Nojkia ma timoiljuikaj: ueuejtlakamej tlen se tlanechikoli mosentlaliaj nojua tlauel kinpaxalosej toikniuaj. Pano tonali uan axaka kipaxalojtokej. Tlauel kinpaleuis tlaj motlajtlanisej: “¿Ya tikitakej ajkia inijuantij kinamiki tikinpaxalosej? ¿Timoiljuijtokej tlake tonali uelis tikinpaxalosej?”.

12. ¿Kemantika tlake uelis tijchiuasej, uan kenke?

¹² Ma tikitakaj tlen kena uelis tijchiuasej. Axaka kipia tonali, chikaualistli uan tomij, uan kiampa uelis kichiuas nochi tlen kineki. Yeka, moneki tikitasej tlake tlamantli amo uelis tijchiuasej. Kemantika monekis tijpatlasej se tlamantli tlen tijtlapejpenijtoyaj pampa amo uelis tijchiuasej (Ecl. 3:6). Ximoiljui, ya tikitak tlen tijtlapejpenijtok tijchiuas, tijpatlak se keski tlamantli uan timoiljuia kena uelis tijchiuas, ¿tlake mitspaleuis tijtlamiltis tlen tijpeualtik tijchiuas? Xikita makuili tlamantli.

13. ¿Tlake techpaleuis tijpiasej chikaualistli uan kiampa tijchiuasej tlen timosentlalijtokej?

¹³ Xikiljui toTeotsij ma mitsmaka chikaualistli, kiampa tijchiuas tlen tijtlapejpenik. Jehová uelis ‘techmakas chikaualistli’ uan kiampa tijchiuasej tlen tijtlapejpenijtokej (Filip. 2:13). Yeka, ma tikiljuikaj ma techmaka itonal uan kiampa tijpiasej chikaualistli. Ma timomaijtokaj maske kemantika tijmatisej amo nima technankilia. Jesús kiijtok: “Xijtlajtlanikaj toTeko [...] uan yajaya inmechmakas [itonal]” (Luc. 11:9, 13).

14. ¿Kenijkatsa techpaleuia Proverbios 21:5 ma tijchiuaj tlen tijtlapejpenijkej?

¹⁴ Ximoiljui tlake tijchiuas (xijpoua Proverbios 21:5). Kema tijchiuaj se tekitl achtoui moneki timoiljuisej kenijkatsa tijchiuasej, uan ika tlen timoiljuijkej moneki kiampa tijchiuasej. Nojkia kema tijtlapejpeniaj tijchiuasej se tlamantli, moneki tikijkuilosej uan ya nopa tijchiuasej. Tlaj tijchiuasej se tlamantli tlen eli ouij, moneki tijchijtiasej kentsitsij uan kiampa tikitasej tlen tijchijtokej. Pablo kiniljuik toikniuaj tlen Corinto ipan “achtoui tonal ipan samano”, ma kiiyokatlalikaj se kentsi tomij, kiampa amo kisentiliskiaj kema ya asiskia (1 Cor. 16:2). Nojkia, kema tijchiuaj kentsitsij se tekitl, techpaleuia amo tlauel ma tisiauikaj.

15. Kema tikijkuilouaj tlen timoiljuiaj tijchiuasej, ¿tlake nojua uelis tijchiuasej?

¹⁵ Kema tikijkuilouaj tlen timoiljuiaj tijchiuasej, techpaleuia ma tijchiuakaj tlen  timosentlaliaj (1 Cor. 14:40). Kema ueuejtlakamej kichiuaj se tlamantli, kiiljuiaj se ueuejtlakatl ma kiijkuilo tlen kichiuasej, ajkia kichiuas uan kema moneki kitlamiltisej, kiampa inijuantij uelis kichiuasej nochi tlen mosentlalijkej (1 Cor. 9:26). Tojuantij nojkia uelis kiampa tijchiuasej, tikijkuilosej tlen tijchiuasej mojmostla uan tlen tijnekij tikachtouitlalisej. Nopa techpaleuis tijtlamiltisej nochi tlen tikijtojkej uan amo tlauel tiuejkauasej.

16. Kej kiijtoua Romanos 12:11, ¿tlake techpaleuis tijchiuasej tlen tijtlapejpenijkej?

¹⁶ Tijchiuasej kampeka. Tlaj tijnekij tijchiuasej tlen tikijkuilojkej uan tijtlamiltisej tlen tijtlapejpenijkej, moneki tijchiuasej se ueyi kampeka (xijpoua Romanos 12:11). Pablo kiiljuik Timoteo nojua ma kichiua kampeka kuali tlamachtis uan nochipa kiampa ma kichijto. Tlen kitlajtolmakak nojkia techpaleuia kuali ma titlatekipanokaj (1 Tim. 4:13, 16).

17. ¿Kenijkatsa techpaleuia Efesios 5:15, 16 ma tijchiuakaj tlen tijtlapejpenijkej?

¹⁷ Kuali ma tijtekiuikaj tonali (xijpoua Efesios 5:15, 16). Kuali ma timoiljuikaj kema tijchiuasej se tlamantli uan amo ma tijpatlakaj. Amo ximoiljui tijchiuas se tlamantli kema nochi kuali eltos, pampa uelis nopa tonali amo kema kiampa panos (Ecl. 11:4). Amo tijchiuasej tlen tlauel ipati tlaj tijkauaj sekinok tlamantli ma techtonalpolo uan ma techkixtili tochikaualis (Filip. 1:10). Yeka, amo ma tiitstokaj kampa timotonalpolosej. Uan ma tikiniljuikaj sekinok kema tijchiuasej se tlamantli tlen tlauel ipati, kiampa amo techtonalpolosej. Nojkia, ma tijseuikaj toteléfono uan ma timosentlalikaj teipa tijtlachilisej correo electrónico uan redes sociales. *

18, 19. Kema kuali tijtlapejpeniaj tlen tijchiuasej, ¿tlake uelis techpaleuis tijtlamiltisej tlen timosentlalijkej maske elis ouij?

¹⁸ Ximoiljui kenijkatsa tijyolmatis kema tijtlamichiuas se tlamantli. Tlen tijtlapejpenik tijchiuas eli kej kema se akajya katli yaui paxaloua uan kineki asiti kampa yaui. Tlaj kineki asiti kampa moiljuijtok, maske nopa carretera kampa yaui tsaktok, uajka yaui ipan seyok carretera. Yeka, tlaj nojkia timoiljuiaj kenijkatsa techpaleuis tlen tijtlapejpenijkej, uajka tijchiuasej kampeka tijtlamiltisej tlen timosentlalijkej maske elis ouij (Gál. 6:9).

¹⁹ Kemantika eli ouij kuali tijtlapejpenis uan tijchiuas tlen timosentlalik. Jehová uelis techpaleuis tijpiasej tlalnamikilistli uan chikaualistli, uan kiampa tijtlamiltisej tlen tijpeualtijkej tijchiuaj.