Nitlakatki ipan 1983. Maske kuali nitlakatki, kema nijpixtoya 10 xiuitl, pejki nechkokoua nochi notlakayo. Se tonali kema ya panotoya ome xiuitl, kema niisak ayokmo uelki nimojmolinia. Maske nikojoliniyaya noikxi, ayokmo uelki nimoketsa. Ipan nopa tonali ayokmo uelki ninejnemi. Nojkia nopa kokolistli kichijki ayokmo ma nimoskalti, yeka nouexka eli kej se okichpil.

Kema techpaxalokoj Jehová itlajtoltemakauaj kichijtoya se keski metstli san niitstoya nochaj. Maske nochipa nimotlatiyaya kema techpaxalouayayaj, ipan nopa tonali nijnejki ma nechkamanaljuikaj. Kema nechiljuiyayaj mochiuas se xochimili, nikilnamijki kema nijpixtoya makuili xiuitl se misionero katli itoka Jethro, katli tlatekipanouayaya Surinam, ualayaya sampatsi ipan se metstli kampa tiitstoyaj uan kimachtiyaya notata. Tlauel nikikneliyaya Jethro pampa nechikneliyaya. Nojkia, kemantika noueyitatauaj nechuikayayaj kampa mosentiliyayaj Jehová itlajtoltemakauaj ipan toaltepe. Yeka, kema Florence katli yajki nochaj nechtlajtlanik tlaj nijnekiyaya nimomachtis Biblia, nikiljuik kena.

Florence uan iueue Justus pejkej nechmachtiaj Biblia. Inijuantij nechmachtijkej ma nitlapoua kema kiitakej amo niueliyaya. Teipa, uelki noselti nitlapoua. Se tonali nechiljuijkej yaskiaj tlajtolmoyauatij Surinam. Yeka, kema kistejkej ayokmo itstoya yon se toikni ipan Orealla katli ueliskia nechmachtis. Maske kiampa panok, niyolpakiyaya pampa nikitak Jehová amo nechilkajtoya.

Teipa, asiko ipan Orealla se precursor katli itoka Floyd. Se tonali asito nochaj kema tlajtolmoyauayaya kajkalpa. Kema nechiljuik tlaj nijnekiyaya nimomachtis Biblia, san niixuetskak. Ya nechiljuik: “¿Kenke tiixuetska?”. Nikiljuik ya nechmachtijtoyaj ika pilamochtsi ¿Tlake kineki toTeotsij ma tijchiuakaj? uan ya nijpeualtijtoya nimomachtia ika amochtli El conocimiento que lleva a vida eterna. * Nojkia nikiljuik kenke ayokmo nimomachtik Biblia. Floyd pejki nechmachtia ika nopa amochtli Conocimiento, kampa poliuiyaya nimomachtis. Teipa ya nojkia kititlankej ma tlatekipanoti sejkanok. Sampa ayokmo aka nechmachtik.

Ipan 2004 asikoj ipan noaltepe Granville uan Joshua, katli eliyayaj precursores especiales.  Inijuantij nechpantijkej kema tlajtolmoyauayayaj kajkalpa. Sampa niixuetskak kema nechiljuijkej tlaj nijnekiyaya nimomachtis Biblia. Nikiniljuik sampa ma tijpeualtikaj amochtli Conocimiento. Nijnekiyaya nikitas tlaj tlen nechmachtiskiaj eliskia sanse ika tlen achtouia nechmachtijtoyaj. Granville nechiljuik ipan noaltepe kichiuayayaj tlanechikoli. Maske nechka matlaktli xiuitl san niitstoya nochaj uan amo nikisayaya, nijneki nias ipan nopa tlanechikoli. Yeka, Granville nechkuito ika se silla de ruedas uan nechuikak kampa mosentiliaj.

Teipa, Granville nechiljuik ueliskia nipanos Kampa techmachtiaj kenijki titlajtolmoyauasej. Ya nechiljuik: “Maske amo ueli tinejnemi, kuali tikamanalti. Se tonali tijpanoltis se tlamachtili. Kena tiuelis”. Tlen nechiljuik tlauel nechyolchikajki uan nimoiljuik kena niueliskia.

Pejki nitlajtolmoyaua iuaya. Uan pampa nopa ojtli amo kuali eltoya amo ueliyaya nechuika ipan silla de ruedas. Yeka, nikiljuik ma nechuika ipan se carretilla, uan kiampa kena uelki titlajtolmoyauaj. Nimoatsonpoliuiltik ipan abril, 2005. Teipa, toikniuaj nechmachtijkej kenijkatsa ueliskia nitemakas amatlajkuiloli ipan tlanechikoli uan nojkia nitlapaleuis ipan sonido.

Ipan 2007, notata kipanok se tlamantli tlen amo kuali kema yauiyaya ipan se akali uan mijki. Nochampoyouaj tlauel mokuesojkej. Granville momaijtouayaya touaya uan techyolchikauayaya ika Biblia. Kema panok ome xiuitl, techpanok seyok kuesoli: Granville nojkia mijki kema yauiyaya ipan se akali.

Toikniuaj tlauel mokuesojkej pampa ayokmo itstoyaj ueuejtlakamej ipan totlanechikol uan san itstoya se tlapaleuijketl. Tlauel nimoyolkokok kema mijki Granville, pampa eliyaya se kuali nouampo katli nochipa nechpaleuik kuali ma nitlaneltoka uan nojkia nechpaleuik ipan sekinok tlamantli. Ipan nopa achtoui tlanechikoli tlen tijpixkej kema ya miktoya, na nijpouaskia párrafos kema timomachtiyayaj pilamochtsi Tlen Tematiltia. San uelki nijpoua ome párrafos pampa pejki nimochokilia. Monejki nitemos pampa tlauel nichokayaya.

Pejki kuali nijyolmati kema toikniuaj tlen seyok tlanechikoli ualajkej techpaleuikoj. Nojkia, kali Betel kiualtitlanki se precursor especial katli itoka Kojo. Tlauel niyolpajki kema nonana uan noikni katli teipaejketl pejkej momachtiaj Biblia uan moatsonpoliuiltijkej. Ipan marzo, 2015 pejki nitlatekipanoua kej tlapaleuijketl. Uan teipa nijpanoltik achtoui tlamachtili ika Biblia. Ipan nopa tonali, pejki niixayotemo uan ika pakilistli nikilnamijki tlen Granville nechiljuijtoya: “Se tonali tijpanoltis se tlamachtili. Kena tiuelis”.

Ipan JW Broadcasting^®, nikinixmajtok toikniuaj katli nojkia kinpano kej na. Maske amo kuali eltok inintlakayo, tlauel kitekipanouaj Jehová uan yolpakij. Na nojkia ueli nijchiua se keski tlamantli. Nijnekiyaya nijtekipanos Jehová ika nochi noyolo uan nijchiuas nochi tlen niuelis, yeka pejki nitlatekipanoua kej precursor regular. Uan tlauel nimosentlachilik ipan septiembre, 2019 pampa ipan nopa metstli nechiljuijkej nitlatekipanoskia kej ueuejtlakatl ipan totlanechikol kampa itstokej se 40 tlajtolmoyauanij.

Tlauel nikintlaskamatilia toikniuaj katli nechmachtijkej tlen melauak, uan nechpaleuijtokej ma nijtekipano Jehová. Uan nojkia tlauel nijtlaskamati pampa Jehová amo kema nechilkajtok.