1, 2. Xikixtoma ika se neskayotl kenijkatsa uelis tijchiuasej tlen kiijtoua Filipenses 3:13.

XIMONEJNEUILI ipan ni eyi tlamantli. Se tosiuaikni katli ya ueyi monejneuilia kenijkatsa uejkajkia kuali itstoya. Maske nama ouij itstok, nojua kichiua kampeka kitekipanos Jehová (1 Cor. 15:58). Mojmostla monejneuilia itstok ipan Xochimili ininuaya ichampoyouaj. Seyok tosiuaikni maske kiilnamiki kema se toikni kiyolkokok, ya mosentlalia amo kikualankaitas (Col. 3:13). Uan se toikni maske amo kiilkaua nopa tlajtlakoli tlen uejkajkia kichijki, nama mosentlalia nochipa kuali tlatekipanos (Sal. 51:10).

² Maske ni eyij toikniuaj kiilnamikij tlen uejkajkia kinpanok, amo san mosentlaliaj ipan nopa tlamantli, inijuantij mosentlalijtokej kuali kitekipanosej Jehová, uan kichiaj ika pakilistli tlen kiselisej teipa (xijpoua Filipenses 3:13).

3. ¿Kenke tlauel ipati timosentlalisej ipan tlen panos teipa?

³ Tlauel ipati timosentlalisej ipan tlen panos teipa. ¿Kenke? Pampa kej se maseuali amo ueli xitlauak nejnemi tlaj nochipa moikankuepti, tojuantij nojkia amo kuali tijtekipanosej Jehová tlaj nochipa timoiljuiaj ipan tlen techpanok uejkajkia (Luc. 9:62).

4. ¿Tlake tikitasej ipan ni tlamachtili?

⁴ Ipan ni tlamachtili tikitasej eyi tlamantli tlen uelis kichiuas se akajya san moiljuijtos tlen kipanok uejkajkia. * Se, kema san tikilnamiktos tlen uejkajkia panok. Ome, kema nojua tikualantok iuaya se akajya. Uan eyi, kema tlauel timoyolkokojtokej ika tlen tijchijkej uejkajkia. Tikitasej kenijkatsa tlen Biblia tetlajtolmaka techpaleuis ma tikilkauakaj  tlen tijchijkej uejkajkia uan san ma timoyoliljuikaj ipan tlen tijchiuasej ipan ni tonali (Filip. 3:13).

5. ¿Tlake techtlajtolmaka Eclesiastés 7:10?

⁵ (Xijpoua Eclesiastés 7:10). Ipan ni versículo kiijtoua amo kenijki tlaj timoiljuisej uejkajkia kuali tiitstoyaj, nopaya kiijtoua amo kinamiki timoiljuisej uejkajkia “elkej más kuali que ama”. Pampa kema timoiljuiaj kenijkatsa uejkajkia kuali tiitstoyaj, eli se nemaktli tlen Jehová techmaka. Yeka, amo kinamiki san tijtlachilisej tlen uejkajkia techpanok ika tlen nama techpano, uan timoiljuisej nama amo kuali tiitstokej. Ipan seyok Biblia kej ni motlajtolkueptok: “Amo kema ximotlatsintoki kenke tlen uejkajkia panok elki tlauel kuali, pampa nopa kichiuaj katli uiuitikej”.

6. ¿Kenke amo kinamiki san timoiljuijtosej achtouia tlauel kuali kej tiitstoyaj? Xikijto se neskayotl.

⁶ Tlauel amo kuali ajachika timoiljuisej uejkajkia tlauel kuali tiitstoyaj. ¿Kenke? Pampa nopa ueliskia kichiuas san tikilnamikisej tlamantli tlen kuali techpanok uan amo tikilnamikisej kema tijpixkej kuesoli. Ma timoiljuikaj ipan tlen kinpanok israeleuanij: kema kiskej ipan Egipto nima kiilkajkej nopaya tlauel kintlaijiyouiltiyayaj, inijuantij san kiilnamiktoyaj tlen kikuayayaj. Kiijtouayayaj: “Tikilnamikij nopa michimej tlen tijkuayayaj san tlapik nepa ipan tlali Egipto. Uan nojkia tijkuayayaj pepinos, melones, xonakatl, cebollas uan ajos” (Núm. 11:5). Maske inijuantij moiljuiyayaj amo kiixtlauayayaj tlen kikuayayaj, nopa amo nelia pampa nopaya tlauel kinchiualtiyayaj ma tekitikaj (Éx. 1:13, 14; 3:6-9). Inijuantij nima kiilkajkej kej itstoyaj uan pejkej kiilnamikij tlen nopaya kipixtoyaj. Amo kipatiitakej tlen Jehová kichijtoya ininpampa, uan san moiljuijtoyaj ipan tlen kikajtejkej. Yeka, Jehová tlauel kualanki (Núm. 11:10).

7. ¿Tlake kipaleuik se tosiuaikni amo san kiilnamiktos tlen uejkajkia kipanok?

⁷ ¿Tlake uelis techpaleuis amo tlauel ma tikilnamikikaj tlen uejkajkia techpanok? Ma tikitakaj tlen kipanok se  tosiuaikni katli pejki tlatekipanoua ipan Betel tlen Brooklyn ipan 1945. Kema panok se keski xiuitl, monamiktik iuaya se betelita uan nopaya sansejko tlatekipanojkej miak xiuitl. Ipan 1976, toikni mokokok, uan kema kiitak ayokmo mochikauaskia kiiljuik isiua tlake kichiuaskia kema mokauaskia iselti. Kiiljuik: “Tlauel tiyolpaktokej tiitstosej sansejko. Miakej katli mosenkajtokej amo kiampa itstokej”. Nojkia kiiljuik: “Maske nojua tikilnamiktos tlen uejkajkia panok, amo san ya nopa xikilnamikto. Kej panotias tonali mitspaleuis ayokmo tlauel timokuesos. Amo xikualani uan amo ximoteikneltiita. [...] Xijtlaskamati pampa tiyolpajkej uan tijselijkej miak tlateochiualistli. Tlen tikilnamikij, eli se nemaktli tlen Jehová techmakatok”. ¡Tlauel kuali tlen kiiljuik!

8. ¿Tlake tlateochiualistli kiselik tosiuaikni pampa amo mosentlalik san kiilnamiktos kej uejkajkia itstoya?

⁸ Tosiuaikni kichijki tlen kiiljuik iueue. Nochipa kitekipanok Jehová, uan mijki kema kipixtoya 92 xiuitl. Kema nechka mikiskia kiijtok: “Kema nimoyoliljuia kenijkatsa senkistok nitlatekipanojtok kipano 63 xiuitl, uelis nikijtos tlauel kuali tlen nijchijtok”. ¿Kenke? Ya kiijtok: “Tlauel nechyolchikaua nikitas kenijkatsa eli toTeotsij itlanechikol uan nojkia kema nimoyoliljuia kenijkatsa tiitstosej ininuaya toikniuaj ipan se yejyektsi xochimili, uan nochipa tijtekipanosej toTeotsij Jehová, tlen nelia melauak”. * ¡Se kuali neskayotl kinextik tosiuaikni pampa mosentlalik ipan tlen teipa panoskia!

9. Kej kiijtoua Levítico 19:18, ¿kema uelis ouij tijmatisej tikilkauasej tlen techchiuilijtokej?

⁹ (Xijpoua Levítico 19:18). Kemantika tijmatij ouij titetlapojpoljuisej tlaj katli techyolkokok eli se toikni, se touampo o se tlen tochampoyouaj. Se tonali, se tosiuaikni  kiistlakauik seyok tosiuaikni kema kiijtok kiichtekilik itomij. Maske nopa tosiuaikni katli teitstlakauik kiiljuik nopa tosiuaikni ma kitlapojpoljui, ya amo ueliyaya kiilkaua tlen kichiuilik. Maske uelis tojuantij amo techpanotok kej tosiuaikni kipanok, uelis kena techpanotok seyok tlamantli tlen kichiua ouij tikilkauasej tlen techchiuilijkej.

10. ¿Tlake techpaleuis ayokmo tikualantosej iuaya se akajya?

¹⁰ Tlauel techpaleuis amo tikualantosej iuaya se akajya tlaj tikilnamikij Jehová kiita nochi tlen pano. Ya kiita kema techchiuiliaj tlen amo kuali uan kema titlaijiyouiaj (Heb. 4:13). Uan kema titlaijiyouiaj, ya nojkia tlaijiyouia (Is. 63:9). Nojkia, techtenkauilia kitlamiltis nochi tlen techtlaijiyouiltik (Apoc. 21.3, 4).

11. ¿Kenijkatsa techpaleuia ayokmo tikualantosej iuaya se akajya?

¹¹ Nojkia, moneki tikilnamikisej tlauel techpaleuia kema tikilkauaj tlen techchiuilijkej. Kej nopa kichijki tosiuaikni katli kiistlakauijkej. Kema panok tonali, kiilkajki tlen kichiuilijkej pampa kiitak kema tikintlapojpoljuiaj sekinok, Jehová nojkia techtlapojpoljuia (Mat. 6:14). Tlen kichijki tosiuaikni amo kiijtosnejki amo kiyolkokok tlen panok, ya mosentlalik kiilkauas uan ayokmo kualantos. Pampa kiampa kichijki, kipaleuik tlauel ma yolpaki uan ma mosentlali kitekipanos Jehová.

12. ¿Tlake techmachtia tlen kiijtoua 1 Juan 3:19, 20?

¹² (Xijpoua 1 Juan 3:19, 20). Kemantika nochi tojuantij uelis timoyolkokojtosej ika tlen uejkajkia tijchijkej. Uelis pampa tijchijkej tlen amo kinamiki kema ayamo timomachtiyayaj Biblia o uelis kema ya timoatsonpoliuiltijtoyaj (Rom. 3:23). Yeka, maske tijchiuaj kampeka tijchiuasej tlen xitlauak, “nochi titlakamej kemantsi timokuapolouaj” (Sant. 3:2; Rom. 7:21-23). Maske amo tiyolpakij kema tikilnamikij ika tlen uejkajkia tijchijkej, kemantika uelis techpaleuis. ¿Kenke? Pampa techpaleuia tijpatlasej se keski tlamantli ipan tonemilis uan techpaleuia timosentlalisej ayokmo sampa tijchiuasej tlen tijchijkej (Heb. 12:12, 13).

13. ¿Kenke amo moneki tlauel timoyolkokojtosej ika tlen tijchijkej uejkajkia?

¹³ Uelis nojua techyolkokoua tlen tijchijkej uejkajkia, maske ya timoyolkuepkej uan Jehová ya techtlapojpoljuik. Tlaj tlauel timoyolkokojtosej uelis techtlanauis (Sal. 31:10; 38:3, 4). Ma tikitakaj tlake kipanok se tosiuaikni katli nochipa motlajtlakoltiyaya ika tlen kichijtoya uejkajkia. Ya kiijtoua: “Nimoiljuiyaya amo monekiyaya nijchiuas kampeka nijtekipanos Jehová pampa uelis amo niitstoskia ipan Xochimili”. Maske, uelis nojkia kiampa tijyolmatij, moneki tijchiuasej kampeka amo tlauel timoyolkokojtosej ika tlen tijchijkej uejkajkia. ¿Kenke? Pampa Satanás yolpakiskia tlaj ayokmo tijtekipanosej Jehová. Ma tikilnamikikaj Jehová tlauel techiknelia uan techtlapojpoljuia (nojkia xikita 2 Corintios 2:5-7, 11).

14. ¿Kenijkatsa uelis timotemachisej Jehová kuali techita?

¹⁴ Uelis kemantika timotlatsintokisej: “¿Kenijkatsa uelis nimotemachis Jehová nojua kuali nechita?”. Kema tijchiuaj ni tlajtlanili, kejuak ya tijnankiliaj. ¿Kenke kiampa tikijtouaj? Kipia miak xiuitl pilamochtsi Tlen Tematiltia kej ni kiixtonki: “Uelis tlen tijchiuayayaj uejkajkia, sampa peuas tijchiuasej. Uan uelis nojua  tijchiuaj kampeka ayokmo tijchiuasej tlen timomajtoyaj tijchiuaj kema ayamo timomachtiyayaj Biblia”. Nojkia kiijtok: “Amo ximoiljui Jehová amo kema mitstlapojpoljuis ika tlen tijchijki. Satanás ya nopa kineki ximoiljui. Kema timoyolkokojtos uan tikualantos ika tlen tijchijki, tijnextia tijpia kuali moyolo uan Jehová uelis mitstlapojpoljuis. Yeka, nochipa ximomaijto uan xikiljui ma mitstlapojpoljui, ma mitspaleui tijpias kuali motlalnamikilis uan ma mitspaleui ayokmo tijchiuas tlen tijchiuayaya. Xikiljui Jehová tlen tijyolmati, kej se konetl kichiua ika itata kema kipano se tlamantli. Yeka, nochipa xikiljui Jehová ma mitspaleui uan ya kiampa kichiuas”. *

15, 16. ¿Kenijkatsa kiyolmatij se keskij toikniuaj kema kiitaj Jehová nojua kuali kinita?

¹⁵ Miakej toikniuaj kinyolchikajtok kema kiitaj Jehová amo kintlauelkajtok. Se neskayotl, se toikni tlauel kipaleuik kema kipojki ipan nopa tlamachtili tlen kistia “Biblia kinpaleuik kuali ma monejnemiltikaj”. Nopaya kiijtok se tosiuaikni kimatiyaya ouij kineltokas Jehová kiiknelia pampa tlajtlakolchijtoya, uan kiampa kiyolmatiyaya maske ya panotoya se keski xiuitl ika moatsonpoliuiltijtoya. ¿Tlake kipaleuik ma kipatla kej moiljuiyaya? Tosiuaikni pejki monejneuilia ipan Cristo imikilis. *

¹⁶ ¿Kenijkatsa kipaleuik se toikni tlen kipojki? Kiijtok: “Kema nieliyaya nitelpokatl pejki nikita pornografía, maske kiampa nijchiuayaya, uelki nijkaua. Teipa sampa pejki nijtlachilia. Nikiniljuik ueuejtlakamej ma nechpaleuikaj, uan nopa nechpaleuijtok ayokmo ma nikita tlen amo kuali. Inijuantij nechiljuijtokej Jehová nechtlasojtla uan nechiknelia. Maske kiampa kichijtokej, kemantika nijmati Jehová amo kuali nechita uan amo nechiknelia”. Toikni tlauel kipaleuik tlen kipanok tosiuaikni, ya kiijtok: “Nama, kema nimoiljuia Jehová amo nechtlapojpoljuia, kejuak nijnextia Cristo imikilis amo nechtlapojpoljuia uan amo nijpatiita. Nijtejtejki ni tlamachtili, kiampa nijpouayaya uan nimoyoliljuiyaya  kema sampa nikilnamikiyaya tlen amo kinamiki”.

17. ¿Tlake kipaleuik Pablo amo tlauel moyolkokojtos ika tlen uejkajkia kichijki?

¹⁷ Ika tlen kinpanok toikniuaj kichiua ma timoiljuikaj ipan apóstol Pablo. Kema ayamo eliyaya Cristo itokilijka tlauel tlajtlakolchijki. Maske kemantika kiilnamikiyaya tlen kichijtoya, amo san moiljuijtoya ipan nopa tlamantli (1 Tim. 1:12-15). Kiitayaya Cristo imikilis kej se nemaktli tlen Jehová kimakatoya (Gál. 2:20). Nopa kipaleuik amo tlauel moyolkokos uan mosentlalis nochipa kitekipanos Jehová.

18. ¿Tlake tijyekojtokej ipan ni tlamachtili?

¹⁸ Ipan ni tlamachtili timomachtijkej: 1) Maske techpaleuia kema timoiljuiaj nopa kuali tlamantli tlen uejkajkia techpanok uan eli se nemaktli tlen Jehová techmakatok, ipan Xochimili nojua tlauel kuali tiitstosej uan amo kej uejkajkia tiitstoyaj. 2) Tlaj se tonali techyolkokosej, moneki tikintlapojpoljuisej pampa techpaleuis nojua kuali ma titlatekipanokaj. 3) Kema tlauel timotlajtlakoltiaj uelis kichiuas ayokmo ma tijtekipanokaj Jehová ika pakilistli. Yeka, kej Pablo ma timotemachikaj Jehová nojkia ya techtlapojpoljuik.

19. ¿Kenijkatsa tijmatij ipan Xochimili ayokmo tikilnamikisej tlen amo kuali techpanok?

¹⁹ Ipan Xochimili ayokmo kema tikilnamikisej tlen kichiuas ma timoyolkokokaj. Biblia kiijtoua ipan nopa tonali “axaka moiljuis tlen nopa iluikaktli uan Tlaltipaktli tlen eltoya” (Is. 65:17). Ipan ni tonali uelis ya tijpia miak xiuitl tijtekipanojtok Jehová uan uelis ya tiueuejtixtok. Nama, ximoiljui ipan yankuik Tlaltipaktli kema sampa timotelpokachiuas (Job 33:25). Yeka, ma timosentlalijtokaj timoyoliljuisej kenijkatsa elis xochimili uan kuali ma titlatekipanokaj ipan ni tonali, kiampa uelis tiitstosej nopaya.