1, 2. 1) Kej kiijtoua Salmo 37:3, 4, ¿kenke katli namanok mosenkajtokej moneki motemachisej ipan Jehová? 2) ¿Tlake tikitasej ipan ni tlamachtili?

¿TIMOILJUIJTOK timosenkauas o namanok timosenkajki? Tlaj kena, uelis tijnekiskia nochipa tiyolpaktos iuaya katli tlauel tikiknelia. Katli mosenkauaj kipiaj se keski kuesoli, yeka katli namanok mosenkajtokej moneki kuali kitlapejpenisej tlen kinpaleuis. Tlen inkitlapejpenisej uelis kichiuas xiyolpakikaj miak xiuitl. Yeka, tlaj inmotemachiaj ipan Jehová, kuali inkitlapejpenisej se keski tlamantli, kuali inmouikasej uan inyolpakisej. Uan tlaj amo inkitlepanitaj tlen Jehová tetlajtolmaka, uelis inkipiasej kuesoli uan amo kuali initstosej (xijpoua Salmo 37:3, 4).

² Maske ipan ni tlamachtili kamanalti tlen katli namanok mosenkajtokej, nojkia uelis kinpaleuis katli ya uejka mosenkajkej. Tikitasej tlen kichijkej se keskij tlakamej uan siuamej katli uejkajkia itstoyaj uan kenijkatsa tlen kichijkej uelis kinpaleuis katli mosenkajtokej uan nojkia tojuantij. Nojkia, tikitasej tlake tijyekouaj tlen kichijtokej ipan ni tonali se keskij toikniuaj katli mosenkajtokej.

3, 4. ¿Tlake uelis kiixnamikisej katli namanok mosenkajtokej?

³ Ipan se keski altepemej kiniljuiaj katli namanok mosenkajtokej moneki itstosej kej sekinok maseualmej. Se neskayotl, uelis tetajmej o sekinok ininchampoyouaj  kiniljuisej nima ma kinpiakaj ininkoneuaj. O uelis ininuampoyouaj uan ininchampoyouaj kiniljuisej moneki kikouasej se kali uan miak tlamantli tlen kichiuas kuali ma nesi ininchaj.

⁴ Katli namanok mosenkajtokej uelis tlauel motlauikaltisej tlaj amo kuali kitlapejpeniaj tlen kichiuasej. Yeka uelis monekis omej tekitisej uan kiampa tlaxtlauasej. Nopa kichiuas ayokmo ma kipiakaj tonali ininselti momachtisej Biblia, ayokmo momachtisej sansejko yon tlajtolmoyauasej. Nojkia, uelis ayokmo nochipa yasej tlanechikoli pampa monekis tlauel tekitisej uan kiampa nojua kitlanisej tomij o amo kipolosej ininteki. Tlaj kiampa kinpanoskia, nopa kichiuaskia amo ma kitekipanokaj Jehová kampa ya kiijtoskia.

5. ¿Tlake tijyekoua tlen kipanok Klaus uan Marisa?

⁵ Onka miak neskayotl kampa kinextia katli mosentlaliaj tlauel tlapijpiasej amo yolpakij. Kiampa kinpanok Klaus uan Marisa. * Kema mosenkajkej, pejkej tlauel tekitij pampa kinekiyayaj kuali itstosej. Maske kipixtoyaj miak tlamantli, amo yolpakiyayaj. Klaus kiijtoua: “Maske tlauel titlapijpixtoyaj uan amo tleno techpolouayaya, amo timosentlalijtoyaj tijchiuasej se keski tlamantli ipan toTeotsij itlanechikol. Tlauel ouij kej tiitstoyaj uan nochipa timotetsoptoyaj”. Uelis nojkia tikitstok maske tijpia miak tlamantli, amo kichijtok nelnelia xiyolpaki. Tlaj kiampa mitspano, tlen kichijtokej sekinok uelis mitspaleuis. Achtoui ma tikitakaj tlake kiyekouaj tlakamej tlen tlanauatijketl Josafat.

6. Kej kiijtoua Proverbios 3:5, 6, ¿kenijkatsa Josafat kiixnamijki se ueyi kuesoli?

⁶ Se katli mosiuajtijtok uelis kemantika tlauel motetsopa pampa amo ueli kichiua nochi tlen moneki. Tlaj kiampa mitspano, tlauel mitspaleuis tlen Josafat kichijki. Ya eliyaya se tlanauatijketl, yeka monekiyaya kichiuas miak tlamantli uan kiampa kuali itstoskiaj katli kinyakanayaya. Josafat kichijki se ueyi kampeka uan kiampa kinmanauik toTeotsij itekipanojkauaj. Kichijchijki uejueyi tepamitl ipan Judá uan kinsentilik kipano 1,160,000 tlateuianij (2 Crón. 17:12-19). Se tonali kiixnamijkej se ueyi tlaouijkayotl. ¿Tlake panok? “Nopa soldados tlen tlali Moab uan tlen tlali Amón kalajkej tlali Judá” uan kinejkej kinteuisej ya, ichampoyouaj uan sekinok maseualmej (2 Crón. 20:1, 2). ¿Tlake kichijki Josafat? Kiiljuik Jehová ma kipaleui uan ma kimaka chikaualistli, kej kiijtoua Proverbios 3:5, 6 (xijpoua). Ipan nopa tlamaijtoli katli Josafat kichijki tlen nesi ipan 2 Crónicas 20:5-12,  kinextia motemachiyaya ika nochi iyolo ipan iTata Jehová. ¿Kenijkatsa kipaleuik Jehová?

7. ¿Kenijkatsa Jehová kinankilik Josafat?

⁷ Ika se levita katli motokaxtiyaya Jahaziel, Jehová kinankilik Josafat. Kiiljuik: “San ximoketsakaj uan amo ximolinikaj uan inkiitasej kejatsa inmechmakixtis [Jehová]” (2 Crón. 20:13-17). Maske amo momajtoyaj kiampa tlateuisej, nama Jehová kiampa kiniljuijtoya ma kichiuakaj. Josafat tlauel motemachiyaya ipan Jehová yeka kichijki tlen kinauatik. Kema yajkej tlateuiaj, amo kintlayakanaltik katli kuali tlateuiaj, ya kintlayakanaltik tlakamej katli uikatiauiyayaj uan amo kipiayayaj tlen ika tlateuisej. Yeka, kintlankej ininkualankaitakauaj, kej Jehová kiniljuijtoya (2 Crón. 20:18-23).

8. ¿Tlake uelis kiyekosej katli mosiuajtijtokej ika tlen Josafat kichijki?

⁸ Nochi katli inmosenkajtokej uelis inkiyekosej miak tlamantli tlen Josafat kichijki. Moneki inkinmokuitlauisej uan inkiitasej kuali ma itstokaj inmochampoyouaj. Maske inkipiasej tlaouijkayotl, amo kema ximoiljuikaj inmoselti inkisenkauasej yon ximotemachikaj san ipan inmojuantij, kej kichiuaj sekinok. Moneki ximomaijtokaj uan xikiljuikaj Jehová ma inmechpaleui. Nojkia, ika nochi inmoyolo ximomaijtokaj ininuaya inmosiua. Xijkauakaj Jehová ma inmechpaleui, ximomachtikaj Biblia, amatlajkuiloli uan xijchiuakaj tlen nopaya inmechtlajtolmaka. Uelis se keskij maseualmej amo kuali kiitasej tlaj inkichiuaj tlen Biblia kiijtoua uan uelis kiijtosej inuiuitikej. Nojkia, maske uelis kiijtosej kuali itstosej inmochampoyouaj tlaj inkipiasej miak tomij uan tlauel intlapijpiasej, xikilnamikikaj tlen Josafat kichijki, ya motemachik ipan Jehová uan kinextik ika tlen kitlapejpenik. ToTeotsij amo kitlauelkajki uan nojkia amo inmechtlauelkauas (Sal. 37:28; Heb. 13:5). Uan, ¿tlake uelis nojua kichiuasej katli mosenkajtokej uan kiampa tlauel yolpakisej?

9. ¿Tlake kichijkej Isaías uan isiua?

⁹ Isaías uan isiua mosentlalijkej kuali kitekipanosej Jehová. Isaías eliyaya se tlajtolpanextijketl uan uelis isiua nojkia kiampa kichiuayaya pampa Biblia kiijtoua “nojkia eliyaya se siuatiokamalojketl” (Is. 8:1-4). Inijuantij tlauel kipatiitayayaj kitekipanosej Jehová. Ipan ni tonali nochi katli mosenkajtokej tlauel kinpaleuis tlaj kichiuasej kej inijuantij kichijkej.

10. ¿Kenke katli mosenkajtokej moneki momachtisej tlajtolpanextili tlen eltok ipan Biblia?

¹⁰ Nochi katli mosenkajtokej uelis kichiuasej kej kichijkej Isaías uan isiua pampa inijuantij tlauel kuali kitekipanojkej Jehová. Yeka, tlaj sansejko momachtisej tlajtolpanextili tlen eltok ipan Biblia uan nojkia kiitasej kenijkatsa nochipa moaxitia, kinpaleuis nojua kuali ma tlaneltokakaj (Tito 1:2). * Uelis moyoliljuisej kenijkatsa nojkia tlapaleuisej ipan se keski tlajtolpanextili tlen moaxitia ipan ni tonali, kej katli Jesús kiijtok: “Ni kuali tlamachtili [...] kiuikasej hasta kampa ueli techaj ipan nochi tlaltinij  ipan ni Tlaltipaktli” (Mat. 24:14). Kema katli mosenkajtokej motemachiaj nelnelia moaxitia tlajtolpanextili, kinpaleuis ma mosentlalikaj nojua tlauel kitekipanosej Jehová.

11. ¿Tlake kichijkej Priscila uan Áquila, uan kenke?

¹¹ Nochi katli namanok mosenkajtokej uelis tlauel kinpaleuis tlen kichijkej Priscila uan Áquila, katli eliyayaj judíos uan itstoyaj Roma. Inijuantij kitlakakilijkej tlen Jesús tlamachtiyaya uan teipa mochijkej itokilijkauaj. Maske uelis tlauel yolpakiyayaj pampa kuali itstoyaj, se tonali tekichijketl Claudio tlanauatik nochi judíos ma kisakaj tlen Roma. Ma timoiljuikaj kenijkatsa kiyolmatkej Priscila uan Áquila. Monejki kikauasej nopa altepetl kampa kuali tlaixmatiyayaj, kitemosej kampa itstosej uan kampa tekitiskiaj. Ika tlen kinpanok, ¿kichijki ayokmo tlauel ma kitekipanokaj Jehová? Amo. Kema itstoyaj Corinto kichijkej kampeka kinpaleuisej toikniuaj uan kipaleuijkej apóstol Pablo kema kinyolchikauayaya sekinok. Kema panok se keski tonali, yajkej ipan sekinok altepemej kampa amo itstoyaj miakej tlajtolmoyauanij (Hech. 18:18-21; Rom. 16:3-5). Inijuantij mosentlalijtoyaj kitekipanosej Jehová, yeka tlauel yolpajkej.

12. ¿Kenke katli mosenkajtokej moneki moiljuisej kenijkatsa tlatekipanosej?

¹² Katli mosenkajtokej tlauel kinpaleuis tlen kichijkej Priscila uan Áquila nojua ma mosentlalikaj kitekipanosej Jehová. Yeka, kema peuaj moixmatij moneki kiijtosej ipan tlake mosentlalijtokej kichiuasej. Kema kiijtouaj tlake kichiuasej ipan toTeotsij itlanechikol uan mosentlaliaj kichiuasej kampeka kiampa tlatekipanosej, uelis kiitasej kenijkatsa toTeotsij itonal kinpaleuia (Ecl. 4:9, 12). Ma tikitakaj tlen kichijkej Russell uan Elizabeth. Russell kiijtoua: “Kema pejki timoixmatij, nochipa tikijtouayayaj ipan tlake nelnelia timosentlalijtoyaj tijchiuasej ipan toTeotsij itlanechikol”. Elizabeth kiijtoua: “Kiampa tijchiuayayaj  pampa tlaj monekiskia tijtlapejpenisej se tlenijki, techpaleuiskia amo ma kipatla tlen ipa timosentlalijtoyaj tijchiuasej”. Yeka, uelkej tlatekipanouaj ipan Micronesia, kampa amo itstoyaj miakej tlajtolmoyauanij.

13. Kej kiijtoua Salmo 28:7, ¿kenijkatsa mitspaleuis tlaj timotemachia ipan Jehová?

¹³ Sanse kej kichijkej Russell uan Elizabeth, miakej toikniuaj nojkia kichijtokej kampeka amo tlauel tlapijpiasej, uan kiampa uelis nojua tlauel tlajtolmoyauasej uan tlamachtisej. Tlaj katli mosenkajtokej mosentlaliaj tlatekipanosej ika nochi ininyolo uan kichiuaj kampeka kiampa kichiuasej, kiselisej miak tlateochiualistli. Kiitasej kenijkatsa Jehová kinmokuitlauia, nojua tlauel motemachisej ipan ya uan nelnelia yolpakisej (xijpoua Salmo 28:7).

14. ¿Kenijkatsa Pedro iuaya isiua motemachiyayaj ipan tlen kiijtoua Mateo 6:25, 31-34?

¹⁴ Katli mosenkajtokej nojkia uelis kiyekosej tlen kichijkej Pedro uan isiua. Uelis kema panotoya se chikueyi metstli o se xiuitl kema Pedro kiixmajtoya Jesús, monejki kitlapejpenis se tlamantli tlen tlauel ipati. Ya michtlajtlamayaya, yeka kema Jesús kiiljuik ma tlajtolmoyaua senkistok iuaya, Pedro monejki kuali moiljuis kenijkatsa kinpanoltis ichampoyouaj (Luc. 5:1-11). ¿Tlake kichijki? Kiselik nopa tekitl. ¡Tlauel kuali tlen kitlapejpenik! Nojkia, se keski tlamantli kinextia isiua nojkia yajki iuaya. Biblia kiijtoua kema Jesús ya moyolkuitoya, Pedro iuaya isiua sansejko tlajtolmoyajkej (1 Cor. 9:5). Isiua tlauel kuali monejnemiltiyaya, yeka Pedro ueliyaya kintlajtolmaka katli mosenkajtokej (1 Ped. 3:1-7). Inijuantij motemachiyayaj Jehová kinmakaskia tlen moneki pampa kiachtouitlaliyayaj kitekipanosej (xijpoua Mateo 6:25, 31-34).

15. ¿Tlake tijyekoua tlen Tiago uan Esther?

¹⁵ Tlaj ya inkipiaj se keski xiuitl ika inmosenkajkej, ¿tlake inmechpaleuis nojua inkinekisej intlatekipanosej ika nochi inmoyolo? Tlauel inmechpaleuis tlaj inkiitasej tlen kichijtokej sekinok toikniuaj katli mosenkajtokej. Se neskayotl, ueliskia inkipouasej tlamachtili “Se ofrecieron de buena gana para servir”. Kiampa kichijkej Tiago uan Esther, katli euaj Brasil. Kema kipojkej ni tlamachtili kinpaleuik ma tlatekipanotij kampa amo itstokej miakej tlajtolmoyauanij. Tiago kiijtoua: “Kema tijpouayayaj kenijkatsa Jehová kinpaleuijtok itekipanojkauaj ipan ni tonali, nojkia tijnejkej tikitasej kenijkatsa techpaleuia uan techyakana”. Ipan 2014, yajkej tlatekipanouaj ipan Paraguay, kampa kamanaltij portugués, uan nojua itstokej nopaya. Esther kiijtoua: “Tlauel techpaktia tlen kiijtoua Efesios 3:20, uan miakpa tikitstokej kenijkatsa moaxitia tlen nopaya kiijtoua”. Ipan nopa amatlajkuiloli tlen Pablo kintlajkuiljuilik toikniuaj tlen Éfeso, kiijtok Jehová techmakaskia nojua tlauel miak tlamantli uan amo san tlen tijtlajtlaniaj, uan nelnelia kiampa kichijtok.

16. ¿Ajkia uelis kinpaleuisej katli namanok mosenkajtokej tlaj kinekij kichiuasej tlen mosentlalijtokej?

¹⁶ Tlaj namanok inmosenkajkej, tlauel inmechpaleuis tlen kichijtokej katli nochipa  motemachijtokej ipan Jehová. Se keskij toikniuaj katli mosenkajtokej, tlauel miak xiuitl senkistok tlatekipanojtokej. Yeka, uelis inkintlatsintokisej tlen inmechpaleuis inkichiuasej tlen inmosentlalijtokej. Tlaj kiampa inkichiuaj, inkinextisej inmotemachiaj ipan Jehová (Prov. 22:17, 19). Nojkia, ueuejtlakamej uelis inmechpaleuisej inmosentlalisej senkistok intlatekipanosej.

17. ¿Tlake kinpanok Klaus uan Marisa, uan tlake tijyekouaj?

¹⁷ Kemantika tlen tijtlapejpeniaj tijchiuasej ipan toTeotsij itlanechikol, amo pano kej timoiljuijtoyaj. Sampa ma tikitakaj tlen kinpanok Klaus uan Marisa, tlen tikijtojkej ipan párrafo 5. Kema kipixtoyaj eyi xiuitl ika mosenkajtoyaj, yajkej tlapaleuitoj ika se keski tekitl ipan Betel tlen Finlandia. Teipa, kiniljuijkej nopaya san itstoskiaj tlajko xiuitl. Nopa kichijki tlauel ma moyolkokokaj. Teipa, kintlanejkej ma momachtitij tlajtoli árabe, uan nama tlauel yolpakij pampa tlatekipanouaj ipan seyok altepetl kampa kamanaltij ni tlajtoli. Marisa kiijtoua: “Maske kemantika achi timajmauis tijkajteuas miak tlamantli uan monekis san ipan Jehová timotemachis, nikitstok kenijkatsa ya nochipa techpaleuijtok ika tlen amo nimoiljuijtoya. Ni kichijtok nojua tlauel ma nimotemachi ipan ya”. Kej tikitstokej, Jehová nochipa techteochiuas tlaj ika nochi toyolo timotemachiaj ipan ya.

18. ¿Tlake moneki kichiuasej katli mosenkajtokej uan kiampa nojua motemachisej ipan Jehová?

¹⁸ Kema se tlakatl uan se siuatl mosenkauaj eli se nemaktli tlen Jehová kinmakatok, uan ya kineki ma yolpakikaj (Prov. 5:18; Mat. 19:5, 6). Nochi toikniuaj katli namanok mosenkajkej uelis motlatsintokisej: “¿Tlake timosentlalijtokej tijchiuasej? ¿Tijchiuaj kampeka tijnextisej tijpatiitaj nopa nemaktli tlen Jehová techmakatok?”. Tlauel inmechpaleuis tlaj nochipa inmomaijtosej, inkitemosej tlamachtili tlen inmechpaleuis uan inkichiuasej ipan inmonemilis tlen Biblia tetlajtolmaka. Tlaj inmosentlaliaj kuali inkitekipanosej Jehová, uajka nelnelia inyolpakisej.