NECHKA xiuitl 670 a.u.J., Asiria elki se altepetl katli tlauel pankisayaya ipan nochi Tlaltipaktli. Ipan Internet, nopa Museo Británico kiijkuilok: “Peuayaya inaliyo Chipre uan tlamiyaya ika este tlen Irán, uan ipan se keski xiuitl nojkia tlamiyaya ipan Egipto”. Nopa altepetl Nínive eliyaya tlauel ueyi tlen nochi sekinok altepemej. Maseualmej tlauel moueyimatiyayaj pampa kipixtoyaj uejueyi tlaixkopinkayomej tlen kichijchijtoyaj ika tetl, yejyejtsitsij parques, uejueyi kali uan kampa kiajokuiyayaj amochtli. Kampa achtouia eliyaya altepetl Nínive kipantijtokej se keski tlajkuiloli ipan tlapepecholi kampa kinextia nopa tlanauatijketl Asurbanipal uan sekinok tlanauatianij tlen Asiria, motokaxtijkej “tlanauatianij tlen nochi Tlaltipaktli”. Ipan nopa tonali, Asiria uan Nínive nesiyaya amo aka ueliskia kintlanis.

Uan kema Asiria kipixtoya miak tlanauatili, tlajtolpanextijketl Sofonías kiijtok tlen Jehová kichiuaskia: “Kitlatsakuiltis tlali Asiria uan iueyi altepetl, Nínive, kikauas sosolijtok keja se uaktok tlali kampa axtleno onka”. Nojkia seyok tlajtolpanextijketl katli itoka Nahúm kiijtok: “¡Xikichtekikaj nopa plata uan nopa oro! [...] Altepetl Nínive mokauas kaktok. Tlatsitsikatok mokauas uan tlauel iselti. [...] Nochi tlen mitsitasej mitstlalkauisej uan kiijtosej: ‘Nínive tlamixolejtok’” (Sof. 2:13; Nah. 2:9, 10; 3:7). Kema kikajkej tlen kiijtojkej ni tlajtolpanextianij, uelis maseualmej motlatsintokijkej: “¿Uelis nelia tlen kiijtouaj? ¿Uelis se akajya kiteuis altepetl Asiria katli kipia miak chikaualistli?”. Inijuantij amo kineltokayayaj tlen panoskia.

Teipa, ¡moaxitik tlen sekinok amo kineltokayayaj! Nechka xiuitl 600 a.u.J., Babilonios uan medos ya kitsontlamiltijtoyaj altepetl Asiria. Teipa, Nínive kitlauelkajkej uan ayokmo aka kiilnamijki nochi tlen nopaya onkayaya. Se pilamochtsi tlen Museo de Arte Metropolitano tlen Nueva York, kiijtok: “Kema panotoya se keski xiuitl, ipan altepetl Nínive ayokmo tleno onkayaya uan ayokmo aka kiilnamikiyaya. Maseualmej san kimatij tlen nopa altepetl ika tlen Biblia kiijtoua”. Nojkia, nopa Biblical Archaeology Society Online Archive, kiijtoua: “Kema pejtoya xiuitl 1800 ayokmo aka kiilnamikiyaya tlaj Nínive eliyaya se altepetl katli kipixtoya miak chikaualistli”. Uan ipan 1845, kema nopa arqueólogo Austen Henry Layard tlaxajki, kipantik se keski tlamantli kampa kinextik Nínive eliyaya se altepetl tlen tlauel ipati.

Ika nopa tlajtolpanextili tlen moaxitik ika altepetl Nínive, techpaleuia ma timotemachikaj nojkia moaxitis nopa tlajtolpanextili kampa kiijtoua tlake kinpanos nochi tlanauatianij ipan ni tonali (Dan. 2:44; Apoc. 19:15, 19-21).