1. ¿Tlake uelis timotlatsintokisej?

¿TIMAJMAUI kema timoiljuia kenijkatsa kintsontlamiltisej religiones tlen amo melauak, kema Gog tlen Magog techtlatsakuiltis uan kema mochiuas Armagedón? ¿Timotlatsintokia tlaj kema panos nochi ni tlamantli nojua kuali titlaneltokatos? Tlaj kiampa timoiljuia, tlauel mitspaleuis nopa texto kampa mokixtijtok ni tlamachtili. Jesús kiniljuik itokilijkauaj: “Amo ximokuesokaj. Xijneltokakaj [Jehová]” (Juan 14:1). Tlaj kuali titlaneltokasej, amo timajmauisej ika tlen panos teipa.

2. ¿Tlake techpaleuis nojua kuali ma titlaneltokakaj, uan tlake tikitasej ipan ni tlamachtili?

² Tlauel techpaleuis tlaj tikitaj kenijkatsa tikixnamikij tokuesoljuaj pampa nopa techpaleuis nojua kuali titlaneltokasej uan uelis tikixnamikisej tlaouijkayotl tlen tijpiasej teipa. Tlaj kiampa tijchiuaj, techpaleuis ma tikitakaj kanke nojua moneki tijnextisej kuali titlaneltokaj. Kema tikixnamikij se tlaouijkayotl techpaleuia nojua kuali ma titlaneltokakaj. Uan techpaleuis ma tikixnamikikaj tlen ualas teipa. Ipan ni tlamachtili tikitasej naui tlamantli kampa Cristo itokilijkauaj kinextijkej nojua monekiyaya kuali tlaneltokasej. Nojkia, tikitasej kenijkatsa uelis tikijiyouisej tlen nama techpano uan kenijkatsa ni uelis techpaleuis teipa.

3. Kej kiijtoua Mateo 6:30, 33, ¿tlake kiijtok Jesús kema se akajya kuali tlaneltoka?

³ Amo kenijki tlaj se tlakatl kineki kuali ma itstokaj ichampoyouaj, ma kipiakaj tlen ika mopanoltisej, tlen mokentisej uan kampa itstosej. Ipan ni tonali nojua tlauel ouij kimatij kichiuasej. Miakej toikniuaj ayokmo kipiaj ininteki, uan kemantika ouij kipantiaj seyok. Sekinok amo kiselijtokej se keski tekitl pampa amo kinekij kiixpanosej toTeotsij  itlanauatiljuaj. Kema kiampa pano, moneki timotemachisej Jehová techmakas tlen techpoloua. Jesús kiampa kiniljuik itokilijkauaj ipan nopa Sermón del Monte (xijpoua Mateo 6:30, 33). Tlaj nelia timotemachiaj Jehová amo kema techtlauelkauas, timosentlalisej san ipan tlen tlauel ipati: tikachtouitlalisej iTlanauatijkayo. Uan kema tikitasej kenijkatsa Jehová techmaka tlen techpoloua, kichiuas nojua ma timonechkauikaj ika ya uan techpaleuis nojua kuali ma titlaneltokakaj.

4, 5. ¿Tlake kinpaleuijtok toikniuaj Castro amo tlauel motekipachosej kema amo kipixtoyaj tlen ika mopanoltisej?

⁴ Ma tikitakaj tlen kinpanok toikniuaj Castro, katli euaj ipan Venezuela. Inijuantij kiitstokej kenijkatsa Jehová kinpaleuijtok amo tlauel ma motekipachokaj ika tlen mopanoltisej. Ni toikniuaj tlatojtokayayaj ipan se tlali tlen kipixtoyaj, uan kiampa ueliyayaj kipiaj tlen ika mopanoltisej. Se tonali, se keskij maseualmej katli kiuikayayaj pistolas moaxkatijkej inintlal. Toikni Miguel kiijtoua: “Nama san timopanoltiaj ika tlen tijtokaj ipan se piltlaltsi tlen techtlanejtijtokej. Mojmostla nikiljuia Jehová ma techpaleui tijpiasej tlen ika timopanoltisej”. Maske tlauel ouij kej itstokej toikniuaj Castro, motemachiaj Jehová nochipa kinmakas tlen kinpoloua. Yeka, nochipa yauij tlanechikoli uan nochipa tlajtolmoyauaj. Inijuantij kiachtouitlaliaj kitekipanosej Jehová, uan ya kinmokuitlauia.

⁵ Toikni Miguel uan isiua Yurai, kiitstokej kenijkatsa Jehová nochipa kinmokuitlauijtok. Kemantika Jehová kintekiuijtok toikniuaj uan kiampa kinmakatok tlen moneki o kipaleuijtokej Miguel ma kipanti tekitl. Uan kemantika toikniuaj katli kiitaj kema tetlasojsoljuilia se tlenijki tlen kali Betel, kinmakatokej se keski tlamantli tlen kinpoloua. Kej tikitaj, Jehová amo kema kintlauelkajtok. Yeka, toikniuaj nojua kuali tlaneltokatokej. Kema kiijtojkej tlen kinpanok uan kenijkatsa Jehová kinpaleuik, Yoselin, iachtouikone toikni Miguel, kiijtok: “Nijneki nimochokilis kema nikita kenijkatsa Jehová tlauel techpaleuia. Nikita kej se nouampo, uan ya nochipa nechmokuitlauia”. Nojkia kiijtok: “Tlen tikixnamiktokej techpaleuis ma tikixnamikikaj uejueyi kuesoli tlen panos teipa”.

6. ¿Tlake mitspaleuis nojua kuali titlaneltokas maske amo tijpias tlen ika timopanoltis?

⁶ Maske nelia tlauel ouij kema amo tijpias tlen ika tikinpanoltis mochampoyouaj, tlauel mitspaleuis tlaj tijchiuas kampeka nojua kuali titlaneltokas. Yeka, ximomaijto ika Jehová, xijpoua tlen Jesús kiijtok ipan Mateo 6:25-34 uan ximoyoliljui. Nojkia, xijpoua tlen kinpanotok toikniuaj ipan ni tonali kampa kinextia Jehová kinpaleuia katli mosentlaliaj tlatekipanosej (1 Cor. 15:58). Kiampa timotemachis Jehová mitspaleuis kej kinpaleuijtok sekinok toikniuaj katli nojkia kinpanotok kej ta. Ya kuali kimati tlake mitspoloua uan  nojkia kimati kenijkatsa mitspaleuis. Kema tikitas kenijkatsa Jehová mitspaleuia, kichiuas nojua kuali xitlaneltoka uan uelis tikixnamikis uejueyi tlaouijkayotl tlen panos teipa (Hab. 3:17, 18).

7. Kej kiijtoua Mateo 8:23-26, ¿kenijkatsa se chikauak ajakatl kinextik Jesús itokilijkauaj nojua monekiyaya kuali tlaneltokasej?

⁷ Se tonali kema Jesús uan itokilijkauaj yauiyayaj ipan se akali, pejki tlauel uetsi atl uan chikauak tlaajakayaya. Jesús kiitak itokilijkauaj nojua monekiyaya kuali tlaneltokasej, uan yeka kinpaleuik (xijpoua Mateo 8:23-26). Kema pejki mokojkoxonia nopa tlauel miak atl uan nechka kalakiyaya ipan akali, Jesús kochtoya. Itokilijkauaj tlauel momajmatijkej, yeka kiixititoj uan kiiljuijkej ma kinmanaui. Jesús kiniljuik ika tlaiknelili: “¿Para tlen inmajmauij? Tlauel pilkentsi innechneltokaj”. Itokilijkauaj monekiyaya kiilnamikisej Jehová kinmokuitlauiskia Jesús uan katli iuaya itstoyaj. ¿Tlake tijyekouaj? Tlaj kuali titlaneltokaj, uelis tikixnamikisej uejueyi tlaouijkayotl, maske eliskia kej se ueyi ajakatl.

8, 9. ¿Tlake kipanok Anel, uan tlake kipaleuik?

⁸ Ma tikitakaj tlen kipanok Anel, se tosiuaikni katli ayamo monamiktia uan itstok ipan Puerto Rico. Ipan 2017, kiixnamijki se ueyi kuesoli pampa se chikauak ajakatl tlen kitokaxtijkej María tlasosolok ipan nopa altepetl, yeka kipolok ichaj uan iteki. Ya kiijtoua: “Maske ipan nopa tonali tlauel nimajmauiyaya, nimomaijtouayaya uan nopa nechpaleuik ma nimotemachi ipan Jehová uan amo ma nechtlani majmajtli”.

⁹ Anel kipaleuik seyok tlamantli: nochipa kichijki tlen kiiljuijkej. Ya kiijtoua: “Nijchiuas tlen nechiljuijkej toikniuaj, kichijki amo tlauel ma nimotekipacho. Kema toikniuaj nechyolchikajkej ika Biblia uan nechmakakej tlen ika nimopanoltis, nikitak Jehová tlauel nechiknelia”. Nojkia kiijtoua: “Jehová nechmakak tlen amo nimoiljuijtoya, uan nopa kichijki nojua kuali ma nitlaneltoka”.

10. ¿Tlake uelis tijchiuas tlaj tikixnamiki se ueyi kuesoli?

¹⁰ Tlaj tijpia se ueyi kuesoli, uelis pampa mitstlasojsoljuilik se tlenijki o pampa tijpia se ueyi kokolistli, uelis kichiuas tlauel ximotekipacho uan amo tijmatis tlake tijchiuas. Maske kemantika uelis timotekipachos, nojua ximotemachijto ipan Jehová. Yeka, xijtlapo moyolo uan xikiljui nochi tlen tijyolmati. Ximoyoliljui kenijkatsa Jehová mitspaleuik uejkajkia, nopa kichiuas nojua kuali xitlaneltoka (Sal. 77:11, 12). Ximotemachi ya amo kema mitstlauelkauas uan nochipa itstos mouaya.

11. ¿Kenke moneki tijchiuasej tlen technauatiaj katli techyakanaj?

¹¹ ¿Tlake nojkia techpaleuis tikijiyouisej tlen techpano? Kej kiijtok Anel, tlaj tijchiuaj tlen technauatiaj. Yeka, ma timotemachikaj ipan toikniuaj katli Jehová uan Jesús kintekimakatokej. Maske uelis kemantika  amo techpaktia tlen technauatiaj tijchiuasej, ma tikilnamikikaj Jehová kinteochiua katli kichiuaj tlen kinnauatiaj. Biblia uan tlen kinpanotok sekinok toikniuaj kinextijtok tlaj tijchiuasej tlen technauatiaj uelis timomakixtisej (Éx. 14:1-4; 2 Crón. 20:17). Yeka, ma timoyoliljuikaj ipan tlen tijpouaj, kiampa timosentlalijtosej tijchiuasej tlen kiijtoua toTeotsij itlanechikol ipan ni tonali uan nojkia teipa (Heb. 13:17). Tlaj kiampa tijchiuasej, amo timajmauisej ipan nopa ueyi tlaijiyouilistli tlen monechkauijtiuala (Prov. 3:25).

12. Kej kiijtoua Lucas 18:1-8, ¿kenijkatsa totlaneltokilis eli sanse kej kema tikijiyouiaj tlen amo xitlauak?

¹² Jesús kimatiyaya kemantika itokilijkauaj kinchiuiliskiaj tlen amo xitlauak uan nopa kinextiskia tlaj kuali tlaneltokaj. Yeka, kinpaleuik ika se tlapoualistli tlen eltok ipan amochtli Lucas. Ya kiijtok se siuatl katli ayokmo kipixtoya iueue miakpa kiiljuik se tekichijketl ma kipaleui pampa kichiuilijtoyaj tlen amo xitlauak. Nopa siuatl motemachiyaya tlaj miakpa kiiljuiskia, ya kena kipaleuiskia. Uan kiampa panok. ¿Tlake tijyekouaj? Jehová nochipa kichiua tlen xitlauak. Yeka, Jesús kiijtok: “ToTeko achi más nimantsi kintlajtolsenkauas itlakauaj tlen kintlapejpenijtok intla inijuantij momaijtouaj tonaya uan youali” (xijpoua Lucas 18:1-8). Jesús nojkia kiijtok: “Kema na tlen niMokuepki Tlakatl nimokuepas, ¿keskij tlakamej noja nechneltokilisej uan momaijtojtosej ipan ni Tlaltipaktli?”. Kema techchiuiliaj tlen amo xitlauak moneki tijnextisej tijpiaj toyolo uan nojua tijchijtosej kampeka, kiampa kej nopa siuatl, tijnextisej kuali titlaneltokaj. Moneki timotemachisej Jehová techpaleuis, maske uelis uejkauas tlen techchiuiliaj. Nojkia, moneki tikilnamiktosej tlamaijtoli nelia techpaleuis. Uan kemantika Jehová uelis technankilis kej amo kema timoiljuijtoyaj.

13. ¿Kenijkatsa tlamaijtoli kinpaleuik katli kinchiuilijkej tlen amo xitlauak?

¹³ Ma tikitakaj tlen kinpanok tosiuaikni Vero, iueue katli amo momachtia Biblia uan iichpoka katli kipia 15 xiuitl. Inijuantij euaj ipan República Democrática del Congo. Nopa eyij monejki yasej sejkanok pampa soldados kalajkej ipan nopa altepetl kampa itstoyaj. Kema kisteuayayaj, nopa soldados kinojtsakuilijkej uan kiniljuijkej kinmiktiskiaj. Maske Vero pejki mochokilia, iichpoka kiyolchikajki uan pejki chikauak momaijtoua, uan miakpa kitekiuik Jehová itoka. Kema tlanki momaijtoua, nopa soldado katli tlayakanayaya kitlatsintoki: “Siuapil, ¿ajkia mitsmachtik timomaijtos?”. Uan ya kinankilik: “Nonana, uan nechmachtik kej kiijtoua Mateo 6:9-13”. Nopa tlakatl kiiljuik: “Uelis inyasej, uan ma inmechmanaui inmoTeotsij Jehová”.

14. ¿Tlake uelis kinextis moneki nojua kuali titlaneltokasej, uan tlake techpaleuis tikijiyouisej tlen techpano?

 ¹⁴ Tlen kinpanok tosiuaikni Vero ininuaya ichampoyouaj, kinextia tlauel ipati timomaijtosej. Uan, ¿tlaj kema timomaijtouaj amo tikitaj kenijkatsa Jehová technankilia o amo kichiua kej timoiljuijtoyaj? Sanse kej nopa siuatl katli Jesús kiijtok, moneki nojua timomaijtosej uan timotemachisej Jehová amo kema techtlauelkauas, uan ya technankilis kema monekis uan kej kinamiki. Yeka, nojua ma tijtlajtlanikaj ika nochi toyolo ma techmaka itonal (Filip. 4:13). Nochipa ma tikilnamiktokaj Jehová nechka tlauel techteochiuas, uan kiampa amo kema tikilnamikisej tlen nama techpano. Tlaj amo tijtlauelkauaj Jehová uan tikijiyouiaj nochi tlen techpano, techpaleuis tikixnamikisej tlen panos teipa (1 Ped. 1:6, 7).

15. Kej kiijtoua Mateo 17:19, 20, ¿tlake amo uelkej kichiuaj Jesús itokilijkauaj uan kenke?

¹⁵ Jesús kinmachtik itokilijkauaj tlaj kuali tlaneltokaj kinpaleuiskia ma kiixnamikikaj uejueyi kuesoli (xijpoua Mateo 17:19, 20). Maske inijuantij miakpa kinkixtilijtoyaj maseualmej amo kuali ajakamej, se tonali amo uelkej kichiuaj. ¿Kenke? Jesús kiniljuik nojua monekiyaya kuali tlaneltokasej. Ya kiniljuik tlaj kuali tlaneltokaskiaj ueliskiaj kiixnamikisej uejueyi kuesoli, maske eliskia kej se ueyi tepetl. Ipan ni tonali, tojuantij nojkia uelis tikixnamikisej uejueyi kuesoli tlen nesiskia amo uelis tikijiyouisej.

16. ¿Kenijkatsa Geydi pampa kuali tlaneltoka kipaleuijtok kiixnamikis se ueyi kuesoli?

¹⁶ Nama ma tikitakaj tlen kipanok tosiuaikni Geydi, katli eua Guatemala. Se tonali kema tlakuepiliyayaj ininchaj kema yajtoyaj tlanechikoli, iueue, Edi, kimiktijkej. Tosiuaikni kichiua kampeka kuali tlaneltokas, nopa kipaleuijtok kiijiyouis nopa ueyi kuesoli. Ya kiijtoua: “Kema nimomaijtoua, nikiljuia Jehová nochi tlen nijyolmati uan nopa kichiua ma nijpia tlaseuilistli. Nikita kenijkatsa Jehová nechmokuitlauia ika tlen kichiuaj nochampoyouaj uan toikniuaj. Kema nimosentlalia nitlatekipanos, kichiua amo tlauel ma nimokueso uan amo tlauel ma nimotekipacho ika tlen uelis panos teipa. Tlen nechpanotok nechpaleuijtok nikitas maske teipa nijpias uejueyi tlaouijkayotl, uelis nikixnamikis pampa Jehová, Jesús uan toikniuaj nechpaleuisej”.

17. ¿Tlake uelis tijchiuasej kema tikixnamikisej se ueyi tlaouijkayotl?

¹⁷ Tlaj mijki se katli tlauel tikikneliaj, ma tijchiuakaj kampeka tijpouasej tlapoualistli kampa kiijtoua Jehová kinyolkuik maseualmej, nopa techpaleuis nojua timotemachisej ya kinyolkuis katli miktokej. Uan, tlaj tlauel timokuesouaj pampa se tlen tochampoyouaj kikixtijkej tlen tlanechikoli, uajka ma timomachtikaj kampa kiijtoua  kenijkatsa Jehová techtlalnamiktia pampa techiknelia uan kineki kuali ma tiitstokaj. Maske tikixnamikisej tlen ueli kuesoli, ma tikilnamikikaj nopa techpaleuis nojua kuali ma titlaneltokakaj. Yeka, ma tijtlapokaj toyolo iixpa Jehová uan amo ma timouejkatlalikaj tlen toikniuaj (Prov. 18:1). Maske kemantika timochokilijtosej, nojua ma timotekiuijtokaj ipan tlen techpaleuis tikijiyouisej (Sal. 126:5, 6). Nojkia, ma tiakaj tlanechikoli, ma titlajtolmoyauakaj uan ma timomachtikaj Biblia. Uan ma timoyoliljuijtokaj ipan tlen Jehová techtenkauilijtok. Kema tikitasej kenijkatsa Jehová techpaleuia, techpaleuis nojua kuali ma titlaneltokakaj.

18. ¿Tlake uelis tijchiuasej tlaj tikitaj moneki nojua kuali titlaneltokasej?

¹⁸ Tlaj kema tikixnamijkej se tlaouijkayotl o tlen nama tikixnamikij kinextia nojua moneki kuali titlaneltokasej, uajka ma tijchiuakaj kampeka pampa nopa techpaleuis nojua kuali ma titlaneltokakaj. Ma tijchiuakaj kej apóstoles katli kiijtojkej: “Xitechpaleui para más ma timitsneltokilikaj” (Luc. 17:5). Nojkia, ma timoyoliljuikaj ipan tlen kinpanok toikniuaj katli tikitakej ipan ni tlamachtili. Kej kichijkej Miguel uan Yurai, nochipa ma tikilnamikikaj kenijkatsa Jehová techpaleuik uejkajkia. Sanse kej kichijkej iichpoka Vero uan Anel, ma timomaijtokaj ika nochi toyolo kema tikixnamikij uejueyi tlaouijkayotl. Uan kej Geydi, ma tijkauakaj Jehová ma techpaleui ika tochampoyouaj uan ika toikniuaj. Tlaj kema tijpiaj kuesoli tijkauaj Jehová ma techpaleui, nopa kichiuas ma timotemachikaj ya techpaleuis kema tikixnamikisej sekinok uejueyi tlaouijkayotl.

19. ¿Ipan tlake motemachik Jesús, uan ipan tlake uelis timotemachisej?

¹⁹ Jesús kiijtok se keski tlamantli kampa kinextik itokilijkauaj nojua monekiyaya kuali tlaneltokasej. Maske kiampa kichijki, ya motemachik Jehová kinpaleuiskia ma kiixnamikikaj tlen ueli tlaouijkayotl (Juan 14:1; 16:33). Nojkia, motemachik tlauel miakej maseualmej momanauisej ipan nopa ueyi tlaijiyouilistli pampa kuali tlaneltokaskiaj (Apoc. 7:9, 14). Yeka, tlaj nojkia tijnekij timomanauisej, ma tijchiuakaj kampeka tikitasej kenijkatsa nojua kuali titlaneltokasej (Heb. 10:39).