1. ¿Kenijkatsa Pablo kinitayaya tlapaleuianij?

 ININTEKI tlapaleuianij tlauel ipati ipan tlanechikoli. Uejkajkia, apóstol Pablo tlauel kinpatiitayaya tlapaleuianij pampa kuali tlatekipanouayayaj. Yeka, kema kintlajkuiljuilik toikniuaj tlen Filipos, kintlajpalok tlapaleuianij uan nojkia ueuejtlakamej (Filip. 1:1).

2. ¿Kenijkatsa kiita Luis iteki kej tlapaleuijketl?

² Ipan ni tonali, miakej toikniuaj telpokamej uan katli ya uejueyij tlauel yolpakij pampa tlatekipanouaj kej tlapaleuianij. Kiampa kiyolmati Devan, katli kitekimakakej kema kipixtoya 18 xiuitl. Uan Luis kema kipixtoya kipano 50 xiuitl. Luis kiijtoua: “Nikita kej se ueyi tlateochiualistli nitlatekipanos kej tlapaleuijketl, uan más kiampa nijyolmati kema nikita kenijkatsa toikniuaj tlauel nechikneliaj”. Tlen kiijtoua ni toikni kinextia kenijkatsa kiyolmatij miakej tlapaleuianij.

3. ¿Tlake tlamantli tikixtomasej ipan ni tlamachtili?

³ Tlaj ta ya timoatsonpoliuiltijtok uan ayamo titlatekipanoua kej tlapaleuijketl, ¿mitspaktiskia kiampa titlatekipanos? ¿Tlake moneki mitsyololinis? ¿Tlake kuajkuali tlamantli tlen kiijtoua Biblia moneki tijnextis? Nochi ni tlajtlanili tikixtomasej ipan ni tlamachtili. Pero achtoui ma tikitakaj tlake tekitl kichiua se tlapaleuijketl ipan tlanechikoli.

 ¿TLAKE TEKITL KICHIUA SE TLAPALEUIJKETL?

4. ¿Tlake tekitl kichiuaj tlapaleuianij ipan tlanechikoli? (Nojkia xikita tlaixkopinkayotl).

⁴ Toikniuaj tlapaleuianij kintlapejpenijtokej ika ichikaualis Dios para ma kinpaleuikaj ueuejtlakamej ika se keski tekitl tlen mochiua ipan tlanechikoli. Se keskij kintekimakaj para ma kinmakakaj toikniuaj amatlajkuiloli uan kampa tlajtolmoyauasej. Miakej tlapaleuiaj kema tlapojpouaj uan kema kikualchijchiuaj kali kampa timosentiliaj. Nojkia, kintekimakaj para ma kinselikaj toikniuaj uan tlapaleuiaj ipan audio uan video kema mochiua tlanechikoli. Maske amo kichiuaj sanse tekitl kej ueuejtlakamej, ni toikniuaj tlauel kuali tlaneltokaj, kiikneliaj Jehová, kuali monejnemiltiaj uan nojkia tlauel kinikneliaj toikniuaj (Mat. 22:37-39). ¿Tlake moneki kichiuas se toikni para tlatekipanos kej tlapaleuijketl?

5. ¿Tlake moneki kichiuas se akajya para elis tlapaleuijketl?

⁵ Biblia kiijtoua tlake moneki kichiuas se katli kineki ma kitekimakakaj kej tlapaleuijketl (1 Tim. 3:8-10, 12, 13). ¿Tlake uelis tijchiuas? Ximomachti ipan Biblia tlen moneki tijchiuas uan teipa xijchiua kampeka tijchiuas ipan monemilis. Pero achtoui ma tikitakaj tlake moneki mitsyololinis para kiampa titlatekipanos.

¿TLAKE MONEKI MITSYOLOLINIS?

6. ¿Tlake moneki mitsyololinis para titlatekipanos kej tlapaleuijketl? (Mateo 20:28; nojkia xikita tlaixkopinkayotl ).

⁶ Tlen Jesús kichijki, tlauel techpaleuia. Ya tlauel kiiknelia iTata uan nojkia maseualmej. Nopa tlaiknelili kichijki kuali ma tlatekipano uan ma kichiua se keski piltekitsitsij para kinpaleuis sekinok (xijpoua Mateo 20:28; Juan 13:5, 14, 15). Tlaj ta nojkia tijneki kiampa titlatekipanos pampa titeiknelia, Jehová mitsteochiuas uan mitspaleuis xitlatekipano kej tlapaleuijketl (1 Cor. 16:14; 1 Ped. 5:5).

7. ¿Kenke amo kinamiki tijnekis tielis titlapaleuijketl san pampa tijneki ma mitsuejkapantlalikaj?

⁷ Ipan ni tonali, tlauel kinpatiitaj maseualmej katli kineki pankisasej ika tlen kichiuaj. Pero ipan Jehová itlanechikol amo kiampa pano. Kema se toikni kiniknelia sekinok sanse kej Jesús, amo san kinekis tlanauatis  yon kinekis ma kiuejkapantlalikaj. Pero tlaj se akajya san kineki ma kitekimakakaj ipan tlanechikoli para pankisas, uelis amo kinekis kichiuas se keski piltekitsitsij tlen kinauatisej para kinmokuitlauis toikniuaj. Uelis moiljuis amo kinamiki kichiuas nopa tekitl (Juan 10:12). Jehová amo kema kiteochiuas tlen kichiuaj maseualmej katli moueyimatij uan san kinekij pankisasej (1 Cor. 10:24, 33; 13:4, 5).

8. ¿Tlake kiniljuik Jesús iapóstoles?

⁸ Jesús iuampoyouaj nojkia kiampa kinpanok pampa kichijkej kampeka ma kintekimakakaj para pankisasej. Santiago uan Juan, katli eliyayaj apóstoles, kiiljuijkej Jesús ma kintekimaka ipan iTlanauatijkayo. Pero Jesús amo kuali kiitak tlen kitlajtlanijkej, yeka kiniljuik nopa 12 apóstoles: “Katli kineki kipias tlanauatili, moneki kintekipanos sekinok uan katli kineki tlayakanas, moneki elis inintlatekipanojka sekinok” (Mar. 10:35-37, 43, 44). Toikniuaj katli kichiuaj kampeka tlatekipanosej ika nochi ininyolo, tlauel kinpaleuisej toikniuaj ipan tlanechikoli (1 Tes. 2:8).

¿TLAKE MITSPALEUIS TIJNEKIS TIKINPALEUIS TOIKNIUAJ?

9. ¿Tlake uelis mitspaleuis para tijnekis más tikinpaleuis toikniuaj?

⁹ Ta tlauel tikiknelia Jehová uan tijneki tikinpaleuis toikniuaj. Maske ya tijchiua ni tlamantli, uelis amo tijneki ma mitstekimakakaj. ¿Tlake mitspaleuis para tijnekis más titlapaleuis ipan tlanechikoli? Uelis timoiljuis kenijkatsa tiyolpakis kema tikinpaleuis toikniuaj. Jesús kiampa kiijtok: “Más tiyolpakis kema titemakas se tlenijki uan amo kej kema tijselis” (Hech. 20:35). Ya nochipa moyakanki ika ni texto, yeka tlauel yolpakiyaya kema kinpaleuiyaya sekinok. Tlaj ta kiampa tijchiuas, nojkia kiampa tijyolmatis.

10. ¿Kenijkatsa Jesús kinextik yolpakiyaya kema kinpaleuiyaya sekinok? (Marcos 6:31-34).

¹⁰ Ma tikilnamikikaj kenijkatsa Jesús yolpakiyaya kema kinpaleuiyaya sekinok (xijpoua Marcos 6:31-34). Se tonali kema Jesús uan iapóstoles tlauel siajtoyaj, yajkej sejkanok para mosiajkauasej. Pero miakej maseualmej tlayakankej uan achtoui asitoj que inijuantij, pampa kinekiyayaj kitlakakilisej tlen Jesús tlamachtiyaya. Ya ueltoskia kiniljuis amo kinmachtis pampa ya uan iuampoyouaj “amo kipiayayaj tonali yon para tlakuasej”. Nojkia ueltoskia san kinmachtis se o ome tlamachtili uan kiniljuijtoskia ma tlakuepilikaj ininchaj. Pero Jesús tlauel kinikneliyaya, yeka “pejki kinmachtia miak tlamantli”, uan amo kimatki kenijkatsa nima tiotlakixki (Mar. 6:35). Amo kichijki san pampa kinamikiyaya kichiuas, ya kichijki pampa “tlauel kinteikneltiitak”. Kinekiyaya kinmachtis pampa tlauel kinikneliyaya. Uan kema kiampa kichiuayaya, nelia tlauel yolpakiyaya.

11. ¿Kenijkatsa Jesús kinpaleuik katli kitlakakiliyayaj? (Nojkia xikita tlaixkopinkayotl).

¹¹ Jesús amo san tlamachtik, nojkia tlapaleuik ika sekinok tlamantli. Se tonali kintlamakak miakej maseualmej uan kiniljuik itokilijkauaj ma kipaleuikaj kinmajmakasej tlakualistli (Mar. 6:41). Kiampa kinmachtik kenijkatsa kinamiki kinpaleuisej sekinok. Tlen Jesús kichijki, kinextik tlauel ipati tlen kichiuaj tlapaleuianij. Uelis apóstoles tlauel yolpajkej pampa kinmajmakakej tlakualistli maseualmej uan “nochi tlakuajkej uan ixuikej” (Mar. 6:42). Pero Jesús amo san ya ni kichijki, kema itstoya ipan Tlaltipaktli mosentlalik kinpaleuis maseualmej (Mat. 4:23; 8:16). Jesús tlauel yolpakiyaya kema tlamachtiyaya uan kema kinpaleuiyaya maseualmej ika tlen kinpolouayaya. Ta nojkia uelis  kiampa tijyolmatis uan tlauel tiyolpakis tlaj tijnekis titlatekipanos kej tlapaleuijketl.

12. ¿Kenke amo kinamiki timoiljuisej amo uelis titlapaleuisej ipan tlanechikoli?

¹² Amo kenijki ximoiljui tlaj tikita amo tiyajati tijchiua se keski tekitl. Uelis tijpia se keski kuajkuali tlamantli tlen ika uelis titlapaleuis ipan tlanechikoli. Tlauel mitspaleuis tlaj timomaijtos uan tijpouas 1 Corintios 12:12-30. Ipan ni textos, Pablo kiijtoua nochi itekipanojkauaj Jehová tlauel ininpati uan uelis tlapaleuisej ipan tlanechikoli. Tlaj tikita nojua mitspoloua tijchiuas se keski tlamantli ipan monemilis para mitstekimakasej kej tlapaleuijketl, amo kenijki ximoiljui, nojua xijchijto kampeka. Xijchiua tlen tiueli para tijtekipanos Jehová uan tikinpaleuis toikniuaj. Uan ximotemachi ueuejtlakamej kiitasej tlen tiyajati tijchiua kema moiljuisej mitsmakasej se tekitl (Rom. 12:4-8).

13. Xikijto tlake moneki kiilnamiktosej katli kinekij tlatekipanosej kej tlapaleuianij.

¹³ Biblia kiijtoua katli kinekij elisej tlapaleuianij ipan tlanechikoli, moneki kinextisej kuajkuali tlamantli ipan ininnemilis. Uan amo san inijuantij, pampa nochi Jehová itekipanojkauaj moneki kinextisej nopa kuajkuali tlamantli, kinechkauisej Jehová, yolpakisej kema kinpaleuisej sekinok uan monejnemiltisej kej Biblia tlamachtia. Yeka, uelis ipan ni tonali ya tijnextia se keski kuajkuali tlamantli tlen mitspaleuis para ma mitstekimakakaj kej tlapaleuijketl.

¿TLAKE MITSPALEUIS TIELIS SE TLAPALEUIJKETL?

14. ¿Tlake kiijtosneki amo tikajauilmatis se tlamantli? (1 Timoteo 3:8-10, 12).

¹⁴ Ipan 1 Timoteo 3:8-10, 12 (xijpoua) kiijtoua se keski tlamantli tlen moneki kichiuasej katli kinekij ma kintekimakakaj ipan tlanechikoli. Tlapaleuianij moneki amo tleno kiajauilmatisej, ni nojkia kiijtosneki sekinok moneki kintlepanitasej uan elisej temachmej. Maske kiampa kiijtoua, nopa amo kiijtosneki amo uetskasej o amo moyolpakiltisej (Ecl. 3:1, 4). Pero kena moneki kinextisej kuali kichiuaj ininteki para sekinok kiitasej elij temachmej. Uan kiampa toikniuaj kintlepanitasej.

15. ¿Tlake kiijtosneki “amo kinamiki kipajpatlasej tlen kiijtouaj” uan amo “san kinejnektosej kitlanisej tomij uan kitemosej san tlen inijuantij kinpaleuia”?

¹⁵ “Amo kinamiki kipajpatlasej tlen kiijtouaj”. Ni kiijtosneki nochipa moneki kiijtosej tlen melauak uan elisej temachmej. Moneki  kichiuasej tlen kiijtouaj uan amo aka kikajkayauasej (Prov. 3:32). Amo “san kinejnektosej kitlanisej tomij uan kitemosej san tlen inijuantij kinpaleuia”. Nopa kiijtosneki amo tekajkayauasej kema tlanamakasej uan ika nopa tomij tlen temakaj ipan tlanechikoli. Uan amo moneki kinkuilisej o kintlajtlanisej tomij toikniuaj pampa kinekisej tlatominpiasej.

16. 1) ¿Tlake kiijtosneki “amo kinamiki [ . . . ] kiisej miak tlaili”? 2) ¿Tlake kiijtosneki kipiasej “kuali inintlalnamikilis”?

¹⁶ “Amo kinamiki [ . . . ] kiisej miak tlaili”. Ni nojkia kiijtosneki amo tlauel motlailtisej uan amo ma kinixmatikaj kej maseualmej katli tlauel tlaij. Nojkia moneki kipiasej “kuali inintlalnamikilis” pampa moyakanaj ika iTlanauatiljuaj Jehová. Maske nochi titlajtlakolejkej, kena uelis tiyolpakisej tlaj kuali timouampojchijtokej iuaya Dios.

17. ¿Kenijkatsa se ueuejtlakatl uelis kiitas tlaj kuali kichiua iteki se toikni? (1 Timoteo 3:10; nojkia xikita tlaixkopinkayotl).

¹⁷ “Achtoui moneki kintlachilisej tlaj kuali kichiuaj ininteki”. Ni kiijtosneki katli kinekij elisej tlapaleuianij moneki ya kinextijtosej elij temachmej. Yeka, kema ueuejtlakamej kinnauatiaj ma kichiuakaj se keski tekitl, moneki kichiuasej ininteki kej kiniljuijkej uan kej Jehová itlanechikol kiijtoua. Moneki kimajtosej kenijkatsa kichiuasej nopa tekitl uan kema kitlamiltisej. Tlaj kuali kichiuaj ininteki, toikniuaj tlen tlanechikoli kiitasej kuali tlaneltokatiauij. Ueuejtlakamej, xikintlachilikaj toikniuaj katli ya moatsonpoliuiltijtokej katli uelis inkinnextilisej kenijkatsa uelis kichiuasej se keski tekitl (xijpoua 1 Timoteo 3:10). Ipan inmotlanechikol, ¿itstokej toikniuaj katli motelpokachijtiauij uan ya moatsonpoliuiltijtokej? ¿Momajtokej momachtiaj Biblia ininselti? ¿Tlanankiliaj ipan tlanechikoli uan kisaj tlajtolmoyauaj? Tlaj kena itstokej, uelis inkinmakasej se keski piltekitsitsij tlaj inkiitaj yajatisej kichiuasej, kiampa inkiitasej tlaj kuali kichiuaj ininteki. Kiampa, kema ya kuali motelpokachijtosej, uelis ya kinextijtosej kuajkuali tlamantli ipan ininnemilis uan uelis inkintekimakasej.

18. ¿Tlake kiijtosneki “amo aka kintlateljuia ika yon se tlamantli”?

¹⁸ Tlapaleuianij nojkia “amo aka kintlateljuia ika yon se tlamantli”. Ni kiijtosneki amo kinamiki sekinok ma kiijtojtinemikaj amo kuali monejnemiltiaj. Kemantika sekinok maseualmej kinijilnamikij uan kinistlakauiaj  toikniuaj ika se tlamantli tlen amo nelia kichijtokej. Jesús kiampa kipanok uan kiijtok itokilijkauaj nojkia kiampa kinpanoskia (Juan 15:20). Pero tlaj toikniuaj kichiuaj kej Jesús uan kuali monejnemiltiaj, ipan tlanechikoli kuali kinitasej (Mat. 11:19).

19. ¿Tlake kiijtosneki kema Biblia kiijtoua “moneki kipiasej san setsi ininsiua”?

¹⁹ Katli kinekij tlatekipanosej kej tlapaleuianij “moneki kipiasej san setsi ininsiua”. Moneki amo kiixpanosej tlen Jehová kiijtojtok ma kichiuakaj katli mosenkajtokej uan itstosej sansejko san se tlakatl uan se siuatl (Mat. 19:3-9). Se toikni katli mosiuajtijtok amo kinamiki kikajkayauas isiua (Heb. 13:4). Pero amo san ya nopa moneki kichiuas, nojkia moneki kitlepanitas isiua uan amo kinixtokatinemis sekinok siuamej (Job 31:1).

20. ¿Kenijkatsa uelis kinextis se tetaj kuali kinyakana ichampoyouaj?

²⁰ Nojkia “moneki kuali kinyakanasej ininkoneuaj uan ininchampoyouaj”. Tetajmej moneki kinmokuitlauisej ininchampoyouaj, kinyakanasej para kinmachtisej sejse semana, kinpaleuisej para nochipa ma tlajtolmoyauakaj uan kinpaleuisej ininkoneuaj kuali ma mouampojchiuakaj iuaya Jehová (Efes. 6:4). Tlaj se tetaj kuali kinmokuitlauia ichampoyouaj, nojkia kuali kinmokuitlauis toikniuaj ipan tlanechikoli (nojkia xikita 1 Timoteo 3:5).

21. ¿Tlake uelis tijchiuas tlaj ayamo mitstekimakaj kej tlapaleuijketl?

²¹ Tlaj ayamo mitstekimakaj kej tlapaleuijketl, tlauel mitspaleuis tlaj timomaijtos uan timomachtis ni tlamachtili. Nojkia ximomachti ipan Biblia tlen moneki kichiuasej katli kinekij elisej tlapaleuianij uan xijchiua ipan monemilis. Xijchiua kampeka tikiniknelis uan tikinpaleuis toikniuaj ika nochi moyolo (1 Ped. 4:8, 10). Tlaj kiampa tijchiuas, tlauel tiyolpakis. ¡Jehová ma mitsteochiua pampa tijchiua kampeka titlatekipanos kej se tlapaleuijketl ipan tlanechikoli! (Filip. 2:13).