1, 2. ¿Tlake kiijtosneki kema Biblia kiijtoua ueuejtlakamej kichiuaj se “tekitl tlen tlauel kuali”?

 TLAJ miak xiuitl titlatekipanojtok kej tlapaleuijketl, uelis ya tijnextia ipan monemilis miak kuajkuali tlamantli tlen mitspaleuis tielis ueuejtlakatl. ¿Ueliskia más tijchiuas kampeka para titlatekipanos uan tijchiuas “se tekitl tlen tlauel kuali”? (1 Tim. 3:1).

² ¿Tlake tekitl kichiua se ueuejtlakatl? Nochipa tlajtolmoyaua ininuaya toikniuaj, kichiua kampeka kinmachtis uan kinmokuitlauis, uan ika tlen kiijtoua uan kichiua kinpaleuia toikniuaj kuali ma tlaneltokakaj. Yeka, Biblia kiijtoua inijuantij elij “kej regalos” (Efes. 4:8).

3. ¿Tlake moneki kichiuas se toikni tlaj kineki elis ueuejtlakatl? (1 Timoteo 3:1-7; Tito 1:5-9).

³ ¿Tlake moneki kichiuas se akajya tlaj kineki elis ueuejtlakatl? Tlaj kineki kiampa tlatekipanos, amo san moneki kimatis se keski tlamantli kej kichiuaj katli kitemouaj tekitl. Kema se akajya kitemoua se tekitl, katli kitekimaka san kiita tlake tlamantli ueli kichiua uan kimati. Pero tlaj se akajya kineki ma kitekimakakaj kej ueuejtlakatl ipan tlanechikoli, amo san moneki kuali tlajtolmoyauas o tlamachtis, nojkia moneki kichiuas se keski tlamantli tlen Biblia kiijtoua ipan 1 Timoteo 3:1-7 uan Tito 1:5-9 (xijpoua). Ipan ni tlamachtili moixtomas eyi tlamantli tlen moneki kichiuasej ueuejtlakamej: moneki toikniuaj uan sekinok maseualmej kuali kiitasej, kuali kinyakanas ichampoyouaj uan kinekis kinpaleuis toikniuaj.

 MONEKI KUALI KIITASEJ

4. ¿Tlake kiijtosneki nopa tlajtoli “amo ma kitlateljuikaj ika yon se tlamantli”?

⁴ Tlaj se akajya kineki elis ueuejtlakatl moneki “amo ma kitlateljuikaj ika yon se tlamantli”. Nopa kineki kiijtos amo aka uelis kitlaijiljuis pampa nochipa kuali monejnemiltia. Nojkia “moneki elis se tlakatl katli kuali kiitaj maseualmej katli amo tlaneltokaj”. Katli amo kitekipanouaj Jehová uelis amo kuali kiitaj tlen kineltoka, pero ika nochi tlen kichiua nopa toikni kinextia kuali monejnemiltia (Dan. 6:4, 5). Ximotlajtlani: “¿Kuali nechitaj toikniuaj uan sekinok maseualmej?”.

5. ¿Tlake kiijtosneki nopa tlajtoli “kiiknelis tlen kuali”?

⁵ “Kiiknelis tlen kuali” kiijtosneki se ueuejtlakatl moneki kitlachilis nopa kuali tlamantli tlen sekinok kinextiaj uan kinyolchikauas pampa kiampa kichiuaj. Nojkia yolpaki kema kinpaleuia sekinok uan kichiua sekinok tlamantli maske amo kiiljuiaj (1 Tes. 2:8). ¿Kenke ueuejtlakamej moneki kiampa kichiuasej? Pampa moneki kikixtisej tonali para kinmokuitlauisej toikniuaj uan kichiuasej sekinok tekitl ipan tlanechikoli (1 Ped. 5:1-3). Maske inijuantij kipiaj miak tekitl, yolpakij kema kinpaleuiaj sekinok (Hech. 20:35).

6. ¿Tlake kichiua se akajya katli kuali teselia? (Hebreos 13:2, 16; nojkia xikita tlaixkopinkayotl).

⁶ Se akajya katli kuali teselia amo san kinpaleuia katli elij iuampoyouaj (1 Ped. 4:9). Se amochtli kiijtoua: “Tlaj se akajya kuali teselia, kinpaleuia maseualmej maske amo kinixmati uan yolpaki kema kintlaneui ichaj”. Ximotlajtlani: “¿Sekinok kiijtouaj kuali nikinselia katli nechpaxalouaj?” (xijpoua Hebreos 13:2, 16). Katli kuali teselia kinmaka tlen kipia katli kipaxalouaj, maske sekij elij teikneltsitsij o senkistok tlatekipanouaj, kej katli tepaxalouaj chijchikuasej metstli uan katli yauij tlamachtiaj ipan sekinok tlanechikoli (Gén. 18:2-8; Prov. 3:27; Luc. 14:13, 14; Hech. 16:15; Rom. 12:13).

7. ¿Kenijkatsa kinextia se ueuejtlakatl amo san kinejnektok tomij?

⁷ Amo “san kinejnektos tomij”. Nopa kiijtosneki moneki amo san mosentlalis kipias miak tlamantli. Maske tlapijpia o amo, moneki mosentlalis kitekipanos Jehová (Mat. 6:33). Moneki kuali kitekiuis tonali, ichikaualis  uan sekinok tlamantli tlen kipia para kiueyichiuas Jehová, kinmokuitlauis ichampoyouaj uan tlapaleuis ipan tlanechikoli (Mat. 6:24; 1 Juan 2:15-17). Ximotlajtlani: “¿Kenijkatsa nikita tomij? ¿Niyolpaki san ika tlen nijpia? ¿O san nimosentlalia nijtlanis más tomij uan nitlapijpias?” (1 Tim. 6:6, 17-19).

8. ¿Kenijkatsa kinextia se akajya “kuali kinauatia tlen kichiua uan kuali monauatia”?

⁸ Se akajya kinextia kuali kinauatia tlen kichiua uan kuali monauatia kema kichiua nochi kej kinamiki. Nopa kiijtosneki amo tlauel tlakua yon tlai, amo mosentlalia san moyejyekchiuas uan kuali kitekiuia tonali. Nojkia moneki amo kichiuas sanse kej maseualmej (Luc. 21:34; Sant. 4:4). Uan kema sekinok amo kuali kinojnotsasej, moneki kipias iyolo. Se ueuejtlakatl moneki “amo moiuintis” yon kiixmatisej kej se akajya katli tlauel tlai. Ximotlajtlani: “¿Kej nimonejnemiltia nijnextia nijchiua kampeka kuali nimonauatis?”.

9. ¿Tlake kichiua se akajya katli “kuali tlalnamiki” uan kichiua “nochi kej kinamiki”?

⁹ Se ueuejtlakatl katli kinextia “kuali tlalnamiki”, nochipa moyakana ika tlen Biblia kiijtoua. Uan kema moyoliljuia ipan tlen momachtia, kuali kikuamachilia tlen pano uan más kuali kitlapejpenia tlen kichiuas. Yeka kema pano se tlenijki, amo nima moiljuia ajkia itlajtlakol, ya kichiua kampeka kimatis nochi tlen panok (Prov. 18:13). Kema se ueuejtlakatl kiampa kichiua, kinextia kuali tlalnamiki uan moiljuia sanse kej Jehová. Nojkia kichiua nochi kej kinamiki ni kiijtosneki asi ipan nopa hora tlen kiijtok. Nochi motemachiaj ipan ya pampa moyakana ika tlen Jehová itlanechikol kiniljuia ma kichiuakaj ueuejtlakamej. Yeka nochi kuali kiitaj. Nama ma tikitakaj tlake moneki kinextis se ueuejtlakatl tlaj kineki kuali kinyakanas ichampoyouaj.

MONEKI KUALI KINYAKANAS ICHAMPOYOUAJ

10. ¿Tlake kiijtosneki kema Biblia kiijtoua se tlakatl moneki “kuali kinyakanas ichampoyouaj”?

¹⁰ Tlaj se toikni katli mosiuajtijtok kineki ma kitekimakakaj kej ueuejtlakatl, ichampoyouaj moneki kuali ma monejnemiltikaj. Yeka, moneki “kuali kinyakanas ichampoyouaj”. Sekinok moneki kiitasej tlauel kiniknelia uan kinmaka tlen moneki. Nojkia moneki kinpaleuis kuali ma tlaneltokakaj. ¿Kenke moneki kiampa kichiuas? Pampa kej kiijtok apóstol Pablo: “Tlaj se tlakatl amo kimati kenijkatsa kinyakanas ichampoyouaj, ¿kenijkatsa kimokuitlauis itlanechikol Dios?” (1 Tim. 3:5).

11, 12. ¿Kenke tlen kichiuaj ichampoyouaj se toikni uelis kipaleuis ma tlatekipano kej ueuejtlakatl? (Nojkia xikita tlaixkopinkayotl).

¹¹ Tlaj nopa toikni kinpia ikoneuaj katli ayamo kiaxitiaj 18 xiuitl uan nojua itstokej ichaj, moneki “nochipa kineltokasej uan kuali monejnemiltisej”. Nopa tetaj moneki kuali kinmachtis ikoneuaj uan kinyakanas ika tlaiknelili. Uan maske konemej kinpaktia mauiltisej uan uetskasej, tlaj inintata kuali kinmachtia, uajka tlaneltokasej, tlatlepanitasej uan amo kichiuasej tlen amo kuali. Nojkia, inintata moneki kinpaleuis kuali ma mouampojchiuakaj iuaya Jehová, ma kichiuakaj ipan ininnemilis tlen Biblia kiijtoua uan nojkia ma kichiuakaj tlen kinpaleuis ma moatsonpoliuiltikaj.

¹² “Moneki elis se tlakatl katli […] kinpia ikoneuaj katli nojkia tlaneltokaj uan amo aka uelis kintlateljuis pampa san tlemach tlachiuaj uan tlaijixnamikij”. ¿Tlake panoskia tlaj ikone se ueuejtlakatl kichiua se ueyi tlajtlakoli? Tlaj nopa tetaj ayokmo kuali kinmachtik yon kintlalnamiktik, amo uelis tlatekipanos kej ueuejtlakatl (xikita La Atalaya octubre 15, 1996, iamayo 21, párrafos 6, 7).

 MONEKI TLAPALEUIS IPAN TLANECHIKOLI

13. ¿Kenijkatsa se akajya kinextia amo eli tochontik uan amo kineki ma mochiua “san tlen ya kineki”?

¹³ Toikniuaj katli kinextiaj kuajkuali tlamantli ipan ininnemilis tlauel tlapaleuiaj ipa tlanechikoli. Se toikni katli amo kichiua “san tlen ya kineki”, tlapaleuia amo ma mokualanikaj sekinok. Tlaj ta tijneki kiampa tielis, moneki kuali tikintlakakilis sekinok uan tikinkauas ma kiijtokaj tlen moiljuiaj. Kema monechikouaj ueuejtlakamej, ¿tikinpaleuiskia ika tlen kitlapejpeniaj tlaj amo kiixpanoj tlen kiijtoua Biblia? Se ueuejtlakatl “amo kinamiki elis tochontik”. Nopa kiijtosneki amo san kinekis ma mochiua tlen ya kiijtoua. Uan moneki yolpakis pampa itstokej sekinok toikniuaj katli kipaleuiaj (Gén. 13:8, 9; Prov. 15:22). Nojkia moneki “amo mosisinis” yon “kichijtinemis kualantli”. Kiijtosneki nopa ueuejtlakatl kuali tenojnotsas, kinextis teiknelia uan amo san kej ueli kamanaltis. Amo kitemoua kuesoli uan nochipa kichiua kampeka amo ma onka kualantli maske kemantika ouij (Sant. 3:17, 18). Ika tlen kiijtoua kinpaleuia sekinok ayokmo ma mosisinikaj, maske kemantika amo kinekij kitlakakilisej (Juec. 8:1-3; Prov. 20:3; 25:15; Mat. 5:23, 24).

14. ¿Kenke se ueuejtlakatl “moneki amo elis se tlakatl katli namanok pejtok tlaneltoka”, uan kenijkatsa kinextia amo tetlauelkaua?

¹⁴ Se ueuejtlakatl “moneki amo elis se tlakatl katli namanok pejtok tlaneltoka”. Maske kipia san se keski xiuitl kema moatsonpoliuiltik, moneki panos tonali uan kiampa kinextis tlaj kuali mouampojchijtok iuaya Jehová uan tlaj kuali tlaneltoka. Kema ayamo kitekimakaj kej ueuejtlakatl, moneki kinextis amo moueyimati uan kinekis kitekipanos Jehová kej ya kineki uan kej Jesús kichijki (Mat. 20:23; Filip. 2:5-8). Nojkia moneki “amo tetlauelkauas”, nopa kiijtosneki moneki nochipa kitekipanos Jehová, kichiuas tlen kiijtoua iTlanauatiljuaj uan moyakanas ika tlen itlanechikol techiljuia (1 Tim. 4:15).

15. ¿Moneki tlauel kuali tlamachtis se ueuejtlakatl?

 ¹⁵ Ipan Biblia xitlauak kiijtoua katli tlayakana ipan tlanechikoli moneki “kuali kimatis kenijkatsa tlamachtis”. Nopa amo kiijtosneki nopa toikni moneki tlauel kuali tlamachtis. Maske miakej ueuejtlakamej amo nelkuali tlamachtiaj, kena kuali kinmachtiaj sekinok uan kuali teyolchikauaj (nojkia xikita 1 Corintios 12:28, 29 uan Efesios 4:11). Yeka, tlaj se toikni kineki tlatekipanos kej ueuejtlakatl, moneki kichiuas kampeka kuali tlamachtis. ¿Kenijkatsa uelis kichiuas?

16. ¿Kenijkatsa se toikni uelis más kuali tlamachtis? (Nojkia xikita tlaixkopinkayotl).

¹⁶ “Moneki motlatskilis ipan nopa tlajtoli tlen melauak”. Tlaj se ueuejtlakatl kineki kuali tlamachtis, moneki motlatskilis ipan tlen Biblia kiijtoua kema tlamachtia ininixpa sekinok o kema tetlajtolmaka. Nojkia, moneki kuali momachtis Biblia uan amatlajkuiloli (Prov. 15:28; 16:23). Kema momachtis, monekis kiitas kenijkatsa uelis kichiuas ipan inemilis tlen kiijtoua se keski textos. Uan kema tlamachtis kichiuas kampeka tlen kiijtos ma asi ipan ininyolo katli kitlakakiliaj. Tlauel kipaleuis tlaj kintlatsintokis sekinok ueuejtlakamej katli kuali tlamachtia ma kiiljuikaj kanke nojua moneki kichiuas kampeka (1 Tim. 5:17). Ueuejtlakamej nojkia moneki kimatisej kenijkatsa kinyolchikauasej toikniuaj uan tosiuaikniuaj. Uan maske kemantika monekis chikauak kintlakaualtisej se keskij, moneki kichiuasej ika tlaiknelili. Tlaj kuali tenojnotsaj, teikneliaj uan motlatskiliaj ipan tlen kiijtoua Biblia, kinextisej kichiuaj kej Jesús pampa kuali tlamachtisej (Mat. 11:28-30; 2 Tim. 2:24).

NOJUA XIJCHIJTO KAMPEKA

17. 1) ¿Tlake kinpaleuis tlapaleuianij nojua ma kichijtokaj kampeka para tlatekipanosej kej ueuejtlakamej? 2) ¿Tlake moneki kiilnamikisej ueuejtlakamej kema kiitasej tlaj se toikni ya uelis tlatekipanos kej ueuejtlakatl? (Xikita recuadro “ Kuali xikitakaj tlaj se toikni uelis tlatekipanos kej ueuejtlakatl”).

¹⁷ Se keskij tlapaleuianij uelis moiljuisej  amo kema uelis tlatekipanosej kej ueuejtlakamej pampa kiitaj moneki kinextisej miak kuajkuali tlamantli ipan ininnemilis. Pero moneki kiilnamikisej Jehová uan itlanechikol amo kichiaj ma kinextikaj nochi nopa kuajkuali tlamantli pampa nochi titlajtlakolejkej (1 Ped. 2:21). Uan nojkia, Jehová ika ichikaualis uelis kinpaleuis katli kinekij tlatekipanosej kej ueuejtlakamej (Filip. 2:13). ¿Mitspaktiskia tijnextis se tlen nopa kuajkuali tlamantli tlen tikitakej? Uajka, ximomaijto, xijtemo tlamachtili tlen mitspaleuis uan xikiniljui ueuejtlakamej ma mitsiljuikaj tlake sekinok tlamantli nojua uelis tijchiuas.

18. ¿Tlake moneki kichiuasej katli elij tlapaleuianij?

¹⁸ Nochi toikniuaj uan katli ya elij ueuejtlakamej, moneki kichiuasej kampeka kinextisej nopa kuajkuali tlamantli tlen timomachtijkej ipan ni tlamachtili (Filip. 3:16). Tlaj titlatekipanoua kej tlapaleuijketl, nojua xijchijto kampeka para titlatekipanos kej ueuejtlakatl. Xikiljui Jehová ma mitspaleui más kuali tijtekipanos uan tikinpaleuis toikniuaj ipan tlanechikoli (Is. 64:8). Tlaj tijchiuas kampeka kiampa titlatekipanos, Jehová tlauel mitsteochiuas.