¿OUIJ tijmati timomachtis sejse semana? ¿Mitskuesiuiltia? Kemantika kiampa techpano. Pero nojkia onka sekinok tlamantli tlen moneki tijchiuasej nochipa. Se neskayotl, kemantika moneki tijchiuasej kampeka timaltisej mojmostla, pero kema kiampa tijchiuaj tlauel kuali timomachiliaj. Uan kema timomachtiaj Biblia, nojkia kichiua kuali ma tijyolmatikaj (Efes. 5:26). Tlen nikaj kiijtoua uelis mitspaleuis:

• Xikijkuilo kema timomachtis. Nochi katli tijtekipanouaj Jehová moneki nochipa timomachtisej pampa nopa tlamantli tlauel ipati (Filip. 1:10). Tlaj amo tijneki tikilkauas kema timomachtis, uelis tikijkuilos uan tijtlalis kampa nima tikitas, kej ipan refrigerador. O uelis mitspaleuis tlaj tijtlalia se alarma ipan moteléfono uan ma kakisti kema nechka timomachtis.

• Xijchiua tlen más mitspaleuis. Se keskij kinpaleuia tlaj uejkauaj momachtiaj, uan sekinok tlaj kixejxelojtiauij tlen momachtiaj. ¿Ta tlake mitspaleuia? Kuali xikita nopa tlamantli kema tikijkuilos tlen timomachtis. ¿Uan tlaj amo tlauel tijneki timomachtis kema tikixtlalijtoya? Uelis timomachtis maske san se diez minutos. Maske nesi amo tiuejkauas, tlauel mitspaleuis. Uan uelis teipa tijnekis más timomachtis (Filip. 2:13).

• Achtoui xikita tlake timomachtis. Tlaj kema timomachtis ayamo tijmati tlake tlamachtili tijneki tikitas, tijnextis amo tijtekiuia tonali kej kinamiki (Efes. 5:16). Uelis tikijkuilos tlake tlamachtili mitspaktiskia timomachtis o tlen amo kuali tijkuamachilia. Uan tlaj kema timomachtia timoiljuia ipan sekinok tlamachtili tlen uelis tijtemos, nojkia xikijkuilo.

• Xijpatla se keski tlamantli kema monekis. Ximosentlali timomachtis sejse chikueyi. Yeka, kema monekis uelis tijpatlas nopa tonali, hora, keski tiuejkauas uan tlen timomachtis.

Tlaj nochipa timomachtia Biblia moselti, tlauel mitspaleuis pampa más tijnechkauis Jehová, kuali tijtlapejpenis tlen tijchiuas uan kuali tijyolmatis (Jos. 1:8).