1-3. 1) ¿Tlake moneki nochipa kichiuasej nochi toTeotsij itekipanojkauaj? 2) ¿Tlake tlaouijkayotl kipiaj katli kiyekouaj se yankuik tlajtoli, uan tlake tlajtlanili tijnankilisej? (Xikita nopa achtoui tlaixkopinkayotl).

IPAN ni tonali Jehová itekipanojkauaj kichiuaj ma moaxiti nopa tlajtolpanextili tlen uala ipan Apocalipsis [Revelación] 14:6, kampa kiijtoua toTeotsij iTlajtol momoyauaskia “ipan nochi tlaltinij, uan ipan nochi xinachtli tlakamej, uan hasta tlakamej tlen kamatij nochi tlajtoli”. Miakej Jehová itlajtoltemakauaj kiyekouaj se yankuik tlajtoli, sekij tlatekipanouaj kej misioneros o yajtokej ipan seyok altepetl kampa nojua moneki tlajtolmoyauasej. Uan sekinok, maske itstokej ipan ininaltepe, tlatekipanouaj ipan se tlanechikoli kampa motekiuia seyok tlajtoli.

² Nochi toTeotsij itekipanojkauaj moneki nochipa kichiuasej kampeka kuali mouikasej iuaya Jehová uan kinpaleuisej ininchampoyouaj nojkia kiampa ma kichiuakaj (Mat. 5:3). Kemantika, uelis tlauel timotekiuijtokej uan amo tiuelij timomachtiaj Biblia toselti. Uan toikniuaj katli tlatekipanouaj ipan se tlanechikoli kampa motekiuia seyok tlajtoli nojkia kipiaj sekinok tlaouijkayotl.

 ³ Katli tlatekipanouaj ipan se tlanechikoli amo san moneki kiyekosej se yankuik tlajtoli, nojkia moneki kichiuasej kampeka nochipa momachtisej se keski tlamantli tlen achi ouij ipan toTeotsij iTlajtol (1 Cor. 2:10). ¿Kenijkatsa kichiuasej nopa tlaj amo kikuamachiliaj tlen moixtoma ipan tlanechikoli? ¿Kenke tetajmej katli tlatekipanouaj ipan se tlanechikoli kampa motekiuia seyok tlajtoli moneki kinpaleuisej ininkoneuaj kuali ma kikuamachilikaj tlen momachtiaj?

4. ¿Tlake ueliskia kichiuas ayokmo kuali ma timouikakaj iuaya Jehová? Xikijto se neskayotl.

⁴ Tlaj amo tijkuamachiliaj se tlajtoli, uajka amo tijkuamachilisej tlen Biblia tlamachtia uan nopa kichiuaskia ayokmo kuali ma timouikakaj iuaya Jehová. Ma tikitakaj tlen panok uejkajkia. Kema Nehemías tlakuepilik Jerusalén, kiitak se keskij konemej amo kamanaltiyayaj judíos inintlajtol (xijpoua Nehemías 13:23, 24). Yeka amo kikuamachiliyayaj toTeotsij iTlajtol, uan nopa kichijki ayokmo kuali ma mouikakaj iuaya Jehová (Neh. 8:2, 8).

5, 6. ¿Tlake kiitstokej sekij tetajmej katli tlatekipanouaj ipan se tlanechikoli kampa motekiuia seyok tlajtoli, uan kenke kiampa panotok?

⁵ Sekij tetajmej katli tlatekipanouaj ipan se tlanechikoli kampa motekiuia seyok tlajtoli kiitstokej ininkoneuaj ayokmo tlauel kuali mouikaj iuaya Jehová. ¿Kenke kiampa kinpanotok? Pampa amo kikuamachiliaj tlen moixtoma ipan tlanechikoli, uan yeka amo kinyololinia ma kichiuakaj ipan ininnemilis tlen nopaya tlamachtiaj. Ma tikitakaj tlake kiijtoua Pedro, ya itstoya ininuaya ichampoyouaj ipan Sudamérica uan teipa yajkej Australia. Ya kiijtoua: “Kema tikijtouaj se keski tlamantli tlen toTeotsij, moneki tikijtosej tlen timoiljuiaj uan tlen eltok ipan toyolo” (Luc. 24:32) ^[1] (xikita nopa nota kampa tlami ni tlamachtili).

⁶ Kema tijpouaj se amatlajkuiloli ipan seyok tlajtoli, uelis amo sanse tijyolmatij kej kema tijpouaj ipan totlajtol. Uan nojkia tlauel ouij tijmatij tikinnojnotsasej sekinok ipan inintlajtol. Nopa kichiua ma tijmatikaj ouij tijtekipanosej Jehová o ayokmo tlauel ma tiyolpakikaj. Yeka, amo kinamiki san tijnekisej kuali titlatekipanosej ipan se tlanechikoli kampa motekiuia seyok tlajtoli, nojkia moneki tijchiuasej kampeka nochipa kuali timouikasej iuaya Jehová (Mat. 4:4).

7. ¿Tlake kichijkej babiloniaeuanij pampa kinekiyayaj Daniel ma kichiua kej inijuantij uan ma itsto ipan ininreligión?

⁷ Kema Daniel uan iuampoyouaj kinuikakej Babilonia, nopa babiloniaeuanij kinekiyayaj ma kichiuakaj tlen inijuantij momajtoyaj kichiuaj uan ma itstokaj ipan ininreligión. Yeka kinnextilijkej inintlajtol uan kintokaxtlalijkej kej babiloniaeuanij inintoka (Dan. 1:3-7). Nopa tokajyotl tlen kitlalilijkej Daniel mokixtijtoya tlen nopa tokajyotl Bel, katli eliyaya se teotsij tlen babiloniaeuanij tlauel kiueyichiuayayaj. Uelis nopa tlanauatijketl kinekiyaya Daniel ma moiljui san iteotsij kena tlauel kipiayaya miak chikaualistli uan amo Jehová, katli Daniel kitekipanouayaya (Dan. 4:8).

8. ¿Tlake kipaleuik Daniel nojua kuali mouikas iuaya Jehová?

⁸ Maske ipan Babilonia, kimakakej tlakualistli tlen san tlanauatijketl kikuayaya, “Daniel  ipan iyolo motemakak” kineltokas toTeotsij (Dan. 1:8). ¿Tlake kipaleuik nojua kuali mouikas iuaya Jehová maske itstoya ipan seyok altepetl? Ya momachtiyaya nopa pilamochtsitsij tlen “iTlajtol toTeko” ipan tlajtoli hebreo (Dan. 9:2). Maske ya panotoya se 70 xiuitl kema kiuikakej Babilonia, ya nojua kitokaxtiyayaj Daniel (Dan. 5:13).

9. ¿Tlake kichijki katli kiijkuilok Salmo 119?

⁹ Tlen kichijki katli kiijkuilok Salmo 119 nojkia tlauel techpaleuia. Maske sekij maseualmej katli kipiayayaj tlanauatijkayotl kitlaijiljuijkej, ya momachtik toTeotsij iTlajtol, uan nopa kipaleuik amo ma kichiua kej sekinok (Sal. 119: 23, 61). Kikajki toTeotsij itlanauatiljuaj ma kiyakana ipan inemilis (xijpoua Salmo 119:11, 46).

10, 11. 1) ¿Tlake moneki tikitasej kema timomachtisej? 2) ¿Kenijkatsa uelis tijchiuasej nopa? Xikixtoma ika se neskayotl.

¹⁰ Maske uelis tijpiaj miak tekitl ipan tlanechikoli o kampa titekitij, nochi moneki tijchiuasej kampeka timomachtisej Biblia toselti o ininuaya tochampoyouaj (Efes. 5:15, 16). Kema timomachtisej, amo kinamiki san tijpouasej miak iamayo Biblia uan miak amatlajkuiloli o san tijkualchijchiuasej tlen titlanankilisej ipan tlanechikoli. Kema timomachtisej toTeotsij iTlajtol moneki tikitasej kenijkatsa techpaleuia kuali ma titlaneltokakaj uan ma techyololini tijchiuasej tlen timomachtiaj.

¹¹ Tlaj tijnekij tijchiuasej nopa kema timomachtisej, moneki amo san timoiljuisej kenijkatsa uelis kinpaleuis sekinok, nojkia moneki timoiljuisej kenijkatsa uelis techpaleuis tojuantij (Filip. 1:9, 10). ¿Kenke moneki tijchiuasej nopa? Pampa kema timomachtiaj pampa tiasej titlajtolmoyauatij, tiasej tlanechikoli, titlamachtisej o tikixnextisej kenijkatsa titlajtolmoyauasej, kemantika amo timoiljuiaj kenijkatsa uelis techpaleuis tlen tijpouaj. Ma timoiljuikaj ipan se tlakualchijketl. Maske achtoui moneki kiyekos nopa tlakualistli, amo ixuis san pampa kiyekoua. Tlaj kineki kuali itstos, moneki nochipa kuali motlakualchiuilis. Sanse kej nopa tlakualchijketl, tlaj tijnekij kuali timouikasej iuaya Jehová, moneki nochipa timomachtisej Biblia. Uan kema tijchiuasej nopa, moneki timoiljuisej kenijkatsa techpaleuis.

12, 13. ¿Kenke miakej toikniuaj kiijtouaj tlauel kuali tlaj timomachtisej Biblia ipan totlajtol?

¹² Miakej toikniuaj katli tlatekipanouaj ipan se tlanechikoli kampa motekiuia seyok tlajtoli kiitstokej kenijkatsa kinpaleuijtok pampa momachtiaj Biblia ipan inintlajtol (Hech. 2:8). Uan katli tlatekipanouaj kej misioneros nojkia kiitstokej tlauel kinpaleuijtok kuali ma tlatekipanokaj kampa kintitlantokej pampa momachtiaj ipan inintlajtol, uan kiijtouaj amo moneki moiljuisej kinpaleuijtos san tlen kikakij ipan tlanechikoli.

¹³ Se toikni tlen itoka Alain kipia chikueyi xiuitl momachtijtok tlajtoli persa. Ya kiijtoua: “Kema nimomachtia tlen moixtomas ipan tlanechikoli ipan tlajtoli persa, san nimoiljuia  kenijkatsa nikijtos se tlenijki ipan nopa tlajtoli. Pampa san nimoiljuijtok nopa, amo asi ipan noyolo tlen nimomachtia. Yeka, nimomajtok nimomachtia Biblia uan amatlajkuiloli ipan notlajtol”.

14. ¿Tlake moneki kuali kiitasej tetajmej, uan kenke?

¹⁴ Tetajmej moneki kuali kiitasej tlaj ininkoneuaj kikuamachiliaj tlen Biblia tlamachtia uan tlaj nelia kipatiitaj. Ma tikitakaj tlen kinpanok Serge uan isiua Muriel. Inijuantij tlatekipanojkej eyi xiuitl ipan se tlanechikoli kampa motekiuia seyok tlajtoli. Teipa pejki kiitaj ininkone tlen kipixtoya 17 xiuitl ayokmo kipaktiyaya tlajtolmoyauas yon yas tlanechikoli. Muriel kiijtoua: “Kualaniyaya kema yauiyaya tlajtolmoyaua ipan seyok tlajtoli, uan achtouia tlauel kipaktiyaya tlajtolmoyauas ipan itlajtol francés”. Serge kiijtoua: “Kema tikitakej tokone ayokmo kuali mouikayaya iuaya Jehová, tikijtojkej sampa tiaskiaj ipan nopa tlanechikoli kampa achtouia tiitstoyaj”.

15. 1) ¿Tlake moneki kiitasej tetajmej tlaj kinekij yasej ipan se tlanechikoli kampa motekiuia inintlajtol? 2) ¿Tlake kintlajtolmaka tetajmej tlen kiijtoua Deuteronomio 6:5-7?

¹⁵ Sekij tetajmej moiljuijtokej tlaj kualtiaskia yasej ipan se tlanechikoli kampa motekiuia inintlajtol. ¿Tlake moneki kiitasej achtoui tlaj kinekij kiampa kichiuasej? Achtoui moneki kiitasej tlaj kena kipiaj tonali, uan kiampa kinmachtisej ininkoneuaj ma kiiknelikaj Jehová uan nojkia kinnextilijtosej seyok tlajtoli.  Uan nojkia moneki kiitasej tlaj ininkoneuaj kinekij tlajtolmoyauasej, yasej tlanechikoli o tlatekipanosej ipan se tlanechikoli kampa motekiuia seyok tlajtoli. Kema kimatisej ni tlamantli, uelis sekij tetajmej kiitasej moneki yasej ipan se tlanechikoli kampa motekiuia inintlajtol, kiampa ininkoneuaj kikuamachilisej tlen moixtoma. Kema tetajmej kiitasej ininkoneuaj ya kuali mouikaj iuaya Jehová, uelis sampa kinekisej tlapaleuisej ipan se tlanechikoli kampa motekiuia seyok tlajtoli (xijpoua Deuteronomio 6:5-7).

16, 17. ¿Tlake kichijtokej se keskij tetajmej pampa kinekij kinpaleuisej ininkoneuaj ma kiiknelikaj Jehová?

¹⁶ Sekij tetajmej kiitstokej kenijkatsa kinpaleuisej ininkoneuaj ma kiiknelikaj Jehová ipan inintlajtol, maske tlatekipanouaj ipan se tlanechikoli o se grupo kampa motekiuia seyok tlajtoli. Ma tikitakaj tlen kichiua toikni Charles. Ya kinpia eyij isiuapiljuaj, katli ya ueyi kipia 13 xiuitl uan teipaejketl kipia 9 xiuitl, uan nochi tlatekipanouaj ipan se grupo ipan tlajtoli lingala. Charles kiijtoua: “Timosentlalijkej tikinmachtiskiaj Biblia ipan totlajtol, uan nojkia kiampa tijchiuaskiaj kema timomachtiskiaj sansejko ininuaya tochampoyouaj. Nojkia tikompauiaj tlen uelis tikijtosej ipan tlajtoli lingala uan timauiltijtiauij kema tijchiuaj ni, kiampa tosiuapiljuaj kinpaktia kiyekosej nopa tlajtoli”.

¹⁷ Kevin nojkia kipia se siuapil tlen kipia makuili xiuitl uan seyok tlen kipia chikueyi xiuitl. Ya kichiua kampeka kinmachtis isiuapiljuaj tlen Biblia tlamachtia, pampa ayamo kuali kikuamachiliaj tlen moixtoma ipan  tlanechikoli kampa motekiuia seyok tlajtoli. Ya kiijtoua: “Nosiua uan na tikinmachtiaj tosiuapiljuaj ipan totlajtol, ipan tlajtoli francés. Nojkia timosentlalijtokej sejse metstli tiasej ipan se tlanechikoli tlen mochiua ipan francés. Uan kema tijpiaj vacaciones, tiauij ipan se ueyi tlanechikolistli tlen mochiua ipan totlajtol”.

18. 1) ¿Kenijkatsa Romanos 15:1, 2 uelis kinpaleuis tetajmej ma kiitakaj tlake uelis kichiuasej uan kiampa kinpaleuisej ininkoneuaj? 2) ¿Tlake kiijtouaj se keskij tetajmej? (Xikita nopa nota kampa tlami ni tlamachtili).

¹⁸ Nochi tetajmej moneki kiitasej tlake uelis kichiuasej uan kiampa kinpaleuisej ininkoneuaj kuali ma mouikakaj iuaya Jehová (Gál. 6:5) ^[2] (xikita nopa nota kampa tlami ni tlamachtili). Ipan párrafo 14 tikijtojkej tlen kinpanok Muriel uan Serge. Muriel kiijtoua maske ya iuaya iueue kinekiyayaj tlatekipanosej ipan se tlanechikoli tlen seyok tlajtoli, kiitakej kualtiaskia yasej ipan seyok tlanechikoli, uan kiampa ueliskiaj kipaleuisej ininkone kuali ma mouika iuaya Jehová (xijpoua Romanos 15:1, 2). Ipan ni tonali Serge kiijtoua tlauel kuali tlen kichijkej. Ya kiijtoua: “Kema pejki tiauij ipan se tlanechikoli ipan tlajtoli francés, tokone pejki nima kuali mouika iuaya Jehová uan moatsonpoliuiltik. Nama tlatekipanoua kej precursor uan moiljuijtok tlaj uelis yas tlatekipanoti ipan se tlanechikoli kampa motekiuia seyok tlajtoli”.

19, 20. ¿Kenijkatsa tijnextiaj tikikneliaj toTeotsij iTlajtol?

¹⁹ Jehová kiniknelia nochi maseualmej. Ya kichijtok iTlajtol ma elto ipan miak tlajtoli pampa kineki nochi maseualmej ma kimatikaj tlen ya tlamachtia (1 Tim. 2:4). Jehová kimati nojua tlauel kuali timouikasej iuaya tlaj tijpouasej Biblia ipan totlajtol.

²⁰ Nochi moneki tijchiuasej kampeka nojua kuali timouikasej iuaya Jehová. Yeka, moneki nochipa timomachtisej Biblia ipan totlajtol, kiampa uelis tikinpaleuisej tochampoyouaj kuali ma tlaneltokakaj uan tijnextisej nelia tikikneliaj toTeotsij iTlajtol (Sal. 119:11).