JESÚS kiijtok ipan Mateo 13:24-26: “Kema toTeko [...] tlanauatis ipan ni Tlaltipaktli, elis keja imil ni tlakatl tlen niinmechiljuis. Se tlakatl kitojki trigo tlen kuali ipan imil. Pero kema kochtoya, ualajki ikualankaitaka uan kitojki seyok tlamantli xinachtli [...] uan yajki. Teipa nopa trigo tlen kuali ixuak uan temakak itlajka, uan nojkia neski para onkayaya sekinok toktsontli tlen axkuali”. Maske sekij kiijtouaj nopa amo nelia panoyaya, se keski amatlajkuiloli tlen romaeuanij katli moijkuilok kema itstoyaj nopa achtoui Cristo itokilijkauaj, kinextia kena panoyaya nopa tlamantli tlen Jesús kiijtok.

Se diccionario tlen Biblia kiijtoua ipan romaeuanij inintlanauatil kiijtouayaya se akajya kitlatsakuiltiskiaj tlaj kitokaskia amo kuali xinachtli ipan imil se akajya san pampa momakuepa. Tlaj eltoya se tlanauatili tlen kiijtouayaya nopa, uajka kiijtosneki sekij kena kichiuayayaj nopa. Alastair Kerr, katli kiixmati tlanauatili kiijtoua ipan xiuitl 533 y.u.J., nopa tlanauatijketl Justiniano kiijkuilok se amochtli tlen kiixmatij kej Digesto. Nopaya ijkuilijtoya romaeuanij inintlanauatiljuaj uan nojkia tlen kiijtojkej se keskij tlakamej katli itstoyaj ipan xiuitl 100 uan 250 kema ya ualajtoya Jesús. Ipan nopa Digesto nesi itoka Ulpiano, yaya kiijtok se akajya kitojki amo kuali xinachtli ipan seyok imil uan yeka amo tlaelki. Nojkia kiijtoua ueliskia kiiljuis nopa tlakatl katli kinenpoljuilik imil ma kitlaxtlaui.

Romaeuanij kena kichiuayayaj ni tlamantli. Ni kinextia nopa neskayotl tlen Jesús uelis kena panok.