1, 2. 1) ¿Tlake uelis tijyolmatisej kema panos ipan tonemilis se tlamantli tlen amo timoiljuijtoyaj? (Xikita nopa achtoui tlaixkopinkayotl). 2) Kej kiijtoua Salmo 131, ¿tlake uelis techpaleuis amo tlauel ma timotekipachokaj?

LLOYD UAN ALEXANDRA itstoyaj kipano 25 xiuitl ipan Betel uan kema kiniljuijkej ayokmo tlatekipanoskiaj nopaya, motekipachojkej. Lloyd kiijtok: “Tlauel nechpaktiyaya nitlatekipanos ipan Betel uan nimoiljuiyaya amo ueliskia nijchiuas seyok tlamantli. Maske nijkuamachiliyaya kenke monekiyaya ma mopatla se keski tlamantli, kema panok se keski semanas uan se keski metstli, nijmatiyaya amo aka nechnekiyaya. Nimantsi mopatlayaya tlen nijyolmatiyaya. Kemantika kuali nimomachiliyaya uan kemantika nojua tlauel nimotekipachouayaya”.

² Kema ipan tonemilis pano se tlamantli tlen amo timoiljuijtoyaj, uelis timotekipachouaj uan amo kuali tijyolmatij (Prov. 12:25). Uan uelis ouij tijmatisej tijselisej nopa seyok tekitl. ¿Tlake techpaleuis amo tlauel ma timotekipachokaj uan ma tijpiakaj tlaseuilistli? (Xijpoua Salmo 131:1; 131:2, TNM *; 131:3).  Ma tikitakaj tlake kichijkej se keskij toTeotsij itekipanojkauaj katli uejkajkia itstoyaj uan katli itstokej ipan ni tonali uan kiampa amo tlauel motekipachojkej kema mopatlak se keski tlamantli ipan ininnemilis.

3. ¿Tlake kipanok José?

³ Jacob san José tlauel kiikneliyaya. Yeka, iikniuaj tlauel kikualankaitakej uan kema kipixtoya se 17 xiuitl kinamakakej kej se tlatekipanojketl (Gén. 37:2-4, 23-28). José tlatekipanok uan tsaktoya ipan Egipto se 13 xiuitl, itstoya tlauel uejka tlen itata Jacob. ¿Tlake kipaleuik ma kipia iyolo uan amo ma moyolkoko?

4. 1) ¿Ipan tlake tlamantli moiljuiyaya José kema tsaktoya? 2) ¿Kenijkatsa Jehová kinankilik?

⁴ Kema José tlaijiyouiyaya kampa tsaktoya, uelis timotemachisej ya moiljuiyaya kenijkatsa Jehová kiteochiuayaya (Gén. 39:21; Sal. 105:17-19). Nojkia, tlen José kitemijki kema eliyaya telpokatl, kipaleuik nojua tlauel ma motemachi ipan Jehová (Gén. 37:5-11). Uan nojkia uelis timoiljuisej kenijkatsa miakpa momaijtok (Sal. 145:18). Jehová kinankilik José kema kipaleuik ma motemachi ya nochipa itstoskia iuaya maske kipanoskia tlen ueli tlamantli (Hech. 7:9, 10). *

5. ¿Kenijkatsa techpaleuia nopa tlaseuilistli tlen toTeotsij techmaka ma tijchiuakaj tlen timosentlalijtokej?

⁵ Ipan ni tonali, uelis nojkia tijpiasej tlaouijkayotl. Uan kema kiampa techpanos, nojkia uelis tijmachilisej kenijkatsa toTeotsij techmakas tlaseuilistli tlen “kiyaualtsakuas” totlalnamikilis (xijpoua Filipenses 4:6, 7). Uajka, kema tlauel timotekipachosej ma tikiljuikaj Jehová ma techpaleui. Tlaj kiampa tijchiuasej, techmakas tlaseuilistli tlen techpaleuis ma tijchiuakaj tlen timosentlalijtokej uan ma tikijiyouikaj tlen techpano. Ma tikitakaj kenijkatsa tlen kinpanok se keskij toikniuaj kinextia nopa.

6, 7. ¿Kenijkatsa techpaleuia Jehová kema tikiljuiaj ika tlake tlamantli tijnekij ma techpaleui? Xikijto se neskayotl.

⁶ Kema Ryan uan Juliette kiniljuijkej ayokmo tlatekipanoskiaj kej precursores especiales, tlauel motekipachojkej. Ryan kiijtoua nimantsi momaijtojkej. Nojkia kiijtoua: “Tijmatiyayaj ueliskia tijnextisej kenijkatsa timotemachiyayaj ipan Jehová. Miakej toikniuaj tlen itstoyaj ipan totlanechikol sanok pejtoyaj kitekipanouaj Jehová, yeka tikiljuijkej Jehová ma techpaleui kuali ma titlaneltokakaj uan kiampa inijuantij nojkia kuali tlaneltokaskiaj”.

⁷ ¿Kenijkatsa kinpaleuik Jehová? Ryan kiijtoua: “Kema tlanki timomaijtouaj, ayokmo timotekipachojkej uan kuali tijyolmatkej. Nopa tlaseuilistli tlen toTeotsij techmakak kiyaualtsajki totlalnamikilis uan toyolo. Tijkuamachilijkej Jehová nojua techkauaskia ma tijtekipanokaj tlaj kuali tikitaskiaj tlen ya kiijtoua”.

8-10. 1) ¿Kenijkatsa toTeotsij itonal techpaleuia amo tlauel ma timotekipachokaj? 2) ¿Kenijkatsa techpaleuis Jehová tlaj tijchiuasej kampeka timoiljuisej kej ya moiljuia?

⁸ ToTeotsij itonal amo san techpaleuia ma timoyolseuikaj, nojkia uelis techpaleuis ma tikilnamikikaj se keski textos tlen techpaleuis kuali ma tijtekipanojtokaj Jehová (xijpoua Juan 14:26, 27). Ma tikitakaj tlen kipanok Philip uan isiua Mary katli tlatekipanojkej nechka se 25 xiuitl ipan Betel. Ipan naui metstli mijki inana Philip uan inana Mary, uan nojkia mijki seyok iuikal Philip. Nojkia monejki  kimokuitlauisej Mary itata katli kipixtoya se kokolistli tlen itoka demencia.

⁹ Philip kiijtoua: “Maske nimoiljuiyaya kuali nikijiyouiyaya nopa kuesoli, nechpolouayaya se tlamantli. Se tonali, kema nijpouayaya se tlamachtili ipan pilamochtsi Tlen Tematiltia, nimoiljuik ipan tlen kiijtoua Colosenses 1:11. Nikitak maske kena nikijiyouiyaya, nechpolouayaya nijchiuas seyok tlamantli. Nopa versículo nechpaleuik ma nikita monekiyaya nijpias noyolo uan nipakis kema nikijiyouiskia nopa kuesoli. Uan nopa nechilnamikilik toTeotsij itonal ueliskia nechpaleuis ma niyolpaki maske nechpanoskia tlen ueli kuesoli ipan nonemilis”.

¹⁰ Philip uan Mary kichijkej kampeka moiljuisej kej Jehová moiljuia ika nopa kuesoli tlen kipixtoyaj uan Jehová kinteochijki ika miak tlamantli. Kema panotoya se keski tonali ika kistoyaj Betel, kinpantijkej maseualmej katli kinekiyayaj ma kinmachtikaj ika Biblia se keski tonali ipan se semana uan kuali tlaneltokakej. Mary moiljuia tlen panok uan kiijtoua: “Inijuantij kichijkej ma tiyolpakikaj uan kiampa Jehová kejuak techiljuik kuali tiitstoskiaj”.

11, 12. 1) ¿Tlake kichijki José pampa kinekiyaya Jehová ma kiteochiua? 2) ¿Kenijkatsa Jehová kiteochijki José?

¹¹ Kema ipan tonemilis mopatla se keski tlamantli uelis timajmauij uan amo tijmatij tlake tijchiuasej. Maske ya nopa uelis kipanok José, ya kichijki tlen kimatiyaya ueliskia kichiuas pampa kinekiyaya Jehová ma kiteochiua. Yeka, kema tsaktoya kichijki kampeka kuali kichiuas tlen kinauatiyayaj, sanse kej kichijki kema kitekipanouayaya Potifar (Gén. 39:21-23).

¹² Se tonali, kinauatijkej ma kinmokuitlauiti omej tlakamej katli achtouia kipixtoyaj miak tlanauatili kema tlatekipanouayayaj ichaj faraón. José kuali kinmokuitlauik, yeka se tonali kiiljuijkej nochi tlen kintekipachouayaya uan tlen kitemiktoyaj ipan se youali (Gén. 40:5-8). Maske José amo kimatiyaya, tlen panok kipaleuiskia ma mopatla inemilis. Uan maske nojua tsaktoya ome xiuitl, ipan nopa tonali kema kikixtijkej kimakakej tlauel miak tlanauatili; teipa tlen faraón san ya kipixki miak tlanauatili ipan Egipto (Gén. 41:1, 14-16, 39-41).

13. Maske techpanos tlen ueli tlamantli ipan tonemilis, ¿tlake moneki tijchiuasej tlaj tijnekij Jehová ma techteochiua?

¹³ Sanse kej José, uelis kemantika tijpiaj se kuesoli tlen amo tijmatij kenijkatsa tijsenkauasej o amo uelis tijsenkauasej. Uan tlaj tijpiaj toyolo uan tijchiuaj kampeka tijchiuasej tlen tiuelij, Jehová techteochiuas (Sal. 37:5). Uajka maske kemantika amo tijmatisej tlake tijchiuasej, kena onkas se tlamantli tlen uelis tijchiuasej kej kiijtok apóstol Pablo  (2 Cor. 4:8). Tikitasej nelnelia tlen Pablo kiijtok tlaj timosentlalisej titlajtolmoyauasej.

14-16. ¿Tlake kichijki tlajtolmoyajketl Felipe kema mopatlak se keski tlamantli ipan inemilis?

¹⁴ Tlen kichijki tlajtolmoyajketl Felipe techpaleuia ma timosentlalikaj titlajtolmoyauasej maske mopatla se keski tlamantli ipan tonemilis. Felipe kimakakej se yankuik tekitl ipan tlanechikoli tlen Jerusalén (Hech. 6:1-6). Teipa, kema ya kimiktijtoyaj Esteban tlauel kintlaijiyouiltijkej Cristo itokilijkauaj. * Kema Felipe kiitak miakej tlaneltokanij kistejkej tlen Jerusalén, amo san nopaya mokajki. Yajki tlajtolmoyaua Samaria, se altepetl kampa sanok pejtoyaj tlajtolmoyauaj (Mat. 10:5; Hech. 8:1, 5).

¹⁵ Felipe kikajki toTeotsij itonal ma kiuika kampa Jehová kinekiyaya. Yeka, Jehová kitekimakak ma tlajtolmoyaua kampa amo aka tlajtolmoyajtoya. Ipan nopa tonali, judíos kinkualankaitayayaj samariaeuanij. Uan Felipe amo kinchikoitak, yeka inijuantij kuali kiyolmatkej kema itstoyaj iuaya, uan kuali kitlakakilijkej (Hech. 8:6-8).

¹⁶ ToTeotsij itonal kichijki Felipe ma yaui Azoto [Asdod] uan Cesarea, ome altepetl kampa itstoyaj miakej katli amo eliyayaj judíos (Hech. 8:39, 40). Kema panotoya se 20 xiuitl ika tlajtolmoyajtoya Samaria, nesi mopatlatoya inemilis Felipe pampa nama kinpixtoya ichampoyouaj uan tlajtolmoyauayaya kampa mochantijtoya. Maske mopatlak miak tlamantli ipan inemilis, ya mosentlalik tlajtolmoyauas, yeka Jehová tlauel kiteochijki ya uan ichampoyouaj (Hech. 21:8, 9).

17, 18. ¿Kenijkatsa techpaleuia kema timosentlaliaj titlajtolmoyauasej maske mopatla se keski tlamantli ipan tonemilis?

¹⁷ Miakej Jehová itekipanojkauaj katli senkistok tlatekipanouaj kiitstokej kenijkatsa kinpaleuijtok amo tlauel ma motekipachokaj kema mosentlaliaj tlajtolmoyauasej maske mopatla se keski tlamantli ipan ininnemilis. Ma tikitakaj tlen kinpanok Osborne iuaya isiua Polite, katli itstokej Sudáfrica. Kema kiskej Betel moiljuijkej nimantsi kipantiskiaj se tekitl uan kampa itstoskiaj. Uan, ¿tlake panok? Osborne kiijtoua: “Amo nimantsi tijpantijkej tekitl kej timoiljuijtoyaj”. Uan Polite kiijtoua: “Eyi metstli amo tijpixkej tekitl uan amo tikajoktoyaj tomij. Tlauel ouij tijmatkej”.

¹⁸ ¿Tlake kinpaleuik? Osborne kiijtoua:  “Kema titlajtolmoyauayayaj ininuaya toikniuaj techpaleuik ma timosentlalikaj ipan kuali tlamantli tlen techpanoyaya. Amo san timotekipachojtoyaj, tojuantij timosentlalijkej titlajtolmoyauasej uan nopa kichijki tlauel ma tiyolpakikaj. Kampa ueli tijtemojkej tekitl uan kena tijpantijkej”.

19-21. 1) ¿Tlake techpaleuis nojua ma tijpixtokaj tlaseuilistli? 2) ¿Kenijkatsa techpaleuis tlaj timomatisej tijchiuasej se keski tlamantli tlen mopatla ipan tonemilis?

¹⁹ Tlen kinpanok toTeotsij itekipanojkauaj kinextia tlaj tijchiuaj kampeka tijchiuasej nochi tlen tiuelij uan timotemachisej ipan Jehová, tijpiasej tlaseuilistli (xijpoua Miqueas 7:7, TNM *). Uelis tikitstokej kenijkatsa tlen mopatlatok ipan tonemilis techpaleuijtok nojua kuali ma titlaneltokakaj. Ika tlen kipanok Polite kiijtoua: “Kema nijselik se yankuik tekitl nechpaleuik ma nijkuamachili tlake kiijtosneki timotemachis ipan Jehová maske tijpias miak kuesoli. Nama nelia kuali nimouampojchijtok iuaya Jehová”.

²⁰ Mary, tlen tikijtojkej ipan párrafo 8, nojua kimokuitlauijtok itata uan eli precursora. Ya kiijtoua: “Kema nimotekipachoua nijyekojtok moneki nimoiljuis, nimomaijtos uan nimoyoltlalis. Tlen nechpanotok nechpaleuijtok ma nijkaua nokuesoljuaj imako Jehová. Uan teipa nojua tlauel monekis nijnextis nimotemachia ipan Jehová”.

²¹ Lloyd uan Alexandra, katli achtoui tikijtojkej, kiijtouaj tlamantli tlen mopatlak ipan ininnemilis kichijki ma kinextikaj tlaj nelia kuali tlaneltokayayaj. Kiijtouaj: “Kema tijpiaj kuesoli kichiua ma nesi tlaj totlaneltokilis techpaleuis uan techyoltlalis kema tijpiasej tlaouijkayotl. Nama nojua kuali timonejnemiltiaj”.

22. ¿Ipan tlake tlamantli uelis timotemachisej tlaj tijchiuasej nochi tlen tiuelij?

²² Tlaj mopatla kej tiitstokej uelis pampa techmakaj se yankuik tekitl, pampa timokokouaj o pampa moneki tikinmokuitlauisej tochampoyouaj, ma timotemachikaj Jehová kitekipachoua tlen techpano uan techpaleuis kema kinamiki (Heb. 4:16; 1 Ped. 5:6, 7). Yeka, ma tijchiuakaj tlen uelis tijchiuasej. Ma tijnechkauikaj Jehová ika tlamaijtoli uan ma tijkauakaj Jehová ma techmokuitlaui. Kiampa amo tlauel timotekipachosej maske mopatlas se keski tlamantli ipan tonemilis.