1, 2. 1) ¿Tlake nechka kiijtosej tlanauatianij? 2) ¿Tlake tlajtlanili tijnankilisej?

MA TIMOILJUIKAJ tlanauatianij kiijtouaj: “Onka tlaseuilistli uan nochi itstokej kuali”. Uelis peuas kiijtosej amo kema tlauel kuali tiitstoyaj. Uan kinekisej ma timoiljuikaj nochi kuali eltok. Tlanauatianij amo tleno uelis kichiuasej ika tlen panos teipa. ¿Kenke amo? Pampa Biblia kiijtoua “ipan nopa tlalochtli kinasis se ueyi tlatsakuiltili [...] uan axaka uelis cholos” (1 Tes. 5:3).

² Yeka, kualtiaskia tijnankilisej se keski tlajtlanili: ¿Tlake panos ipan nopa “ueyi tlaijiyouilistli”? ¿Tlake kineki Jehová ma tijchiuakaj ipan nopa tonali? Uan ¿tlake uelis tijchiuasej nama uan kiampa amo titlaixpanosej ipan nopa “ueyi tlaijiyouilistli”? (Mat. 24:21).

3. Kej kiijtoua Apocalipsis 17:5, 15-18, ¿kenijkatsa toTeotsij kitsontlamiltis “nopa Ueyi Babilonia”?

³ (Xijpoua Apocalipsis 17:5, 15-18). “Nopa Ueyi Babilonia” kitsontlamiltisej. Kej tikitstokej, tlanauatianij amo tleno uelis kichiuasej kema panos ueyi tlaijiyouilistli. ¿Kenke amo? Pampa “toTeko kintlalilis ipan ininyolo” tlanauatianij tlen ya “kineki ma pano”. ¿Tlake kineki ma pano? Ma kitsontlamiltikaj nochi religiones tlen amo melauak, uan nojkia katli kiijtouaj elij Cristo itokilijkauaj. * ToTeotsij kitlalis tlen ya moiljuia  ipan iyolo nopa “matlaktli ikuakua” tlen nopa “fiero tlapiali chichiltik”. Nopa matlaktli ikuakua kinixnextia nochi tlanauatianij katli kipaleuiaj nopa “fiero tlapiali”, o nopa Naciones Unidas (Apoc. 17:3, 11-13; 18:8). Kema tlanauatianij kitsontlamiltisej religiones tlen amo melauak kinextis ya peuas nopa ueyi tlaijiyouilistli, ni tlamantli nima peuas uan elis temajmati.

4. 1) ¿Kenke uelis tlanauatianij kinteuisej religiones tlen amo melauak? 2) ¿Tlake kinekisej kichiuasej maseualmej katli itstoyaj ipan nopa religiones?

⁴ Amo tijmatij kenke tlanauatianij kitsontlamiltisej Ueyi Babilonia. Uelis kiijtosej religiones amo tlapaleuiaj ma onka tlaseuilistli uan mokalakiaj ipan política. O uelis kiijtosej religiones moaxkatijtokej miak tlamantli uan miak tomij (Apoc. 18:3, 7). Kema tlanauatianij kiteuisej religiones tlen amo melauak uelis amo kinmiktisej nochi katli itstokej nopaya, inijuantij san kitlamiltisej religión o ayokmo kikauasej ma elto yon se. Kema ayokmo onkas religiones tlen amo melauak, maseualmej katli nopaya itstoyaj kiitasej kenijkatsa katli tlayakanayayaj kintlauelkajkej uan yeka uelis ayokmo kinekisej itstosej ipan nopa religión.

5. ¿Tlake kiijtok Jehová kichiuaskia kema panos ueyi tlaijiyouilistli, uan kenke kiampa kichiuas?

⁵ Maske Biblia amo kiijtoua keski tonali uejkauas kema kitsontlamiltisej Ueyi Babilonia, kena tijmatij amo uejkauas (Apoc. 18:10, 21). Jehová kiijtok “kichiuaskia kototsi” nopa ueyi tlaijiyouilistli uan kiampa ueliskiaj momanauisej katli “kintlapejpenijtok” uan nochi katli kiueyichiuaj kej kinamiki (Mar. 13:19, 20). Uan, ¿tlake kineki Jehová ma tijchiuakaj kema peuas ueyi tlaijiyouilistli uan Armagedón?

6. ¿Tlake kineki Jehová ma tijchiuakaj?

⁶ Kej tikitakej ipan tlamachtili 40, Jehová amo kineki ma timokalakikaj yon se kentsi ipan religión tlen amo melauak. Uan nojkia moneki tijchiuasej sekinok tlamantli. Moneki timosentlalijtosej nojua tijtekipanojtosej Jehová. Ma tikitakaj ome tlamantli.

7. 1) ¿Kenijkatsa tijnextiaj senkistok tijneltokaj Jehová kema kiijtoua kenijkatsa kinamiki monejnemiltisej maseualmej? 2) Kej kiijtoua Hebreos 10:24, 25, ¿kenke tlauel moneki timosentilisej ni tonali?

 ⁷ Se, moneki senkistok tijneltokasej nochi tlen toTeotsij tlanauatia. Amo kinamiki timoiljuisej kej maseualmej yon timonejnemiltisej kej inijuantij. Ma tikitakaj se neskayotl: amo kuali tikitaj kema se akajya kichiua miak tlamantli iuaya se akajya katli amo inamik, uan nojkia kema se tlakatl mosenkaua iuaya seyok tlakatl o se siuatl ika seyok siuatl, yon sekinok tlamantli tlen kichiuaj katli mosiuanekij o motlakanekij (Mat. 19:4, 5; Rom. 1:26, 27). Ome, moneki nojua tijueyichijtosej Jehová ininuaya toikniuaj. Tlaj tekichiuanij techkauaj, tijchiuaj ipan kali kampa timosentiliaj, uan tlaj amo, tijchiuaj ni kema ichtakatsi timosentiliaj ipan ichaj se toikni. Amo kinamiki yon se tlamantli ma techtsakuili, uan maske panos miak tlamantli, moneki nojua timosentilisej uan tijueyichiuasej Jehová. Moneki tijchiuasej nama pampa monechkauijtiuala nopa tonali kema onkas ueyi tlaijiyouilistli (xijpoua Hebreos 10:24, 25).

8. ¿Tlake uelis mopatlas kema panos ueyi tlaijiyouilistli?

⁸ Uelis kema panos nopa ueyi tlaijiyouilistli, monekis tijpatlasej tlen titematiltiaj kema titlajtolmoyauaj. Nama tijmoyauaj nopa kuali tlamachtili tlen toTeotsij iTlanauatijkayo uan tikinpaleuiaj maseualmej ma elikaj Cristo itokilijkauaj. Uan ipan nopa tonali uelis xitlauak tikijtosej se keski tlamantli, Biblia kiijtoua tlen tijmoyauasej elis kejuak uejueyi tesiuitl (Apoc. 16:21). Uelis tikiniljuisej nechka tsontlamis nochi tlen Satanás kinauatia. Teipa tijmatisej tlake tlamantli tikinmatiltisej maseualmej uan kenijkatsa tijchiuasej. ¿Tijchiuasej sanse kej tijchijtokej ipan kipano cien xiuitl, o tijpatlasej kej titlajtolmoyauaj? Moneki timochiasej ma asi nopa tonali uan kiampa tijmatisej. Nochi tijpiasej se ueyi tlateochiualistli tlaj tijnextisej amo timajmauij kema tikiniljuisej maseualmej kenijkatsa toTeotsij kintlatsakuiltis (Ezeq. 2:3-5).

9. ¿Tlake kinekisej kichiuasej tekichiuanij, uan ipan tlake kinamiki timotemachisej?

⁹ Uelis tekichiuanij kinekisej techtlatsakuiltisej pampa amo kinpaktis tlen tijmoyauasej. Kej nama tijchiuaj, ipan nopa tonali nojkia monekis timotemachisej ipan Jehová kema titlajtolmoyauasej. Uelis timotemachisej Jehová techpaleuis ma tijchiuakaj tlen ya kineki (Miq. 3:8).

10. Kej kiijtoua Lucas 21:25-28, ¿tlake kinpanos maseualmej kema kiitasej nochi tlen pano ipan nopa ueyi tlaijiyouilistli?

¹⁰ (Xijpoua Lucas 21:25-28). Ipan nopa ueyi tlaijiyouilistli maseualmej momajmatisej pampa kiitasej poliui nochi tlen ipan motemachiyayaj. Tlauel “majmauisej” uan motekipachosej pampa moiljuisej mikisej kema nechka tlamis nopa ueyi tlaijiyouilistli (Sof. 1:14, 15). Ipan nopa tonali nochi tlauel ouij itstosej, uan nojkia toTeotsij itekipanojkauaj kiampa kimatisej. Uan uelis tikixnamikisej miak tlaouijkayotl pampa amo tijnekisej tijchiuasej kej maseualmej. Yeka, uelis amo tijpiasej se keski tlamantli tlen tlauel moneki.

11. 1) ¿Kenke nochi maseualmej kejuak techtlachilisej? 2) ¿Kenke amo kinamiki tijmakasisej nopa ueyi tlaijiyouilistli?

¹¹ Maseualmej katli kintsontlamiltilijkej ininreligión peuas kualanisej touaya pampa kiitasej tojuantij nojua tijpiaj toreligión. Kampa ueli kiijtojtinemisej nopa tlamantli,  kej ipan redes sociales. Nochi altepemej ika inintlanauatijka Satanás, techkualankaitasej pampa san tojuantij tijpixtosej se religión. Uan kema kiitasej amo uelkej kintsontlamiltijkej nochi religiones, nochi kejuak techtlachilisej. Uajka, altepemej elisej Gog tlen Magog. * Nochi mosansejkotilisej uan kinekisej kinmiktisej nochi Jehová itekipanojkauaj (Ezeq. 38:2, 14-16). Amo tijmatij kenijkatsa panos nochi, yeka uelis achi timotekipachouaj kema timoiljuiaj ipan nopa tonali. Maske kiampa techpano, amo kinamiki tijmakasisej nopa ueyi tlaijiyouilistli, pampa Jehová techiljuis tlake monekis tijchiuasej uan kiampa timomakixtisej (Sal. 34:19). Ipan nopa tonali ‘timoyolchikauasej uan tiajkotlachiasej ika pakilistli pampa nechkatsi’ techmakixtisej. *

12. ¿Kenijkatsa techkualchijchijtok nopa “tlalnamijkatlatekipanojketl tlen nelia temachtli”?

¹² Nopa “tlalnamijkatlatekipanojketl tlen nelia temachtli” techkualchijchijtok pampa amo kineki ma titlaixpanokaj ipan ueyi tlaijiyouilistli (Mat. 24:45). Maske kichijtok ika miak tlamantli, san ma tikitakaj se: nopa uejueyi tlanechikolistli tlen eyi tonali tlen pejki ipan 2016 uan tlanki ipan 2018. Sejse tlen nopa ueyi tlanechikolistli techpaleuik nojua ma tijnextikaj se keski kuajkuali tlamantli tlen techpaleuis nama kema monechkauijtiuala nopa tonali kema Jehová tetlatsakuiltis. Ma tikilnamikikaj se keski tlamantli.

13. ¿Kenijkatsa uelis timokualchijchiuasej uan kiampa amo tijtlauelkauasej Jehová, uan kenke moneki nama tijchiuasej?

¹³ Amo ma titetlauelkauakaj. Nopa ueyi tlanechikolistli tlen 2016 motokaxtik “Amo xijtlauelkaua Jehová”. Nopaya tijyekojkej moneki kuali timouampojchijtosej iuaya tlaj amo tijnekij tijtlauelkauasej. Nojkia tikitakej kema timomaijtouaj ika nochi toyolo uan kuali timomachtiaj Biblia timonechkauiaj iuaya. Nochi ni techpaleuis ma tikijiyouikaj maske tijpiasej uejueyi tlaouijkayotl. Kej monechkauijtias nopa tonali kema kitsontlamiltisej tlen Satanás kinauatia, tikixnamikisej miak tlamantli kampa monekis tijnextisej tlaj nelia amo tijtlauelkauasej toTeotsij uan tlaj nelia tijpaleuiaj iTlanauatijkayo. Uelis miakej tlauel techpinajtisej (2 Ped. 3:3, 4). Kiampa kichiuasej pampa kiitasej amo titlapaleuisej o amo tijchiuasej kej inijuantij. Moneki timokualchijchiuasej uan kiampa amo tijtlauelkauasej toTeotsij ipan nopa ueyi tlaijiyouilistli.

14. 1) ¿Tlake mopatlas ipan ueyi tlaijiyouilistli? 2) ¿Kenke monekis tijnextisej amo titetlauelkauaj?

¹⁴ Ipan nopa ueyi tlaijiyouilistli, toikniuaj katli nama techyakanaj ayokmo techyakanasej. Nochi katli kintlapejpenijtokej yasej iluikak pampa tlateuisej ipan Armagedón (Mat. 24:31; Apoc. 2:26, 27). Uajka, Katli kinyakanaj Jehová itlajtoltemakauaj ayokmo itstosej touaya. Maske panos nopa, toTeotsij itekipanojkauaj nojua mosentikapaleuisej. Uan techyakanasej toikniuaj katli kuali kitekipanojtokej toTeotsij. Tojuantij tijnextisej amo titetlauelkauaj tlaj tikinpaleuisej uan tijneltokasej nochi tlen techiljuisej, pampa toTeotsij kinyakanas nopa toikniuaj. Uelis  timomakixtisej tlaj tijchiuasej nochi tlen techiljuisej.

15. ¿Tlake techpaleuis ma tijnextikaj tikijiyouiaj nochi, uan kenke tlauel moneki nama tikijiyouisej nochi?

¹⁵ Ma tikijiyouikaj nochi. Ipan 2017, nopa ueyi tlanechikolistli motokaxtik “¡Xikijiyouijto nochi!”. Tlen moixtonki tlauel techpaleuik nojua ma tikijiyouijtokaj nochi maske tijpiasej tlaouijkayotl. Tijyekojkej nopa kuali tlamantli uelis tijnextisej maske amo kuali tiitstokej, uan nojua tlauel tijnextiaj kema timotemachiaj ipan Jehová (Rom. 12:12). Nochipa ma tikilnamiktokaj tlen Jesús kitenkajki: “[Katli] kiijiyouis nochi tlen panotiualas hasta itlamia tonali, nijmakixtis” (Mat. 24:13). Uajka, moneki tikijiyouisej nochi maske techpanos tlen ueli tlaouijkayotl. Tlaj ipan ni tonali tikijiyouiaj nochi, uajka kema panos nopa ueyi tlaijiyouilistli nojkia tikijiyouisej.

16. ¿Tlake techpaleuia amo ma timajmauikaj, uan tlake kinamiki tijchiuasej nama?

¹⁶ ¡Amo ximajmaui! Kiampa motokaxtik ueyi tlanechikolistli tlen xiuitl 2018. Nopaya techilnamikilijkej uelis tijnextisej amo timajmauij tlaj nelia timotemachiaj ipan Jehová, sanse kej kema tikijiyouiaj nochi, uan amo pampa tiuelij tijchiuaj miak tlamantli. ¿Tlake techpaleuis nojua tlauel ma timotemachikaj ipan Jehová? Moneki mojmostla tijpouasej Biblia uan timoyoliljuisej kenijkatsa uejkajkia kinmakixtik itekipanojkauaj (Sal. 68:20; 2 Ped. 2:9). Kema tlanauatianij techteuisej ipan ueyi tlaijiyouilistli, monekis amo timajmauisej uan tlauel timotemachisej ipan Jehová (Sal. 112:7, 8; Heb. 13:6). Tlaj nama tlauel timotemachiaj ipan ya, uajka amo timajmauisej yon se kentsi kema Gog techteuis. *

17. ¿Kenke amo timajmauisej ipan Armagedón? (Xikita tlaixkopinkayotl tlen ipantsajka).

¹⁷ Kej tikitakej ipan tlamachtili 40, maske miakej tlen tojuantij tlauel miak xiuitl tiitstokej ipan itlamia tonali, nojkia timotemachiaj timomakixtisej kema panos ueyi tlaijiyouilistli.  Uan maske ipan Armagedón kintsontlamiltisej nochi katli amo kualmej, amo kinamiki timajmauisej pampa nopa tlauilankayotl kiyakanas toTeotsij uan tojuantij amo titlateuisej (Prov. 1:33; Ezeq. 38:18-20; Zac. 14:3). Kema Jehová kiijtos, Jesucristo peuas tlateuis. Ipan nopa tonali ya moyolkuitosej nochi katli kintlapejpenijkej, yeka inijuantij uan tlauel miakej iluikaeuanij kipaleuisej. Kinteuisej Satanás, amo kuali ajakamej uan nochi maseualmej katli kipaleuiaj (Dan. 12:1; Apoc. 6:2; 17:14).

18. 1) ¿Tlake techtenkauilijtok Jehová? 2) ¿Kenijkatsa techpaleuia Apocalipsis 7:9, 13-17 amo ma timajmauikaj ika tlen panos teipa?

¹⁸ Jehová techtenkauilijtok ni: “Niyon se tepostli tlen kichijchijtokej tlakamej axuelis inmechtsontlamiltis” (Is. 54:17). “Onpano miak” toTeotsij itekipanojkauaj momakixtisej “tlen ueyi tlaijiyouilistli” uan nojua kitekipanojtosej Jehová (xijpoua Apocalipsis 7:9, 13-17). Biblia techpaleuia amo ma tijmakasikaj nochi tlen panos teipa. Tijmatij Jehová “kinmokuitlauia tlen itstokej temachmej” (Sal. 31:23). Nochi katli tikikneliaj uan tijtlepanitaj Jehová, tlauel tiyolpakisej kema kiuejkapantlalis itoka (Ezeq. 38:23).

19. ¿Tlake kuali tlamantli tijchixtokej?

¹⁹ Ma timoiljuikaj kenijkatsa kiijtoskia 2 Timoteo 3:2-5 tlen nopa maseualmej katli itstosej ipan nopa yankuik Tlaltipaktli, kema Satanás ayokmo tlanauatis (xikita nopa recuadro “ ¿Kenijkatsa monejnemiltisej maseualmej?”). Toikni George Gangas, * katli elki se tlen Katli kinyakanaj Jehová itlajtoltemakauaj, kiijtok: “¡Tlauel kuali elis kema nochi itstosej kej iknimej! Nechka asis nopa tonali kema itstosej ipan Xochimili. Uan kej Jehová, itstosej tlauel miak xiuitl. Ayokmo kema mikisej”. ¡Nelia tlauel kuali tlen tijchixtokej!