1. ¿Kenke san Jehová kinamiki ma tijueyichiuakaj?

KINAMIKI san Jehová ma tijueyichiuakaj pampa yaya techchijchijki uan techmakatok tonemilis (Apoc. 4:11). Uan maske tikikneliaj uan tijtlepanitaj Jehová, eltok miak tlamantli tlen uelis techyoltilanas o techtsakuilis ma tijueyichiuakaj Jehová kej kinamiki. Tlaj amo tijnekij kiampa ma techpano, moneki ma tijkuamachilikaj kenijkatsa ueliskia techpanos ni. Achtoui ma tikitakaj tlake kiijtosneki san Jehová tijueyichiuasej o tijtekipanosej.

2. Kej kiijtoua Éxodo 34:14, ¿tlake tijchiuasej tlaj san Jehová tijueyichiuaj?

² Biblia kiijtoua kema tlauel tikikneliaj Jehová ika nochi toyolo, tijueyichiuaj kej kinamiki. Uajka, san ya tijueyichiuaj kiijtosneki san ya tikachtouitlaliaj. Amo tijkauaj yon se tlamantli ma kitsakuili tikiknelisej ika nochi toyolo (xijpoua Éxodo 34:14).

3. ¿Kenke tijmakaj Jehová tlen kinamiki kiselis?

³ Tijmakaj tlen kinamiki kiselis pampa tikixmatij. Tikitstokej kenijkatsa kinextia kuajkuali tlamantli. Nojkia tijmatij tlake kipaktia uan tlake amo, uan yeka tijchiuaj kej ya kiijtoua. Kuali tijkuamachiliaj tlake mosentlalijtok techmakas uan tojuantij tijpaleuiaj kema tijneltokaj itlanauatiljuaj. Uan tikitaj kej se ueyi tlateochiualistli pampa techkaua ma tielikaj iuampoyouaj (Sal. 25:14). Kema kuali tikixmajtiauij, nojua tlauel timonechkauiaj iuaya (Sant. 4:8).

4. 1) ¿Tlake kitekiuia Diablo pampa amo kineki ma tijueyichiuakaj Jehová? 2) ¿Tlake tikitasej ipan ni tlamachtili?

 ⁴ Diablo kinauatia Tlaltipaktli uan kitekiuia tlen onka pampa kineki techyololinis ma tijchiuakaj tlen techyoltilana uan tlen techpaktia (Efes. 2:1-3; 1 Juan 5:19). Kineki ma tikiknelikaj sekinok tlamantli uan kiampa ayokmo tijueyichiuasej Jehová kej kinamiki. Ma tikitakaj ome tlamantli tlen Satanás kitekiuia: 1) techyololinia ma tijnekikaj titlapijpiasej uan 2) techyololinia ma timoyolpakiltikaj ika tlamantli tlen amo kuali.

5. ¿Kenke moneki timomokuitlauisej uan kiampa amo tijnekisej titlapijpiasej?

⁵ Maske nochi tijnekij tijpiasej tlen tijkuasej, tlen ika timoyoyontisej o se yejyektsi kali kampa uelis tiitstosej, moneki timomokuitlauisej uan kiampa amo tijnekisej tijpiasej miak tomij. Ipan ni tonali miakej maseualmej san kinekij “miak tomij” uan mokouisej miak tlamantli (2 Tim. 3:2). Jesús kimajtoya itokilijkauaj ueliskia tlauel kipatiitasej tomij, yeka kiniljuik: “Axaka uelis kintekipanos omej itekojuaj, pampa kikokolis se uan kiiknelis ne se. Uan ika se elis temachtli, pero ne seyok kitlauelkauas. Iuikal eli, axuelis inkitekipanosej toTeko intla inkikauiliaj ma inmechyoltilana tomij” (Mat. 6:24). Katli kiueyichiua toTeotsij uan miak tonali chikauak tekiti pampa kineki tlatominpias, kinextia kejuak kineki omej kintekipanos. Nopa maseuali ayokmo san Jehová kiachtouitlalia.

6. ¿Tlake techmachtia tlen Jesús kiniljuik toikniuaj tlen Laodicea?

⁶ Ipan itlamia achtoui siglo, Cristo itokilijkauaj katli itstoyaj Laodicea kiijtouayayaj tlauel tlatominpiayayaj, kipixtoyaj miak tlamantli uan amo tleno kinpolouayaya. Jehová uan Jesús amo kiampa kinitayayaj, inijuantij kinitayayaj itstokej teikneltikej, popoyotsitsij  uan xolomej. Jesús amo kintlalnamiktik pampa tlatominpiayayaj, kintlalnamiktik pampa san tomij kipatiitayayaj uan ayokmo kuali mouikayayaj ika Jehová (Apoc. 3:14-17). Tlaj tikitaj toyolijtik peua tijnekij titlapijpiasej, nimantsi ma tijkixtikaj nopa tlalnamikilistli (1 Tim. 6:7, 8). Tlaj amo tijchiuaj, toyolo kejuak moxelos uan Jehová ayokmo kuali kiitas nochi tlen tijchiuaj kema tijueyichiuaj, pampa ya eli “se Dios tlen tetlasomati” (Deut. 4:24). ¿Tlake ueliskia kichiuas tlauel ma tijpatiitakaj tomij?

7-9. ¿Tlake techmachtia tlen kipanok David?

⁷ Ma tikitakaj tlen kipanok David, se ueuejtlakatl katli eua ipan Estados Unidos uan katli kipaktia tlatekipanos. Ya kiijtoua kipaktia kuali kichiuas se tekitl. Kampa tekitiyaya, kimakakej seyok tekitl tlen tlauel ipati, uan ipan nopa ueyi altepetl kiitakej kej se tlen katli tlauel kuali kichiuaj ininteki. Ya kiijtoua: “Kema nechpanok nopa, nimoiljuik Jehová nelia nechteochiuayaya”. ¿Nelia tlen moiljuiyaya?

⁸ David kiitak nopa tekitl kichiuayaya ayokmo kuali ma mouika iuaya Jehová. Ya kiijtoua: “Kema niitstoya ipan tlanechikoli uan ipan tlajtolmoyaualistli, san nimoiljuijtoya ipan kuesoli tlen nijpixtoya ipan noteki. Maske kena nijtlaniyaya miak tomij, nelia tlauel nisiauiyaya uan pejki nimokualania iuaya nosiua”.

⁹ Kema kiitak tlen kipanoyaya, David moiljuik tlake nelia monekiyaya kipatiitas. Kiijtok: “Nimosentlalik nijkualtlalis nonemilis”. David moiljuik kipatlaskia tonali tlen tekitiyaya uan kiiljuik katli kitekipanouayaya tlake mosentlalijtoya kichiuas. ¿Tlake panok? Ayokmo kitekimakakej. David kiijtoua tlake kichijki: “Ualmostla nitemakak nopa amatl  kampa kiijtouayaya nitlatekipanoskia kej precursor auxiliar”. Ya uan isiua pejkej kintlachpaniaj uan kintlapajpakiliyayaj sekinok maseualmej, kiampa uelij mopanoltiaj. Teipa, David pejki tlatekipanoua kej precursor regular, uan teipa isiua nojkia kiampa tlatekipanok. Maske nopa tekitl tlen nama kipixtokej miakej amo kuali kiitaj, inijuantij amo kintekipachoua nopa tlamantli. Uan maske tlauel pilkentsi kitlanij, sejse metstli kipixtokej tlen ika mopanoltiaj. Inijuantij kinekij san Jehová kiachtouitlalisej, uan kiitstokej kenijkatsa ya kinmokuitlauia pampa kiachtouitlaliaj toTeotsij iTlanauatijkayo (Mat. 6:31-33).

10. ¿Kenijkatsa uelis tijmokuitlauisej toyolo?

¹⁰ Tlaj tijpiaj miak tlamantli o amo, nochi moneki tijmokuitlauisej toyolo. ¿Kenijkatsa uelis tijchiuasej? Amo ma tijpatiitakaj tomij yon ma tijkauakaj se tekitl ma techtsakuili senkistok tijtekipanosej Jehová. Kualtiaskia ma timotlajtlanikaj ni, kiampa tijmatisej tlaj amo tijpatiitaj tomij: “¿San nimoiljuijtok ipan noteki kema niitstok tlanechikoli o kema nitlajtolmoyaua? ¿Nimotekipachoua pampa nimoiljuia uelis teipa amo nijpias tomij? ¿Nimokualania iuaya nosiua o noueue pampa nijneki nijpias miak tomij o nijpias miak tlamantli? ¿Nijseliskia se tekitl tlen sekinok amo kinpaktia pampa nijneki nojua nijtekipanos Jehová?” (1 Tim. 6:9-12). Kema timoiljuisej ipan ni tlajtlanili, ma tikilnamikikaj Jehová techiknelia uan kintenkauilia ni tlamantli katli kitekipanouaj ika nochi ininyolo: “Axkema niinmechkajteuas, nochipa niitstos inmouaya”. Yeka, apóstol Pablo kintlajtolmakak: “Amo xikixtokakaj inkipiasej miak tomij” (Heb. 13:5, 6).

11. ¿Tlake techpanos tlaj timoyolpakiltisej ika tlen amo kuali?

¹¹ Jehová kineki ma tiitstokaj ika pakilistli, uan miak tlamantli techpaleuia ma timoyolpakiltikaj. Yeka, Biblia kiijtoua: “Axonka tleno más kuali uan ipati para se tlakatl, san ma kikuas tlen kinekis uan kiijis tlen kipaktia uan kichiuas nopa tekitl” (Ecl. 2:24). Maske tepaleuia, miak tlamantli tlen ika maseualmej moyolpakiltiaj kinyololinia ayokmo kuali ma monejnemiltikaj uan ma kichiuakaj tlen Biblia kiijtoua amo kuali.

12. Kej kiijtoua 1 Corintios 10:21, 22, ¿kenke moneki kuali tijtlapejpenisej tlen ika timoyolpakiltisej?

¹² Tijnekij san Jehová tijpatiitasej, yeka amo uelis kejuak tijkuasej “tlen eltok ipan  imesa toTeko” uan “tlen eltok ipan ininmesa ajakamej” (xijpoua 1 Corintios 10:21, 22). Kema titlakuaj iuaya se akajya tijnextiaj kuali timouampojchijtokej iuaya. Yeka, tlaj timoyolpakiltiaj kampa nesi tlasisinijkayotl, tlen kichiuaj tetlajchiuianij, kampa momekatiaj o sekinok tlamantli tlen techyoltilana, tijnextiskiaj kejuak titlakuaj ininuaya toTeotsij ikualankaitakauaj. Tlaj kiampa tijchiuaskiaj, ayokmo kuali timonejnemiltiskiaj uan ayokmo kuali timouikaskiaj iuaya Jehová.

13, 14. 1) ¿Kenke tlen ika timoyolpakiltiaj eli sanse ika tlen tijkuaj? 2) Kej kiijtoua Santiago 1:14, 15, ¿kenke moneki amo timoyoliljuisej ipan tlen amo kuali?

¹³ ¿Kenke tlen ika timoyolpakiltiaj eli kej tlakualistli? Kema titlakuaj, tojuantij tijmatij tlake tijchiuasej ika tlen tijkamatlaliaj. Uan kema tijtolouaj, ayokmo tleno uelis tijchiuasej pampa toijtiko iselti peua tekiti uan kiampa kikixtia tlen nopa tlakualistli tlamantli tlen kipaleuis totlakayo. Kema tijkuaj tlakualistli tlen tepaleuia, totlakayo kuali eltok. Uan kema tijkuaj tlen ueli tlakualistli, uajka uelis timokokosej. Kej panotia tonali, tikitaj kenijkatsa techtlanauia tlen tijkuaj pampa amo kuali tijtlapejpenijkej.

¹⁴ Nojkia kiampa pano ika tlen timoyolpakiltiaj, pampa maske tojuantij tijmatij tlake tlamantli kejuak tijkalakisej ipan totsonteko, kema kalaki, totsonteko iselti peua tekiti uan kichiua ma timoiljuikaj uan ma tijyolmatikaj se tlenijki. Kema timoyolpakiltiaj ika tlen kuali, kichiua kuali ma tijyolmatikaj, uan kema timoyolpakiltiaj ika tlen amo kuali, uajka amo techpaleuia (xijpoua Santiago 1:14, 15). Maske uelis amo nima tikitasej tlake techyololinia ma tijchiuakaj, teipa nesis kenijkatsa amo techpaleuik tlen tikitakej. Yeka, Biblia techtlajtolmaka: “Amo ximokajkayauakaj, pampa axaka ueli kikajkayauas toTeko. Tlen inkitokasej, ya nopa inkipixkasej. Intla inkichiuaj tlen axkuali pampa inkitokiliaj tlen eltok inmopani tlen kipaktia tlajtlakolchiuas, inkipantisej se nemilistli tlen fiero” (Gál. 6:7, 8). Uajka tlauel moneki timosentlalisej amo timoyolpakiltisej ika tlamantli tlen techyololinia ma tijchiuakaj tlen Jehová amo kipaktia (Sal. 97:10).

15. ¿Tlake tlamantli tlen tlauel kuali techmakatok Jehová?

¹⁵ Miakej Jehová itlajtoltemakauaj kinpaktia kiitasej JW Broadcasting^®, kampa tijpanoltiaj tlamachtili. Tosiuaikni Marilyn kiijtok: “Tlen nopaya nikita nechpaleuijtok ma niyolpaki, uan uelis nikitas tlen na nijnekis pampa nochi nechpaleuia. Kema nimokuesoua o nijyolmati noselti niitstok, nochipa nijtlachilia se tlamachtili o tlen moixtoma ijnalok, pampa nopa tlauel nechyolchikaua. Nechpaleuia nojua tlauel ma nimonechkaui ika toTeotsij uan ika itlanechikol. Tlen pano ipan JW Broadcasting kipatlatok nochi nonemilis”. ¿Nojkia tijtekiuiaj tlen Jehová techmakatok? Amo kinamiki san tikitasej tlamachtili tlen pano sejse metstli, nojkia uelis tikitasej sekinok videos tlen nopaya eltok uan tijtlakakilisej tlamachtili o uikatl tlen techyolchikauas.

16, 17. ¿Kenke kinamiki kuali tikitasej keski tonali tijtekiuiaj kema timoyolpakiltiaj, uan tlake techpaleuis amo ma tijtekiuikaj miak tonali?

¹⁶ Amo san kinamiki tikitasej ika tlake timoyolpakiltiaj, nojkia kinamiki tikitasej keski tonali tijtekiuiaj, pampa tlaj amo timomokuitlauisej, uelis miak tonali san timoyolpakiltisej uan ayokmo tlauel tijtekipanosej Jehová. Sekij tlauel ouij kimatij kichiuasej ni. Abigail, katli kipia 18 xiuitl, kiijtoua: “Kema se tonal nimotekiuia uan nisiaui, kuali nijyolmati nimoseuis uan nijtlachilis tlen nesi ipan televisión. Maske nechpaleuia, tlaj amo nimomokuitlauia,  uelis nijtlachilijtos miak horas”. Uan se telpokatl katli itoka Samuel kiijtoua: “Kemantika, nijtlachilia miak videos ipan Internet. Achtoui san setsi, uan kema nikita, ya niuejkajki eyi o naui horas”.

¹⁷ ¿Tlake techpaleuis ayokmo tlauel ma tijtekiuikaj miak tonali tlen ika timoyolpakiltiaj? Achtoui moneki tikitasej keski tijtekiuiaj. Uelis tikijkuilosej ipan se calendario keski horas tiuejkauaj sejse chikueyi tijtlachilijtokej televisión, Internet o timauiltiaj ipan toteléfono. Tlaj tikitasej tlauel miak tonali tijtekiuiaj, uajka kinamikiskia tikijkuilosej keski uelis tijtekiuisej. Achtoui ma tijchiuakaj san tlen tlauel ipati uan teipa ma tikijkuilokaj keski uelis tiuejkauasej kema timoyolpakiltisej. Teipa, ma tikiljuikaj Jehová ma techpaleui tijchiuasej kej tikijkuilojkej. Kiampa, tochikaualis uan tonali uelis tijtekiuisej kema toselti timomachtisej Biblia, kema timomachtisej ininuaya tochampoyouaj, tiasej tlanechikoli, titlajtolmoyauasej uan tikinmachtisej sekinok. Kiampa, amo timoyolkokosej kema timoyolpakiltisej, pampa tijmajtosej tijchijtokej tlen tlauel ipati.

18, 19. ¿Kenijkatsa uelis tijnextisej san Jehová tikachtouitlaliaj?

¹⁸ Apóstol Pedro kiijkuilok kitsontlamiltiskiaj nochi tlen Satanás kinauatia uan nojkia onkaskia se yankuik Tlaltipaktli, uan teipa kiijtok: “Noikniuaj tlen niinmechiknelia, pampa inmochiaj para panos ni tlamantli, xijchiuakaj kampeka para axintlajtlakolchiuasej. Xielikaj senkistok tlapajpaktikej iixtla toTeko para axaka uelis inmechteiljuis. Keja nopa toTeko inmechpantis ika tlaseuilistli ipan inmoyolo kema mokuepas” (2 Ped. 3:14). Kema tijneltokaj tlen Pedro kiijtok uan tijchiuaj kampeka kuali timonejnemiltisej uan kuali tijtekipanosej Jehová, tijnextiaj san ya tikachtouitlaliaj.

¹⁹ Satanás uan nochi katli kinnauatia nojua kinekisej techyoltilanasej uan kiampa amo tikachtouitlalisej tlen tlauel ipati (Luc. 4:13). Maske uelis tikixnamikisej miak kuesoli, amo tijkauasej se maseuali o se tlamantli ma techtsakuili tijtekipanosej Jehová ika nochi toyolo. Timosentlalijtokej tijmakasej Jehová nochi tlen kinamiki kiselis: san ya tijueyichiuasej uan tikachtouitlalisej.