1. ¿Kenke tijmatij nechka tlamis “itlamia tonali”?

TLAJ titlakatkej teipa tlen 1914, uajka nochipa tiitstokej ipan itlamia tonali (2 Tim. 3:1). Nochi tojuantij tikitstokej o tijkaktokej kenijkatsa moaxitijtok tlen Jesús kiijtok panoskia: tlauilankayotl, mayantli, kokolistli, momiakilia tlasisinijkayotl, kintlatsakuiltiaj toTeotsij itekipanojkauaj uan sekinok tlamantli (Mat. 24:3, 7-9, 12; Luc. 21:10-12). Nojkia tikitstokej kenijkatsa maseualmej monejnemiltiaj kej kiijtok apóstol Pablo (xikita nopa recuadro “ Tlen maseualmej kichiuaj”). Katli tijtekipanouaj Jehová temachtli tijmatij nechka tlamis “itlamia tonali” (Miq. 4:1).

2. ¿Tlake tlajtlanili kinamiki tijnankilisej?

² Panotok miak xiuitl kema pejki itlamia tonali ipan 1914, yeka tijmatij nechka tlamis. Pampa nechka kitsontlamiltisej nochi tlen amo kuali, kinamiki tijnankilisej ni ome tlajtlanili tlen tlauel ipati: ¿Tlake panos kema nechka tlamis “itlamia tonali”? Uan, ¿tlake kineki Jehová ma tijchiuakaj?

3. Kej kiijtoua nopa tlajtolpanextili ipan 1 Tesalonicenses 5:1-3, ¿tlake kiijtosej tekichiuanij?

³ (Xijpoua 1 Tesalonicenses 5:1-3). Ipan ni textos, kema Pablo kiijtok “nopa tonal tlen iaxka toueyiTeko”, kiijtosneki kema peuas kitsontlamiltisej “Ueyi Babilonia” o nochi religiones tlen amo melauak, uan nopa tonali tlamis ipan Armagedón  (Apoc. 16:14, 16; 17:5). Kema nechka peuas “nopa tonal”, tekichiuanij tlen nochi altepemej kiijtosej “ya onka tlaseuilistli uan ya itstokej ika kuali”. Kemantika, tlanauatianij kitekiuiaj ni tlajtoli kema kiijtouaj kisenkauasej se keski kuesoli ika sekinok altepemej. * Kej Biblia kiijtoua, tlen tekichiuanij kiijtosej amo elis sanse ika tlen nama kiijtouaj. ¿Kenke? Pampa ipan nopa tonali miakej maseualmej kineltokasej tlen kiijtosej tlanauatianij uan moiljuisej nochipa kuali itstosej. Amo nelia kiampa panos pampa peuas “ueyi tlaijiyouilistli” tlen kintsontlamiltis miakej (Mat. 24:21).

4. 1) ¿Tlake tlamantli amo tijmatij? 2) ¿Tlake kena tijmatij?

⁴ Maske kena tijmatij se keski tlamantli, amo tijmatij kenke kiijtosej “ya onka tlaseuilistli uan itstokej ika kuali” yon kenijkatsa kichiuasej. Nojkia amo tijmatij tlaj sampatsi kiijtosej o tlaj miakpa kiijtosej. Maske amo tijmatij kenijkatsa panos, kena tijmatij ni: moneki amo tijkauasej ma techkajkayauakaj yon timoiljuisej tlanauatianij kichiuasej ma onka tlaseuilistli. Kema kiijtosej nopa tlamantli, tijmatisej “nopa tonal tlen iaxka toueyiTeko” ya peuas.

5. ¿Kenijkatsa techpaleuia 1 Tesalonicenses 5:4-6 kuali ma timokualchijchijtokaj?

⁵ (Xijpoua 1 Tesalonicenses 5:4-6). Pablo techiljuia tlake moneki tijchiuasej kema asis nopa tonali tlen iaxka Jehová. Moneki kuali titlachixtosej uan amo kejuak tikochtosej kej sekinok katli “axkimatij” tlen panos. Moneki timomokuitlauisej, kiampa amo timokalakisej ipan política uan uelis tijnextisej san toTeotsij iTlanauatijkayo tijpaleuiaj. Tlaj amo timomokuitlauisej, uelis tijchiuasej tlen kichiuaj ipan “ni Tlaltipaktli” (Juan 15:19). Tijmatij san Jehová iTlanauatijkayo uelis kichiuas ma onka tlaseuilistli ipan Tlaltipaktli.

6. ¿Kenijkatsa uelis tikinpaleuisej maseualmej, uan kenke kiampa tijnekij tijchiuasej?

⁶ Nojkia moneki tikinpaleuisej sekinok kuali ma tlachixtokaj, o tikinpaleuisej ma kimatikaj tlake kiijtoua Biblia kinpanos maseualmej katli amo kualmej. Kema peuas nopa ueyi tlaijiyouilistli, maseualmej ayokmo uelis kitemosej Jehová. Yeka, nama tlauel moneki ma titlajtolmoyauakaj. *

7. ¿Tlake kineki toTeotsij ma tijchiuakaj?

⁷ Jehová kineki ma titlajtolmoyauakaj, pampa nechka asis “nopa tonal tlen iaxka”. Yeka, moneki nochipa ma tikitakaj tlaj tijchiuaj “nochi nopa tekitl tlen toueyiTeko”  techmakatok (1 Cor. 15:58). Kema Jesús kiijtok ipan itlamia tonali panoskia uejueyi tlamantli, nojkia kiijtok tlake kichiuaskiaj toTeotsij itekipanojkauaj. Ya kiijtok: “Achtoui moneki tlakamej teixtomilisej iTlajtol toTeko ipan nochi tlaltinij” (Mar. 13:4, 8, 10; Mat. 24:14). Ma tikilnamikikaj ni: kema titlajtolmoyauaj, titlapaleuiaj ma moaxiti nopa tlajtolpanextili.

8. ¿Kenijkatsa tijmatij nopa tlajtolmoyaualistli momiakilijtok?

⁸ Sejse xiuitl miakej maseualmej kitlakakiliaj nopa kuali tlamachtili tlen toTeotsij iTlanauatijkayo. Ma tikitakaj kenijkatsa ipan nochi Tlaltipaktli momiakilijtokej tlajtolmoyauanij. Ipan 1914 itstoyaj 5,155 tlajtolmoyauanij ipan 43 altepemej. Nama itstokej 8,500,000 tlajtolmoyauanij ipan 240 altepemej uan pilaltepetsitsij. Nopa tekitl ayamo tlantok. Nojua moneki titlajtolmoyauasej, kiampa maseualmej kimatisej san toTeotsij iTlanauatijkayo kisenkauas nochi kuesoli tlen tijpiaj (Sal. 145:11-13).

9. ¿Kenke moneki nojua titlajtolmoyauasej?

⁹ Ayokmo titlajtolmoyauasej kema kiampa techiljuis Jehová. ¿Keski tonali mokaua uan kiampa maseualmej uelis kiixmatisej Jehová uan Jesucristo? (Juan 17:3). Maske amo tijmatij keski tonali poliui, kena tijmatij nochi katli kipiaj kuali ininyolo nojua uelis kitlakakilisej nopa kuali tlamachtili uan itstosej nochipa, pampa ayamo asi nopa ueyi tlaijiyouilistli (Hech. 13:48). ¿Kenijkatsa uelis tikinpaleuisej maseualmej nama kema nojua onka tonali?

10. ¿Kenijkatsa Jehová techpaleuia ma tikinmachtikaj maseualmej?

¹⁰ Ika itlanechikol, Jehová techmaka miak tlapaleuili tlen ika uelis tikinmachtisej maseualmej. Ipan nopa tlanechikoli tlen tijpiaj ipan semana, technextiliaj tlake tikijtosej kema achtoui tijnojnotsasej se maseuali, kema sampa tijpaxalosej uan kenijkatsa titlamachtisej. Nojkia, Jehová itlanechikol techmakatok tlen tlauel tijtekiuiaj kema titlamachtiaj. Ni uelis techpaleuis ipan ni tlamantli:

• ma tijmatikaj kenijkatsa tikinnojnotsasej maseualmej,

• kenijkatsa tikinyoltilanasej,

• kenijkatsa tijchiuasej ma kinekikaj kimatisej sekinok tlamachtili,

•   ma tikinmachtiaj tlen melauak ika Biblia uan

• ma tikintlaneuikaj ma yakaj kampa timosentiliaj uan ma kiitakaj tlamachtili ipan Internet.

Moneki tijtekiuisej nochi tlen Jehová techmaka uan amo san tijpixtosej, kej kema tikamanaltij iuaya se maseuali. * Tlaj kuali techtlakakilik, uelis tijmakasej se pilamatsi o se pilamochtsi, kiampa uelis kipouas sekinok tlamantli uan tikamanaltisej iuaya kema sampa tijpaxalosej. Nochi kinamiki tikitasej tlaj nelia tlauel titlajtolmoyauaj sejse metstli.

11. ¿Kenke Jehová itlajtoltemakauaj kitlalijkej kampa maseualmej uelis momachtisej ipan Internet?

¹¹ Ma tikitakaj kenijkatsa Jehová nojkia kiampa kinpaleuia maseualmej ma kiixmatikaj tlen melauak. Ipan jw.org^®, maseualmej uelis momachtisej kampa kiijtoua ximomachti Biblia ipan Internet. * ¿Kenke kichijkej? Pampa sejse metstli tlauel miakej maseualmej tlen nochi altepemej kinekij momachtisej ika Biblia ipan Internet. Nopaya uelis kimatisej tlen nelnelia tlamachtia toTeotsij iTlajtol. Kema titlajtolmoyauaj, uelis se keskij maseualmej pinauaj ma tikinmachtikaj ika Biblia. Tlaj kiampa pano, ma tikinnextilikaj kampa titlamachtiaj ipan Internet o ma tikintitlanilikaj kampa uelis kalakisej ipan inintlajtol.

12. ¿Tlake uelis kiyekosej maseualmej kema momachtisej ipan Internet?

¹² Kema se akajya momachtia ipan Internet, kipantis tlamachtili tlen Biblia uan ajkia kichijki ma moijkuilo, tlen kinpanok se keskij toTeotsij itekipanojkauaj uan tlen timotemachiaj tijselisej teipa. Kema momachtijtias, nopa maseuali kiyekos ni:

• kenijkatsa techpaleuia Biblia,

• ajkia elij Jehová, Jesús uan iluikaeuanij,

• kenke toTeotsij kinchijchijki maseualmej uan

• kenke onka tlaijiyouilistli uan pano tlen amo kuali.

Nopaya nojkia moixtoma ni tlamachtili:

• tlake kichiuas Jehová uan kiampa kitlamiltis tlaijiyouilistli uan mikilistli,

• kenijkatsa kinyolkuis katli miktokej uan

• kenijkatsa toTeotsij iTlanauatijkayo kintekipatlas tlanauatianij.

13. Xikixtoma tlaj kema titlamachtiaj ipan Internet kipatla kema titlamachtiaj ipan ininchaj maseualmej.

¹³ Kema titlamachtiaj ipan Internet, amo kipatla kema titlamachtiaj ipan ininchaj maseualmej. Jesús techmakatok se yejyektsi tekitl: ma tikinpaleuikaj maseualmej ma elikaj itokilijkauaj. Tijnekij nopa maseualmej katli momachtiaj ipan Internet ma kipatiitakaj tlen kiyekouaj uan ma kinekikaj kimatisej sekinok tlamantli. Tlaj kiampa kichiuasej, uelis teipa kinekisej se akajya ma kinpaxalo ininchaj uan ma kinmachti. Kema tlami se tlamachtili ipan Internet, nochipa kiniljuia tlaj kinekij ma kinpaxalo se akajya, kiampa uelis kinpaleuisej ma kiyekokaj sekinok tlamachtili. Mojmostla ipan nochi Tlaltipaktli, se 230 maseualmej tlajtlanij ma kinmachtikaj. Tlauel kinpaleuis tlaj se akajya kinmachtis.

14. Kej Jesús tlanauatik ipan Mateo 28:19, 20, ¿tlake moneki tijchiuasej, uan kenke?

¹⁴ (Xijpoua Mateo 28:19, 20). Kema tijmachtiaj se maseuali, moneki tijchiuasej kampeka tijpaleuisej ma eli Cristo itokilijka uan ma kineltoka nochi tlen Jesús tlanauatik.  Kinamiki tijpaleuisej ma kikuamachili moneki kitekipanos Jehová uan kipaleuis iTlanauatijkayo. Yeka, moneki tijyololinisej ma kichiua ipan inemilis tlen momachtia, ma kimaktili Jehová inemilis uan ma moatsonpoliuilti. Tlaj kiampa kichiuas, momanauis kema Jehová kintlatsakuiltis maseualmej (1 Ped. 3:21).

15. ¿Kenke moneki amo timotonalpolosej, uan kenke?

¹⁵ Kej tikitstokej, toTeotsij nechka kintsontlamiltis katli amo kualmej. Yeka, amo kinamiki timotonalpolosej ika maseualmej katli amo kinekij elisej Cristo itokilijkauaj (1 Cor. 9:26). Nojua itstokej miakej maseualmej katli moneki kimatisej nopa kuali tlamachtili tlen toTeotsij iTlanauatijkayo, yeka moneki nimantsi tijchiuasej nopa tekitl.

16. Kej kiijtoua Apocalipsis 18:2, 4, 5, 8, ¿tlake moneki tijchiuasej? (Xikita nopa nota).

¹⁶ (Xijpoua Apocalipsis 18:2, 4, 5, 8). Ni versículos kinextia tlake kineki Jehová ma tijchiuakaj. Nochi moneki ma tikisakaj tlen nopa Ueyi Babilonia. Uelis se keskij katli tikinmachtiaj ika Biblia achtouia yauiyayaj ipan sekinok religiones tlen amo melauak. Uelis mosentiliyayaj, kichiuayayaj tlen ininreligión kichiua o temakayayaj tomij. Kema ueuejtlakamej kiitasej tlaj uelis tlajtolmoyauas maske ayamo moatsonpoliuiltijtok, nopa maseuali achtoui moneki kisas tlen nopa religión uan ayokmo kipias o kichiuas yon se tlamantli tlen nopa religión. Moneki kikauatij se amatlajkuiloli kampa kiijtosej ayokmo elisej tlen nopa iglesia o tlen se religión tlen amo melauak. *

17. ¿Tlake tekitl amo kinamiki kichiuasej Cristo itokilijkauaj, uan kenke?

¹⁷ Cristo itokilijkauaj moneki kiitasej tlaj kampa tekitij amo kipaleuiaj Ueyi Babilonia (2 Cor. 6:14-17). Tojuantij amo tijseliskiaj se tekitl ipan se iglesia. Uan tlaj titekitij kampa kichijchiuaj miak tlamantli, amo tijchiuasej se tlenijki tlen kitekiuisej kampa tlaueyichiuaj. Uan tlaj toaxka kampa titekitij, amo tikiniljuisej tojuantij uelis tijchiuasej se tekitl yon tijchiuasej se tekitl tlen uelis kipaleuis Ueyi Babilonia. ¿Kenke timosentlaliaj amo tijchiuasej nopa? Pampa amo tijnekij tijpaleuisej inintlajtlakoljuaj nopa religiones tlen amo melauak yon tlen kichiuaj, pampa toTeotsij kinita kejuak sokiyojkej (Is. 52:11). *

18. ¿Tlake kichijki se toikni kema kiiljuijkej ma tekiti ipan se iglesia?

 ¹⁸ Uejkajkia, se tlakatl katli kintekimakayaya sekinok, kiiljuik se toikni ueuejtlakatl katli eliyaya kuaxinketl, ma kichiua se tekitl ipan se iglesia. Maske nopa tlakatl kimatiyaya toikni kiijtojtoya amo tekitis ipan yon se iglesia, kiiljuik nelia monekiyaya se akajya nimantsi ma kichiua nopa tekitl. Toikni amo kinejki uan kitlepanitak tlen Biblia kiijtoua. Se chikueyi teipa, ipan periódico kiski se kuaxinketl kampa nesi kenijkatsa kitlalia se kuamapeli ipan se iglesia. Tlaj nopa toikni kiselijtoskia nopa tekitl, yaya kistoskia ipan nopa periódico. Ipan tlanechikoli ayokmo kuali kiitaskiaj uan tlauel kiyolkokojtoskia Jehová.

19, 20. 1) ¿Tlake tijyekojtokej ipan ni tlamachtili? 2) ¿Tlake nojua moneki tijyekosej?

¹⁹ Kej kiijtoua miak tlajtolpanextili, kema tlanauatianij kiijtosej “ya onka tlaseuilistli” uan nochi “itstokej ika kuali” elis se tlamantli tlen tlauel ipati. Jehová techmachtijtok maseualmej amo uelis kichiuasej nochipa ma onka tlaseuilistli. ¿Tlake moneki tijchiuasej nama kema ayamo asi nopa tonali? ToTeotsij kineki ma timotekiuijtokaj ipan tlajtolmoyaualistli uan ma tikinpaleuikaj maseualmej ma elikaj Cristo itokilijkauaj. Nojkia moneki timouejkatlalisej tlen religiones tlen amo melauak. Nopa kiijtosneki tikisasej tlen nopa religión kampa tiauiyayaj uan amo tijchiuasej yon se tekitl tlen kipaleuis Ueyi Babilonia.

²⁰ Nojua panos miak tlamantli kema nechka tlamis “itlamia tonali” uan Jehová nojua kinekis ma tijchiuakaj sekinok tlamantli. ¿Tlake tlamantli? Uan, ¿kenijkatsa uelis timokualchijchiuasej nama? Ni tikitasej ipan tlamachtili 41.