1. ¿Tlake nojua moneki kichiuasej katli moatsonpoliuiltijtokej?

KEMA se akajya moatsonpoliuiltia, kinextia motemachia ipan Jehová uan nojkia kineki kitekipanos ipan itlanechikol. * Maske ya timoatsonpoliuiltijtokej, moneki tijchiuasej kampeka nojua kuali titlaneltokasej uan timotemachisej Jehová kiyakana itlanechikol uan kiampa kichiua tlen mosentlalijtok.

2, 3. ¿Tlake tlamantli kinextia Jehová kema kiyakana itlanechikol?

² Ipan ni tonali, kema tikitaj kenijkatsa Jehová kiyakana itlanechikol, tikitaj kenijkatsa eli, tlake mosentlalijtok kichiuas uan itlanauatiljuaj. Ma tikitakaj eyi tlamantli tlen Jehová kinextia kema kiyakana itlanechikol.

³ Se, Jehová “axtechchikoiknelia” (Hech. 10:34). Pampa tlauel techiknelia, Jehová temaktilik iKone uan kiampa techmakixtik (Juan 3:16; 1 Tim. 2:6). Jehová kineki miakej maseualmej ma kinpaleui Cristo imikilis, yeka ika itlanechikol kimoyaua nopa kuali tlamachtili uan kiampa katli kinekisej uelis kikakisej. Ome, Jehová kineki nochi ma mochiua ika “tlaseuilistli” uan “keja kinamiki” (1 Cor. 14:33, 40). Yeka, Jehová kineki itekipanojkauaj ma kitekipanokaj ika “tlaseuilistli” uan “keja kinamiki”. Eyi, Jehová tlauel kuali tlamachtia (Is. 30:20, 21). Yeka, itlanechikol mosentlalia tlamachtis ika Biblia: ipan tlanechikoli uan ipan tlajtolmoyaualistli. ¿Kenijkatsa Jehová kinextik ni eyi tlamantli ipan achtoui siglo? ¿Kenijkatsa kinextia ipan ni tonali? ¿Uan kenijkatsa toTeotsij itonal techpaleuia katli titlatekipanouaj ipan itlanechikol?

4. Kej kiijtoua Hechos 1:8, ¿tlake kiniljuik Jesús ma kichiuakaj itokilijkauaj, uan tlake kinpaleuiskia?

⁴ Ipan achtoui siglo. Nopa tlamachtili tlen Jesús kimoyajki kinpaleuik maseualmej ma motemachikaj teipa kuali itstosej (Luc. 4:43). Uan kiniljuik itokilijkauaj nojkia ma kichiuakaj nopa tekitl tlen ya kipeualtijtoya “kampa más uejuejka pilaltepetsitsij ipan ni Tlaltipaktli” (xijpoua Hechos 1:8). Maske kiampa kiniljuik, ininselti amo ueliskiaj kichiuasej. Yeka, Jesús kiniljuik toTeotsij itonal kinpaleuiskia (Juan 14:26; Zac. 4:6).

5, 6. ¿Kenijkatsa toTeotsij itonal kinpaleuik Cristo itokilijkauaj?

⁵ Cristo itokilijkauaj kiselijkej toTeotsij itonal ipan Pentecostés, xiuitl 33. Yeka, nima pejkej tlajtolmoyauaj uan tlauel miakej maseualmej kuali kiselijkej nopa tlamachtili (Hech. 2:41; 4:4). Teipa kema pejkej kintlatsakuiltiaj, inijuantij amo majmajkej pampa kiiljuijkej toTeotsij ma kinpaleui kema kiijtojkej: “Xitechmaka fuerza tinmotlatekipanojkauaj para ma axtimajmauikaj tikamatisej motlajtol”. Kiampa toTeotsij kinpaleuik ika itonal uan nojua tlajtolmoyajkej (Hech. 4:18-20, 29, 31).

⁶ Inijuantij nojkia kiixnamijkej sekinok kuesoli. Se neskayotl, amo kipixtoyaj miak amatlajkuiloli tlen kiixtomayaya Biblia uan sekinok tlamantli tlen tijtekiuiaj kema timomachtiaj. Nojkia, monekiyaya kinnojnotsasej maseualmej katli kamanaltiyayaj sekinok tlajtoli. Maske kiixnamijkej nochi ni tlamantli, Cristo itokilijkauaj nojua tlajtolmoyajkej, uan ipan se keski xiuitl kimoyajkej nopa kuali tlamachtili “kampa ueli [...] ipan ni Tlaltipaktli” (Col. 1:6, 23).

7. ¿Kenijkatsa toikniuaj katli itstoyaj se 100 xiuitl achtouia kimatiyayaj tlen Jehová kinekiyaya ma kichiuakaj, uan tlake kichijkej?

⁷ Ipan ni tonali. Jehová nojua kinyakantok itokilijkauaj uan kinmaka chikaualistli. Yeka, kitekiuia Biblia uan kiampa kinyakana. Ipan Biblia kiijtoua kanke uan kenijkatsa tlajtolmoyajki Jesús, uan nojkia kiijtoua kiniljuik itokilijkauaj ma kichiuakaj nopa tekitl tlen kipeualtik (Mat. 28:19, 20, TNM). Ipan julio 1881, ni pilamochtsi kiijtok: “Jehová amo techtlapejpenik pampa kinekiyaya ma techuejkapantlalikaj maseualmej o pampa kinekiyaya ma titlatominpiakaj. Amo, ya techtlapejpenik pampa kinekiyaya ma tijtekiuikaj nochi tlen tijpiaj uan kiampa tijmoyauasej nopa kuali tlamachtili”. Nopa pilamochtsi To Whom the Work Is Entrusted (A quienes se les confía la obra), tlen kiski ipan 1919, kiijtok: “Maske tikitaj tlauel miak ni tekitl, tijmatij toTeotsij techpaleuis pampa eli iaxka”. Sanse kej Cristo itokilijkauaj tlen achtoui siglo, amo majmajkej tlajtolmoyauasej. Inijuantij motemachiyayaj toTeotsij itonal kinpaleuiskia ma kinkamanaljuikaj nochi maseualmej. ¡Tojuantij nojkia timotemachiaj ipan ni tlamantli!

8, 9. ¿Tlake tlamantli kitekiuijtok Jehová itlanechikol pampa kineki ma momoyaua nopa kuali tlamachtili?

⁸ Pampa Jehová kineki tlauel ma momoyaua nopa kuali tlamachtili, uejkajkia itlanechikol kitekiuik tlauel miak tlamantli uan nojua kitekiuia tlen namanok kistok. Kitekiuijtokej amatlajkuiloli, nopa “Foto-Drama de la Creación”, gramófonos, carros tlen kipixtoya altavoces, radio, uan ipan ni tonali motekiuia teléfonos, tabletas o sekinok tlamantli. Nojkia, amo aka kitlajtolkueptok tlauel miak amatlajkuiloli kej kichiua toTeotsij itlanechikol. ¿Kenke kiampa tijchiuaj? Pampa tijnekij nochi maseualmej ma kikakikaj nopa kuali tlamachtili ipan inintlajtol. Jehová amo aka kichikoita, yeka kiijtok titlajtolmoyauaskiaj “ipan nochi tlaltinij, uan ipan  nochi xinachtli tlakamej, [...] tlen kamatij nochi tlajtoli” (Apoc. 14:6, 7). Ya kineki nochi maseualmej ma kikakikaj nopa kuali tlamachtili.

⁹ ¿Kenijkatsa tikinkamanaljuisej maseualmej katli ouij tikinpantiaj, uelis pampa itstokej ipan se kali kampa tlauel kimokuitlauiaj? Pampa Jehová kineki kinpaleuis, itlanechikol kitekiuijtok se keski tlamantli tlen ika titlajtolmoyauaj kampa nemij miakej. Se neskayotl, ipan 2001 Katli kinyakanaj Jehová itlajtoltemakauaj kiijtojkej ueliskiaj tlajtolmoyauasej ipan Francia ika carritos o mesas tlen kipia amatlajkuiloli, uan teipa kiampa kichijkej ipan sekinok altepemej. ¡Tlauel kuali pampa kiampa kichijkej! Ipan 2011, toikniuaj tlen Nueva York (Estados Unidos) nojkia pejkej tlajtolmoyauaj kampa nemij miakej. Uan ipan nopa xiuitl temakakej 102,129 amochtli, 68,911 pilamochtsitsij uan 4,701 maseualmej tlajtlankej ma kinmachtikaj. Ni kinextia toTeotsij itonal kiyakana ni tekitl. Yeka, Katli kinyakanaj Jehová itlajtoltemakauaj kiijtojkej ipan nochi Tlaltipaktli ueliskia titlajtolmoyauasej ika carritos.

10. ¿Tlake uelis tijchiuasej tlaj tijnekij nojua kuali titlajtolmoyauasej?

¹⁰ Tlen tiuelij tijchiuaj. Ma tijpatiitakaj nopa tlamachtili tlen Jehová techmaka ika itlanechikol. Nochipa ma titlajtolmoyauakaj ininuaya toikniuaj. ¿Kenke? Pampa tlaj se tlamantli monekis tijpatlasej, inijuantij techpaleuisej uan techyolchikauasej ika tlen kichiuaj. Nojua ma titlajtolmoyauakaj maske tikixnamikij kuesoli. Kej tikitstokej ipan ni tlamachtili, toselti amo ueliskia tijchiuasej tlen toTeotsij kineki, yeka ya techpaleuia ika itonal (Zac. 4:6). Nochipa ma tikilnamikikaj ni tekitl eli Jehová iaxka.

11. ¿Tlake kichijkej toikniuaj tlen cuerpo gobernante pampa kinekiyayaj toikniuaj ma itstokaj ika tlaseuilistli?

¹¹ Ipan achtoui siglo. Nopa cuerpo gobernante tlen achtoui siglo, sansejko tekitiyaya pampa kinekiyayaj ma onka tlaseuilistli ipan tlanechikoli uan ma mochiua kej kinamiki tlen Jehová kinekiyaya (Hech. 2:42). Se neskayotl, nechka xiuitl 49 kema toikniuaj  pejkej motlatsintokiaj tlaj nojua kinamikiyaya kichiuasej nopa circuncisión, toTeotsij itonal kinpaleuik toikniuaj tlen cuerpo gobernante, ma kisenkauakaj nopa kuesoli. Tlaj nopa tlanechikoli moxeloskia, ayokmo tlajtolmoyauaskiaj kej ipa kichiuayayaj. Maske apóstoles uan ueuejtlakamej eliyayaj judíos, kikajkej ma kinyakana toTeotsij itonal uan iTlajtol, yeka amo kichijkej tlen inijuantij moiljuiyayaj uan tlen sekinok tlamachtiyayaj (Hech. 15:1, 2, 5-20, 28). Pampa kiampa kichijkej, Jehová kinteochijki, nojua kipixkej tlaseuilistli, amo moxelojkej uan nojua tlajtolmoyajkej (Hech. 15:30, 31; 16:4, 5).

12. ¿Kenke tikijtouaj san ipan toTeotsij itlanechikol onka tlaseuilistli uan nochi mochiua kej kinamiki?

¹² Ipan ni tonali. ToTeotsij itlanechikol kichiua kampeka ma mochiua ika “tlaseuilistli” uan “keja kinamiki” tlen Jehová kineki. Ipan 1895, ni pilamochtsi tlen kiski ika inglés, noviembre 15, kipixtoya se tlamachtili tlen motokaxtiyaya “Decentemente y con orden” uan mokixtijtoya ipan 1 Corintios 14:40. Nopaya kiijtoua: “Nopa apóstoles kiniljuijkej toikniuaj tlen achtoui siglo monekiyaya kichiuasej nochi tlamantli kej kinamiki [...]. Tlauel ipati tijneltokasej tlen techiljuiaj pampa tlen kiijkuilojkej uelis techpaleuis” (Rom. 15:4). Sanse kej kichiuayayaj toikniuaj tlen achtoui siglo, kiampa kichiua toTeotsij itlanechikol ipan ni tonali. Se neskayotl, ximoiljui tia ipan se tlanechikoli kampa moixtomas pilamochtsi Tlen Tematiltia. Kuali tijyolmatiskia nopaya tiitstos pampa tijmati kenijkatsa moixtoma uan tlake tlamachtili moitas, maske tiitstoskia ipan seyok altepetl. Kiampa uelis tijyolmatisej pampa toTeotsij itonal kichiua sansejko ma tiitstokaj (Sof. 3:9).

13. Kej kiijtoua Santiago 3:17, ¿tlake moneki timotlatsintokisej?

¹³ Tlen tiuelij tijchiuaj. Jehová kineki sansejko ma tiitstokaj uan kiampa tijpiasej tlaseuilistli (Efes. 4:1-3). Yeka ma timotlatsintokikaj: “¿Nijchiua kampeka nochi tiitstosej ika tlaseuilistli? ¿Nikinneltoka katli tlayakanaj ipan tlanechikoli? Tlaj nijpia se tekitl ipan tlanechikoli, ¿motemachiaj toikniuaj ipan na? ¿Niasi ipan nopa  hora tlen nikijtok, nikiniknelia sekinok uan nijchiua kampeka nikinpaleuis?” (xijpoua Santiago 3:17). Tlaj tikitaj nojua moneki tijpatlasej se keski tlamantli, uajka ma tikiljuikaj Jehová ma techpaleui ika itonal. Yeka, tlaj tijkauaj ma techyakana uan ma techpaleui ipan tonemilis, toikniuaj nojua tlauel techiknelisej uan techpatiitasej.

14. Kej kiijtoua Colosenses 1:9, 10, ¿kenijkatsa Jehová kinpaleuik toikniuaj tlen achtoui siglo nojua ma kiixmatikaj?

¹⁴ Ipan achtoui siglo. Jehová tlauel kipaktia kinmachtis itekipanojkauaj (Sal. 32:8). Ya kineki nochi ikoneuaj ma kiixmatikaj, ma kiikneliaj uan nochipa ma itstokaj. Uelij tijchiuaj nochi ni tlamantli pampa ya techmachtia (Juan 17:3). Ipan achtoui siglo, kitekiuik tlanechikoli uan kiampa kinmachtik itokilijkauaj (xijpoua Colosenses 1:9, 10). Uan kej Jesús kiijtok, toTeotsij itonal kinpaleuiskia (Juan 14:16). Nojkia kinpaleuik itokilijkauaj ma kikuamachilikaj toTeotsij iTlajtol uan kinpaleuik ma kiilnamikikaj tlen Jesús kiijtok uan tlen kichijki, kiampa uelkej kiijkuilouaj ipan pilamochtsi Mateo, Marcos, Lucas uan Juan. Tlen kimatiyayaj kinpaleuik Cristo itokilijkauaj kuali ma tlaneltokakaj, nojua ma kiiknelikaj Jehová, Jesús uan ininikniuaj.

15. ¿Kenijkatsa tikistok moaxitijtok tlen Jehová kiijtok ipan Isaías 2:2, 3?

¹⁵ Ipan ni tonali. Jehová kiijtok ipan itlamia tonali, tlauel miakej maseualmej kejuak tlejkoskiaj “ipan nopa tepetl tlen más uejkapa” uan kiampa kinmachtiskia ma kichiuakaj tlen ya kineki (xijpoua Isaías 2:2, 3). Ipan ni tonali moaxitia ni tlajtolpanextili. Tikitaj kenijkatsa toTeotsij itlanechikol san ya tlauel kuali tlamachtia uan amo kej sekinok religiones (Is. 25:6). Jehová kitekimakatok nopa “tlalnamijkatlatekipanojketl” ma techmaka miak tlamachtili  katli amo sanse. Se neskayotl, techmaka tlamachtili tlen mopanoltia ipan tlanechikoli, videos tlen kinpaleuia konemej, telpokamej uan katli ya uejueyij (Mat. 24:45). Yeka tijyolmatij kej Eliú, iuampo Job, katli kiijtok: “Axaka seyok tlamachtijketl tlen tlamachtia keja ya” (Job 36:22).

16. ¿Tlake techpaleuis nojua kuali ma titlaneltokakaj?

¹⁶ Tlen tiuelij tijchiuaj. ToTeotsij itonal techpaleuis ma tijchiuakaj tlen tijpouaj uan tlen timomachtiaj ipan iTlajtol. Ma tikiljuikaj Jehová kej katli kiijkuilok se salmo, kiijtok: “[Jehová] xinechnextili moojui uan nijtokilis pampa san ya nopa temachtli. Xijchiua para noyolo ma mitsueyitlepanita, uan ma kiimakasis mitsixpanos nochi noyolis” (Sal. 86:11). Yeka, ma tijpatiitakaj nochi nopa tlamachtili tlen Jehová techmaka ika Biblia uan ika itlanechikol. Maske tijpiaj miak tlamantli, amo moneki san tijtsontekontlalisej, moneki tijtlalisej ipan toyolo uan tijchiuasej tlen tijyekouaj. ToTeotsij itonal techpaleuis ma tijchiuakaj, uan ma tikinyolchikauakaj toikniuaj, pampa elij kejuak tochampoyouaj (Heb. 10:24, 25). Ma tikiljuikaj Jehová ma techpaleui titlanankilisej ika nochi toyolo ipan tlanechikoli uan kuali ma titlamachtikaj kema tipanosej tlaixpa. Tlaj kiampa tijchiuaj tijnextisej tlauel tikinikneliaj toikniuaj (Juan 21:15-17).

17. ¿Kenijkatsa uelis tijnextisej tijpaleuiaj toTeotsij itlanechikol?

¹⁷ Nechka san toTeotsij itlanechikol mokauas ipan Tlaltipaktli pampa san ya kiyakana ika itonal, yeka ma titlatekipanokaj ika pakilistli uan ma tijnextikaj titeikneliaj uan amo titechikoitaj. Nojkia, ma tijchiuakaj kampeka tiitstosej ika tlaseuilistli uan ma tijchiuakaj nochi tlamantli kej kinamiki, kiampa sansejko tiitstosej ipan tlanechikoli. Uan ma tijtlakakilikaj Jehová katli eli totlamachtijka, kema tijpatiitasej nochi nopa tlamantli tlen ika techmachtia. Kiampa kema kitsontlamiltisej tlen Satanás kinauatia, amo timajmauisej uan tiitstosej ininuaya toikniuaj katli kitekipanouaj Jehová ika nochi ininyolo.