1. ¿Tlake uelis tijtlapejpenisej tlen kichiuas tlauel ma tiyolpakikaj?

KEMANTIKA tlen tetajmej kitlapejpeniaj uelis kichiuas ma yolpakikaj ininkoneuaj o ma kipiakaj kuesoli. Maske tetajmej kitlapejpeniaj se keski tlamantli, ininkoneuaj nojkia uelis kitlapejpenisej tlen uelis kinpaleuis. Tlaj tijtlapejpenisej tijtekipanosej Jehová katli eli toTata, techpaleuis tlauel ma tiyolpakikaj (Sal. 73:28).

2. ¿Tlake kitlapejpenijkej José, María uan Jesús?

² José uan María kinekiyayaj ininkoneuaj ma kitekipanokaj Jehová, uan ika tlen kitlapejpenijkej kichiuasej kinextijkej kiachtouitlaliyayaj ipan ininnemilis (Luc. 2:40, 41, 52). Jesús nojkia kitlapejpenik se keski tlamantli tlen kipaleuiskia ma kichiua tlen Jehová kinekiyaya (Mat. 4:1-10). Pampa kiampa kichijki, elki se kuali tlakatl, amo tetlauelkajki uan amo majmajki. Nochi tetajmej tlauel yolpakiskiaj tlaj ininkoneuaj nojkia eliskiaj kej Jesús.

3. ¿Tlake tlajtlanili tijnankilisej ipan ni tlamachtili?

³ Ipan ni tlamachtili tijnankilisej ni tlajtlanili: ¿Tlake tlamantli tlen kipaleuiskia Jesús kitlapejpenik Jehová? ¿Tlake uelis kiyekosej tetajmej tlen kichijkej José uan María? Uan, ¿tlake uelis kiyekosej telpokamej tlen Jesús kitlapejpenik?

4. ¿Tlake kitlapejpenik Jehová tlen elki tlauel ipati?

⁴ Jehová kintlapejpenik tetajmej katli kuali kiiskaltiskiaj Jesús (Mat. 1:18-23; Luc. 1:26-38). Biblia kinextia ika tlen María kiijtok tlauel kiikneliyaya Jehová uan nojkia iTlajtol  (Luc. 1:46-55). Nojkia, José kinextik tlauel kiikneliyaya Jehová uan kinekiyaya kichiuas ipakilis kema kichijki tlen kiiljuik (Mat. 1:24).

5, 6. ¿Tlake tlamantli kikajki Jehová ma kiixnamiki Jesús?

⁵ Jehová amo kintlapejpenik maseualmej katli tlatominpiayayaj tlen eliskiaj Jesús itatauaj. Tlen kichijkej José uan María kema tlakatki Jesús, kinextia amo tlatominpiayayaj (Luc. 2:24). Uelis José kipixtoya ipan Nazaret se pilkaltsi kampa kuaximayaya. Nojkia uelis pampa kinpixkej se chikome ininkoneuaj, amo kipixtoyaj miak tlamantli (Mat. 13:55, 56).

⁶ Maske Jehová nochipa kimokuitlauik iKone, nojkia kikajki ma kiixnamiki se keski tlamantli tlen ouij (Mat. 2:13-15). Se neskayotl, se keskij tlen ichampoyouaj amo kineltokakej. Yeka, uelis tlauel ouij kimatki pampa achtoui amo kineltokayayaj tlaj ya eliyaya Mesías (Mar. 3:21; Juan 7:5). Uan uelis nojkia tlaijiyouik kema José mijki. Uan pampa ya eliyaya achtouiejketl, monejki tekitis uan kiampa kinpaleuiskia ichampoyouaj (Mar. 6:3). Kema panok se keski xiuitl, kuali kiyekok kenijkatsa kinpanoltis ichampoyouaj pampa tlauel tekitik. Yeka, uelis tikijtosej ya kuali kimatiyaya kenijkatsa timomachiliaj kema tlauel tisiajtokej.

7. 1) ¿Tlake moneki motlatsintokisej katli kinpiaj ininkoneuaj? 2) Kej kiijtoua Proverbios 2:1-6, ¿tlake moneki kichiuasej tetajmej?

⁷ Tlaj ta uan mosiua inkinekij inkipiasej inmokoneuaj, ximotlatsintokikaj: “¿Techtlapejpeniskia Jehová ma tikiskaltikaj se pilkonetsi pampa amo timoueyimatij uan kuali titlaneltokaj?” (Sal. 127:3, 4). Tlaj ya tikinpia mokoneuaj, uajka ximotlatsintoki: “¿Nikinmachtia ma kiitakaj moneki tekitisej?” (Ecl. 3:12, 13). “¿Nikinmokuitlauia nokoneuaj tlen Satanás kitekiuia, kej auilnemilistli uan ika tlen amo kuali?” (Prov. 22:3). Maske tijnekis tikinmokuitlauis, amo nochipa kiampa tijchiuas. ¿Tlake uelis kinpaleuis kema kiixnamikisej kuesoli? Moneki tikinmachtis ma kitemokaj tlen Biblia tlamachtia (xijpoua Proverbios 2:1-6). Se neskayotl, tlaj se tlen mochampoyouaj  kitlauelkaua toTeotsij, moneki tikiniljuis uan tikinmachtis mokoneuaj kenke tlauel ipati amo ma kitlauelkauakaj Jehová (Sal. 31:23). Uan tlaj se akajya katli tlauel tikiknelia miki, uajka xikinnextili se keski textos tlen kinpaleuis amo tlauel ma moyolkokokaj uan ma kipiakaj tlaseuilistli (2 Cor. 1:3, 4; 2 Tim. 3:16).

8. ¿Kenijkatsa José uan María kinextijkej kichiuayayaj tlen kiijtoua Deuteronomio 6:6, 7?

⁸ José uan María uelkej kipaleuiaj Jesús pampa kineltokakej tlen Jehová kiniljuijtoya ma kichiuakaj tetajmej (xijpoua Deuteronomio 6:6, 7). Inijuantij tlauel kiikneliyaya Jehová, yeka kichijkej kampeka kinpaleuisej ininkoneuaj nojkia ma kiiknelikaj.

9. ¿Tlake kuali tlamantli kitlapejpenijkej kichiuasej José uan María?

⁹ José uan María kichiuayayaj kampeka sansejko kiueyichiuasej Jehová ininuaya ininkoneuaj. Sejse semana yauiyayaj ipan sinagoga tlen eltoya ipan Nazaret, uan sejse xiuitl yauiyayaj Jerusalén pampa nopaya kichiuayayaj nopa Pascua (Luc. 2:41; 4:16). Uelis kema yauiyayaj ipan Jerusalén kiiljuiyayaj Jesús uan iikniuaj, kenijkatsa Jehová kinmakixtik israeleuanij. Nojkia uelis kema yauiyayaj, panoyayaj ipan se keskij altepemej tlen ijkuilijtok ipan Biblia. Pampa José uan María kinpixkej sekinok ininkoneuaj, nojua tlauel ouij kimatkej kinpaleuisej kuali ma tlaneltokakaj. Inijuantij nochipa kichiuayayaj kampeka kiueyichiuasej Jehová, uan nopa kinpaleuik kuali ma tlaneltokakaj.

10. ¿Kenijkatsa uelis kinpaleuis tetajmej tlen kichijkej José uan María?

¹⁰ Tlen kichijkej José uan María tlauel kinpaleuis tetajmej. ¿Kenijkatsa? Moneki kinnextilisej ininkoneuaj tlauel kiikneliaj Jehová ika tlen kiijtouaj uan ika tlen kichiuaj. Tlauel ipati tetajmej kinnextilisej ininkoneuaj ma kiiknelikaj Jehová uan ma kinnextilikaj moneki mojmostla momachtisej Biblia, momaijtosej, yasej tlanechikoli uan tlajtolmoyauasej (1 Tim. 6:6). Nojkia ma kinmakakaj ininkoneuaj tlen kinpoloua (1 Tim. 5:8). Maske kiampa  kinamiki kichiuasej, moneki kiilnamikisej ininkoneuaj uelis momakixtisej uan itstosej ipan Xochimili tlaj mouampojchiuaj iuaya Jehová, uan amo tlaj tlauel tlapijpiasej (Ezeq. 7:19; 1 Tim. 4:8). *

11. 1) ¿Kenijkatsa kinpaleuis tetajmej 1 Timoteo 6:17-19 kema kitlapejpenisej se tlamantli? 2) ¿Ipan tlake uelis mosentlalisej kichiuasej tetajmej ininuaya ininkoneuaj, uan tlake tlateochiualistli kiselisej? (Xikita nopa recuadro “ ¿Ipan tlake uelis inmosentlalisej?”).

¹¹ Tlauel tiyolpakij kema tikinitaj tetajmej kitlapejpeniaj tlen uelis kinpaleuis ininchampoyouaj nojua kuali ma tlaneltokakaj. Yeka, sansejko kiueyichiuaj Jehová kema nochipa yauij tlanechikoli, uejueyi tlanechikolistli uan kema tlajtolmoyauaj. Sekij toikniuaj ininuaya ininchampoyouaj yauij tlatekipanouaj kampa amo tlauel tlajtolmoyauaj. Nojkia se keskij yauij kipaxalouaj kali Betel o tlapaleuiaj kampa mochiua se kali kampa titlaueyichiuaj. Maske kema kiampa kichiuaj moneki tomij uan moneki kichiuasej se ueyi kampeka, Jehová tlauel kipatiita uan nochipa kinteochiua (xijpoua 1 Timoteo 6:17-19). Miakej toikniuaj katli moskaltijtokej ininuaya ichampoyouaj katli kichijtokej ni tlamantli, nojua kichiuaj tlen kiyekojkej kema eliyayaj konemej uan tlauel yolpakij ika nopa tlamantli tlen inintatauaj kinnextilijkej (Prov. 10:22). *

12. ¿Tlake monejki kichiuas Jesús kema moskaltijtiajki?

¹² Jehová nochipa kitlapejpenik tlen kipaleuiskia Jesús, uan nojkia kiampa kichijkej José uan María. Maske kiampa kichijkej, kema Jesús moskaltik monejki iselti kitlapejpenis tlen kichiuaskia (Gál. 6:5). Jehová nojkia kikajki ma kitlapejpeni tlen kichiuaskia, kej kichiua ika tojuantij. Maske Jesús ueltoskia kichiuas tlen kinekiyaya, ya kitlapejpenik kuali mouampojchiuas iuaya Jehová (Juan 8:29). Tlen Jesús kichijki uelis kinpaleuis telpokamej ipan ni tonali.

13. ¿Tlake kuali tlamantli kitlapejpenik Jesús kema eliyaya telpokatl?

¹³ Jesús nochipa kintlepanitak itatauaj. Amo kema kinijixnamijki José uan María yon amo kema moiljuik ya tlauel tlalnamiki. Biblia kiijtoua Jesús “kinneltokilijtiajki nochi tlen inijuantij kinauatiyayaj” (Luc. 2:51). Pampa Jesús eliyaya nopa achtouiejketl, monekiyaya kichiuas se keski tlamantli. Yeka, kichijki kampeka nojkia kichiuas nopa tekitl tlen  kichiuayaya José uan kiampa kinpanoltis ichampoyouaj.

14. ¿Kenijkatsa tijmatij Jesús tlauel kuali momachtiyaya?

¹⁴ José uan María uelis kiiljuijkej Jesús kenijkatsa Jehová kichijki ma tlakati ipan Tlaltipaktli uan tlen kiijtojkej iluikaeuanij tlen kichiuaskia (Luc. 2:8-19, 25-38). Maske kimatiyaya nochi ni tlamantli ya nojkia iselti momachtik. ¿Kenijkatsa tijmatij kuali momachtiyaya? Pampa kema nojua eliyaya piltelpokatsi, katli tlamachtiyayaj ipan Jerusalén “kisentlachiliyayaj ika itlalnamikilis uan ika itlajtol pampa nelia kuali kinnankiliyaya” (Luc. 2:46, 47). Maske san kipixtoya 12 xiuitl, Jesús kuali kimatiyaya Jehová eli iTata (Luc. 2:42, 43, 49).

15. ¿Kenijkatsa kinextik Jesús mosentlalijtoya kichiuas tlen iTata kinekiyaya?

¹⁵ Kema Jesús kikuamachilik tlake tlamantli kinekiyaya Jehová ma kichiua, ya kiselik nopa tekitl (Juan 6:38). Maske kimatiyaya miakej maseualmej tlauel kikualankaitaskiaj uan kiixnamikiskia se keski tlamantli, ya nochipa kichijki tlen Jehová kinekiyaya. Yeka, kema moatsonpoliuiltik ipan xiuitl 29, mosentlalik kichiuas iTata ipakilis (Heb. 10:5-7). Uan nojkia kiampa kinextik kema kikuapilojtoyaj ipan nopa kuauitl (Juan 19:30).

16. ¿Tlake uelis kiyekosej konemej tlen Jesús?

¹⁶ Xikintlepanita motatauaj. Sanse kej José uan María, motatauaj nojkia tlajtlakolejkej. Jehová kinkajtok motatauaj ma mitsmokuitlauikaj, ma mitsmachtikaj uan ma mitsyakanakaj. Yeka, tlaj tijneki tiyolpakis uan kuali tiitstos, moneki tikintlakakilis kema mitstlajtolmakaj uan tikintlepanitas (Efes. 6:1-4).

17. Kej kiijtoua Josué 24:15, ¿tlake tlamantli moneki ininselti kitlapejpenisej telpokamej?

¹⁷ Xijtlapejpeni ajkeya tijtekipanos. Moneki moselti timomachtis kenijkatsa eli Jehová, tlake ipakilis uan kenijkatsa uelis tijneltokas (Rom. 12:2). Tlaj kiampa tijchiuas, uajka moselti uelis tijtlapejpenis se tlamantli tlen tlauel ipati: tijtekipanos Jehová (xijpoua Josué 24:15; Ecl. 12:1). Tlaj nochipa tijpouas Biblia uan timomachtis sekinok tlamachtili, uajka nojua tlauel tikiknelis uan tijneltokas Jehová.

18. ¿Tlake seyok tlamantli moneki kitlapejpenisej telpokamej, uan kenijkatsa kinpaleuis?

 ¹⁸ Ximosentlali tijchiuas Jehová ipakilis. Katli Satanás kinnauatia kiijtouaj tlaj ta tlauel kuali tijchiua se keski tlamantli, xijtekiui uan kiampa tiyolpakis. Maske kiampa kiijtouaj, nopa maseualmej katli mosentlaliaj san tlapijpiasej “kipantijtokej miak tlakuajkualojkayotl” (1 Tim. 6:9, 10). Uan tlaj timosentlalis tijtlakakilis Jehová uan tijchiuas ipakilis “tijnextis titlalnamiki ika tlen tijchiuas” uan tlauel tiyolpakis (Jos. 1:8).

19. ¿Tlake moneki kiilnamikisej tetajmej?

¹⁹ Tetajmej, xijchiuakaj se ueyi kampeka inkinpaleuisej inmokoneuaj ma kitekipanokaj Jehová. Tlaj inmotemachiaj ipan ya, inmechpaleuis kuali xijtlapejpenikaj se keski tlamantli (Prov. 3:5, 6). Xikilnamikikaj tlen nelia kinpaleuis eli tlen inkichiuaj uan amo tlen inkiijtouaj. Yeka, xijtlapejpenikaj tlen kinpaleuis nojua kuali ma tlaneltokakaj.

20. ¿Tlake tlateochiualistli kiselisej telpokamej tlaj kitlapejpenisej kitekipanosej Jehová?

²⁰ Telpokamej, maske inmotatauaj inmechpaleuiaj inkitlapejpenisej se keski tlamantli, san inmojuantij uelis inkitlapejpenisej tlaj inkinekij inkiyolpakiltisej toTeotsij. Yeka, xijchiuakaj kej Jesús uan ximosentlalikaj inkitekipanosej Jehová. Tlaj kiampa inkichiuasej tlauel kuali initstosej, inyolpakisej uan inmotekiuijtosej ipan toTeotsij itlanechikol (1 Tim. 4:16). Uan ipan xochimili nelnelia tlauel inyolpakisej.