Tlaj kinekiyayaj kimoyauasej nopa kuali tlamachtili, monekiyaya amo majmauisej. Amo san kimoyauaskiaj “nopa kuali tlamachtili”, nojkia nopa “tonali kema toTeotsij momakuepas” uan kintsontlamiltis ikualankaitakauaj.

Toikni John Hoskin, katli itstoya Canadá, amo majmajki tlajtolmoyauas maske amo kinkauayayaj ma tlaueyichiuakaj. Ipan xiuitl 1921, monojnotski iuaya se tlakatl katli eliyaya metodista, uan kiiljuik: “Amo kinamiki timokualankanojnotsasej kema tijpouaj Biblia. Maske amo tijkuamachiliaj sanse tlamantli, uelis timonauatijteuasej ika tlaseuilistli uan nojua kuali timouikasej”. Maske kiampa kiiljuik, toikni Hoskin kiijtoua: “Kema panotoya san se keski minutos, nopa tlakatl chikauak kaltsajki uan nimoiljuik nopa teskatl tlapaniskia noixteno”.

Nopa tlakatl chikauak kiiljuik: “Xia xikinkamanaljuiti katli amo tlaneltokaj ipan Jesús”. Toikni Hoskin moijiyouik uan san moiljuik: “¡Nimoiljuiyaya ya nopa nijchiua!”.

Nopa tlakatl nojua kualantoya kema tlamachtiyaya ipan iglesia. Toikni kiijtok: “Kiniljuik maseualmej amo ma nechtlakakilikaj. Nojkia, kiijtok niasitoya ipan nopa altepetl pampa nijnekiyaya nikinkajkayauas uan yeka monekiyaya ma nechtoponikaj”. Maske kiampa kiijtok, toikni amo majmajki uan nojua tlajtolmoyajki. Nojkia kiijtok: “Tlauel nechpaktik nitlajtolmoyauas kajkalpa. Se keskij maseualmej nechiljuiyayaj: ‘Tijmatij titlamachtia tlen toTeotsij’. Uan kiijtojkej tlaj nechpolouayaya se tlenijki, inijuantij nechmakaskiaj”.

Estudiantes de la Biblia kinejkej kinpaleuisej maseualmej nojua ma kikuamachilikaj Biblia, yeka ipan pilamochtsi tlen nama tikixmatij kej ¡Xitlachixtokaj!, kipixtoya tlajtlanili uan nopaya monankiliyaya. Nopa tlamachtili “Juvenile Bible Study” (Estudio bíblico para los jóvenes) kipixtoya tlajtlanili tlen tetajmej ueliskiaj kinchiuilisej ininkoneuaj. Tetajmej monekiyaya “kintlatsintokisej ininkoneuaj uan kiitasej kenijkatsa kinankilia Biblia”. Se keski tlajtlanili amo ouij eliyaya, kej “¿Keski amochtli kipia Biblia?”. Uan sekij eliyaya kej ni: “¿Kenijkatsa moneki kiitasej Cristo itokilijkauaj kema kintlatsakuiltisej?”, nopa kinpaleuiyaya telpokamej amo ma majmauikaj tlajtolmoyauasej.

 Nopa tlamachtili “Advanced Studies in the Divine Plan of the Ages” (Estudios avanzados sobre el Plan Divino de las Edades) kinpaleuik Estudiantes de la Biblia katli kuali tlaneltokayayaj ma moyoliljuikaj ipan nopa tlajtlanili tlen kinankiliyaya nopa achtoui amochtli Estudios de las Escrituras. Maske tlauel miakej kinpaleuik nopa ome tlamachtili, ipan pilamochtsi The Golden Age, diciembre 21, 1921, kiijtok ayokmo kisaskia. ¿Kenke kiampa kiijtojkej?

Toikniuaj katli kiyakanayayaj tlajtolmoyaualistli kiitakej Estudiantes de la Biblia monekiyaya kiyekosej tlen Biblia tlamachtia kej kinamiki. Yeka, ipan noviembre 1921 kiski nopa amochtli The Harp of God (ipan 1925 kiski ika español uan kitokaxtijkej El Arpa de Dios). Maseualmej katli kiseliyayaj ni amochtli, kinamatlaliyayaj uan kiampa ininselti momachtiyayaj ika nopa amochtli The Harp Bible Study Course. Kema kiampa kichiuayayaj kinpaleuiyaya ma kikuamachilikaj “tlake kineki toTeotsij ma kichiuakaj uan kiampa kipiaskiaj nemilistli tlen axkema tlamis”. ¿Kenijkatsa kichiuayayaj?

Kema se akajya kiseliyaya nopa amochtli, nojkia kimakayayaj se pilamatsi kampa kiijtouayaya kanke kipouaskia. Kema panoyaya se semana, kiseliyaya seyok pilamatsi kampa kipixtoya se keski tlajtlanili tlen nopa tlamachtili tlen kipojtoya, uan nojkia kiiljuiyaya tlake tlamachtili monekiyaya kipouas ipan nopa seyok semana.

Se katli momachtiyaya kititlaniliyayaj se eyi metstli nopa pilamatsi ipan correo. Ni pilamatsitsij kititlaniyayaj toikniuaj katli ya uejueyij o katli amo ueliyayaj kisaj ininchaj. Se neskayotl, tosiuaikni Anna Gardner, katli itstoya Millvale (Pensilvania, Estados Unidos), kiijtok: “Nosiuaikni Thayle, katli amo ueliyaya nejnemi, tlauel kipaleuik nojua tlajtolmoyauas ika nopa amochtli El Arpa de Dios pampa sejse semanas kititlaniyaya nopa pilamatsitsij tlen kipixtoya tlajtlanili”. Kema katli kimachtiyayaj tlamiyaya momachtia, toikniuaj kipaxalouayayaj uan kipaleuiyayaj nojua ma kiyeko sekinok tlamantli tlen Biblia tlamachtia.

Itlamia xiuitl 1921, toikni Joseph Rutherford kititlanki se amatlajkuiloli ipan nochi tlanechikoli. Nopaya kiijtouayaya: “Ipan ni xiuitl tlauel momiakilik tlajtolmoyaualistli uan miakej inkinmachtijkej. Amo kema kiampa tikitstoyaj”. Nojkia kiijtok: “Nojua moneki tijchiuasej kampeka titlajtolmoyauasej. Xikinpaleuikaj sekinok nojkia ma kichiuakaj ni yejyektsi tekitl”. ¡Uan kiampa kichijkej toikniuaj! Ipan 1922 amo majmajkej kimoyauasej nopa kuali tlamachtili tlen toTeotsij iTlanauatijkayo.