TLAMACHTILI 42
¡Ximotemachi tijneltoka tlen melauak!
“Xijyejyekokaj nochi tlen kiijtouaj. Xijtokilikaj tlen kuali” (1 TES. 5:21).
UIKATL 142 Ma timotemachikaj ipan Jehová
TLEN MOIXTOMAS *
1. ¿Kenke miakej maseualmej amo kimatij ipan tlake religión itstosej?
IPAN ni tonali onka tlauel miakej religiones katli kiijtouaj kitokiliaj Jesús uan kiueyichiuaj toTeotsij kej kinamiki. Yeka, miakej maseualmej ayokmo kimatij tlake religión nelnelia melauak, yeka sekij motlatsintokiaj: “¿Onka se religión katli melauak o kuali kinita toTeotsij nochi religiones?”. ¿Tojuantij tlake timoiljuiaj? ¿Timotemachiaj Jehová itlajtoltemakauaj nelnelia tlamachtiaj tlen melauak uan toTeotsij kuali kiita kej tijueyichiuaj? ¿Kenijkatsa tijmatij melauak tlen tijchiuaj? Ma tikitakaj se keski tlamantli tlen kiampa kinextia.
2. Kej kiijtoua 1 Tesalonicenses 1:5, ¿kenke Pablo motemachiyaya tlen kineltokayaya eliyaya melauak?
2 Apóstol Pablo motemachiyaya tlen kineltokayaya eliyaya nelnelia melauak (xijpoua 1 Tesalonicenses 1:5). Ya amo motemachiyaya san pampa kuali kiyolmatiyaya. Motemachiyaya pampa kuali momachtiyaya toTeotsij iTlajtol. Yeka, kiijtok: “ToTeko temakak nochi nopa tlatsejtseloltik Tlajkuiloli” (2 Tim. 3:16). Uan, ¿kenijkatsa kipaleuik tlen momachtik? Pablo kikuamachilik Jesús eliyaya nopa Mesías. Maske ya kiampa kichijki, katli tlayakanayayaj ipan religiones amo kiampa kikuamachilijkej. Inijuantij san kiijtouayayaj kiueyichiuayayaj toTeotsij pampa ika tlen kichiuayayaj kinextiyaya amo nelia tlen kiijtouayayaj (Tito 1:16). Pablo amo kiampa kichijki, ya amo kineltokak Biblia san kampa ya kipaktik. Mosentlalijtoya tlamachtis uan kichiuas “senkistok nochi tlen toTeko kineki” (Hech. 20:27).
3. ¿Moneki tijmatisej nochi tlen timotlatsintokiaj uan kiampa timotemachisej tijneltokaj tlen melauak? (Xikita recuadro “ Amo nochi ueli tijkuamachiliaj Jehová itlalnamikilis uan tlen kichijchijtok”).
3 Sekij kiijtouaj nopa religión katli melauak moneki kinankilis nochi tlajtlanili, maske tlaj ipan Biblia amo nesi kanke kinankilia. ¿Nelia tlen kiijtouaj maseualmej? Ma tikitakaj tlen Pablo kichijki. Maske kiniljuik Cristo itokilijkauaj: “Xikitakaj tlaj melauak nochi tlamantli”, nojkia kiijtok ya amo kikuamachiliyaya se keski tlamachtili (1 Tes. 5:21). Ya kiijtok “san se kentsi tijmatij” uan “keja tijtlachiliaj toTeko ipan se teskatl kampa tsintlayoua uan axueli tikitaj kuali” (1 Cor. 13:9, 12). Sanse kej tojuantij, Pablo amo nochi kimatiyaya. Ya san kikuamachiliyaya tlamachtili tlen nochi tijkuamachiliaj tlen toTeotsij, uan nopa kipaleuiyaya ma motemachi nelia melauak tlen kineltokayaya.
4. ¿Tlake techpaleuis timotemachisej nelia tijneltokaj tlen melauak, uan tlake tikitasej ipan ni tlamachtili?
4 Tlaj tikitaj kenijkatsa Jesús tlamachtik ma kiueyichiuakaj Jehová uan kej nama tijueyichiuaj, techpaleuis timotemachisej nelia tijneltokaj tlen melauak. Ipan ni tlamachtili tikitasej Cristo itokilijkauaj: 1) amo kinueyichiuaj teteyomej, 2) kitlepanitaj Jehová itoka, 3) kipatiitaj tlen melauak uan 4) nelnelia moikneliaj.
AMO TIKINUEYICHIUAJ TETEYOMEJ
5. ¿Kenijkatsa Jesús kiueyichijki iTata, uan kenijkatsa uelis tijchiuasej kej ya?
5 Jesús tlauel kiiknelik Jehová, yeka san ya kiueyichijki, uan kiampa kichijki kema itstoya iluikak uan kema ualajki ipan Tlaltipaktli (Luc. 4:8). Uan itokilijkauaj nojkia kiniljuik kiampa ma kichiuakaj. Jesús uan itokilijkauaj amo kema kintekiuijkej tlaixkopinkayomej kema tlaueyichiuayayaj. Ma tikilnamikikaj, yon se maseuali amo kema kiitstok toTeotsij, yeka amo kema uelis kiixnextisej iueyitilis ipan se tlamantli tlen san kimachijchijtokej (Is. 46:5). ¿Kenijkatsa toTeotsij kinita tlaixkopinkayomej uan kema kinnojnotsaj? Ipan nopa ompa Tlanauatili tlen Moisés kimakakej, kiijtoua: “Amo xijchiuakaj itlachialis niyon se tlamantli para inkitlepanitasej. Amo xikixkopinakaj tlen eltok ipan iluikak, niyon tlen eltok ipan ni Tlaltipaktli, niyon tlen onka ipan atemitl para inkiueyichiuasej. Amo ximotlankuaketsakaj ininixpa tlaixkopinkayomej tlen tlamachijchiuali” (Éx. 20:4, 5). Katli nelnelia kiueyichiuaj toTeotsij, kuali kikuamachiliaj ni Tlanauatili uan kineltokaj.
6. ¿Kej ajkia inijuantij tlaueyichiuaj Cristo itokilijkauaj ipan ni tonali?
6 Ixtlamatinij kiitstokej Cristo itokilijkauaj tlen achtoui siglo, san toTeotsij kiueyichiuayayaj. Se neskayotl, se amochtli kampa kamanalti tlen kichiuayayaj achtoui Cristo itokilijkauaj kiijtoua “tlauel amo kuali kiitaskiaj” tlaj kitlaliskiaj tlaixkopinkayomej kampa tlaueyichiuayayaj (History of the Christian Church). Ipan ni tonali tojuantij nojkia tijchiuaj kej kichiuayayaj toikniuaj tlen achtoui siglo. Amo timomaijtouaj ininixpa tlaixkopinkayomej, iluikaeuanij yon Jesús. Nojkia, amo tijchiuaj tlen kinextiskia tijueyichiuaj tlen kitekiuiaj ipan se altepetl, kej tijtlajpalosej bandera o seyok tlamantli. Nochi tojuantij timosentlalijtokej tijchiuasej tlen Jesús kiijtok: “San [Jehová] xijueyichiua” (Mat. 4:10).
7. ¿Tlake amo sanse kichiuaj toTeotsij itekipanojkauaj ika sekinok religiones?
7 Ipan ni tonali, miakej maseualmej kintokiliaj katli tlayakanaj ipan religiones pampa tlauel kinixmatij, uan kemantika kinekij kinueyichiuasej. Tlauel miakej mosentiliaj kampa tlamachtiaj, kikouaj amochtli tlen nopaya kinamakaj uan temakaj tlauel miak tomij. Sekij kineltokaj nochi tlen kiniljuiaj. ¡Uelis tlaj kiitaskiaj Jesús amo kiampa kichiuaskiaj! Tojuantij amo tijtokiliaj yon se maseuali. Maske tikintlepanitaj katli techyakanaj, tijchiuaj tlen Jesús kiijtok: “Nochi inmojuantij sansejko initstokej keja iniknimej” (Mat. 23:8-10). Amo tikinuejkapantlaliaj maseualmej maske tlayakanaj ipan se religión o ipan política. Nojkia, amo tikinpaleuiaj ika tlen kichiuaj, amo timokalakiaj ipan política yon tiauij ipan tlauilankayotl. Yeka, amo tielij sanse kej sekinok religiones katli kiijtouaj nojkia elij Cristo itokilijkauaj (Juan 18:36).
TIJTLEPANITAJ JEHOVÁ ITOKA
Cristo itokilijkauaj tlauel kipatiitaj kinmachtisej sekinok tlen Jehová. (Xikita párrafos 8-10). *
8. ¿Kenijkatsa tijmatij Jehová kineki ma tijueyichiuakaj itoka uan ma tikiniljuikaj sekinok?
8 Se tonali, Jesús kiiljuik iTata: “Papá, xijchiua para nochi tlakamej ma mitsueyitlalikaj”. Uan Jehová kinankilik Jesús kema ipan iluikak chikauak kakistik itoskak kampa kiiljuik kiueyichiuaskia itoka (Juan 12:28). Yeka, kema Jesús tlajtolmoyajki kiueyichijki toTeotsij itoka (Juan 17:26). Uan ipan ni tonali, katli nelnelia elij Cristo itokilijkauaj nojkia tlauel kipatiitaj kitekiuisej toTeotsij itoka uan kiniljuisej sekinok.
9. ¿Kenijkatsa kinextijkej Cristo itokilijkauaj tlen achtoui siglo kitlepanitayayaj toTeotsij itoka?
9 Ipan achtoui siglo kema pejki tlanechikoli, Jehová “pejki kinnotsa tlakamej tlen axisraelitajmej [...] para kiueyichiuasej [itoka]” (Hech. 15:14). Inijuantij nelnelia tlauel kipatiitayayaj kitekiuisej toTeotsij itoka uan kiniljuisej sekinok. Yeka, kema tlajtolmoyauayayaj kitekiuiyayaj toTeotsij itoka uan nojkia kema kiijkuilojkej Biblia. * Kiampa kinextijkej eliyayaj iaxkauaj toTeotsij katli kiueyichiuayayaj itoka (Hech. 2:14, 21).
10. ¿Tlake kinextia san Jehová itekipanojkauaj tlamachtiaj toTeotsij itoka?
10 ¿Kenke uelis tikijtosej Jehová itlajtoltemakauaj kiueyichiuaj toTeotsij itoka? Ma tikitakaj se keski tlamantli tlen kiampa kinextia. Ipan ni tonali, miakej katli tlayakanaj ipan religiones kichijtokej miak tlamantli uan kiampa amo kinnextiliaj sekinok toTeotsij itoka. Yeka, kiixpolojtokej ipan Biblia itoka toTeotsij uan kemantika kiniljuijtokej maseualmej amo ma kitekiuikaj. * San Jehová itlajtoltemakauaj kitekiuiaj kej kinamiki uan tlauel kitlepanitaj. Yon se religión kinmachtia sekinok maseualmej toTeotsij itoka pampa nopa san tojuantij tijchiuaj. Tijchiuaj kampeka timonejnemiltisej kej techixmatij maseualmej, kej Jehová itlajtoltemakauaj (Is. 43:10-12). Tijmoyajtokej biblias Traducción del Nuevo Mundo kipano 240 millones kampa nesi toTeotsij itoka uan kampa sekinok biblias kiixpolojtokej. Uan tijtlajtolkueptokej amatlajkuiloli ipan kipano 1,000 tlajtoli kampa nojkia nesi itoka.
TIJPATIITAJ TLEN MELAUAK
11. ¿Kenijkatsa kinextijkej Cristo itokilijkauaj tlen achtoui siglo kipatiitayayaj tlen melauak?
11 Jesús tlauel kipatiitayaya tlen melauak tlen toTeotsij uan tlen mosentlalijtok kichiuas. Yeka, kinextiyaya ipan inemilis uan nojkia kinmachtik sekinok (Juan 18:37). Cristo itokilijkauaj nojkia tlauel kipatiitaj tlen melauak (Juan 4:23, 24). Yeka, apóstol Pedro kiijtok katli tijtokiliaj Cristo tielij kej “nopa ojtli tlen melauak” (2 Ped. 2:2). Uan Cristo itokilijkauaj tlen achtoui siglo tlauel kipatiitayayaj, yeka amo kineltokakej tlen sekinok religiones tlamachtiyayaj, tlen momajtoyaj kichiuaj yon kineltokakej tlen maseualmej moiljuiyayaj (Col. 2:8). Ipan ni tonali nojkia tijchiuaj kampeka tinemisej ipan nopa “ojtli tlen xitlauak [o melauak]” (3 Juan 3, 4). ¿Kenijkatsa tijchiuaj? Kema tikitaj tlen tijneltokaj uan kej timonejnemiltiaj motlatskilia ipan Biblia.
12. ¿Tlake kichiuaj toikniuaj katli techyakanaj kema kiitaj moneki mopatlas se tlamachtili, uan kenke kiampa kichiuaj?
12 Jehová itlajtoltemakauaj amo kiijtouaj nochi kikuamachiliaj tlen Biblia tlamachtia. Kemantika kiitstokej amo kuali kikuamachilijtoyaj se tlamachtili o kej kiyakanasej tlanechikoli. Tojuantij amo timosentlachiliaj kema mopatla se keski tlamantli pampa Biblia kiijtoua ipan toTeotsij itlanechikol yolik kikuamachilijtiaskia se keski tlamachtili (Col. 1:9, 10). Jehová yolik kipankixtijtia tlamachtili tlen eltok ipan Biblia, yeka ma tijnextikaj nelnelia tijpiaj toyolo tijchiasej nopa tonali kema tijmatisej sekinok tlamachtili (Prov. 4:18). Kema toikniuaj katli techyakanaj kiitaj moneki mopatlas kej tijkuamachilijtoyaj se tlamachtili, inijuantij nima kichiuaj. Ipan miak religiones katli tlayakanaj kipatlaj se keski tlamantli san pampa kinekij kuali ma kinitakaj uan nojua ma kinuejkapantlalikaj. ToTeotsij itekipanojkauaj amo kema kiampa kichiuaj. Inijuantij kipatlaj se keski tlamantli pampa kinekij nojua mouampojchijtosej iuaya toTeotsij uan kiueyichiuasej kej Jesús tlamachtik (Sant. 4:4). Kema tijpatlaj se tlamantli amo tijchiuaj pampa tijnekij tijchiuasej kej sekinok religiones o pampa tikitaj nochi kiampa kichiuaj. Tojuantij tijchiuaj pampa tijkuamachiliaj Biblia uan pampa tijpatiitaj tlen melauak (1 Tes. 2:3, 4).
NELNELIA NOCHI TIMOIKNELIAJ
13. 1) ¿Tlake kuali tlamantli kinextijtokej Cristo itokilijkauaj? 2) ¿Kenijkatsa kinextiaj Jehová itlajtoltemakauaj ipan ni tonali?
13 Cristo itokilijkauaj tlen achtoui siglo kinixmatiyayaj pampa kinextiyayaj kuajkuali tlamantli, uan se tlen nochi kiitayayaj eliyaya nopa tlaiknelili. Jesús kiijtok: “Nochi tlakamej kimachilisej para nelia innomomachtijkauaj intla nelia inmoiknelisej” (Juan 13:34, 35). Ipan ni tonali, ipan nochi Tlaltipaktli Jehová itlajtoltemakauaj tlauel moikneliaj uan kuali mouikaj. Moitaj kej nelnelia iknimej, yeka tlauel moikneliaj maske sekij chipaktikej o euaj ipan seyok altepetl. Kiampa tikitstokej ipan tlanechikoli uan ipan uejueyi tlanechikolistli. Ni tlamantli kichiua ma timotemachikaj san tojuantij tijueyichiuaj Jehová kej ya kipaktia. Yon se religión amo kiampa kichiua.
14. Kej kiijtoua Colosenses 3:12-14, ¿kenijkatsa tijnextiaj nelnelia timoikneliaj?
14 Biblia kiijtoua: “Ximoiknelikaj miak se ika seyok” (1 Ped. 4:8). Tijnextiaj ni kuali tlamantli kema, maske techchiuiliaj tlen amo kuali, amo timoyolkokouaj uan timotlapojpoljuiaj pampa tijmatij nochi titlajtlakolejkej. Nojkia, tijchiuaj kampeka titemakasej tlen tijpiaj uan kuali tikinselisej nochi toikniuaj, maske kemantika techyolkokouaj (xijpoua Colosenses 3:12-14). Ika ni tlamantli tijnextiaj nelia tielij Cristo itokilijkauaj pampa nelia timoikneliaj.
“SETSI TLANELTOKILISTLI”
15. ¿Ipan tlake sekinok tlamantli nojkia tijchiuaj kej toikniuaj tlen achtoui siglo?
15 Nojkia, kema tijueyichiuaj Jehová tijchiuaj kej kichijkej toikniuaj tlen achtoui siglo. Ipan toTeotsij itlanechikol, nochi toikniuaj katli tepaxalouaj chijchikuasej metstli, ueuejtlakamej uan tlapaleuianij, kichiuaj ininteki sanse kej kichiuayayaj apóstoles (Filip. 1:1; Tito 1:5). Uan nojkia tikitaj ni tlamantli sanse kej inijuantij: kej kema se tlakatl uan se siuatl motekaj sansejko, katli mosenkajtokej, estli uan kema kikixtiaj katli tlajtlakolchiua uan amo moyolkuepa pampa tijnekij tlanechikoli ma elto tlapajpaktik (Hech. 15:28, 29; 1 Cor. 5:11-13; 6:9, 10; Heb. 13:4).
16. ¿Tlake tijyekouaj tlen kiijtoua Efesios 4:4-6?
16 Jesús kiijtok maske miakej kiijtoskiaj elij itokilijkauaj, amo nochi kichiuaskiaj tlen tlanauatik (Mat. 7:21-23). Biblia nojkia ipa kiijtojtoya ipan itlamia tonali miakej san kinextiskiaj “keja kiixmatij toTeko” (2 Tim. 3:1, 5). Maske kiampa kichiuaskiaj, Biblia kiijtoua onkaskia “setsi tlaneltokilistli” katli toTeotsij kuali kiita (xijpoua Efesios 4:4, 5, TNM; * 4:6).
17. ¿Ajkia inijuantij kichiuaj kej Jesús uan itstokej ipan religión tlen melauak?
17 Ipan ni tlamachtili tikitakej kenijkatsa Jesús tlaueyichijki uan kenijkatsa itokilijkauaj kichijkej kej ya. Uajka, ¿ajkia inijuantij nelnelia kiueyichiuaj Jehová kej kinamiki? Ika tlen tikitstokej, kinextia san Jehová itlajtoltemakauaj itstokej ipan religión tlen melauak. Tijpiaj se ueyi tlateochiualistli pampa tiitstokej ipan toTeotsij itlanechikol, tijmatij tlen melauak tlen Jehová uan tlen mosentlalijtok kichiuas teipa. Yeka, ma tijchiuakaj kampeka timosentlalijtosej amo kema tijkauasej tlen melauak.
UIKATL 3 Jehová nochipa techpaleuis
^ párr. 5 Ipan ni tlamachtili tikitasej kenijkatsa Jesús kinextik ma tijueyichiuakaj Jehová, kej kichijkej ipan achtoui siglo. Nojkia, tikitasej kenijkatsa ipan ni tonali Jehová itlajtoltemakauaj kichiuaj sanse kej Jesús.
^ párr. 9 Xikita recuadro “¿Empleaban los primeros cristianos el nombre de Dios?”, tlen kiski ipan La Atalaya, julio 1, 2010, iamayo 6.
^ párr. 10 Se neskayotl, ipan 2008, nopa papa Benedicto XVI tlanauatik amo ma kitekiuikaj toTeotsij itoka kema uikaskiaj, momaijtoskiaj o kema tlaueyichiuaskiaj.
^ párr. 16 Efesios 4:4, 5, TNM: “Tiitstokej sansejko kejuak san setsi totlakayo uan onka san setsi toTeotsij itonal, uan kej inmojuantij inkichiaj se tlamantli nojkia san ika ni tlamantli inmechnotskej. 5 Itstok setsi toTeko, onka setsi tlaneltokilistli, setsi atsonpoliuilistli”.
^ párr. 64 TLEN NESI IPAN TLAIXKOPINKAYOMEJ. ToTeotsij itlanechikol kikixtijtok nopa Traducción del Nuevo Mundo ipan kipano 200 tlajtoli, uan kiampa maseualmej uelis kipouasej ipan inintlajtol, uan nojkia nopaya nesi toTeotsij itoka.
