KEMA mochijtoya nopa Achtoui Ueyi Tlauilankayotl, se soldado nazi chikauak kintsajtsilik se keskij toikniuaj: “Tlaj se tlen inmojuantij amo kinekis tlateuiti Francia uan Inglaterra, ¡tiinmechmiktisej!”. Maske nechka itstoyaj soldados katli kiniljuiyayaj SS uan kipiayayaj miak tlamantli tlen ika tlateuisej, toikniuaj amo kichijkej tlen kinnauatijkej. ¡Kinextijkej amo majmauij! Nochi katli tijtekipanouaj toTeotsij Jehová amo tiauij ipan tlauilankayotl. Nojkia, amo timokalakiaj kema mokualaniaj altepemej, maske kinekisej techmiktisej.

1. NOCHI TOTEOTSIJ ITEKIPANOJKAUAJ ITSTOYAJ IPAN SANSE ALTEPETL

Uejkajkia, Jehová kintlapejpenik israeleuanij ma elikaj itekipanojkauaj. Ya kiniljuik: “Inelisej innotlapejpeniljuaj tlen nochi tlakamej” (Éx. 19:5). Nojkia, kiniljuik kanke monekiyaya mochantisej. Yeka kema Jehová kinnauatiyaya ma kinteuikaj katli euayayaj ipan sekinok altepemej, amo kinmiktiyayaj sekinok katli nojkia kitekipanouayayaj toTeotsij. a

Ipan ni tonali, Jehová itekipanojkauaj itstokej ipan nochi Tlaltipaktli, kipiaj “sejse tlamantli inintlalnamikilis uan inincostumbres” uan “kamatij nochi tlamantli tlajtoli” (Apoc. 7:9). Tlaj yaskiaj ipan se tlauilankayotl, kinteuiskiaj uan kinmiktiskiaj ininikniuaj.

 2. JEHOVÁ KINILJUIYAYA ISRAELEUANIJ KEMA YASKIAJ TLATEUITIJ

Uejkajkia, Jehová kiniljuiyaya israeleuanij kema uan kenke monekiyaya yasej tlateuitij. Se neskayotl, kiniljuik ma kintsontlamiltikaj canaáneuanij pampa kinueyichiuayayaj amo kuali ajakamej, auilnemiyayaj uan nojkia pampa temakayayaj ininkoneuaj kej tlakajkaualistli. Jehová kinnauatik israeleuanij ma kintsontlamiltikaj nochi katli itstoyaj ipan nopa tlali tlen kinmakaskia pampa amo kinekiyaya ma kichiuakaj kej inijuantij (Lev. 18:24, 25). Kema israeleuanij ya itstoyaj ipan nopa tlali, kemantika Jehová kinkajki ma momanauikaj kema ininkualankaitakauaj kinteuiyayaj (2 Sam. 5:17-25). Maske kinkajki ma tlateuikaj, Jehová amo kinekiyaya ma yakaj kema inijuantij kinekiyayaj. Uan kema ininselti monauatiyayaj, kinpanoyaya tlen amo kuali (Núm. 14:41-45; 2 Crón. 35:20-24).

Ipan ni tonali, Jehová amo kinnauatia maseualmej ma tlateuikaj. Maseualmej katli itstokej ipan se altepetl tlateuiaj san pampa kinekij kichiuasej tlen kinpaleuis. Uelis kiampa kichiuaj pampa kinekij moaxkatisej tlali, tomij, kinnauatisej sekinok o kinekij ma moiljuikaj sanse kej inijuantij. Nojkia, toTeotsij amo kuali kinita katli kiijtouaj tlateuiaj pampa kimanauiaj toTeotsij itoka o pampa kinekij kintsontlamiltisej ikualankaitakauaj. Jehová kiijtojtok yaya kinmanauis itekipanojkauaj, uan kintsontlamiltis ikualankaitakauaj teipa ipan se tlauilankayotl tlen itoka Armagedón (Apoc. 16:14, 16). Ipan nopa tlauilankayotl amo tlateuisej itekipanojkauaj, san tlateuisej iluikaeuanij (Apoc. 19:11-15).

3. ISRAELEUANIJ AMO KINMIKTIYAYAJ KATLI PEUAYAYAJ TLANELTOKAJ IPAN JEHOVÁ

Uejkajkia, israeleuanij amo kinmiktiyayaj katli peuayayaj tlaneltokaj ipan toTeotsij, uan san kinmiktiyayaj katli Jehová amo kintlapojpoljuiyaya. Ma tikitakaj ome neskayotl. Maske Jehová kiijtok ma kitsontlamiltikaj altepetl Jericó, israeleuanij amo kinmiktijkej Rahab uan ichampoyouaj pampa ya pejki tlaneltoka (Jos. 2:9-16; 6:16, 17). Nojkia, Jehová amo kintsontlamiltik gabaóneuanij  pampa kinextijkej kitlepanitayayaj (Jos. 9:3-9, 17-19).

Ipan ni tonali, katli tlateuiaj ipan se tlauilankayotl kinmiktiaj katli tlaneltokaj ipan toTeotsij uan kemantika nojkia kinmiktiaj katli amo tleno kichijtokej.

4. JEHOVÁ KINILJUIYAYA ISRAELEUANIJ KENIJKATSA KINAMIKIYAYA TLATEUISEJ

Uejkajkia, Jehová kiniljuiyaya israeleuanij kenijkatsa tlateuisej. Kemantika kiniljuiyaya: “Kema inmonechkauisej kampa se altepetl para inkiteuisej, achtoui xikintenkauilikaj kejatsa ueli inmosejseltisej ininuaya” (Deut. 20:10). Uan kiniljuiyaya katli yauiyayaj tlateuitij amo ma nemikaj sokiyojkej inijuantij yon kampa mokauayayaj uan amo ma momekatikaj (Deut. 23:9-14). Jehová nojkia kiniljuik israeleuanij amo ma kinpinaualtikaj siuamej kema moaxkatiskiaj se altepetl, maske katli euayayaj ipan sekinok altepemej kiampa momajtoyaj kichiuaj. Uan tlaj se katli yajtoya tlateuia kinekiyaya mosiuajtis iuaya se siuatl katli itstoya ipan nopa altepetl tlen kitlankej, monekiyaya mochias se metstli (Deut. 21:10-13).

Ipan ni tonali, maske se keskij altepemej kiijtojtokej amo kichiuasej se keski tlamantli kema mochiuas tlauilankayotl, amo kitlepanitaj nopa tlanauatili pampa nojkia kinmiktiaj katli amo elij soldados.

5. JEHOVÁ KINPALEUIYAYA ISRAELEUANIJ KEMA TLATEUIYAYAJ

Uejkajkia, Jehová kinpaleuik israeleuanij kema tlateuiyayaj. Kemantika kichijki uejueyi tlamantli, kiampa kinpaleuik ma tlatlanikaj. Se neskayotl, kema kinpaleuik israeleuanij ma moaxkatikaj Jericó, inijuantij kichijkej tlen Jehová kinnauatik, “tsajtsikej tlauel chikauak, uan nopa tepamitl tlen ika kitsaktoyaj nopa altepetl uetski”. Kiampa Jehová kinpaleuik ma moaxkatikaj nopa altepetl (Jos. 6:20). Uan teipa kintlankej amorreos pampa Jehová “kimajkajki tesiuitl ininpani tlen iluikak tlen eliyaya keja uejueyi tetinij. Uan toTeko kinmiktik más amorreos ika tesiuitl que israelitajmej kinmiktijkej ika ininmachete” (Jos. 10:6-11).

KATLI NELIA ELIJ CRISTO ITOKILIJKAUAJ TLAPALEUIAJ MA ONKA TLASEUILISTLI

Kej tikitstokej, ayokmo tiitstokej kej israeleuanij, yeka amo tiauij ipan tlauilankayotl. Nojkia, onka sekinok tlamantli tlen kichiua amo ma titlapaleuikaj ipan tlauilankayotl. Se neskayotl, toTeotsij kiijtok katli kiixmatiskiaj ipan itlamia tonali “ayok monekis momachtisej para tlateuisej” uan ayokmo tlapaleuiskiaj ipan tlauilankayotl (Is. 2:2-4). Nojkia, Jesús kiijtok itokilijkauaj amo mokalakiskiaj ipan tlen maseualmej kichiuaj yon tlateuiskiaj (Juan 15:19).

Jesús kiniljuik itokilijkauaj ma kichiuakaj sekinok tlamantli. Kiniljuik amo ma kichiuakaj tlen kichiuaskia ma mokualankaitakaj ika sekinok, ma mosisinikaj uan ma moteuikaj (Mat. 5:21, 22). Nojkia, kiniljuik ma kichiuakaj kampeka itstosej ika tlaseuilistli uan ma kiniknelikaj ininkualankaitakauaj (Mat. 5:9, 44).

¿Tlake techmachtia ni tlamantli? Maske amo tijnekij titlapaleuisej ipan tlauilankayotl, ¿tijkualankaitaj se akajya o tijchiuaj se tlamantli tlen uelis kinxelos toikniuaj o kichiuas ma mokualanikaj? Nojua ma tijchijtokaj kampeka tijkixtisej ipan toyolo tlen amo kuali (Sant. 4:1, 11).

Katli tielij Cristo itokilijkauaj amo titlapaleuiaj ipan tlauilankayotl, tojuantij tijchiuaj kampeka tiitstosej ika tlaseuilistli uan timoiknelisej (Juan 13:34, 35). Ma timosentlalijtokaj amo timokalakisej ipan tlen maseualmej kichiuaj uan ma tijchiakaj kema Jehová kitsontlamiltis tlauilankayotl (Sal. 46:9).