1. ¿Tlake kiijtojtok Jehová tijselisej teipa?

 JEHOVÁ kiijtojtok teipa nochipa tiitstosej. Se keskij toTeotsij itekipanojkauaj motemachiaj itstosej iluikak (1 Cor. 15:50, 53). Uan miakej motemachiaj itstosej ipan Tlaltipaktli, yolpakisej uan amo kema mokokosej (Apoc. 21:3, 4). Nochi tijpatiitaj tlen tijselisej teipa: tiitstosej ipan iluikak o ipan Tlaltipaktli.

2. ¿Kenke timotemachiaj teipa tijselisej tlen kuali?

² Kema Biblia kiijtoua tijselisej se tlamantli, kichiua ma timotemachikaj teipa panos tlen kuali. Timotemachiaj nelia panos nopa tlamantli pampa Jehová kiijtojtok (Rom. 15:13). Tijmatij tlen kitenkajtok uan nojkia tijmatij nochipa kichiua tlen kiijtoua (Núm. 23:19). Timotemachiaj Jehová kineki uan ueli kichiua tlen mosentlalia. Uajka, amo san tlapik pampa timotemachiaj tijselisej tlen kuali.

3. ¿Tlake tikitasej ipan ni tlamachtili? (Salmo 27:14).

³ Jehová tlauel techiknelia, uan kineki ma timotemachikaj ipan ya (xijpoua Salmo 27:14). Tlaj timotemachiaj ipan Jehová, uelis tikixnamikisej tlen ueli tlaouijkayotl uan amo timajmauisej yon timoyolkokosej. Ipan ni tlamachtili tikitasej kenijkatsa techpaleuia kema timotemachiaj ipan tlen tijselisej. Achtoui tikitasej kenke tlen tijchiaj tijselisej eli kej se tepostli tlen moatsintlanoua uan kej se totepostsontsajka. Teipa tikitasej kenijkatsa uelis nojua tlauel timotemachisej ipan nopa tlamantli.

4. ¿Kenke tlen tijchiaj tijselisej eli kej se tepostli tlen moatsintlanoua? (Hebreos 6:19).

⁴ Kema apóstol Pablo kiijkuilok amatlajkuiloli Hebreos, kiijtok tlen tijchiaj tijselisej eli kejuak se tepostli tlen moatsintlanoua (xijpoua Hebreos 6:19). Ya miakpa nenki  ipan barcos, yeka kimatiyaya nopa tepostli kipaleuia se barco amo ma kiuika ajakatl kampa ueli. Se tonali kema yauiyaya ipan barco, pejki chikauak uetsi atl uan tlaajaka. Teipa kiitak katli kiuikayayaj nopa barco kimajkajkej nopa tepostli, kiampa amo motomoniskiaj ipan uejueyi tetl (Hech. 27:29, 39-41). Tlen tijchiaj tijselisej eli kej nopa tepostli pampa techpaleuia amo ma tijtlauelkauakaj Jehová kema tikixnamikij tlaouijkayotl. Kema timotemachiaj teipa kuali tiitstosej, techpaleuia ma tikijiyouikaj tlen ueli tlaouijkayotl. Ma tikilnamikikaj Jesús kiijtok teipa techtlaijiyouiltiskiaj (Juan 15:20). Yeka kema timoyoliljuiaj ipan tlen Jehová techtenkauilijtok, techpaleuia nojua ma tijtekipanojtokaj.

5. ¿Kenijkatsa kipaleuik Jesús pampa motemachiyaya teipa kiseliskia tlen kuali?

⁵ Ma tikitakaj kenijkatsa tlen Jesús kichiayaya kiselis kipaleuik ma kiijiyoui tlen kichiuilijkej. Ipan Pentecostés, xiuitl 33, apóstol Pedro kiijtok se salmo kampa kiijtoua Jesús amo majmajki uan ipan tlake motemachik. Nopa salmo kiijtoua: “Notlakayo motemachijtok ipan ta. Pampa axtijkauas notlakayo ipan tlakoyoktli, niyon axtijkauas ma palani itlakayo Yajaya Tlen Tlatsejtseloltik. [...] Nijpias ueyi pakilistli nepa kampa ta tiitstok” (Hech. 2:25-28; Sal. 16:8-11). Maske Jesús kimatiyaya kimiktiskiaj, ya motemachik iTata kiyolkuiskia uan sampa itstoskia iuaya (Heb. 12:2, 3).

6. Kej kiijtok se toikni, ¿kenijkatsa techpaleuis tlen tijchiaj tijselisej?

⁶ Miakej toikniuaj kiijiyouijtokej tlaouijkayotl pampa motemachiaj kiselisej tlen kuali. Ma tikitakaj tlen kipanok toikni Leonard Chinn, katli itstoya Inglaterra. Kema mochijki nopa Achtoui Ueyi Tlauilankayotl, kitsajkej pampa amo kinejki yas tlateuiti. Ome metstli amo kikajkej ma kamanalti ininuaya sekinok uan teipa kichiualtijkej ma tekiti. Teipa ya kiijtok: “Tlen nechpanok, kichijki ma nikita tlauel ipati nimotemachis ipan tlen nijselis teipa. Tlen kinpanok Jesús, apóstoles, tlajtolpanextianij uan tlen Biblia kiijtoua, techpaleuia ma timotemachikaj teipa kuali tiitstosej uan ma tikijiyouikaj tlaouijkayotl”. Leonard amo kitlauelkajki Jehová pampa motemachiyaya ipan tlen kiseliskia. Tojuantij nojkia tlauel techpaleuis tlaj kiampa tijchiuasej.

7. ¿Kenijkatsa techpaleuia kema tikixnamikij tlaouijkayotl? (Romanos 5:3-5; Santiago 1:12).

⁷ Nojua tlauel timotemachiaj ipan tlen tijselisej kema tikijiyouiaj tlaouijkayotl uan tikitaj kenijkatsa Jehová techpaleuia uan techteochiua (xijpoua Romanos 5:3-5; Santiago 1:12). Kema kiampa techpano, techpaleuia nojua tlauel ma titlaneltokakaj. Maske Satanás kineki tlauel ma timotetsopakaj kema tikixnamikij se tlaouijkayotl, Jehová nochipa techpaleuis ma tikijiyouikaj.

8. ¿Kenke tlen tijchiaj tijselisej eli kej totepostsontsajka? (1 Tesalonicenses 5:8).

⁸ Biblia nojkia kiijtoua tlen tijchiaj tijselisej, eli kejuak totepostsontsajka (xijpoua 1 Tesalonicenses 5:8). Se soldado kitekiuia itepostsontsajka pampa amo kineki ma kikokokaj ipan tlauilankayotl. Tojuantij nojkia kejuak timoteuiaj iuaya Satanás, yeka moneki tijmokuitlauisej totlalnamikilis pampa ya kineki ma tijchiuakaj uan ma timoiljuikaj tlen techtlanauis. Itepostsontsajka se soldado kipaleuia amo ma kipano tlen amo kuali. Uan  kema timotemachiaj ipan tlen tijselisej, techpaleuia amo ma timoiljuikaj tlen Jehová kikualankaita.

9. ¿Tlake kichiuaj maseualmej pampa amo motemachiaj teipa itstosej nochipa?

⁹ Kema timotemachiaj tiitstosej nochipa, techpaleuia kuali ma tijtlapejpenikaj tlen tijchiuasej. Maske tlauel techpaleuia, tlaj timosentlaliaj san ipan tlen tijnekij uelis ayokmo timotemachisej ipan tlen tijselisej. Ma timoiljuikaj ipan tlen kinpanok se keskij Cristo itokilijkauaj katli itstoyaj Corinto. Inijuantij ayokmo motemachijkej moyolkuisej katli miktokej (1 Cor. 15:12). Pablo kiijtok katli ayokmo kuali tlaneltokayayaj, san kichiuayayaj tlen inijuantij kinekij (1 Cor. 15:32). Ipan ni tonali, miakej maseualmej amo motemachiaj ipan tlen toTeotsij kitenkajtok, yeka kichiuaj san tlen kinekij. Maske kiampa kichiuaj, tojuantij timotemachiaj ipan tlen toTeotsij kitenkajtok. Tlen tijchiaj tijselisej eli kej totepostsontsajka tlen techpaleuia amo ma timosentlalikaj san ipan tlen tijnekij yon ma tijchiuakaj tlen kichiuas ayokmo kuali ma timouikakaj iuaya Jehová (1 Cor. 15:33, 34).

10. ¿Kenijkatsa tlen tijchiaj tijselisej techpaleuia amo ma tijneltokakaj istlakatili?

¹⁰ Tlen tijchiaj tijselisej, nojkia techpaleuia amo ma timoiljuikaj san tlapik tijchiuaj kampeka tijyolpakiltisej Jehová. Uelis se akajya moiljuia: “Amo kema nijselis nopa nemilistli tlen axkema tlamis. Tlauel nimokuapoloua. Amo kema uelis nijchiuas tlen toTeotsij kineki”. Ma tikilnamikikaj Elifaz kiampa kinejki ma moiljui Job, ya kiiljuik: “¿Kejatsa uelis se tlakatl mochiuas tlapajpaktik iixpa toTeko? [...] ¡Xikita! ToTeko Dios axmotemachia ipan iiluikaejkauaj. Niyon iluikaktli axeltok senkistok tlapajpaktik iixpa” (Job 15:14, 15). ¡Tlen kiijtok eli se istlakatili! Satanás kiampa kineki ma timoiljuikaj pampa ayokmo kuali titlaneltokasej. Yeka ma tijchiuakaj kampeka amo kiampa timoiljuisej uan ma timosentlalikaj ipan tlen Jehová techtenkauilijtok. Ma timotemachikaj ya kineki ma tiitstokaj nochipa uan techpaleuis ma tijselikaj nopa tlateochiualistli (1 Tim. 2:3, 4).

11. ¿Kenke moneki tijchiasej toTeotsij ma kiaxiti nochi tlen kitenkajtok?

¹¹ Kemantika tijmatij ouij timotemachisej ipan tlen tijselisej teipa. Uelis timoiljuisej Jehová amo nima kichiua tlen kitenkajtok. Maske kiampa timoiljuisej, moneki tikilnamikisej Jehová nochipa itstok uan amo kiita tonali sanse kej tojuantij (2 Ped. 3:8, 9). Ya kichiuas nochi tlen kiijtojtok maske uelis amo kichiuas kema tojuantij tijnekij. ¿Tlake techpaleuis nojua tlauel ma timotemachikaj ipan tlen tijselisej uan ma tijchiakaj ma moaxiti nochi tlen toTeotsij kitenkajtok? (Sant. 5:7, 8).

12. Kej kiijtoua Hebreos 11:1, 6, ¿kenke moneki kuali titlaneltokasej tlaj tijnekij timotemachisej ipan tlen tijselisej teipa?

¹² Nojua tlauel timotemachisej ipan tlen tijselisej tlaj kuali timouampojchiuaj iuaya Jehová, pampa ya kiijtojtok nelia kichiuas tlen kitenkajtok. Biblia kiijtoua tlaj tijnekij timotemachisej ipan tlen tijselisej, moneki tijneltokasej toTeotsij itstok “uan kinteochiua katli nochipa kichiuaj kampeka kitemosej” (xijpoua Hebreos 11:1; 11:6, TNM). b Kema nojua kuali tikixmatij  Jehová, techpaleuia nojua tlauel ma timotemachikaj kichiuas tlen kitenkajtok. Uajka ma tikitakaj kenijkatsa nojua kuali timouampojchiuasej iuaya.

13. ¿Kenijkatsa uelis timouampojchiuasej iuaya Jehová?

¹³ Ma timomaijtokaj uan ma tijpouakaj Biblia. Maske amo tikitaj Jehová, kena uelis timouampojchiuasej iuaya. Tikamanaltij iuaya kema timomaijtouaj uan ya techtlakakilia (Jer. 29:11, 12). Uan tijtlakakiliaj kema tijpouaj iTlajtol uan timoyoliljuiaj. Kema tijpouaj kenijkatsa Jehová kinmokuitlauik itekipanojkauaj uejkajkia, techpaleuia nojua tlauel ma timotemachikaj ipan tlen tijselisej. Nochi tlen ijkuilijtok ipan toTeotsij iTlajtol techmachtia “para uelis tikijiyouisej tlen techpanotiuala. Nojkia [...] para ma tijchiakaj nochi tlen techiljuia para tijselisej teipa” (Rom. 15:4).

14. ¿Kenke techpaleuis tlaj timoyoliljuisej kenijkatsa Jehová kinteochijtok sekinok?

¹⁴ Ma timoyoliljuikaj kenijkatsa Jehová kichijtok tlen kitenkajtok. Uelis timoiljuisej kenijkatsa kinteochijki Abraham uan Sara. Maske inijuantij ayokmo ueliskia kinpiasej ininkoneuaj pampa ya kipixtoyaj miak xiuitl, Jehová kiniljuik kipiaskiaj se ininkone (Gén. 18:10). ¿Tlake kichijki Abraham? Biblia kiijtoua: “Kineltokak para temachtli panoskia tlen toTeko kiiljuik” (Rom. 4:18). Maske se akajya moiljuiskia ayokmo ueliskia kinpiasej ininkoneuaj, Abraham motemachik Jehová nelia kichiuaskia tlen kitenkauilijtoya uan nelia kiampa panok (Rom. 4:19-21). Tlen kinpanok Abraham uan Sara kinextia Jehová nochipa kiaxitia tlen kitenkaua, maske kemantika timoiljuisej ouij kichiuas.

15. ¿Kenke moneki timoyoliljuisej kenijkatsa Jehová techpaleuijtok?

 ¹⁵ Ma timoiljuikaj kenijkatsa Jehová techteochijtok. ¿Tikitstok ipan monemilis kenijkatsa Jehová kichijtok tlen kiijtojtok? Se neskayotl, Jesús kiijtok iTata techmakaskia tlen ika timopanoltisej (Mat. 6:32, 33). Uan nojkia kiijtok techmakaskia itonal tlaj tijtlajtlaniaj (Luc. 11:13). Jehová nelia kichijtok tlen kitenkajtok. Uelis nojkia tikilnamikij ya kiijtok techtlapojpoljuiskia, techyolchikauaskia uan techmakaskia tlamachtili, uan nelia kiampa kichijtok (Mat. 6:14; 24:45; 2 Cor. 1:3). Tlaj timoyoliljuiaj kenijkatsa Jehová techpaleuijtok, nojua tlauel timotemachisej nelia kichiuas tlen kiijtojtok.

16. ¿Kenke tlen tijchiaj tijselisej eli se tlamantli tlen tlauel ipati?

¹⁶ Jehová techmakatok se tlamantli tlen tlauel ipati: kiijtojtok uelis tiitstosej nochipa. Tijchiaj ma kichiua tlen kiijtojtok uan timotemachiaj nelia kiampa kichiuas. Tlen tijchiaj tijselisej, eli kej se tepostli tlen moatsintlanoua pampa techpaleuia ma tikijiyouikaj tlaouijkayotl, kema techtlatsakuiltiaj o kema kinekij techmiktisej. Nojkia eli kej totepostsontsajka pampa techpaleuia amo ma timoiljuikaj yon ma tijchiuakaj tlen amo kuali. Tlen Jehová techtenkauilijtok, techpaleuia nojua kuali ma timouampojchiuakaj iuaya uan kinextia tlauel techiknelia. Yeka, tlauel techpaleuis tlaj nochipa timotemachisej ipan tlen tijselisej teipa.

17. ¿Kenke tlen tijselisej teipa kichiua tlauel ma tiyolpakikaj?

¹⁷ Kema Pablo kintlajkuiljuilik toikniuaj katli itstoyaj Roma, kiniljuik: “Ximoyolpakiltikaj ipan tlen inkichiaj” (Rom. 12:12, TNM). Pablo yolpakiyaya pampa motemachiyaya itstoskia iluikak tlaj amo kitlauelkauaskia Jehová. Tojuantij nojkia tiyolpakij pampa timotemachiaj toTeotsij nelnelia kichiuas tlen kiijtojtok. Uelis tijyolmatisej kej katli kiijkuilok se salmo, ya kiijtok: “Nelia paki nopa tlakatl tlen [...] san ipan toTeko iDios motemachia [...]. Yajaya tlen kichiua nochi tlen kitlajtolkajtok para kichiuas” (Sal. 146:5, 6).