1. ¿Kenijkatsa techpaleuis tlaj timomachtisej toTeotsij iTlajtol?

 KEMA se akajya nelnelia yolpaki, nochipa kiampa kiyolmati. Ipan Sermón del Monte, Jesús kiijtok tlake techpaleuis. Ya kiijtok: “Pakij katli kimatij moneki momachtisej toTeotsij iTlajtol” (Mat. 5:3, TNM). Ya kimatiyaya maseualmej techchijchijkej ma tijnekikaj tikixmatisej uan tijueyichiuasej Jehová. Uan kiampa tijchiuaj kema timomachtiaj Biblia. Jehová “tlauel yolpaki”, yeka katli tijtekipanouaj nojkia uelis tiyolpakisej (1 Tim. 1:11, TNM).

2, 3. 1) Kej kiijtok Jesús, ¿ajkia inijuantij nojkia uelis yolpakisej? 2) ¿Tlake tikitasej ipan ni tlamachtili, uan kenke moneki timomachtisej?

² Maske tijpiaj kuesoli, uelis tiyolpakisej. Tlen Jesús kiijtok ipan Sermón del Monte kiampa kinextia. Ya kiijtok katli mokuesouaj pampa tlajtlakolchijkej o pampa kiixnamikij se tlaouijkayotl, uelis yolpakisej. Nojkia uelis kiampa kiyolmatisej katli kintlaijiyouiltiaj pampa kichiuaj tlen xitlauak o pampa mochiuaj Cristo itokilijkauaj (Mat. 5:4, 10, 11). Uajka, ¿kenijkatsa uelis tiyolpakisej maske tikixnamikisej ni tlaouijkayotl?

³ Jesús kiijtok maske tikixnamikisej miak tlaouijkayotl, uelis tiyolpakisej tlaj tijchiuaj kampeka timomachtisej Biblia uan timouampojchiuasej iuaya Jehová (Sant. 4:8). ¿Tlake uelis tijchiuasej tlaj tijnekij nelnelia tiyolpakisej?  Ipan ni tlamachtili tikitasej eyi tlamantli tlen techpaleuis.

4. Xikijto nopa achtoui tlamantli tlen techpaleuis tiyolpakisej (Salmo 1:1-3).

⁴ SE: Tlaj tijnekij nelnelia tiyolpakisej, moneki timomachtisej Biblia. Maske maseualmej uan tlapialmej moneki tlakuasej uan kiampa nojua yoltosej, san maseualmej uelij kipouaj Biblia uan kinpaleuia. Yeka, Jesús kiijtok: “Axsan pantsi moneki para itstosej tlakamej. Nojkia moneki tijneltokilijtiasej nochi iTlajtol toTeko” (Mat. 4:4). Uajka mojmostla ma tijchiuakaj kampeka tijpouasej Biblia. Se katli kiijkuilok se salmo kiijtok tlauel tiyolpakisej tlaj mojmostla tijpouasej toTeotsij iTlajtol (xijpoua Salmo 1:1-3).

5, 6. 1) ¿Tlake tijyekouaj ipan Biblia? 2) ¿Kenijkatsa techpaleuia kema tijpouaj Biblia?

⁵ Jehová tlauel techiknelia, yeka techiljuia ipan Biblia tlake techpaleuis ma tiyolpakikaj. Techiljuia kenke techchijchijki, kenijkatsa uelis timouampojchiuasej iuaya uan tlake moneki tijchiuasej tlaj tijnekij ma techtlapojpoljui. Nojkia techiljuia teipa tlauel kuali tiitstosej (Jer. 29:11). Kema timomachtiaj ni tlamantli ipan Biblia, kichiua tlauel ma tiyolpakikaj.

⁶ Tlauel techpaleuia tlen kiijtoua Biblia. Uan kema tijchiuaj tlen techtlajtolmaka, techpaleuia tlauel ma tiyolpakikaj. Uajka, tlaj tikixnamiktokej se kuesoli, nojua ma tijchiuakaj kampeka  tijpouasej toTeotsij iTlajtol uan ma timoyoliljuikaj ipan tlen kiijtoua. Jesús kiijtok: “Más kuali kipantiaj nopa tlakamej tlen kikakij iTlajtol toTeko uan kineltokiliaj” (Luc. 11:28).

7. ¿Kenijkatsa techpaleuis tlaj yolik tijpojtiasej Biblia?

⁷ Kema tijpouaj Biblia, yolik ma tijpojtiakaj. Ma timoiljuikaj ipan ni tlamantli: se akajya techchijchiuilia se tlakualistli tlen tlauel techpaktia. Maske tlauel ajuiyak, timoisiuiltiaj tijkuaj pampa tijnekij tiasej kanajya o pampa timoiljuijtokej ipan sekinok tlamantli. Uan kema titlamij, tikitaj ueltoskia yolik titlakuasej uan tikajuiyakmajtoskiaj. Uelis kiampa techpanos kema tijpouaj Biblia. Kemantika amo yolik titlapouaj, yeka kejuak amo tikajuiyakmatij tlen tijpouaj. Uajka yolik ma tijpojtiakaj, kiampa uelis timoiljuisej tlen panok, kejuak tijkakisej tlen kiijtojkej uan timoyoliljuisej ipan tlen tijpojkej. Tlaj kiampa tijchiuaj, tlauel tiyolpakisej.

8. ¿Kenijkatsa “tlalnamijkatlatekipanojketl” kuali kichiua iteki? (Nojkia xikita nota).

⁸ Jesús kitekimakatok se “tlalnamijkatlatekipanojketl” ma techmaka tlamachtili tlen techpaleuis kema kinamikis, uan nelia kiampa kichijtok (Mat. 24:45). b Nopa tlamachtili tlen techmaka, mokixtijtok ipan Biblia (1 Tes. 2:13). Uan techpaleuia ma tikitakaj kenijkatsa moiljuia Jehová. Yeka, tijpouaj pilamochtsitsij Tlen Tematiltia uan ¡Xitlachixtokaj! uan nopa tlamachtili tlen nesi ipan jw.org. Nojkia timokualchijchiuaj ika tlen tikitasej ipan tlanechikoli uan tikitaj tlamachtili tlen kisa ipan JW Broadcasting^®. Kema kuali tijtekiuiaj ni tlamachtili, techpaleuia ma tijchiuakaj nopa ompa tlamantli tlen nojkia kichiuas nelnelia ma tiyolpakikaj.

9. Xikijto nopa ompa tlamantli tlen techpaleuis nelnelia ma tiyolpakikaj.

⁹ OME: Tlaj tijnekij nelnelia tiyolpakisej, moneki tijneltokasej Jehová itlanauatiljuaj. Se katli kiijkuilok se salmo, kiijtok: “Paki nopa tlakatl tlen kiimakasi uan kitlepanita toTeko. Kena, paki tlen nemi xitlauak ipan iojui” (Sal. 128:1). Kema tijmakasij Jehová, tlauel tijtlepanitaj uan amo tijnekij tijchiuasej se tlamantli tlen kiyolkokos (Prov. 16:6). Yeka, tijchiuaj kampeka nojua tijneltokatosej itlanauatiljuaj tlen eltok ipan Biblia (2 Cor. 7:1). Tlaj tijchiuaj tlen Jehová kipaktia uan amo tijchiuaj tlen kikualankaita, tlauel tiyolpakisej (Sal. 37:27; 97:10; Rom. 12:9).

10. Maske ya tijmatij tlen toTeotsij technauatia, ¿tlake moneki nojua tijchiuasej? (Romanos 12:2).

¹⁰ (Xijpoua Romanos 12:2). Maske uelis se akajya kimati Jehová kinamiki kiijtos tlake kuali uan tlake amo, nojkia moneki kineltokas itlanauatiljuaj. Ma timoiljuikaj ipan ni tlamantli: se akajya uelis kimati tlanauatianij kinamiki kiijtosej kenijkatsa tijnemiltisej carro. Maske kimati nopa, uelis amo kinekis kineltokas nopa tlanauatili uan nojua chikauak kinemiltis icarro. Uajka, ika tlen tijchiuasej uelis tijnextisej tlaj nelia timotemachiaj Jehová itlanauatiljuaj techpaleuia ipan tonemilis (Prov. 12:28). David kiampa moiljuiyaya, yeka kiiljuik Jehová: “Xinechnextilis katlia ojtli kipia yolistli.  Nijpias ueyi pakilistli nepa kampa ta tiitstok. Kena, onkas ueyi pakili para nochipa nepa kampa monejmatl” (Sal. 16:11).

11, 12. 1) ¿Kenke moneki timomokuitlauisej kema techtekipachoua se tlamantli o timokuesouaj? 2) ¿Kenijkatsa techpaleuia Filipenses 4:8 kuali ma tijtlapejpenikaj tlen ika timoyolpakiltisej?

¹¹ Uelis kema timokuesouaj, uan timotekipachouaj tijnekij tijchiuasej tlen techpaleuis ma tikilkauakaj nopa kuesoli. Tlaj tijchiuasej se tlamantli, ma tikitakaj amo ma kiixpano Jehová (Efes. 5:10-12, 15-17).

¹² Ipan nopa amatlajkuiloli tlen apóstol Pablo kintitlanilik toikniuaj tlen Filipos, kiniljuik ma moyoliljuijtinemikaj ipan tlamantli tlen xitlauak, tlen amo sokiyo, tlen kinpaleuis ma moiknelikaj uan tlen kuali kiitaskiaj sekinok (xijpoua Filipenses 4:8). Maske Pablo amo kinkamanaljuiyaya tlen ika moyolpakiltiyayaj, tlen kiijtok techpaleuis kuali ma tijtlapejpenikaj ika tlake timoyolpakiltisej. Ma tijchiuakaj ni tlamantli: kema tijpouasej ni versículo, ma tijpatlakaj nopa tlajtoli “tlamantli” ika tlajtoli “uikatl”, “películas”, “amochtli” o “videojuegos”. Ni techpaleuis ma tikitakaj tlake kuali kiita toTeotsij uan tlake amo. Nochipa tijnekij timoyakanasej ika itlanauatiljuaj (Sal. 119:1-3). Yeka tlaj tijpiaj tlapajpaktik totlalnamikilis, uelis tijchiuasej nopa seyok tlamantli tlen techpaleuis ma tiyolpakikaj (Hech. 23:1).

13. Xikijto nopa expa tlamantli tlen techpaleuis nelnelia ma tiyolpakikaj (Juan 4:23, 24).

¹³ EYI. Moneki tikachtouitlalisej tijueyichiuasej Jehová. Kinamiki ma tijueyichiuakaj Jehová pampa ya techchijchijki (Apoc. 4:11; 14:6, 7). Yeka moneki nochipa tikachtouitlalisej tijueyichiuasej uan tijchiuasej ika nochi toyolo (xijpoua Juan 4:23, 24). Tijnekij toTeotsij itonal nochipa ma techyakana kema titlaueyichiuaj, kiampa amo tikixpanosej tlen kiijtoua Biblia. Nojkia, tijnekij nochipa tikachtouitlalisej tijueyichiuasej Jehová maske kampa tiitstokej amo techkauaj ma titlaueyichiuakaj. Ipan ni tonali, kintsaktokej kipano 100 toikniuaj pampa elij Jehová itlajtoltemakauaj. c Maske kiixnamiktokej ni tlaouijkayotl, inijuantij yolpakij uan kichiuaj kampeka momaijtosej, momachtisej uan kinpouilisej sekinok tlen toTeotsij uan iTlanauatijkayo. Maske techtlaijiljuiaj o techtlaijiyouiltiaj, tlauel tiyolpakij pampa tijmatij Jehová nochipa techpaleuia uan techteochiuas (Sant. 1:12; 1 Ped. 4:14).

14. ¿Tlake kipanok se toikni katli eua Tayikistán, uan kenke?

¹⁴ Tlen kinpanotok se keskij toikniuaj, kinextia nopa eyi tlamantli tlen tikitstokej nelia kichiua ma tiyolpakikaj maske tikixnamikij tlen ueli tlaouijkayotl. Ma tikitakaj tlen kipanok Yovidón Boboyónov, se telpokatl katli kipia 19 xiuitl uan eua Tayikistán. Ya amo kinejki kikixtis icartilla militar, yeka ipan octubre 4, 2019, soldados kikixtitoj ichaj, kitsajkej miak metstli uan tlauel kitlaijiyouiltijkej. Ipan sekinok altepemej kiijtokej ipan radio uan televisión tlen kipanotoya toikni. Kiijtojkej kimakilijkej pampa kinekiyayaj kichiualtisej ma kiijto eliskia  soldado uan moyoyontiskia kej inijuantij. Maske kitsajkej uan kichiualtijkej ma tekiti, teipa nopa tekichijketl katli tlayakana ipan nopa altepetl kiijtok amo tleno kichijtoya uan tlanauatik ma kikixtikaj. Maske Yovidón kiixnamijki nochi ni tlaouijkayotl, amo kema kitlauelkajki Jehová uan nochipa yolpajki. ¿Tlake kipaleuik? Nochipa momachtik toTeotsij iTlajtol.

15. ¿Kenijkatsa Yovidón kuali momachtik kema tsaktoya?

¹⁵ Kema Yovidón tsaktoya, kuali momachtik maske amo kipixtoya Biblia yon amatlajkuiloli. Uajka, ¿kenijkatsa kichijki? Kema toikniuaj kiuikiliyayaj tlakualistli, kiijkuilouayayaj textos ipan bolsas. Kiampa Yovidón kipouayaya Biblia uan mojmostla moyoliljuiyaya ipan tlen kipouayaya. Kema kikixtijkej, kiijtok se tlamantli tlen kinpaleuis katli ayamo kiixnamikij uejueyi tlaouijkayotl. Ya kiijtok: “Tlaj tekichiuanij nojua inmechkauaj xitlaueyichiuakaj, uajka xijchiuakaj kampeka nojua kuali inmouampojchiuasej iuaya Jehová. Yeka ximomachtikaj Biblia uan amatlajkuiloli”.

16. ¿Ipan tlake mosentlalik Yovidón?

¹⁶ Toikni Yovidón kineltokak Jehová  itlanauatiljuaj. Ya mosentlalik ipan Jehová uan ipan tlen kipaktia uan amo moiljuik yon kichijki tlen amo kinamiki. Kichiuayaya kampeka kiitas tlen Jehová kichijchijtok. Mojmostla ika ijnalok kikakiyaya kenijkatsa uikaj totomej uan ika tlayoua kiitayaya metstli uan sitlalimej. Ya kiijtok: “Ni tlamantli tlen Jehová kichijchijtok, kichiuayaya ma niyolpaki uan kuali ma nijyolmati”. Kema tijpatiitaj nopa tlamachtili tlen Jehová techmaka uan tlen kichijchijtok, techpaleuia tlauel ma tiyolpakikaj uan ma tikijiyouikaj tlen ueli tlaouijkayotl.

17. ¿Kenijkatsa tlen kiijtoua 1 Pedro 1:6, 7 uelis kipaleuis se akajya katli kiixnamiki se tlaouijkayotl kej Yovidón?

¹⁷ Yovidón nojkia kiachtouitlalik kuali kitekipanos Jehová. Ya kimatiyaya monekiyaya amo kitlauelkauas toTeotsij. Jesús kiijtok: “Xijueyimati san toTeko Dios uan san ya xijtekipano” (Luc. 4:8). Maske soldados kinekiyayaj kichiualtisej Yovidón ma kitlauelkaua Jehová, ya mojmostla momaijtouayaya uan kiiljuiyaya Jehová ma kipaleui kiijiyouis nopa tlaouijkayotl uan amo kitlauelkauas. Maske tlauel kitlaijiyouiltijkej, Yovidón amo kema kitlauelkajki Jehová. Yeka tlauel yolpaki pampa nama nojua tlauel kuali tlaneltoka (xijpoua 1 Pedro 1:6, 7).

18. ¿Kenijkatsa uelis nojua tlauel tiyolpaktosej?

¹⁸ Jehová kimati tlake uelis techpaleuis nelnelia ma tiyolpakikaj. Tlaj tijchiuaj nopa eyi tlamantli tlen tikitakej ipan ni tlamachtili, techpaleuis ma tiyolpakikaj maske tijpiasej tlaouijkayotl. Kiampa nojkia uelis tikijtosej: “Nelia pakij kuali tlakamej tlen kipiaj toTeko para ininDios” (Sal. 144:15).