Ipan nopa xiuitl, Jehová itlanechikol kipatlak se keski tlamantli, uan nopa tlauel kinpaleuik Estudiantes de la Biblia más ma mosentikapaleuikaj kema kiueyichiuaskiaj Jehová. Nopa amochtli The Watch Tower, pejki kiixtoma nopa texto tlen ika moyakanayaya nopa tlanechikoli kampa momaijtouayayaj, tlaueyichiuayayaj uan kampa kiijtouayayaj tlen kinpanotoya, ni tlanechikoli mochiuayaya sejse semana. Nojkia, Estudiantes de la Biblia kichijchiuayayaj se calendario tlen kipiayaya texto tlen kiixtomayayaj ipan se semana, uan uikatl tlen ueliyayaj kitekiuiaj mojmostla kema momachtiyayaj ininselti o ika ininchampoyouaj.

Kema monechikouayayaj Estudiantes de la Biblia kiijtouayayaj tlen kipanotoya ipan tlajtolmoyaualistli, kitlaskamatiliyayaj Jehová uan uikayayaj o momaijtouayayaj. Eva Barney, katli moatsonpoliuiltik ipan 1923 kema kipixtoya 15 xiuitl, kiijtok: “Tlaj se akajya kinekiyaya kiijtos tlen kipanotoya, achtoui moketsayaya uan kiijtouayaya ‘Nijneki nijtlaskamatilis toTeko pampa tlauel techiknelia. . . ’”. Se keskij toikniuaj tlauel kinpaktiyaya kiijtosej tlen kinpanotoya. Tosiuaikni Barney, kiijtok: “Toikni Godwin, katli ya eliyaya ueuentsi, nochipa kipaktiyaya kitlaskamatilis toTeotsij miak tlamantli. Pero kema isiua kiitayaya katli kiyakanayaya tlanechikoli nesiyaya kejuak nakaskuesiuiyaya, kitilanayaya icamisa iueue, uan Godwin moseuiyaya”.

Sejse metstli mopatlayaya se kentsi nopa tlanechikoli kampa momaijtouayayaj, tlaueyichiuayayaj uan kampa kiijtouayayaj tlen kinpanotoya. The Watch Tower abril 1, 1923, kinnauatik ni tlamantli katli monechikouayayaj: “Tlajko tlen nopa tlanechikoli, toikniuaj moneki kiijtosej tlen kinpanotok ipan tlajtolmoyaualistli uan kinyolchikauasej katli tlajtolmoyauaj [ . . . ]. Timoiljuiaj tlaj timoyolchikauaj, más kuali timouikasej”.

Nopa tlanechikoli tlauel kipaleuik toikni Charles Martin, katli eliyaya trabajador de clase (nama kinixmatij kej tlajtolmoyauanij). Ya kipixtoya 19 xiuitl uan euayaya Vancouver (Canadá). Ya kiijtok: “Nopaya nijyekok tlake nikijtoskia kema nitlajtolmoyauaskia kajkalpa. Ipan nopa tlanechikoli, toikniuaj kiijtouayayaj tlen kinpanotoya ipan tlajtolmoyaualistli. Nopa nechpaleuik ma nijmati tlake nikijtos uan kenijkatsa nijchiuas ma nechtlakakili se maseuali maske kiijtoua amo kineki”.

Kema tlajtolmoyauayayaj, nojkia kinpaleuik toikniuaj ma mosentikapaleuikaj. The Watch Tower  abril 1, 1923, kiijtok: “Tijnekij timosentikapaleuisej [ . . . ], yeka ipan martes 1, mayo 1923, sansejko titlajtolmoyauasej. Uan kiampa tijchiuasej sejse metstli ipan achtoui martes [ . . . ]. Nochi toikniuaj moneki kichiuasej ni tekitl”.

Estudiantes de la Biblia katli nojua eliyayaj piltelpokatsitsij nojkia tlajtolmoyauayayaj. Se tosiuaikni katli itoka Hazel Burford, katli kipixtoya 16 xiuitl ipan 1923, kiijtok: “Nopa pilamochtsi Bulletin kiijtouayaya se keski tlamantli tlen monekiyaya tijtsontekontlalisej uan tikijtoskiaj kema titlajtolmoyauaskiaj. a Noueyitata uan na tlauel techpaktiyaya titlajtolmoyauasej”. Pero se toikni amo kuali kiitayaya tlen kichiuayaya ni tosiuaikni. Hazel nojkia kiijtoua: “Se toikni katli ya eliyaya ueuentsi amo kipaktiyaya ma nikinkamanaljui sekinok tlen Biblia. Ipan nopa tonali amo nochi kuali kikuamachilijtoyaj ‘telpokamej uan ichpokamej’ nojkia monekiyaya tlajtolmoyauasej” (Sal. 148:12, 13). Maske ouij tlen kipanok, Hazel nojua tlajtolmoyajki. Kema panok se keski xiuitl, yajki momachtito Galaad ipan nopa ompa clase uan kititlankej kej misionera ipan Panamá. Teipa, nopa toikniuaj kipatlakej kej kinitayayaj toikniuaj telpokamej uan tlajtolmoyaualistli.

Uejueyi tlanechikolistli nojkia kinpaleuik toikniuaj ma mosentikapaleuikaj. Kemantika ipan nopa uejueyi tlanechikolistli kisayayaj tlajtolmoyauaj, kiampa mochijki ipan Winnipeg (Canadá). Ipan marzo 31, nochi katli yajkej ipan nopa ueyi tlanechikolistli tlajtolmoyajkej ipan nopa altepetl. Miakej kintlakakiliyayaj pampa kiampa kichiuayayaj. Ipan seyok ueyi tlanechikolistli tlen mochijki ipan Winnipeg, ipan agosto 5 tlen nopa xiuitl, mosentilijkej nechka 7 mil maseualmej, amo kema kiampa mosentilijtoyaj ipan se ueyi tlanechikolistli ipan Canadá.

Ipan agosto 18-26, 1923, mochijki se ueyi tlanechikolistli tlen tlauel ipati ipan Los Ángeles, California. Kema nechka mochiuaskia, ipan periódicos tematiltijkej mochiuaskia nopa ueyi tlanechikolistli, uan Estudiantes de la Biblia temakakej kipano 500 mil pilamatsitsij tlen ika  tetlaneuiyayaj. Nojkia kitlalijkej letreros ipan inincarro uan ipan sekinok carros, kampa kiijtouayaya mochiuaskia nopa ueyi tlanechikolistli.

Ipan sábado agosto 25, toikni Rutherford kiixtonki nopa tlamachtili tlen motokaxtik “Borregojmej uan chivojmej”. Uan kiijtok nopa “borregojmej” elij maseualmej katli kipiaj kuali ininyolo uan itstosej nochipa ipan Tlaltipaktli kema mochiuas xochimili. Nojkia kiixtonki se tlamachtili tlen motokaxtik “Amonestación”, nopaya kiijtok religiones tlen amo melauak kichiuayayaj tlen amo kuali. Uan kiniljuik katli kipixtoyaj kuali ininyolo ma kisakaj tlen “Ueyi Babilonia” (Apoc. 18:2, 4). Teipa kikixtijkej se pilamatsi tlen kiijtouayaya nopa tlamantli, uan Estudiantes de la Biblia kimoyajkej ipan nochi Tlaltipaktli.

Ipan nopa iyojtsi tonali tlen nopa ueyi tlanechikolistli, kipano 30 mil maseualmej kikajkej nopa tlamachtili tlen kiixtonki toikni Rutherford tlen itoka: “Miakej kintsontlamiltisej ipan Armagedón, pero miakej katli nama itstokej amo kema mikisej”. Moiljuiyayaj miakej yaskiaj ipan nopa ueyi tlanechikolistli, yeka Estudiantes de la Biblia motlanejkej nopa yankuik Coliseo tlen Los Ángeles. Toikniuaj kinekiyayaj nochi kuali ma kitlakakilikaj nopa tlamachtili, yeka kitekiuijkej nopa yajyankuik bocinas tlen kipixtoya nopa estadio. Uan miakej maseualmej kitlakakilijkej nopa tlamachtili ipan radio.

Ipan xiuitl 1923, tlauel tlajtolmoyajkej ipan África, Europa, la India uan Sudamérica. Ipan la India, toikni Adavimannathu Joseph, katli kipixtoya isiua uan chikuasej ikoneuaj, tlapaleuik kampa mochijchiuayaya amatlajkuiloli ipan hindi, tamil, telugu uan urdu.

Kema Alfred Joseph uan Leonard Blackman itstoyaj ipan Sierra Leona, kititlankej se carta ipan ueyi kali Betel tlen Brooklyn (Nueva York) pampa kinekiyayaj ma kintitlanikaj sekinok toikniuaj ipan nopa altepetl. Ipan abril 14, 1923, kinnankilijkej. Alfred kiijtok: “Se sábado ika tlayoua se akajya nechnojnotski ipan teléfono”. Katli kinojnotski chikauak kitlajtlanik: “¿Ta titlajtlanki ipan Sociedad Watch Tower ma kintitlanikaj tlajtolmoyauanij kampa tiitstok?”. Alfred kinankilik: “Kena”. Nopa toikni kiijtok: “Na nechtitlankej ma nia nopaya”. Nopa tlakatl katli kinojnotski eliyaya William Brown. Ipan nopa tonali asitoyaj ipan nopa altepetl uan kistejtoyaj ipan Caribe iuaya isiua Antonia uan omej isiuapiljuaj, Louise uan Lucy. Toikniuaj tlen Sierra Leona nima kinixmatkej toikni Brown uan ichampoyouaj.

 Alfred nojua kiijtok: “Ualmostla ika ijnalok kema Leonard uan na tijpouayayaj Biblia, se ueyi tlakatl moketsako kalteno: eliyaya William Brown. Ya tlauel kipaktiyaya tlamachtis, yeka kinekiyaya tlamachtis ualmostla”. Kema ayamo tlamiyaya se metstli, toikni Brown temakak nochi nopa amatlajkuiloli tlen kiuikatoya. Teipa kititlanilijkej seyok 5 mil amochtli, nojkia nima kimoyajki uan sampa monejki tlajtlanis. Pero maseualmej amo kiitayayaj kej se katli kinamakayaya libros, pampa nochipa kitekiuiyaya Biblia kema tlamachtiyaya. Ya kuali kitekipanok Jehová miak xiuitl uan kiixmatiyayaj kej Brown katli kitekiuia Biblia.

Ipan nopa tonali, kali Betel tlen Barmen (Alemania) ayokmo kinkuiyaya toikniuaj, uan franceses kinekiyayaj moaxkatisej nopa altepetl. Estudiantes de la Biblia kipantijkej se keski kali ipan Magdeburgo uan nopaya ueliskia kichijchiuasej amatlajkuiloli. Ipan junio 19, toikniuaj kiajojkej nochi uan nojkia tlen kitekiuiyayaj ipan imprenta, uan yajkej ipan nopa yankuik kali Betel. Ualmostla, kema tlamatiltijkej ipan ueyi kali Betel ya itstoyaj Magdeburgo, ipan periódicos kiijtojkej Francia moaxkatijtoya Barmen. Toikniuaj kiitakej Jehová kinmokuitlauiyaya uan kinteochiuayaya.

George Young tlajtolmoyajki ipan pilaltepetsitsij tlen Brasil. Nopaya kipeualtik se kali Betel uan pejki kitlajtolkuepa ika portugués pilamochtsi The Watch Tower. San ipan se keski metstli ya temakatoya kipano 7 mil amatlajkuiloli. Kema toikni George Young asito Brasil, tlauel kipaleuik tosiuaikni Sarah Ferguson. Tosiuaikni pejki kipoua pilamochtsi The Watch Tower ipan 1899, pero ayamo moatsonpoliuiltijtoya. Kema panok se keski metstli, tosiuaikni Sarah Ferguson uan nauij ikoneuaj moatsonpoliuiltijkej.

Itlamia xiuitl 1923, pilamochtsi The Watch Tower tlen diciembre 15, 1923, kiijtok kenijkatsa tlapaleuijtoya nochi tlen kipatlatoyaj. Kiijtok: “Ipan tlanechikoli [ . . . ] nesi nochi kuali tlaneltokaj [ . . . ]. Yeka nojkia ma tijchiuakaj kampeka kuali titlaneltokasej uan tijtekipanosej Jehová ika pakilistli ipan xiuitl 1924”.

Ipan 1924, panok se tlamantli tlen kichijki tlauel ma yolpakikaj Estudiantes de la Biblia. Toikniuaj tlen Ueyi Kali Betel tlen Brooklyn, pejtoyaj kichijchiuaj se kali ipan Staten Island uan tlankej kichijchiuaj ipan 1924. Nopa kali kinpaleuik toikniuaj más ma mosentikapaleuikaj uan tlauel ma tlajtolmoyauakaj.