Tlen maseualmej kinekij kimatisej
¿Israeleuanij san kinkuajkej solimej uan maná ipan uaktok tlali?
Ipan nopa 40 xiuitl kema israeleuanij itstoyaj ipan uaktok tlali, kikuayayaj maná (Éx. 16:35). Teipa, Jehová ompa kinmakak solimej o codornices (Éx. 16:12, 13; Núm. 11:31). Pero israeleuanij nojkia kipiayayaj sekinok tlakualistli maske amo tlauel miak.
Se neskayotl, kemantika Jehová kinuikayaya israeleuanij “kampa moseuisej”, uan nopaya kipantiyayaj atl uan tlakualistli (Núm. 10:33). Kema asitoj Elim, kipantijkej “12 ameli uan 70 apachkuatinij”, tlen uelis temakayayaj inintlajka tlen itoka dátiles (Éx. 15:27). Nopa amochtli Plants of the Bible, kiijtoua nopa apachkuauitl “moskaltia ipan miak altepemej, […] nopa apachkuauitl temaka itlajka ipan uaktok tlali; miakej maseualmej kikuaj, ika kichiuaj aceite uan moekauiliaj nopaya”.
Uelis israeleuanij nojkia mosiajketskej kampa eltoya se akomoli, tlen nama kiixmatij kej Farán, tlen eltok ipan tlamayamitl Farán. a Nopa amochtli Discovering the World of the Bible, kiijtoua ni tlamayamitl “kipia 130 km iueueyaka, tlauel ueyi, yejyektsitsij uan tlauel kiixmatij ipan Sinaí”. Nopa amochtli nojkia kiijtoua: “Se 45 km tlen nopa tlamayamitl, eltok nopa akomoli Farán. Nopaya onka miak apachkuauitl. Ni akomoli iueueyaka se 4.8 km uan amo eltok kampa tlauel tlauejkapa, se 610 metros tlen mar. Miakej kiijtouaj nopaya tlauel tlayejyektsi. Eltok miak apachkuauitl tlen temaka dátiles, yeka miakej maseualmej kinpaktia yasej nopaya”.
Apachkuatinij tlen temakaj inintlajka ipan tlamayamitl Farán.
Kema israeleuanij kistejkej tlen Egipto, kiuikayayaj harina, kampa tlaxakualouayayaj, aceite uan sekinok tlamantli tlen kikuaskiaj. Pero nopa tlamantli nima tlanki. Nojkia kinuikakej “miak borregojmej uan uakaxmej” (Éx. 12:34-39). Pero uelis miakej tlapialmej mijkej pampa tlauel tlauaktoya kampa nemiyayaj. Uelis israeleuanij kinkuajkej se keskij tlapialmej uan nojkia kimakakej Jehová kej tlakajkaualistli o kinmakakej sekinok teotsitsij (Hech. 7:39-43). b Maske kiampa eliyaya kampa nemiyayaj, israeleuanij nojua kiniskaltijkej borregojmej uan uakaxmej. Kiampa tikijtouaj pampa kema israeleuanij amo kineltokakej Jehová, ya kiniljuik: “Inmokoneuaj [kinmokuitlauisej borregojmej] ipan ni uaktok tlali para 40 xiuitl” (Núm. 14:33). Yeka uelis kena kipiayayaj leche uan nakatl, pero amo kinaxilik nopa tres millones maseualmej ipan 40 xiuitl. c
¿Kanke kikuikej atl uan tlakualistli para inintlapialjuaj? d Ipan nopa tonali uelis tlauel uetsiyaya atl, yeka onkayaya miak xiuitl ipan uaktok tlali. Ipan tlamachtili “Arabia” tlen amochtli Perspicacia para comprender las Escrituras, kiijtoua kipia se 3,500 xiuitl “ipan Arabia amo tlauel uakiyaya atl kej ipan ni tonali”. Nojkia kiijtoua: “Ipan nopa tlamayamitl onka miak tlakomoli kampa nesi motekayaya atl. Ni kinextia uejkajkia kena tlauel uetsiyaya atl”. Maske kiampa eliyaya, nochipa tlauaktoya uan amo aka itstoya nopaya (Deut. 8:14-16). Tlaj Jehová amo kinmakatoskia atl israeleuanij, inijuantij uan inintlapialjuaj miktoskiaj (Éx. 15:22-25; 17:1-6; Núm. 20:2, 11).
Moisés kiniljuik israeleuanij Jehová kintlamakatoya ika maná para kimatisej “axsan ika pantsi moneki para itstos se tlakatl. Nojkia moneki kineltokatias nochi Itlajtol TOTEKO” (Deut. 8:3).
a Xikita La Atalaya mayo 1, 1992, iamayo 24, 25.
b Biblia kiijtoua israeleuanij ompa kimakakej Jehová tlakajkaualistli kema itstoyaj ipan uaktok tlali. Achtoui kichijkej kema pejkej tekitij sacerdotes, uan teipa kichijkej ipan Pascua. Kiampa kichijkej ipan xiuitl 1512 a.u.J., uelis se xiuitl teipa kema kistejkej tlen Egipto (Lev. 8:14–9:24; Núm. 9:1-5).
c Kema nechka tlamiskia nopa 40 xiuitl kema israeleuanij itstoyaj ipan uaktok tlali, kinkuitejkej tlauel miakej tlapialmej kema kinteuijkej ininkualankaitakauaj (Núm. 31:32-34). Maske kiampa kichijkej, nojua kikuajkej maná hasta kema asitoj ipan nopa tlali tlen Jehová kitenkauilijtoya (Jos. 5:10-12).
d Biblia amo kiijtoua tlaj tlapialmej kikuayayaj maná, pampa Jehová kiniljuik israeleuanij ma kipejpenakaj san tlen sejse maseuali kikuaskia (Éx. 16:15, 16).
