1. ¿Kiita Jehová tlen techpano?

 JEHOVÁ kiita nochi tlen techpano. Kiita kema tiyolpakij uan kema timotekipachouaj (Sal. 37:18). Uan tlauel yolpaki kema tijchiuaj kampeka tijtekipanosej maske tlauel timokuesouaj. Yeka kineki techpaleuis uan techyolchikauas.

2. ¿Kenijkatsa kinpaleuia Jehová katli tlauel moyolkuesojtokej, uan tlake uelis tijchiuasej tlaj tijnekij ma techpaleui?

² Salmo 147:3 tlauel kinpaleuis katli mokuesouaj pampa nopaya kiijtoua Jehová “kinpajtia kampa mokokojtokej”. Ni texto kinextia ya kinmokuitlauia ika miak tlaiknelili katli tlauel moyolkuesouaj. ¿Tlake uelis tijchiuasej tlaj tijnekij ma techpaleui? Ma timoiljuikaj ipan ni tlamantli: kema se akajya mokokoua, moneki yas kiitati se tepajtijketl. Pero tlaj kineki mochikauas, moneki kichiuas nochi tlen kiiljuis. Ipan ni tlamachtili tikitasej tlake kiniljuia Jehová katli moyolkuesojtokej uan kenijkatsa uelis kichiuasej ipan ininnemilis tlen kiniljuia ika miak tlaiknelili.

JEHOVÁ TECHPALEUIA MA TIMOPATIITAKAJ

3. ¿Kenke se keskij kiyolmatij amo tleno ininpati?

³ Ipan ni tonali, miakej amo teikneliaj. Miakej kintlaijiyouiltiaj sekinok uan kichiuaj ma kiyolmatikaj amo tleno ininpati.  Tosiuaikni Helen, a kiijtoua: “Tlauel ouij kej timoskaltijkej. Notata tlauel mosisiniyaya uan mojmostla techiljuiyaya san tlapik tiitstokej”. ¿Nojkia kiampa mitspanotok? Uelis tlauel mitstlaijiyouiltijkej, nochipa mitsiljuiyayaj amo kuali tijchiuayaya se tlenijki o kichiuayayaj xijyolmati amo kinamikiyaya mitsiknelisej. Tlaj kiampa mitspanok, uelis tijmati ouij tijneltokas se akajya nelia kitekipachoua tlen mitspano.

4. Kej kiijtoua Salmo 34:18, ¿tlake kichiua Jehová?

⁴ Maske sekij mitstlaijiyouiltijkej, uelis timotemachis Jehová mitsiknelia uan mitspatiita. Ya “itstok ininnechka [ . . . ] tlen mokuesouaj” (xijpoua Salmo 34:18). Tlaj tlauel timokuesoua, xikilnamiki Jehová kiitak tijpia kuali moyolo uan yeka kinejki xijtekipano (Juan 6:44). Ya nochipa mitspaleuis pampa tlauel mitsiknelia.

5. ¿Tlake techmachtia tlen Jesús kichijki kema kinechkauiyayaj katli amo kinpatiitayayaj?

⁵ Tlen kichijki Jesús techpaleuia ma tijkuamachilikaj kenijkatsa eli Jehová. Kema itstoya ipan Tlaltipaktli kinejki kinpaleuis uan kintlasojtlak katli amo kinpatiitayayaj (Mat. 9:9-12). Kema se siuatl katli tlauel mokokouayaya kiitskik iyoyo Jesús pampa kinekiyaya mochikauas, ya kiyoltlalik uan kiyolchikajki pampa kiiljuik kuali tlaneltokayaya (Mar. 5:25-34). Jesús kichijki sanse kej iTata (Juan 14:9). Uajka, uelis timotemachis Jehová mitspatiita uan kiita nopa kuajkuali tlamantli tlen tijnextia. Kiita kuali titlaneltoka uan tikiknelia.

6. ¿Tlake uelis tijchiuasej tlaj tijyolmatij amo tleno topati?

⁶ ¿Tlake uelis tijchiuas tlaj nojua timoiljuia amo tleno mopati? Xijpoua se keski textos tlen mitspaleuis ximotemachi Jehová  mitsiknelia uan ximoyoliljui ipan tlen tijpouas (Sal. 94:19). b Tlaj amo uelki tijchiua tlen timosentlalijtoya o amo ueli tijtekipanoua Jehová kej sekinok, amo ximoyolkoko yon ximotetsopa. Jehová mitskuamachilia uan amo mitschiualtia xijchiua tlen amo tiyajati o amo tiueli (Sal. 103:13, 14). Tlaj mitstlaijiyouiltijkej o mitschiuilijkej tlen amo kuali, amo ximoyolkoko pampa amo elki motlajtlakol. Xikilnamiki, Jehová kintlajtolsenkauas katli kichiuaj tlen amo kuali uan amo katli kintlaijiyouiltijkej (1 Ped. 3:12). Sandra, katli tlauel kitlaijiyouiltijkej kema eliyaya siuapil, kiijtoua: “Nochipa nijtlajtlania Jehová ma nechpaleui nikitas nopa kuajkuali tlamantli tlen nijnextia sanse kej ya kiita”.

7. ¿Kenijkatsa uelis techpaleuis tlen uejkajkia techpanok?

⁷ Maske kemantika timoiljuia amo uelis tikinpaleuis sekinok, Jehová uelis mitstekiuis. Ya mitsmakatok se ueyi tlateochiualistli pampa mitskaua xikinmachti sekinok maseualmej (1 Cor. 3:9). Uelis tlen mitspanok uejkajkia, mitspaleuia xikinkuamachili uan xikinikneli katli tlaijiyouiaj. Tlauel tikinpaleuis ika tlen tijchiua. Helen, katli tikijtojkej ipan párrafo 3, nama nojkia ueli kinpaleuia sekinok pampa kipaleuijkej. Ya kiijtoua: “Achtouia nijyolmatiyaya amo tleno nopati. Pero Jehová nechpaleuijtok ma nikita nechiknelia uan ma nimopatiita”. Helen eli precursora regular uan tlauel yolpaki.

JEHOVÁ KINEKI MA TIMOTEMACHIKAJ NELIA TECHTLAPOJPOLJUIA

8. ¿Tlake techiljuia Jehová ipan Isaías 1:18?

⁸ Se keskij Jehová itekipanojkauaj moyolkokouaj pampa tlajtlakolchijkej kema ayamo moatsonpoliuiltijtoyaj o teipa. Pero ma tikilnamikikaj Jehová kitemaktilik iKone pampa tlauel techiknelia. Uajka, uelis timotemachisej ya kineki ma techpaleui iKone imikilis. Jehová techiljuia: “Xiualakaj nimantsi uan ma tijsenkauakaj tocuentas”. c Uan kema ya tijchijtosej ni tlamantli, ya kiijtoua techtlapojpoljuis (xijpoua Isaías 1:18). Tlauel tiyolpakij pampa toTeko kiilkaua nopa tlajtlakoli tlen tijchijkej uejkajki, pero amo kema kiilkaua tlen kuali tijchijtokej (Sal. 103:9, 12; Heb. 6:10).

9. ¿Ipan tlake moneki timosentlalisej, uan kenke?

⁹ ¿Tlake uelis tijchiuas tlaj nojua timoyolkokoua pampa titlajtlakolchijki? Ximosentlali ipan tlen ueli tijchiua nama uan ipan tlen uelis tijchiuas teipa. Ximoiljui tlen kichijki apóstol Pablo. Maske moyolkokouayaya pampa kintlaijiyouiltik Cristo itokilijkauaj, ya motemachiyaya Jehová kitlapojpoljuijtoya (1 Tim. 1:12-15). Yeka, mosentlalik kiilkauas nopa tlajtlakoli tlen kichijki achtouia, sanse kej kiilkajki nopa tlamantli tlen kikajtejki kema itstoya ipan religión judía (Filip. 3:4-8, 13-15). Pablo nochipa tlajtolmoyajki ika pakilistli uan mosentlalik ipan tlen kiseliskia teipa. Sanse kej Pablo, maske amo uelis tijpatlas tlen tijchijki uejkajkia, kena uelis tijtekipanos Jehová uan uelis timosentlalis ipan tlen tijselis teipa.

10. ¿Tlake uelis tijchiuas tlaj titeyolkokok ika tlen tijchijki?

¹⁰ Uelis timoyolkokoua pampa tlen tijchijki nojkia kinyolkokok sekinok. ¿Tlake uelis tijchiuas? Xikiniljui ika nochi moyolo ma mitstlapojpoljuikaj uan xijchiua kampeka sampa  kuali ma itstokaj (2 Cor. 7:11). Xikiljui Jehová ma kinpaleui katli tikinyolkokok. Ya uelis mitspaleuis sampa xiyolpaki uan nojkia uelis kinpaleuis inijuantij sampa kuali ma kiyolmatikaj.

11. ¿Tlake techmachtia tlen kichijki Jonás? (Xikita tlaixkopinkayotl).

¹¹ Ximotlalnamikti ika tlen tijchijki uan xijkaua Jehová ma mitstekiui kej ya kineki. Xikilnamiki tlen kichijki teokamanalojketl Jonás. Maske Jehová kiiljuijtoya ma yaui Nínive, yajki sejkanok. Jehová kitlakaualtik, uan ya motlalnamiktik (Jon. 1:1-4, 15-17; 2:7-10). Jehová nojua kitekimakak uan sampa kiiljuik ma yaui Nínive. Uan nama, Jonás kena tlaneltokak. Maske moyolkokouayaya ika tlen kichijki, kiselik nopa tekitl tlen Jehová kimakak uan amo kikajki yon se tlamantli ma kitsakuili (Jon. 3:1-3).

JEHOVÁ TECHYOLCHIKAUA IKA ICHIKAUALIS

12. ¿Kenijkatsa techyoltlalia Jehová kema techpano se kuesoli o techmajmatia se tlamantli? (Filipenses 4:6, 7).

¹² Kema techpano se kuesoli o techmajmatia se tlamantli, Jehová techyoltlalia ika ichikaualis. Kiampa kinpanok Ron uan Carol kema momiktik ininkone katli eliyaya achtouiejketl. Inijuantij kiijtouaj: “Maske ya tikixnamiktoyaj sekinok tlaouijkayotl, kema momiktik tokone tijmatkej tlauel ouij. Miakpa amo ueliyaya tikochij, yeka timomaijtouayayaj uan Jehová techmakayaya tlaseuilistli kej kiijtoua Filipenses 4:6, 7” (xijpoua). Tlaj tikixnamiktok se tlaouijkayotl uan tlauel timoyolkokoua, xikiljui Jehová nochi tlen tijyolmati. Uelis tijnojnotsas kema ta tijnekis uan tiuejkauas kema timomaijtos (Sal. 86:3; 88:1). Nochipa xijtlajtlani ma mitsmaka ichikaualis. Uan ximotemachi ya mitstlakakilis (Luc. 11:9-13).

13. ¿Kenijkatsa uelis techpaleuis ichikaualis Dios nojua ma tijtekipanojtokaj Jehová? (Efesios 3:16).

¹³ ¿Tikixnamiktok se tlaouijkayotl uan tijmati ayokmo tijpia chikaualistli? Ichikaualis Dios mitspaleuis kuali xijtekipanojto Jehová (xijpoua Efesios 3:16). Ma tikitakaj tlen kipanok tosiuaikni Flora. Ya uan iueue eliyayaj misioneros. Pero iueue kikajkayajki uan yeka moamaxolejkej. Flora kiijtoua: “Mojmostla nitlaijiyouiyaya pampa noueue nechkajkayajki. Yeka nikiljuiyaya Jehová ma nechmaka ichikaualis uan kiampa ueliskia nikijiyouis tlen nechpanoyaya. Jehová nechyolchikajki uan nechpaleuik ayokmo ma nimokueso maske nimoiljuiyaya amo ueliskia kiampa nijchiuas”. Flora kiijtoua Jehová kipaleuik ma kiita nelia kipaleuijtoya. Uan nama motemachia maske kiixnamikis tlen ueli tlamantli, Jehová nochipa kipaleuis. Nojkia kiijtok: “Jehová nechpaleuik kej kiijtoua Salmo 119:32: ‘Intla tinechmakas noyolo tlen kuali moixtla, uajka na achi más nijchijtinemis tlen kiijtouaj motlanauatiljuaj’”.

14. ¿Tlake moneki tijchiuasej tlaj tijnekij Dios ma techmaka ichikaualis?

¹⁴ ¿Tlake uelis tijchiuas tlaj ya tikiljuik Jehová ma mitsmaka ichikaualis? Xijchiua se keski tlamantli tlen mitspaleuis tijselis ichikaualis, uelis tias tlanechikoli uan titlajtolmoyauas. Nojkia, mojmostla xijpoua Biblia pampa mitspaleuis ximoiljui san ipan tlen Jehová kineki (Filip. 4:8, 9). Kema tijpouas, xikita tlake tlaouijkayotl kiixnamijkej se keskij itekipanojkauaj Dios uan ximoyoliljui kenijkatsa Jehová kinpaleuik. Ipan párrafo 6 tikitakej Sandra kiixnamijki miak tlaouijkayotl. Ya kiijtoua: “Tlen kipanok José, tlauel nechyolchikaua. Ya nochipa kichijki kampeka kuali mouampojchijtos iuaya Jehová maske  kiixnamijki tlaouijkayotl uan kitlaijiyouiltijkej” (Gén. 39:21-23).

JEHOVÁ KINTEKIUIA TOIKNIUAJ PARA MA TECHYOLCHIKAUAKAJ

15. ¿Ajkia inijuantij uelis techyolchikauasej uan kenijkatsa uelis kichiuasej? (Nojkia xikita tlaixkopinkayotl).

¹⁵ Kema tikixnamikij tlaouijkayotl, toikniuaj uelis tlauel techpaleuisej uan techyolchikauasej (Col. 4:11). Jehová uelis kintekiuis toikniuaj uan kiampa kinextis tlauel techiknelia. Inijuantij techyolchikauaj kema techtlakakiliaj o kema techpaxalouaj. Kemantika techyolchikauaj ika se texto o momaijtouaj touaya (Rom. 15:4). d Uelis se toikni o se tosiuaikni techpaleuis ma tikitakaj se tlamantli kej Jehová kiita, uan nopa techpaleuis amo tlauel ma timokuesokaj. Uan kemantika toikniuaj nojkia techuikiliaj tlakualistli o techpaleuiaj ika sekinok tlamantli.

16. ¿Tlake moneki tijchiuasej tlaj tijnekij sekinok ma techpaleuikaj?

¹⁶ Tlaj tijnekij ma techpaleuikaj, moneki tikiniljuisej toikniuaj. Inijuantij techikneliaj uan kinekij techpaleuisej (Prov. 17:17). Pero uelis amo kimatij tlake tijyolmatij uan kenijkatsa uelis techpaleuisej (Prov. 14:10). Tlaj timoyolkokoua, xikintemo toikniuaj katli kuali tlaneltokaj uan xikiniljui tlen tijyolmati. Tlauel mitspaleuis tlaj tikiniljuis kenijkatsa tijneki ma mitspaleuikaj. Nojkia, uelis tikamanaltis iuaya se o omej  ueuejtlakamej katli ipan timotemachia. Se keskij tosiuaikniuaj nojkia kuali kiyolmatij kema kamanaltij iuaya se tosiuaikni katli kuali tlaneltoka.

17. ¿Kenke kemantika ouij tijmatij tikinkauasej toikniuaj ma techyolchikauakaj, uan tlake uelis tijchiuasej?

¹⁷ Xijchiua kampeka amo timouejkatlalis. Kema timokuesouaj amo tijnekij tiitstosej ininuaya sekinok. Uelis toikniuaj amo techkuamachilisej o kiijtosej se tlenijki tlen techyolkokos (Sant. 3:2). Amo xijkaua nopa tlamantli ma mitsuejkatlali tlen inijuantij. Tlaj kiampa tijchiuas, amo uelis mitsyolchikauasej. Gavin, se ueuejtlakatl katli mokuesoua miak tonali, kiijtok: “Miakpa ouij nijmati niitstos ininuaya nouampoyouaj”. Maske kemantika ouij kimati, kichiua kampeka itstos ininuaya sekinok, uan kemantika nopa kipaleuia kuali ma kiyolmati. Tosiuaikni Amy kiijtoua: “Tlen nechpanok kichijki ouij ma nijmati nimotemachis ipan sekinok. Pero nijchiua kampeka nikiniknelis toikniuaj uan nimotemachis ipan inijuantij sanse kej Jehová. Nopa kichiua tlauel ma yolpaki uan na nojkia”.

TECHYOLCHIKAUA TLEN JEHOVÁ KIIJTOJTOK KICHIUAS

18. ¿Kenijkatsa tiitstosej teipa, uan tlake uelis tijchiuasej nama?

¹⁸ Tlauel tiyolpakij pampa Jehová nechka kichiuas ayokmo ma timokokokaj uan amo ma timokuesokaj, uan kitlamiltis nochi tlen techtlaijiyouiltia (Apoc. 21:3, 4). Kema moyankuilis nochi tlen onka, maseualmej “ayokmo kiilnamikisej yon eltos ipan ininyolo” tlen kintlaijiyouiltik (Is. 65:17, TNM). Uan kej tikitakej ipan ni tlamachtili, ipan ni tonali Jehová techyolchikaua kema tikixnamikij tlaouijkayotl. Kitekiuia miak tlamantli kema techyolchikaua uan techyoltlalia. Yeka, kuali ma tijtekiuikaj nochi tlen techmaka. Uan nochipa ximotemachi Jehová kitekipachoua tlen mitspano (1 Ped. 5:7).