TLAMACHTILI 42
UIKATL 103 Ueuejtlakamej elij se tlateochiualistli
Ma tikinpatiitakaj tlakamej katli elij “kej regalos”
“Kema yaya tlejkok uejkapa, [ . . . ] temakatejki tlakamej kej regalos” (EFES. 4:8).
TLEN MOIXTOMAS
¿Tlake tekitl kichiuaj toikniuaj tlapaleuianij, ueuejtlakamej uan katli tepaxalouaj chijchikuasej metstli? ¿Uan kenijkatsa uelis tijnextisej tikintlaskamatiliaj pampa kichiuaj nopa tekitl?
1. ¿Tlake regalos techmakatok Jesús?
JESÚS nochipa kipaktijtok temakas se tlenijki. Kema itstoya ipan Tlaltipaktli, kitekiuik ichikaualis uan kiampa kinpaleuik miakej maseualmej (Luc. 9:12-17). Uan nojkia techmakak se ueyi regalo pampa motemaktilik por tojuantij (Juan 15:13). Uan kema moyolkuik, nojua kiampa kichijki. Ya kichijki tlen kitenkajki pampa kitlajtlanik Jehová ma techmaka ichikaualis para techmachtis uan techyolchikauas (Juan 14:16, 17; 16:13). Nojkia Jesús techmachtia ipan tlanechikoli, nopaya technextilia kenijkatsa titlamachtisej ipan nochi Tlaltipaktli (Mat. 28:18-20).
2. ¿Ajkia inijuantij elij “kej regalos”? (Efesios 4:7, 8).
2 Pero Jesús techmakatok sekinok regalos. Apóstol Pablo kiijtok kema Jesús yajki iluikak “temakatejki tlakamej kej regalos” (xijpoua Efesios 4:7, 8). Kiijtok kinkajtejki ni regalos para ma tlapaleuikaj ipan tlanechikoli (Efes. 1:22, 23; 4:11-13). Ipan ni tonali, tlapaleuianij, ueuejtlakamej uan katli tepaxalouaj chijchikuasej metstli, a elij “kej regalos”. Ni tlakamej nojkia elij tlajtlakolejkej uan mokuapolouaj (Sant. 3:2). Maske kiampa elij, Jesús kintekiuia para ma techpaleuikaj.
3. Xikixtoma ika se neskayotl kenijkatsa uelis tikinpaleuisej ni tlakamej katli Jesús techmakatok kej regalos.
3 Jesús temakatejki ni “tlakamej kej regalos” para ma tlapaleuikaj ipan tlanechikoli (Efes. 4:12). Uan tojuantij uelis tikinpaleuisej para kuali ma kichiuakaj ininteki. Ma timoiljuikaj ipan ni tlamantli: kema kichijchiuaj se kali kampa timonechikouaj, san se keskij toikniuaj tekitij nopaya. Pero sekij kinuikiliaj tlakualistli, kinuikaj ipan carro kampa tekitij o kinpaleuiaj ika sekinok tlamantli. Sanse kej mosentikapaleuiaj inijuantij, tojuantij nojkia uelis tikinpaleuisej tlapaleuianij, ueuejtlakamej uan katli tepaxalouaj chijchikuasej metstli ika tlen tijchiuasej uan tikijtosej. Ma tikitakaj kenijkatsa techpaleuia nopa tekitl tlen kichiuaj ni toikniuaj uan kenijkatsa uelis tikintlaskamatilisej inijuantij uan Jesús pampa tijpiaj ni regalos.
“KATLI TLAPALEUIAJ” KUALI KICHIUAJ ININTEKI
4. ¿Tlake tekitl kichiuayayaj tlapaleuianij ipan achtoui siglo?
4 Ipan achtoui siglo, se keskij toikniuaj kintekimakayayaj kej tlapaleuianij (1 Tim. 3:8). Uelis inijuantij eliyayaj katli tlapaleuiyayaj kej kiijtok Pablo ipan 1 Corintios 12:28. Kichiuayayaj se keski tekitl uan kiampa ueuejtlakamej ueliskiaj tlamachtisej uan kinpaxalosej toikniuaj. Uelis tlapaleuianij kimaixkopinayayaj iTlajkuilol Dios o kikouayayaj se keski tlamantli kampa tlajkuilosej.
5. ¿Tlake tekitl kichiuaj toikniuaj tlapaleuianij ipan ni tonali?
5 Ipan ni tonali, katli elij tlapaleuianij nojkia tlauel tekitij ipan tlanechikoli (1 Ped. 4:10). Uelis inijuantij kiitaj keski tomij kisa ipan tlanechikoli uan keski motekiuia, kiitaj kanke kinmelaua tlajtolmoyauasej, tlajtlanij amatlajkuiloli uan kinmajmakaj toikniuaj, kitlaliaj uikatl uan videos, kiniljuiaj toikniuaj kanke uelis moseuisej o tlapaleuiaj ma kikualchijchiuakaj kali kampa monechikouaj. Nochi ni tlamantli tlapaleuia kuali ma itstokaj toikniuaj ipan tlanechikoli (1 Cor. 14:40). Uan sekij tlapaleuianij kiniljuiaj ma kiixtomakaj se tlamachtili ipan tlanechikoli Kej Timonejnemiltiaj uan Titlajtolmoyauaj o ipan tlanechikoli tlen mochiua sábado o domingo. Nojkia uelis kiniljuisej ma kipaleuikaj nopa toikni katli kiyakana se grupo. Uan kemantika se ueuejtlakatl kiiljuia se tlapaleuijketl ma yaui iuaya kiyolchikauati se toikni.
6. ¿Kenke tlauel tijpatiitaj tlen kichiuaj tlapaleuianij?
6 Tlauel tijpatiitaj nopa tekitl tlen kichiuaj tlapaleuianij. Ma tikitakaj tlake kiijtojkej se keskij toikniuaj. Tosiuaikni Beberly, b katli eua Bolivia, kiijtoua: “Tlauel niyolpaki kema nia tlanechikoli pampa toikniuaj tlapaleuianij kitlaliaj uikatl, techpanoltiliaj micrófono kema titlanankiliaj, kitlaliaj videos uan tlaixkopinkayomej. Tlen kichiuaj techpaleuia kuali ma tijtlakakilikaj tlamachtili. Techmokuitlauiaj kema tiitstokej ipan tlanechikoli uan kinpaleuiaj ma kiitakaj tlanechikoli ipan videollamada katli amo uelij yauij. Uan kema tlami timonechikouaj, tlachpanaj, kiitaj keski tomij kiski uan techmakaj nopa amatlajkuiloli tlen tijtekiuiaj. ¡Tlauel nijpatiita tlen kichiuaj!”. Leslie, katli eua Colombia uan iueue eli ueuejtlakatl, kiijtoua: “Toikniuaj tlapaleuianij tlauel kipaleuiaj noueue. Tlaj amo kipaleuiskiaj, kipiaskia más tekitl. Yeka tlauel nikintlaskamatilia pampa tekitij ika pakilistli uan kichiuaj ika nochi ininyolo”. Tojuantij nojkia tlauel tikintlaskamatiliaj (1 Tim. 3:13).
7. ¿Kenijkatsa uelis tijnextisej tijtlaskamatij tlen kichiuaj tlapaleuianij? (Nojkia xikita tlaixkopinkayotl).
7 Amo san moneki timoiljuisej tlauel kuali tlen kichiuaj tlapaleuianij, nojkia moneki tijchiuasej tlen kiijtoua Colosenses 3:15: “Xijnextikaj intetlaskamatij”. Ma tikitakaj tlen kichiua David, se ueuejtlakatl katli eua Finlandia, ya kiijtoua: “Kemantika nijtlajkuiljuilia se tlapaleuijketl ipan se pilamatsi o nijtitlanilia se mensaje ika se texto tlen Biblia. Nopaya nojkia nikiljuia tlauel nechyolchikajki se tlamantli tlen kichijki o nijtlaskamatilia pampa kuali tekiti”. Pascal uan Jael, katli itstokej Nueva Caledonia, kitlajtlaniaj Jehová ma kinpaleui tlapaleuianij. Inijuantij kiijtouaj: “Tlauel tijtlaskamatiliaj Jehová pampa itstokej tlapaleuianij ipan totlanechikol uan tikiljuiaj ma kinpaleui uan ma kinyakana”. Jehová techtlakakilia kema tijtlajtlaniaj ni tlamantli uan kiampa nochi kuali itstokej ipan tlanechikoli (2 Cor. 1:11).
UEUEJTLAKAMEJ “TEKITIJ CHIKAUAK” IPAN TLANECHIKOLI
8. ¿Kenke Pablo kiijtok ueuejtlakamej tlen achtoui siglo tlauel tekitiyayaj ipan tlanechikoli? (1 Tesalonicenses 5:12, 13).
8 Ipan achtoui siglo, ueuejtlakamej nojkia kichiuayayaj miak tekitl (xijpoua 1 Tesalonicenses 5:12, 13; 1 Tim. 5:17). Inijuantij kiyakanayayaj tlanechikoli, tlamachtiyayaj uan sansejko kitlapejpeniyayaj tlake monekiyaya mochiuas. Kintlajtolmakayayaj toikniuaj uan tosiuaikniuaj ika tlaiknelili pampa kinekiyayaj nochi kuali ma mouikakaj (1 Tes. 2:11, 12; 2 Tim. 4:2). Nojkia, kuali momachtiyayaj itlajtol Dios uan kinmokuitlauiyayaj ininchampoyouaj (1 Tim. 3:2, 4; Tito 1:6-9).
9. ¿Tlake tekitl kichiuaj ueuejtlakamej ipan ni tonali?
9 Ipan ni tonali ueuejtlakamej nojkia kipiaj miak tekitl, pampa nojkia tlajtolmoyauaj (2 Tim. 4:5). Kichiuaj kampeka kinmachtisej maseualmej, kuali kiitasej kanke tlajtolmoyauasej uan techmachtiaj kenijkatsa titlajtolmoyauasej uan titlamachtisej. Nojkia kema tetlajtolsenkauaj, amo techikoitaj uan tetlasojtlaj. Kema se akajya tlajtlakolchiua, kichiuaj kampeka kipaleuisej sampa kuali ma mouika iuaya Jehová, pero amo kikauaj ma mosokiui tlanechikoli (1 Cor. 5:12, 13; Gál. 6:1). Ueuejtlakamej nojkia techmokuitlauiaj (1 Ped. 5:1-3). Kuali mokualchijchiuaj kema tlamachtiaj, kichiuaj kampeka kuali kinixmatisej nochi toikniuaj uan kinpaxalouaj para kinyolchikauasej. Uan se keskij ueuejtlakamej tlapaleuiaj kema kichijchiuaj o kikualchijchiuaj se kali kampa titlaueyichiuaj, kiitaj kenijkatsa kichiuasej uejueyi tlanechikolistli, kamanaltij ininuaya tepajtianij, kinpaxalouaj kokoyanij ipan hospitales o kichiuaj sekinok tekitl. ¡Inijuantij tlauel techpaleuiaj!
10. ¿Kenke tlauel tikinikneliaj ueuejtlakamej?
10 Jehová kiijtojtoya ueuejtlakamej kuali techmokuitlauiskiaj, yeka ipan Jeremías 23:4 kiijtok itekipanojkauaj “ayok majmauisej [ . . . ] niyon ayok mokuesosej”. Kiampa kipanok tosiuaikni Johanna katli eua Finlandia, kema inana tlauel mokokok. Ya kiijtok: “Ouij nijmati nikijtos tlen nijyolmati. Pero se ueuejtlakatl katli amo tlauel nikixmati, kuali nechtlakakilik, momaijtok nouaya uan nechiljuik Jehová tlauel nechiknelia. Maske amo nikilnamiki tlake nechiljuik, ya kichijki kuali ma nijyolmati. Jehová kichijki ma nechpaleui kema amo kuali nijyolmatiyaya”. Uan ta, ¿kenijkatsa mitspaleuijtokej ueuejtlakamej?
11. ¿Tlake uelis tijchiuasej uan kiampa tijnextisej tijpatiitaj tlen kichiuaj ueuejtlakamej? (Xikita tlaixkopinkayotl).
11 Jehová kineki ma tikiniknelikaj ueuejtlakamej pampa inijuantij “tekitij chikauak” (1 Tes. 5:12, 13). Henrietta, katli nojkia eua Finlandia, kiijtoua: “Maske ueuejtlakamej kinpaleuiaj sekinok, amo kiijtosneki inijuantij kipiaj miak tonali, chikaualistli o amo kipiaj kuesoli. Yeka kemantika nia kampa itstok se ueuejtlakatl uan nikiljuia: ‘Nijneki xijmati, kuali titlatekipanoua kej ueuejtlakatl’”. Tosiuaikni Sera, katli eua Turquía, kiijtoua: “Ueuejtlakamej nojkia kinekij ma tikinyolchikauakaj para kichiuasej sekinok tekitl, yeka kemantika nikintlajkuiljuilia, nikintlaneui ma tlakuatij uan nitlajtolmoyaua ininuaya”. ¿Tikilnamiki se ueuejtlakatl katli tijneki tijtlaskamatilis tlen kichiua? Ximoiljui kenijkatsa uelis tijnextis tijpatiita tlen kichiua (1 Cor. 16:18).
Ta uelis tikinyolchikauas katli techyakanaj, kiampa uelis nojua kitekipanojtosej Jehová. (Xikita párrafo 7, 11, 15).
KATLI TEPAXALOUAJ TLAUEL TLAPALEUIAJ IPAN TLANECHIKOLI
12. ¿Tlake seyok regalo temakak Jesús pampa kinekiyaya kinyolchikauas toikniuaj? (1 Tesalonicenses 2:7, 8).
12 Jesús nojkia temakak seyok regalo ipan tlanechikoli. Ipan achtoui siglo, kinyakanki ueuejtlakamej tlen Jerusalén para ma kintitlanikaj Pablo, Bernabé uan sekinok para ma kinpaxalokaj toikniuaj (Hech. 11:22). ¿Kenke kintitlankej? Pampa inijuantij kinyolchikauaskiaj toikniuaj, sanse kej kichiuayayaj tlapaleuianij uan ueuejtlakamej (Hech. 15:40, 41). Pablo, Bernabé uan nopa sekinok, kikajkej miak tlamantli pampa kinekiyayaj kinmachtisej uan kinyolchikauasej toikniuaj maske kemantika ueliskiaj kinmiktisej (xijpoua 1 Tesalonicenses 2:7, 8).
13. ¿Tlake tekitl kichiuaj toikniuaj katli tepaxalouaj chijchikuasej metstli?
13 Katli tepaxalouaj chijchikuasej metstli, sejse semana yauij uejka pampa kinpaxalouaj toikniuaj ipan inintlanechikol. Sejse semana kiixtomaj miak tlamachtili, kinpaxalouaj ininchaj se keskij toikniuaj uan kinyolchikauaj, monechikouaj ininuaya precursores, ininuaya ueuejtlakamej uan kiyakanaj nopa tlanechikoli kema kisaj tlajtolmoyauaj. Nojkia, kikualchijchiuaj tlamachtili tlen kipanoltisej ipan uejueyi tlanechikolistli uan kiitakaj kenijkatsa mochiuas. Kiitaj kenijkatsa tlamachtisej kampa kinmachtiaj precursores, monechikouaj ika nochi precursores tlen inincircuito, uan kemantika moneki nima kichiuasej sekinok tekitl tlen kinnauatia kali Betel.
14. ¿Kenke tijpatiitaj nopa tekitl tlen kichiuaj katli tepaxalouaj chijchikuasej metstli?
14 ¿Kenijkatsa techpaleuia nopa tekitl tlen kichiuaj toikniuaj katli tepaxalouaj chijchikuasej metstli? Se toikni katli eua Turquía, kiijtoua: “Nikitstok moneki nijchiuas kampeka niitstos ininuaya toikniuaj uan nikinpaleuis pampa katli tepaxalouaj chijchikuasej metstli kiampa kichiuaj. Nikinixmajtok miakej uan yon se kinextijtok tlauel motekiuijtok o amo kineki kamanaltis nouaya”. Johanna, katli tikijtojkej ipan párrafo 10, tlajtolmoyajki iuaya toikni katli tepaxaloua pero amo aka kipantijkej. Ya kiijtoua: “Maske amo aka tijpantijkej ipan ichaj, amo nikilkaua nopa tonali. Omej nosiuaikniuaj yajkej sejkanok tlatekipanotoj uan tlauel nikintemouayaya. Nopa toikni tlauel nechyolchikajki, uan nechiljuik maske nama amo ueli tiitstokej sansejko, ipan yankuik Tlaltipaktli kena uelis”. Toikniuaj tlauel kinikneliaj katli tepaxalouaj chijchikuasej metstli pampa inijuantij nojkia kiampa kichiuaj (Hech. 20:37–21:1).
15. 1) ¿Kenijkatsa uelis tijchiuasej tlen kiijtoua 3 Juan 5-8 uan kiampa tijnextisej tikinpatiitaj katli tepaxalouaj chijchikuasej metstli? (Nojkia xikita tlaixkopinkayotl). 2) ¿Kenke moneki tijpatiitasej tlen kichiuaj uan tijnextisej tikinpatiitaj ininsiua katli techyakanaj? (Xikita recuadro “ Ma tikinpatiitakaj ininsiua”).
15 Apóstol Juan kiiljuik Gayo kuali ma kinseli toikniuaj katli kinpaxaloskiaj ipan inintlanechikol, kiiljuik: “Kuali para tikinpaleuis ipan iniojui tlen kitekipanouaj Toteko, pampa ya nopa kinamiki ma tijchiuakaj ika tlen kitekipanouaj Toteko” (xijpoua 3 Juan 5-8). ¿Kenijkatsa uelis tijchiuasej sanse kej Gayo? Uelis tikintlaneuisej toikniuaj katli tepaxalouaj chijchikuasej metstli ma tlakuatij tochaj uan nojkia tikisasej titlajtolmoyauasej ipan nopa semana. Ma tikitakaj tlen kichiua Leslie, katli tikijtojkej ipan párrafo 6. Ya kiijtoua: “Nijtlajtlania Jehová ma kinmaka tlen kinpoloua. Noueue uan na tikinchiuiliaj cartas kampa tikiniljuiaj kenijkatsa techyolchikauaj kema techpaxalouaj”. Ma tikilnamiktokaj, moneki tikinyolchikauasej toikniuaj katli techpaxalouaj chijchikuasej metstli pampa kemantika nojkia mokokouaj, kintekipachoua se keski tlamantli uan nojkia mokuesouaj. Tlaj tikinyolchikauaj ika tlen tikiniljuiaj o tikinmakaj se regalo, inijuantij uelis kiitasej kenijkatsa Jehová kinyolchikaua (Prov. 12:25).
MONEKI MÁS TOIKNIUAJ “KEJ REGALOS”
16. ¿Tlake uelis motlajtlanisej toikniuaj? (Proverbios 3:27).
16 Ipan miak tlanechikoli, moneki más toikniuaj tlakamej “kej regalos”. Tlaj ya timoatsonpoliuiltijtok, ¿uelis titlapaleuis? (Xijpoua Proverbios 3:27). ¿Tijchiua kampeka titlatekipanos kej tlapaleuijketl? Uan tlaj ya tieli tlapaleuijketl, ¿timosentlalijtok titlatekipanos kej ueuejtlakatl? c ¿Uelis tijpatlas se keski tlamantli ipan monemilis uan kiampa uelis tias kampa kinmachtiaj katli senkistok tlajtolmoyauaj? Tlaj tias timomachtiti nopaya, Jesús uelis más mitstekiuis. Tlaj timoiljuia amo uelis tijchiuas nopa tlamantli, xikiljui Jehová ma mitspaleui, ma mitsmaka ichikaualis uan kiampa uelis kuali tijchiuas tlen ueli tekitl tlen mitsmakasej ipan tlanechikoli (Luc. 11:13; Hech. 20:28).
17. ¿Tlake kinextia nopa tekitl tlen kichiuaj nopa tlakamej katli elij “kej regalos”?
17 Nopa tekitl tlen kichiuaj ni tlakamej katli elij “kej regalos”, kinextia Jesús techyakana ipan itlamia tonali (Mat. 28:20). ToTlanauatijka tlauel techiknelia uan kipaktia temakas tlen kipia, nochipa kiita tlake techpoloua uan kintlalia toikniuaj katli uelis techpaleuisej. Tlauel tiyolpakij pampa kichiua nochi ni tlamantli, yeka ma tijchiuakaj kampeka tijnextisej tijpatiitaj ni regalos tlen Jesús techmakatok. Uan nojkia, nochipa ma tijtlaskamatilikaj Jehová pampa ya techmaka “nochi tlen yejyektsi uan tlen kuali” (Sant. 1:17).
UIKATL 99 Tikinpiaj miakej toikniuaj
a Ueuejtlakamej katli tlatekipanouaj kej Katli kinyakanaj Jehová itlajtoltemakauaj, katli kinpaleuiaj Katli kinyakanaj Jehová itlajtoltemakauaj, katli kiyakanaj kali Betel uan sekinok ueuejtlakamej katli kichiuaj sekinok tekitl, nojkia elij “kej regalos”.
b Mopatlatok se keski tokajyotl.
c Tlaj tijneki tijmatis tlake uelis tijchiuas para tlatekipanos kej tlapaleuijketl o kej ueuejtlakatl, xikita nopa tlamachtili “¿Mitspaktiskia titlatekipanos kej tlapaleuijketl?” uan “¿Timosentlalijtok titlatekipanos kej ueuejtlakatl?”, ipan Tlen Tematiltia, noviembre 2024.
