1, 2. 1) ¿Tlake uelis timotlasintokiaj? 2) ¿Tlake tikitasej ipan ni tlamachtili?

 KEMANTIKA maseualmej amo kimatij tlaj kuali kitlapejpenijkej tlen kichijkej o tlaj kuali tlen kichiuasej. Ma timoiljuikaj ipan se telpokatl katli amo motemachia tlaj Jehová nelnelia kiiknelia uan yeka ouij kimati moatsonpoliuiltis. O ximoiljui ipan se toikni katli mosentlali kitekipanos Jehová kema eliyaya telpokatl uan amo san kinejki kitlanis tomij. Uan nama kinpia ichampoyouaj uan kimati ouij kinpanoltis, yeka motlajtlania tlaj kuali tlen kichijki kema eliyaya telpokatl. Nojkia ximoiljui se tosiuaikni katli ya ueyi uan ayokmo kipia chikaualistli, uelis moyolkokoua pampa ayokmo ueli tlatekipanoua kej achtouia. Uelis ta nojkia timotlajtlanijtok ni tlamantli: “¿Kiita Jehová tlen nijchiua? ¿Kuali tlen nijchijki pampa nimosentlalik nijtekipanos? ¿Nojua uelis kuali nijtekipanos Jehová?”.

² Tlaj kiampa timoiljuiaj, uelis kichiuas ayokmo kuali ma titlaneltokakaj uan ma timouejkatlalikaj tlen Jehová. Ipan ni tlamachtili tikitasej kenijkatsa Biblia techpaleuia kema timoiljuiaj Jehová amo techpatiita, kema timoiljuiaj amo kuali  tijtlapejpenijkej tlen tijchijkej o kema timoiljuiaj ayokmo uelis kuali tijtekipanosej Jehová.

TLEN TECHPALEUIS MA TIMOILJUIKAJ KEJ KINAMIKI

3. ¿Tlake techpaleuis ma timoiljuikaj kej kinamiki?

³ Biblia uelis techpaleuis ma timoiljuikaj kej kinamiki, ma timotemachikaj ipan Jehová, kuali ma timouikakaj iuaya uan ma timotemachikaj ipan tlen tijneltokaj (1 Cor. 16:13).

4. Kej kiijtoua 1 Tesalonicenses 5:21, ¿tlake moneki tijchiuasej tlaj tijnekij timoiljuisej kej kinamiki?

⁴ (Xijpoua 1 Tesalonicenses 5:21). Biblia kiijtoua: “Kuali xikitakaj nochi tlamantli”. ¿Kenijkatsa uelis tijchiuasej tlen kiijtoua ni texto? Moneki tikitasej tlaj tlen timoiljuiaj mouika ika tlen Biblia kiijtoua. Ma timoiljuikaj ipan se telpokatl katli amo motemachia tlaj Jehová nelnelia kiiknelia. ¿Kinamiki moiljuijtos san ipan nopa tlamantli? Amo, moneki kipouas Biblia pampa nopa kipaleuis ma kimati tlake moiljuia Jehová.

5. ¿Tlake uelis tijchiuasej tlaj tijnekij tijkakisej tlen Jehová moiljuia?

⁵ Kema tijpouaj Biblia, kejuak tijkauaj Jehová ma techkamanaljui. Pero tlaj tijnekij tijkakisej tlen techiljuis, moneki tijchiuasej se tlamantli. Moneki tijtemosej textos tlen techpaleuis ma tijsenkauakaj tlen techtekipachoua uan nojkia moneki tijtekiuisej tlen Jehová itlanechikol kichijchijtok para ika ma timomachtikaj (Prov. 2:3-6). Nojkia moneki tikiljuisej Jehová ma techyakana kema timomachtisej uan kiampa tijpantisej tlen tijnekij tijmatisej. Ma tikitakaj tlake textos uan tlamachtili uelis techpaleuis ipan nopa kuesoli tlen tijpiaj. Nojkia tlauel techpaleuis tlaj tijpouasej ipan Biblia tlen kinpanok se keskij Dios itekipanojkauaj katli kiixnamijkej sanse kuesoli kej tojuantij.

6. ¿Kenijkatsa tlanechikoli techpaleuia ma timoiljuikaj kej kinamiki?

⁶ Nojkia tijtlakakiliaj Jehová kema tiauij tlanechikoli. Tlaj nochipa tijchiuaj kampeka timonechikosej, uelis tijkakisej tlen tijnekij tijmatisej ipan se tlamachtili o kema tlanankilis se toikni (Prov. 27:17). Ma tikitakaj ipan tlake tlamantli uelis ouij tijmatisej timoiljuisej kej kinamiki uan tlake techpaleuis.

“¿KIITA JEHOVÁ TLEN NIJCHIUA?”

7. ¿Tlake uelis timoiljuiaj kemantika?

⁷ Uelis timotlajtlanijtok tlaj Jehová nelia kitekipachoua tlen mitspano. Tlaj amo timopatiita, uelis timoiljuia amo kema uelis timouampojchiuas iuaya Dios, katli kichijchijki nochi tlen onka. Tlanauatijketl David nojkia kiampa moiljuik. Kimatiyaya ouij kineltokas Jehová kitekipachoua tlen kinpano maseualmej, yeka kiijtok: “TOTEKO, ¿tlake topati titlakamej para toka timokuatotonia? ¿Tlake topati para tlauel ta titechpatiita?” (Sal. 144:3). Ma tikitakaj kenijkatsa Biblia kinankilia ni tlajtlanili.

8. Kej kiijtoua 1 Samuel 16:6, 7, 10-12, ¿tlake tlamantli kiita Jehová ipan se akajya?

⁸ Biblia kiijtoua Jehová kinpatiita katli moiljuiaj amo tlauel ininpati. Se neskayotl, kema Jehová kititlanki Samuel ma yaui ichaj Jesé para ma kitlapejpeni se ikone para ma tlanauati ipan Israel, Jesé kinpanoltik chikomej ikoneuaj iixpa Samuel pero amo kipanolti David, katli eliyaya teipaejketl. a Pero Jehová ya kitlapejpenijtoya (xijpoua 1 Samuel 16:6, 7, 10-12). ¿Kenke? Pampa kiitstoya iyolo uan kiitayaya eliyaya se piltelpokatsi katli kuali tlaneltokayaya.

9. ¿Kenke timotemachia Jehová nelnelia kitekipachoua tlen mitspano? (Nojkia xikita tlaixkopinkayotl).

 ⁹ Ximoiljui tlake tlamantli kichijtok Jehová tlen kinextia mitspatiita. Ya mitsiljuia tlen nelnelia mitspaleuia (Sal. 32:8). Kiampa kichiua pampa kuali mitsixmati (Sal. 139:1). Tlaj tijchiuas tlen mitsiljuia uan tikitas kenijkatsa mitspaleuia, mitspaleuis ximotemachi nelnelia kitekipachoua tlen mitspano (1 Crón. 28:9; Hech. 17:26, 27). Ya kiita kema tijchiua kampeka tijtekipanos uan nopa kuajkuali tlamantli tlen tijnextia (Jer. 17:10). Jehová kineki mouampojchiuas mouaya uan kineki xikita kej mouampo (1 Juan 4:19).

“¿NELIA KUALI TLEN NIJTLAPEJPENIK NIJCHIUAS?”

10. ¿Tlake ueliskia timotlajtlanisej kema timoiljuiaj ipan tlen tijtlapejpenijkej uejkajkia?

¹⁰ Kema pano xiuitl, uelis se akajya peuas motlajtlanis tlaj nelnelia kuali tlen kitlapejpenik. Uelis kikajki se kuali tekitl o amo kipeualtik se tekitl pampa kinejki mosentlalis kitekipanos Jehová. Pero uelis nama kinita se keskij katli mosentlalijkej tekitisej amo tleno kinpoloua. Yeka uelis motlajtlania: “¿Nelnelia kuali tlen nijchijki pampa nimosentlalik nijtekipanos Jehová? ¿O más kuali niitstoskia tlaj nijchijtoskia seyok tlamantli?”.

11. ¿Kenke tlauel mokuesouayaya katli kiijkuilok Salmo 73?

¹¹ Tlaj kemantika timotlajtlania ni tlamantli, tlauel mitspaleuis tlaj tikitas tlen kiyolmatki katli kiijkuilok Salmo 73. Ya kiitayaya kenijkatsa katli amo kitekipanouayayaj Jehová, nesiyaya amo mokokouayayaj, kuali itstoyaj uan tlapijpiayayaj (Sal. 73:3-5, 12). Nesiyaya tlauel kuali itstoyaj, yeka katli kiijkuilok nopa salmo moiljuiyaya san tlapik nochi tlen kichiuayaya  kema kitekipanouayaya Jehová. Se tonal mokuesouayaya pampa san moiljuijtinemiyaya ipan nopa tlamantli (Sal. 73:13, 14). ¿Tlake kipaleuik?

12. Salmo 73:16-18, ¿tlake kipaleuik katli kiijkuilok se salmo ma moiljui kej kinamiki?

¹² (Xijpoua Salmo 73:16-18). Katli kiijkuilok Salmo 73 yajki ipan teokali. Kema itstoya nopaya kipaleuik ma moiljui kej kinamiki. Uan kiitak maske sekij nesiyaya kuali itstoyaj, teipa tlauel tlaijiyouiskiaj. Kiitak kuali tlen kichijtoya pampa ya mosentlalijtoya kitekipanos Jehová uan nopa kipaleuik ma kipia tlaseuilistli uan mosentlalik nojua kiampa kichijtos (Sal. 73:23-28).

13. ¿Tlake mitspaleuis kuali xijyolmati? (Xikita tlaixkopinkayomej).

¹³ Ta nojkia uelis kuali tijyolmatis sanse kej katli kiijkuilok Salmo 73. ¿Tlake mitspaleuis? Ximoiljui ipan nochi nopa kuali tlamantli tlen tijpia uan kenijkatsa mitsita Jehová pampa tijtekipanoua. ¿Uan tlake kipiaj katli amo kitekipanouaj Jehová? San tlen onka ipan Tlaltipaktli. Inijuantij san mosentlaliaj ipan tlen uelis kipiasej ipan ni tonali uan amo ipan tlen uelis kiselisej teipa. Pero tojuantij tijmatij Jehová uelis techmakas miak tlamantli tlen tlauel kuali (Sal. 145:16). Ximoiljui ipan ni tlamantli: uelis nama amo kuali tiitstoskia tlaj amo tijtlapejpenijtoskia tijtekipanos Jehová. Pero kema tijtlapejpenia tijchiuas se tlamantli pampa tikiniknelia Jehová uan maseualmej, nelnelia kichiua xiyolpaki.

“¿NOJUA KUALI NIJTEKIPANOUA JEHOVÁ?”

14. ¿Tlake tlaouijkayotl kipiaj se keskij toikniuaj, uan tlake uelis motlajtlaniaj?

¹⁴ Se keskij Jehová itekipanojkauaj kinekij  más kuali kitekipanosej, pero amo uelij pampa ya uejueyij, mokokouaj o pampa amo kuali eltok inintlakayo. Nopa uelis kichiuas ma moiljuikaj Jehová amo kinpatiita, uan yeka motlajtlaniaj tlaj nojua uelis kuali kitekipanosej.

15. ¿Tlake kimatiyaya katli kiijkuilok Salmo 71?

¹⁵ Katli kiijkuilok Salmo 71 nojkia kiampa kiyolmatki, ya kiiljuik Jehová: “Amo xinechtlauelkaua ama kema [ . . . ] ayok nijpia fuerza” (Sal. 71:9, 18). Pero ya motemachiyaya tlaj kitekipanouayaya Jehová ika nochi iyolo, kimokuitlauiskia uan kipaleuiskia. Ya kiitak Jehová kinpatiita itekipanojkauaj katli kichiuaj kampeka kitekipanosej ika nochi ininyolo maske ayokmo ueli kichiuaj se keski tlamantli (Sal. 37:23-25).

16. ¿Kenke tikijtouaj Jehová nojua uelis kintekiuis toikniuaj katli uejueyij? (Salmo 92:12-15).

¹⁶ Tlaj ya tiueuejtixki o titenantixki, xijchiua kampeka timoitas kej Jehová mitsita. Maske ayokmo ueli titlatekipanoua kej achtouia, Jehová mitspaleuis nojua kuali xitlaneltoka (xijpoua Salmo 92:12-15). Ximosentlali ipan tlen kena ueli tijchiua. Uelis tikinyolchikauas sekinok kema kiitasej kuali timonejnemiltia uan mitstekipachoua tlen kinpano. Uelis tikinpouilis kenijkatsa Jehová mitspaleuijtok uan tikiniljuis nelnelia tijneki tikitas kema Dios kichiuas nochi tlen kitenkajtok. Uan tlauel tikinpaleuis sekinok tlaj timomaijtos ininpampa (1 Ped. 3:12). Maske amo sanse kej tiitstokej, nochi uelis tijtekipanosej Jehová uan tikinpaleuisej sekinok.

17. ¿Kenke moneki tijchiuasej kampeka amo tikitasej tlen sekinok kichiuaj ika tlen tojuantij tijchiuaj?

¹⁷ Tlaj tlauel timotekipachoua pampa amo ueli tijtekipanoua Jehová kej tijnekiskia, ximotemachi ya kipatiita nochi tlen ueli  tijchiua. Xijchiua kampeka amo tikitas tlen tijchiua ika tlen sekinok kichiuaj. ¿Kenke? Pampa Jehová amo kichiua nopa tlamantli (Gál. 6:4). Ma timoiljuikaj ipan tlen kichijkej omej siuamej: María kiikxipolok Jesús aceite tlen tlauel patiyo (Juan 12:3-5). Pero nopa siuatl katli ayokmo kipiayaya iueue, temakak ipan teokali ome piltomintsitsij tlen amo kipiayaya miak ipati (Luc. 21:1-4). Maske amo temakakej sanse tlamantli, Jesús kiijtok nopa omej siuamej tlauel kuali tlaneltokayayaj. Motata Jehová tlauel kipatiita kema kiita tijchiua se tlenijki ika nochi moyolo maske timoiljuia amo ipati o amo miak tlen tijmaka.

18. ¿Tlake mitspaleuis ximoiljui kej kinamiki? (Xikita recuadro “ Biblia mitspaleuis ximoiljui kej kinamiki”).

¹⁸ Kemantika tijmatij ouij timoiljuisej kej kinamiki. Pero kej tikitakej ipan ni tlamachtili, Biblia techpaleuia. Yeka, ximomachti Biblia pampa nopaya tijpantis tlen tijneki tijmatis uan tlen mitspaleuis ximotemachi. Jehová kiita tlen tijchiua, kipatiita pampa tijtekipanoua ika nochi moyolo uan kiijtojtok mitsteochiuas. Amo kema xikilkaua, Jehová kiniknelia uan kinmokuitlauia nochi itekipanojkauaj.