Nopa tlamapamitl eltoya kampa kalakiyayaj para asisej kampa Tlatsejtseloltik. ¿Keski iuexka eliyaya? Achtouia ipan Traducción del Nuevo Mundo 2 Crónicas 3:4:kiijtouayaya: “Tlamapamitl tlen eltoya kalixpa, ipatlajka eliyaya sanse kej nopa kali: eliyaya 20 codos uan iuejkapanka eliyaya 120 codos”. Uan ipan sekinok Biblias nojkia kiijtoua iuejkapanka nopa tlamapamitl eliyaya “120 codos”. ¡Nopa kiijtosneki iuejkapanka eliyaya 53 metros!

Pero ipan 2023 mopatlak tlen kiijtoua ni versículo ipan Traducción del Nuevo Mundo, uan nama kiijtoua: “Iuejkapanka eliyaya 20 codos”, ni kiijtosneki eliyaya se 9 metros. a Ma tikitakaj kenke kipatlakej tlen kiijtoua ni versículo.

Nopa tlapoualistli tlen 1 Reyes mouika ika 2 Crónicas 3:4 pero amo kiijtoua keski iuejkapanka eliyaya nopa tlamapamitl. Ipan 1 Reyes 6:3, Jeremías kiijtoua keski ipatlajka uan keski iueueyaka kipiayaya nopa tlamapamitl, pero amo kiijtoua keski iuejkapanka kipiayaya. Uan ipan capítulo 7 kiixtoma kenijkatsa eliyaya tlen eltoya ipan teokali: kej nopa tepospaila, matlaktli carretillas uan ome tlaketsali tlen cobre tlen kiketstoyaj kampa tlamapamitl (1 Rey. 7:15-37). Tlaj nopa tlamapamitl nelnelia iuejkapanka eliyaya 50 metros, uajka tlauel pankisaskia tlen nochi nopa teokali. Uajka, ¿kenke Jeremías amo tleno kiijtok? Kema panok se keski xiuitl, katli kiitstokej tlen uejkajkia panok, kiijtojkej nopa tlamapamitl amo eliyaya más uejkapantik que nopa teokali.

Ixtlamatinij kiijtouaj nopa tlapepecholi tlen nopa teokali amo kiijiyouijtoskia ietika se tlamapamitl tlen kipiaskia 120 codos o 53 metros iuejkapanka. Uejkajkia kema kichijchiuayayaj ika tetl o ika ladrillos se tepamitl tlen uejkapantik, kej kampa kalakiyayaj ipan nopa teokali tlen Egipto, kitsinpeualtiyayaj patlauak uan kikuatlamiltiyayaj pitsaktsi. Pero nopa teokali tlen Salomón kichijchijki amo kiampa eliyaya. Se keskij ixtlamatinij kiijtouaj itilajka nopa tlapepecholi eliyaya se 6 codos o 2.7 metros. Theodor Busink, katli kitlachilia kenijkatsa kichijchiuayayaj kali uejkajkia, kiijtoua: “Tlaj nelnelia kiampa eliyaya itilajka nopa tlapepecholi, uajka nopa tlamapamitl amo ueliskia kipias 120 codos iuejkapanka”.

Uelis mokuapolojkej kema kiixkopinkej tlen kiijtoua 2 Crónicas 3:4. Maske ipan se keski Biblias ni versículo kiijtoua “120 codos”, ipan sekinok Biblias kampa xitlauak kiixkopinkej kiijtoua “20 codos”, kej ipan nopa Códice alejandrino (tlen moijkuilok kipano 1,500 xiuitl) uan ipan Códice ambrosiano (tlen moijkuilok kipano 1,400 xiuitl). ¿Kenke mokuapolojkej? Pampa ipan tlajtoli hebreo cien uan codos moijkuiloua kejuak sanse. Yeka kema se akajya kimaixkopinki iTlajkuilol Dios, kiijkuilok “ciento veinte” uan amo “veinte codos”.

Techpaleuia kema tijmatij kenijkatsa eliyaya nopa teokali tlen Salomón kichijchijki. Pero más techpaleuia pampa nama tijmatij nopa teokali kiixnextia nopa teokali tlen tlatsejtseloltik (o tlen techpaleuia ma tijueyichiuakaj Jehová kej kinamiki). ¡Tlauel tiyolpakij pampa Jehová techtlanejtok nochi ma tijueyichiuakaj ipan nopa teokali! (Heb. 9:11-14; Apoc. 3:12; 7:9-17).