KEMA techmakaj se tlenijki, kinamiki techyololinis ma titetlaskamatilikaj. Jesús kinextik kenke tlauel ipati titetlaskamatilisej kema kinchikajki matlaktli tlakamej katli kipixtoyaj se kokolistli tlen amo kipixtoya pajtli ipan nopa tonali. Kema san “se tlen nopa tlakamej” mokuepki uan “tlauel kiueyichijtiualayaya toTeko”, Jesús kiijtok: “¿Axnikinchikajki matlaktli tlakamej? ¿Kanke itstokej nopa seyok chiknauij?” (Lucas 17:12-17). Ni kinextia kenijkatsa kemantika nima tikilkauaj tlen sekinok kichiuaj pampa techikneliaj o pampa kinekij techpaleuisej.

Kej tikitstokej, nopa tlaxtlauili tlen toTeotsij temakak nelia tlauel ipati. Amo aka techmakatok se tlamantli tlen tlauel ipati kej toTeotsij. Uajka, ¿kenijkatsa uelis tijnextisej tijtlaskamatiliaj tlen kichijki?

• Xikixmati katli techmakak nopa tlamantli. Nopa tlaxtlauili amo kichiuas nochi maseualmej ma itstokaj nochipa. Kej Jesús kiijtok, moneki kichiuasej  ni: “Inijuantij kipiaj yolistli yankuik para nochipa intla mitsixmatij ta tlen melauak tiDios uan axaka seyok, uan nojkia nechixmatij na niJesucristo tlen tinechtitlantok” (Juan 17:3). Tlaj tijmatiskia se tlakatl mitsmanauik kema tieliyaya tiokichpil, uelis tijnekiskia kuali tikixmatis uan tijmatis kenke mitsmanauik. ToTeotsij Jehová, katli temakak nopa tlaxtlauili pampa kinejki techmakixtis, kineki kuali ma tikixmatikaj uan ma timouampojchiuakaj iuaya. Biblia techiljuia: “Ximonechkauikaj kampa toTeko uan yajaya inmechnechkauis” (Santiago 4:8).

• Xitlaneltoka ipan nopa tlaxtlauili. “Tlaj se tlakatl kineltoka iKone toTeko, yajaya kipia yolistli para nochipa” (Juan 3:36). ¿Tlake kiijtosneki titlaneltokasej? Kiijtosneki tijchiuasej se tlenijki. Uajka tlaj titlaneltokaj ipan Jesús imikilis, tijnextisej ika tlen tijchiuasej (Santiago 2:17). ¿Tlake moneki tijchiuasej? Tlaj tijnekij tijselisej se tlamantli tlen techmakaj, moneki timomatlananasej uan tikitskisej. Nojkia kiampa pano ika nopa tlaxtlauili. Tlaj tijnekij tijnextisej tijseliaj tlen toTeotsij techmakak, moneki tijyekosej kenijkatsa kineki ma timonejnemiltikaj uan tijchiuasej tlen kipaktia. * Yeka, ximomaijto uan xikiljui toTeotsij ma mitstlapojpoljui uan ma mitspaleui tijpias kuali motlalnamikilis. Ximonechkaui ika toTeotsij, uan ximotemachi teipa nochipa tiitstos ika tlaseuilistli, ayokmo titlaijiyouis uan ayokmo tleno mitspolos tlaj titlaneltokas ipan nopa tlaxtlauili (Hebreos 11:1).

• Ximosentili kema moilnamikis Cristo imikilis. Jesús kinekiyaya ma tikilnamikikaj imikilis, yeka kiijtok: “Xijchiuakaj ya ni para inkineskayotisej innechilnamikij” (Lucas 22:19). Ni xiuitl, Jehová itlajtoltemakauaj kiilnamikisej Cristo imikilis ipan tonali martes, abril 11, kema ya kalaktos Tonati. Ipan nopa tlanechikoli tlen uejkauas nechka se hora, moixtomas tlake kiijtosneki Jesús imikilis uan kenijkatsa techpaleuia ipan ni tonali uan teipa. Se xiuijtlaya mosentilijkej se 20 millones ipan nochi Tlaltipaktli. Timitstlaneuij nojkia ximosentili uan kiampa tijnextis tijtlaskamatilia toTeotsij pampa techmakatok se tlamantli katli nelia tlauel ipati.