¿Kenijkatsa tiitstosej teipa?
¿Ipa timoiljuijtok tlake panos teipa? Biblia kiijtoua nechka tikitasej panos uejueyi tlamantli tlen amo kema tikitstokej, uan nopa kichiuaskia amo kuali ma tiitstokaj.
Jesús kiijtok kenijkatsa ueliskia tijmatisej kema ‘nechkatitos para toTeko tlanauatis ipan ni Tlaltipaktli’ (Lucas 21:31). Kiijtok panoskia uejueyi tlauilankayotl, mojmoliniskia tlali, onkaskia mayantli uan onkaskia kokolistli. Nochi nopa tlamantli pano ipan ni tonali (Lucas 21:10-17).
Biblia nojkia kiijtoua kenijkatsa amo kuali monejnemiltiskiaj maseualmej ipan “itlamia tonali” kema tekichijtosej katli nama tlanauatiaj. Xijpoua nopa tlajtolpanextili ipan 2 Timoteo 3:1-5. Tlen tijpojki kinextia kenijkatsa ipan ni tonali maseualmej kiampa monejnemiltiaj.
¿Tlake kiijtosneki nopa? Kiijtosneki toTeotsij iTlanauatijkayo nechka kipatlas nochi uan kichiuas kuali ma tiitstokaj (Lucas 21:36). Biblia kiijtoua toTeotsij mosentlalijtok kichiuas kuajkuali tlamantli ipan Tlaltipaktli uan nojkia kichiuas kuali ma itstokaj maseualmej. Ma tikitakaj se keski tlamantli.
SE KUALI TLANAUATIJKETL
Jesús kimakakej “tekiuejkayotl para tlanauatis uan miak tlatlepanitakayotl uan chikaualistli. Uan nochi tlakamej ipan nochi tlaltinij, uan tlakamej tlen kimatiyayaj nochi tlajtoli ipan Tlaltipaktli itstoyaj ipan itlanauatilis uan kiueyichijkej [...]. Uan itekiuejkayo para tlanauatis uejkauas para nochipa, uan itlanauatilis axkema panoteuas, niyon axaki uelis kitlamiltis” (DANIEL 7:14).
¿Tlake kiijtosneki? Nochi tiitstosej ika pakilistli kema toTeotsij iTlanauatijkayo tekichiuas pampa kitlalijtok iKone kej Tlanauatijketl.
AMO TIMOKOKOSEJ
“Ayok kiijtosej para mokokouaj” (ISAÍAS 33:24).
¿Tlake kiijtosneki? Nochipa kuali eltos totlakayo uan amo kema timokokosej, uan uelis tiitstosej nochipa.
ONKAS TLASEUILISTLI
“Yajaya kiketsa nochi tlateuijkayotl hasta kampa ontlantok nochi Tlaltipaktli” (SALMO 46:9).
¿Tlake kiijtosneki? Nochipa onkas tlaseuilistli uan amo kema sampa onkas tlauilankayotl.
IPAN TLALTIPAKTLI ITSTOSEJ MASEUALMEJ KATLI KUALMEJ
“Ayok uejkauas noja itstosej axkuajkualmej, [...]. Pero tlakamej tlen moiknonekij iixpa toTeko itstosej ipan nopa kuali tlali uan tlauel pakisej” (SALMO 37:10, 11).
¿Tlake kiijtosneki? Maseualmej katli kichiuaj tlen amo kuali ayokmo itstosej, san itstosej katli kineltokasej toTeotsij.
NOCHI TLALTIPAKTLI ELIS SE XOCHIMILI
“Ayok kichijchiuasej ininchaj para ipan itstos seyok, niyon ayok kitokasej xokomekatl para sekinok kikuasej” (ISAÍAS 65:21, 22).
¿Tlake kiijtosneki? Nochi Tlaltipaktli elis se xochimili. ToTeotsij kichiuas tlen tijtlajtlaniaj: ma mochiua tlen ya ipakilis ipan “Tlaltipaktli” (Mateo 6:10).
