Kej Jesús kiijtok, nopa kuali tlamachtili tlen toTeotsij iTlanauatijkayo momoyaua ipan nochi Tlaltipaktli (Mateo 24:14). Pilamochtsi Daniel kiijtoua toTeotsij kitlaliskia nopa Tlanauatijkayotl. Ipan capítulo 2 kiijtoua onkaskia uejueyi tlanauatijkayotl, peuaskia ipan Babilonia uan tlamiskia ipan ni tonali. Versículo 44 techiljuia tlake panos teipa:

“ToTeko Dios tlen itstok iluikak kiketsas se tlanauatilistli kampa itlakauaj tlen axaka uelis kisemanas, niyon axkikauas nopa itlanauatilis ika seyok. Uan axaki uelis kitlanis nopa tlanauatijketl tlen toTeko Dios kitlalis para nochipa. Itlanauatijkayo kintlamiltis nochi sekinok tlanauatianij uan inintlanauatijkayo, uan ayok tleno mokauas tlen ne sekinok. Nopa tlanauatilistli uan nopa tlanauatijketl tlen toTeko kitlalijtos uejkauas para nochipa”.

Ni uan sekinok tlajtolpanextili kiijtoua toTeotsij iTlanauatijkayo kintekipatlas nochi tlanauatianij uan kichiuas ma onka xitlaualistli uan tlaseuilistli ipan Tlaltipaktli. ¿Kenijkatsa tiitstosej kema tekichijtos nopa Tlanauatijkayotl? Ma tikitakaj se keski tlamantli tlen techtenkauilijtok toTeotsij uan tlen nechka moaxitis.

• AMO ONKAS TLAUILANKAYOTL

  Salmo 46:9: ToTeotsij “kiketsa nochi tlateuijkayotl hasta kampa ontlantok nochi Tlaltipaktli. Kipostektok nochi kuauitoli uan kixolejtok nochi tlamantli para ika tlateuisej tlakamej. Uan kintlatijtok nochi tlateuijka carrojmej”.

  ¿Timoiljuia kenijkatsa tiitstoskiaj tlaj kinpaleuiskiaj maseualmej ika nochi nopa tomij tlen kitekiuiaj ipan tlauilankayotl? ¿Kenijkatsa tiitstoskiaj tlaj ika nochi tlen maseualmej momachtijtokej kichiuaskiaj tlen kuali? Kema toTeotsij iTlanauatijkayo tekichiuas uan ayokmo onkas tlauilankayotl, uelis kuali tiitstosej.

• AMO ONKAS KOKOLISTLI

  Isaías 33:24: “Ayok kiijtosej para mokokouaj”.

  Ximoiljui kenijkatsa tiitstoskiaj tlaj amo aka kikokoskia iyolo, amo aka kipiaskia cáncer, diabetes o seyok kokolistli. Tlaj amo onkaskia nopa, uajka amo monekiskia pajtli yon hospitales. Kema nochi tielisej tixitlauakej, ayokmo timokokosej.

• ONKAS TLAKUALISTLI

  Salmo 72:16: “Onkas miak trigo ipan nochi nopa tlali, uan hasta nopa kuatinij tlen onka ipan tepetinij [...] temakasej inintlajka”.

  Ipan nochi Tlaltipaktli onkas tlauel miak tlakualistli, uan yeka nochi kipiasej tlen kikuasej. Ayokmo aka mayankamikis yon amo aka mokokos pampa nochi tijpiasej tlen ika timopanoltisej.

• AMO ONKAS TLAIJIYOUILISTLI YON MIKILISTLI

  Apocalipsis [Revelación] 21:4: “ToTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos pampa ya panotos nochi ni tlamantli tlen achtouia eltoya ipan nopa achtoui Tlaltipaktli”.

   Maseualmej ayokmo elisej tlajtlakolejkej uan nochipa itstosej ipan Tlaltipaktli, katli mochiuas se xochimili. Ya nopa techtenkauilijtok toTeotsij Jehová, katli tlauel techiknelia.

¿Timoiljuia amo nelia panos nochi ni kuajkuali tlamantli? Maske miakej kinpaktia tlen Biblia kiijtoua, moiljuiaj amo uelis nochipa tiitstosej. Kiampa moiljuiaj pampa amo kiixmatij se akajya katli nochipa itstok.

Maseualmej tlauel miak xiuitl tlaijiyouijtokej ika tlajtlakoli uan mikilistli, uan yeka moiljuiaj nochipa kiampa panotos. Maske moiljuiaj nopa, toTeotsij amo kinekiyaya kiampa ma itstokaj maseualmej.

ToTeotsij kineki ma timotemachikaj ipan tlen techtenkauilijtok, yeka kiijtok ni: “Notlajtol tlen kisa ipan nokamak, axmokuepa san tlapik, nochipa kipia itlajka. Kichiuas senkistok nochi tlen na nijneki kichiuas, uan kipias itlajka kampa ueli na nijtitlanis” (Isaías 55:11).

Biblia kiijtoua toTeotsij Jehová “axueli istlakati” (Tito 1:2). Nochi nopa kuajkuali tlamantli techtenkauilijtok toTeotsij, yeka kinamiki timotlajtlanisej: “¿Nelia uelis tiitstosej nochipa ipan se xochimili? ¿Tlake moneki tijchiuasej tlaj tijnekij tijselisej tlen toTeotsij kitenkajtok?”. Ipan nopa sekinok tlamachtili tikitas kenijkatsa monankilia ni tlajtlanili.