¿NELIA UELIS TIJTLAPEJPENIS KENIJKATSA TIITSTOS TEIPA? Se keskij maseualmej moiljuiaj toTeotsij kichiua ma kinpano se keski tlamantli ipan ininnemilis, uan sekinok kiijtouaj kejuak ya ijkuilijtok tlake kinpanos. Yeka, kema amo uelij kichiuaj tlen kinekij, moyolkokouaj uan kiijtouaj: “Ipa kiampa nechpanoskia”.

Sekinok tlauel mokuesouaj pampa pano tlen amo kuali uan pampa mochiua tlen amo xitlauak ipan Tlaltipaktli. Maske kinekiskiaj kuali itstosej, amo uelij pampa onka tlauilankayotl, itstokej miakej tlachtekinij, mokokouaj o pampa kintlasojsoljuilia se chikauak ajakatl o seyok tlamantli. Yeka, moiljuiaj san tlapik kichiuasej kampeka kuali itstosej.

Nochi tlen pano ueliskia kichiuas ma tijpatlakaj tlen tijnekij tijchiuasej (Eclesiastés 9:11). Maske kiampa techpano, nochi uelis tijtlapejpenisej kenijkatsa tiitstosej teipa. Uan Biblia kiijtoua toselti uelis tijtlapejpenisej nopa. ¿Kenke kiampa tikijtouaj?

Kema israeleuanij nechka kalakiskiaj ipan nopa tlali tlen kintenkauilijtoyaj, ika Moisés, toTeotsij kiniljuik: “Nijtlalijtok inmoixtla yolistli uan miki[li]stli, uan tlateochiualistli uan tlatelchiualistli para xijtlapejpenikaj. Uajka xijtlapejpenikaj yolistli para inmojuantij uan inmoixuiuaj nelnelia initstosej. Xijtlapejpenikaj xikiknelikaj inmoTeko Dios uan xijneltokilikaj” (Deuteronomio 30:15, 19, 20).

“Nijtlalijtok inmoixtla yolistli uan miki[li]stli, uan tlateochiualistli uan tlatelchiualistli para xijtlapejpenikaj. Uajka xijtlapejpenikaj yolistli” (Deuteronomio 30:19).

ToTeotsij kinmakixtik israeleuanij tlen Egipto, kiampa ayokmo kinchiualtiskiaj ma tekitikaj uan ueliskiaj itstosej ika pakilistli ipan nopa tlali tlen kinmakaskiaj. Tlaj kinekiyayaj nochipa kiampa itstosej, monekiyaya ‘kitlapejpenisej yolistli’. ¿Tlake kiijtosneki nopa? Monekiyaya kiiknelisej toTeotsij, kitlakakilisej uan kuali mouikasej iuaya.

Ta nojkia moneki tijtlapejpenis tlake tijchiuas, pampa tlen nama tijtlapejpenis uelis kichiuas xiitsto nochipa o amo. Tlaj tikiknelis toTeotsij, tijtlakakilis uan kuali timouikas iuaya, ‘tijtlapejpenis nemilistli’ o tiitstos nochipa ipan se xochimili. ¿Kenijkatsa uelis tikiknelis toTeotsij, tijtlakakilis uan kuali timouikas iuaya?

Apóstol Juan kiijkuilok toTeotsij “yajaya [eli] teiknelijkayotl” pampa nochipa kinextia nopa kuali tlamantli (1 Juan 4:8). Jesús kuali kimajtoya nopa, yeka kema kitlajtlanijkej tlake tlanauatili eliyaya tlauel ipati, kiijtok: “Xikikneli toTeko Dios ika nochi moyolo, uan ika nochi moalma, uan ika nochi motlalnamikilis” (Mateo 22:37). Uajka, timouampojchiuaj iuaya toTeotsij pampa tikikneliaj uan amo pampa tijmakasij o pampa tijmatij kiampa moneki tijchiuasej. Uajka, ¿kenke moneki tikiknelisej?

Jehová kiniknelia maseualmej kej tetajmej kinikneliaj ininkoneuaj. Maske tetajmej tlajtlakolejkej, kichiuaj kampeka kinmachtisej ininkoneuaj, kinyolchikauasej, kinpaleuisej uan kintlakaualtisej ika tlaiknelili pampa kinekij ma yolpakikaj uan nochipa kuali ma itstokaj. ¿Uan tlake kinekij tetajmej ma kichiuakaj ininkoneuaj? Kinekij ma kiniknelikaj, ma kinneltokakaj uan ma kikuamachilikaj nochi tlen kiniljuiaj kinpaleuis kuali ma itstokaj. ToTata, katli itstok iluikak, amo tlajtlakole, uan nojkia kineki ma tikiknelikaj uan ma tijtlaskamatilikaj nochi tlen techmakatok.

Kema Biblia moijkuilok, motekiuik nopa tlajtoli xijtlakakili uan miakpa kiijtosneki “xijneltoka”. Kema se tetaj kineki ikone ma kineltoka, kiiljuia: “Xinechtlakakili”. Uajka, tijtlakakilisej toTeotsij kiijtosneki tijmatisej tlake kineki ma tijchiuakaj uan tijneltokasej. Ipan ni tonali, toTeotsij amo kinnojnotsa maseualmej, yeka, tlaj tijnekij tijtlakakilisej, moneki tijpouasej Biblia uan tijchiuasej tlen nopaya kiijtoua (1 Juan 5:3).

Jesús kinekiyaya kinextis tlauel moneki tijtlakakilisej toTeotsij, yeka kiijtok: “Axsan pantsi moneki para itstosej tlakamej. Nojkia moneki tijneltokilijtiasej nochi itlajtol toTeko” (Mateo 4:4). Maske tlakualistli techpaleuia, timomachtisej toTeotsij iTlajtol nojua tlauel techpaleuis. ¿Kenke? Tlanauatijketl Salomón kiijtok: “Tlalnamikistli nelia tepaleuia ipan miak tlamantli iuikal keja tomij. Pero tlalnamikistli noja más tepaleuia pampa se tlen tlalnamiki uelis kimanauis iyolis” (Eclesiastés 7:12). Tlaj tijpiasej tlalnamikilistli uan tijmatisej tlake kineki toTeotsij ma tijchiuakaj, uelis techpaleuis kuali ma tiitstokaj nama uan ma tijtlapejpenikaj tlen techpaleuis nochipa tiitstosej teipa.

Ipan nopa seyok tlamachtili tlen tikitakej, tikilnamijkej se neskayotl tlen Jesús kitekiuik, ya kiijtok: “Nopa kaltemitl pitsaktsi uan ojtli tlen amo patlauak teuika kampa nemilistli; uan amo miakej kiasij” (Mateo 7:13, 14, TNM). Tlaj tijnekij tinemisej ipan nopa ojtli, moneki se akajya ma techyakana. Kiampa uelis tiasitij kampa tijnekij: kampa tiitstosej nochipa. Yeka, moneki kuali timouikasej iuaya toTeotsij (Salmo 16:8). ¿Kenijkatsa uelis tijchiuasej?

Mojmostla moneki tijchiuasej miak tlamantli, uan sekinok tlamantli san techpaktiskia tijchiuasej. Kemantika tlauel timotekiuijtokej o timotonalpolouaj uan yeka amo nochipa timoiljuiaj tlake kineki toTeotsij ma tijchiuakaj. Biblia techiljuia: “Ximomokuitlauikaj keja inmonejnemiltiaj. Amo xinemikaj keja inijuantij tlen uiuitikej. Xinemikaj keja tlalnamikinij [...]. Amo ximotonalpolokaj, pero mojmostla xitekitikaj para toTeko pampa ipan ni tonali tlakamej kichiuaj miak tlamantli tlen fiero” (Efesios 5:15, 16). Uajka, kuali timouikasej iuaya toTeotsij kiijtosneki tlauel tijpatiitasej timouampojchiuasej iuaya (Mateo 6:33).

Maske amo uelis tijpatlas tlen mitspanotok, kena uelis tijtlapejpenis tlen mitspaleuis ta uan mochampoyouaj kuali xiitstokaj teipa. Biblia techmachtia toTata Jehová tlauel techiknelia uan techiljuia tlake moneki tijchiuasej. Xikita tlen kiijtok tlajtolpanextijketl Miqueas:

“ToTeko techiljuijtok nopa tlen kuali uan tlen kineki ma tijchiuakaj. San kineki ma tijchiuakaj tlen xitlauak, ma titetlasojtlakaj uan ma tinejnemikaj iuaya uan ma timoechkapanokaj iixpa” (Miqueas 6:8).

Uajka, ¿tijneltokas toTeotsij? Tlaj tijchiuas tlen toTeotsij mitsiljuia tijselis miak tlateochiualistli tlen amo kema tlamis uan tlen san kiselisej iuampoyouaj. Uajka, san ta tijtlapejpenis tlake tijchiuas.