Kiampa kipanok Sally, * katli eua Estados Unidos. Ya kipolok miak tlamantli tlen kipixtoya pampa se huracán kitlasojsoljuilik. Ya kiijtoua: “Nimoiljuiyaya ayokmo ueliskia nikijiyouis nochi nopa kuesoli. Miak tonali nijmatiyaya nopa tekipacholi nechtlaniskia”.

Nojkia tlauel timoyolkokouaj kema miki se akajya katli tlauel tikikneliaj. Janice, katli eua Australia, kiijtoua: “Kema mijkej omej nokoneuaj, nijmatki kejuak nechkotonilijkej noyolo uan monejki nijchiuas kampeka kejuak sampa nijtlatskiltis uan kiampa kuali nijyolmatis. Miakpa nikiljuiyaya toTeotsij: ‘ToTeko, ¡ayokmo nikijiyouia! San nijnekiskia nikochis uan ayokmo niisas’”.

Daniel nojkia tlauel mokuesok kema isiua kiixpanok. Ya kiijtoua: “Kema nosiua nechiljuik nechkajkayajtoya ika seyok tlakatl, nijmatki kejuak nechkechilik se tlenijki ipan noyolo. Pejki niyolkuajkualo, kejuak miakpa nechkejkechiliyayaj se tlenijki, uan kiampa nechpanok miak metstli”.

Tlen uala ipan ni pilamochtsi Tlen Tematiltia mitspaleuis xiitsto ika pakilistli maske uelis mitspanok se tlen ni tlamantli:

• Kema se tlenijki tetlasojsoljuilia

• Kema miki se akajya katli tlauel tikiknelia

• Kema moueue o mosiua mitsixpano

• Kema tijpia se kokolistli tlen amo kipia pajtli

• Kema timoiljuia tlamantli tlen amo kuali

Achtoui ma tikitakaj tlake uelis tijchiuasej kema se tlenijki techtlasojsoljuilia.