Ximoiljui kenijkatsa tlauel moikneliaj omej iknimej katli sansejko tlakatkej uan sanse tlachiaj. Nopa iknimej kikuamachiliaj tlen inijuantij kiyolmatij. Nancy Segal, se siuatl katli tlayakana kampa momachtiaj kenijkatsa elij katli sanse tlachiaj uan katli kipia se iikni katli tlachia sanse kej ya, kiijtoua katli sansejko tlakatij uan sanse tlachiaj “amo moneki moixtomilisej se keski tlamantli pampa nopa omej nelia kuali kikuamachiliaj tlen kiyolmatij o kinpano”. Se siuatl katli kipia se iikni katli sanse tlachia kej ya, kiijtok: “Nelia tlauel kuali timoixmatij”.

¿Kenke tlauel kuali mokuamachiliaj? Maske kej kiniskaltiaj uan kampa itstokej kinpaleuia, ixtlamatinij kiitstokej inijuantij tlauel kuali mokuamachiliaj pampa miak tlamantli tlen kipiaj ipan inintlakayo eli sanse.

XIMOILJUI NI: ToTeotsij kichijchijki nochi tlen tijpiaj ipan totlakayo, yeka san ya tlauel kuali kikuamachilia nochi tlen tijyolmatij. Yeka, David kiijtok: “Tijmotskiltik sejse tlamantli tlen nijpia, kema niitstoya iijtiko nonana. Ta tijtlachiliyaya kema na nipejki nimoskaltia nopano ipan iijtiko nonana, nelnimotlatijtoya tlen nochi sekinok [...;] Moixteyoljuaj kiitakej kema pejki nimoskaltia iijtiko nonana, uan ipan moamoch ijkuilijtoya kenijkatsa eliskia notlakayo” (Salmo 139:13, 15; 139: 16, TNM). ToTeotsij amo san kiixmati uan kikuamachilia kenijkatsa tielij, nojkia kuali kimati nochi tlamantli tlen techpanotok. Yeka, temachtli tijmatij san ya tlauel kuali kikuamachilia nochi tlen tijyolmatij.

David momaijtok: “ToTeko, ta tinechyoltlachilijtok uan tijmati nochi tlen na. Ta kuali tijmati intla nimoseuia o nimoketsa. Uan kema niitstok uejka, ta tijmati tlachke nijpixtok ipan notlalnamikilis. Ta toTeko, tijmati tlachke nikijtos hasta kema aya nikama[nal]ti” (Salmo 139:1, 2, 4). Jehová kuali kimati tlake tijpiaj toyolijtik uan tlake tijnekij o timosentlaliaj tijchiuasej (1 Samuel 16:6, 7; 1 Crónicas 28:9). ¿Tlake techmachtia ni tlamantli tlen Jehová?

Techmachtia maske kema timomaijtouaj amo tijmatij kenijkatsa tikijtosej se keski tlamantli, Jehová ya kimati nochi tlen timoiljuiaj o tijyolmatij. Ya kuali kiita tlen tijchiuaj uan nojkia kikuamachilia kenke kiampa tijchiuaj. Uan nojkia ueli kimati tlake tijchiuaskiaj tlaj mopatlaskia kej tiitstokej. Uajka, pampa toTeotsij kichijki ma titeiknelikaj, temachtli tijmatij ya tlauel kineki kimatis uan kikuamachilis tlen timoyoliljuiaj uan kenke tijnekij tijchiuasej se tlenijki (1 Juan 4:7-10).

 Biblia techiljuia:

• “Pampa toTeko kinmokuitlauia tlen kichiuaj tlen xitlauak iixtla, uan kinkaki kema momaijtouaj. Pero toTeko moikankuepa ika tlen kichiuaj tlen axkuali” (1 PEDRO 3:12).

• ToTeotsij techtenkauilia: “Na nimitstlalnamiktis uan nimitsnextilis nopa ojtli tlen más kuali, tlen moneki ipan timonejnemiltis. Na [nimitstlajtolmakas] uan nimitstlachilijtos” (SALMO 32:8).

¿Uelis techpaleuis ma tikixnamikikaj tlaouijkayotl pampa tijmatij toTeotsij kikuamachilia tlen tijyolmatij? Ximoiljui ipan Anna, katli eua Nigeria. Ya kiijtoua: “Tlauel amo kuali nijyolmatiyaya, yeka nimoiljuiyaya tlaj nojua kinamikiyaya niitstos. Kema kiijtojkej nijpixtoya cáncer ipan nochichi, noueue ya miktoya uan nosiuapil itstoya ipan hospital pampa kipixtoya hidrocefalia (kema ipan inintsonteko yoli kejuak miak atl). Tepajtianij nechtejkej uan nechchiuilijkej quimioterapia uan radioterapia. Nelia tlauel ouij nijmatki pampa nosiuapil nojkia itstoya ipan hospital”.

¿Tlake kipaleuik Anna kema kipanok nopa? “Nechpaktiyaya nimoyoliljuis ipan se keski textos, kej Filipenses 4:6, 7, kampa kiijtoua ‘nopa tlaseuilistliʼ tlen toTeotsij temaka ‘kiyaualtsakua toyolo uan totlalnamikilis’. Nochipa kema nikilnamikiyaya ni tlajtoli, nijmatiyaya kenijkatsa niitstoya Jehová inechka. Nijmajtoya maske na amo nijkuamachiliyaya se keski tlamantli tlen nijyolmatiyaya, Jehová kena kuali kikuamachiliyaya. Uan nojkia tlauel nechyolchikajkej nouampoyouaj katli nojkia kineltokaj tlen na nijneltoka.

”Maske nojua nimokokoua, ayokmo nechpanotok kej achtouia. Tijchiuaj kampeka tiyolpakisej maske tijpiaj kuesoli, pampa Jehová nochipa itstok touaya. Santiago 5:11 kiijtoua: ‘Tijmatij yajuantij ama nelia pakij pampa kiijiyouijkej tlen kinpanok. Ya inkimatij keja Job tlaijiyouik. Uan inkimatij teipa toTeko nelia kichiuilik tlen kuali pampa toTeko tlauel teiknelia uan tetlasojtla’”. Jehová kuali kikuamachiliyaya nochi nopa kuesoli tlen Job kipixki, uan uelis timotemachisej nojkia kuali kimachilia tlen tojuantij techpano.