Tlen Biblia tetlajtolmaka: “Amo xikixtokakaj inkipiasej miak tomij. Más kuali xipakikaj ika tlen inkipiaj” (Hebreos 13:5).

Ipan ni tonali, maseualmej moiljuiaj moneki kipiasej miak tlamantli. Maske kiampa moiljuiaj, Biblia kiijtoua uelis tiyolpakisej san ika tlamantli tlen tijpiaj. ¿Kenijkatsa uelis tijchiuasej?

Amo ma tikiknelikaj tomij. Katli mosentlaliaj kipiasej miak tomij, peuaj mokokouaj, ayokmo itstokej ininuaya ininchampoyouaj yon ininuampoyouaj, ayokmo moyakanaj ika kuajkuali tlamantli yon mopatiitaj (1 Timoteo 6:10). ¡Tlauel amo kuali itstokej katli mosentlaliaj tlatominpiasej! Nojkia, katli “tlauel kineki kipias tomij, axkema kipias hasta ayok kinekis” (Eclesiastés 5:10).

Maseualmej tlauel ininpati uan amo tlamantli tlen tijpiaj. Maske onka tlamantli tlen tlauel techpaleuia, nopa amo uelis techiknelis pampa san maseualmej uelij teikneliaj. Uan tlaj tijpiasej se kuali touampo nelia tiyolpakisej (Proverbios 17:17).

Tlen Biblia tetlajtolmaka: “Yolpakilistli tepaleuia keja eliskia se kuali pajtli” (Proverbios 17:22).

Tlaj tiyolpakisej tlauel techpaleuis kema tijpiasej se kokolistli. Uan, ¿kenijkatsa uelis tiyolpakisej maske timokokouaj?

Ma titetlaskamatilikaj. Tlaj nochipa timokuesouaj pampa timokokouaj, mojmostla amo kuali tiitstosej (Proverbios 15:15). Biblia techiljuia tlake uelis tijchiuasej: “Nochipa ximotlaskamatikaj” (Colosenses 3:15). Moneki tijpatiitasej nochi kuajkuali tlamantli tlen techpano ipan tonemilis. Kej kema tikitaj kenijkatsa kalaki tonati, kema techasi ajakatl o kema ixuetska se akajya katli tikikneliaj, ni tlamantli uelis kichiuas ma tiyolpakikaj.

Ma tikinpaleuikaj sekinok. “Más pakilistli kiselia tlen temaka se tlenijki, uan axkeja tlen kiselia”, maske timokokouaj uelis tijchiuasej ni tlamantli (Hechos 20:35). Kema sekinok techtlaskamatiliaj pampa tikinpaleuiaj, tlauel tiyolpakij uan amo timoseniljuijtokej ipan tokuesoljuaj. Tlaj tikinpaleuisej sekinok kichiuas kuali ma tijyolmatikaj.

Tlen Biblia tetlajtolmaka: Xijtlapejpenikaj “tlen nelia kuali [o ipati]” (Filipenses 1:10).

Tlaj katli mosenkajtokej amo kichiuaj se keski tlamantli sansejko, teipa ayokmo kuali itstosej. Yeka, tlauel moneki ma kipatiitakaj itstosej sansejko, ma kiitakaj kej se tlamantli tlen tlauel ipati.

Sansejko xijchiuakaj se keski tlamantli. Biblia kiijtoua “achi más kuali kema omej tlakamej tekitij sansejko uan axtekiti setsi iselti” (Eclesiastés 4:9). Amo moselti xijchiua tlamantli tlen mitspaktia, tlauel kuali tlaj timoiljuis tlake tlamantli uelis inkichiuasej sansejko. Kej intlakualchiuasej, inyasej inpaxalotij, incafenisej o inmoyolpakiltisej ika sekinok tlamantli.

Xijnextikaj inmoikneliaj. Biblia kiijtoua katli mosenkajtokej moneki moiknelisej uan motlepanitasej (Efesios 5:28, 33). Tlauel inmechpaleuis tlaj inmoixuetskilisej, inmonajnauasej uan inmomakasej se tlamantli maske amo patiyo. Uan xikilnamikikaj san moneki inmotekasej iuaya inmoueue o inmosiua (Hebreos 13:4).